رفيس قسنطيني على أصول....أصول....أصوله

nihal159 · 2017-10-22, 13:30

السلام عليكم أخوتي، ليوم جتلكم أكلة تقليدية بنييييينة بزاف و نعملوها بكثرة في أفراحنا فالشرق الجزائري وهي الرفيس.
أنا استعملت هذا المنتوج لي يتباع في المحلات لي تبيع مستلزمات الحلويات أو ممكن تلقاوه فلي سيبيرات.
لي ماقدرتش تتحصل عليه ممكن تبداالوصفة من الصفر ههههههه
المقادير عبارة عن3 كيلات سميد متوسط مع كيلة زيت، نخلط المكونات جيدا حتى يتبسس السميد مليح ثم نشمخ بخليط من الماء و ماء الزهر و نلم بأطراف الأصابع من دون عجن حتى نتحصل على عجين.
نفرد العجين في صواني بسمك واحد سنتيمتر، لازم العجين مايكونش غليظ، و نذخلو للفرن يطيب حتى نتحصلو على اللون الاحمر، لازم يطيب مليح، بعد مايبرد، نهرسوه بالمهراس او الروبو حتى نتحصل عليه كما الكسكس.
أنااستعملت هذي النوعية

ندير كمية فالكسكاس و نحطها تفور الفورة الاولى.

بعد مايفور الرفيس، نفرغو فالقصعة و نرشو بخليط من الحليب و ماء الزهر بكميات متساوية،
نرش بالشوية مع التحريك بأطراف الأصابع ثم نخليه يتشرب شوية، من بعد نرجع ليه و نحركو باطراف الاصابع باش هكذا الكتل لكل يتفتحو.
نضيف عليه شوية زبدة ذايبة
و ندلكو باش مايتلاصقش، و نرجعو فالكسكاس يفور للمرة التانية
لما يفور الرفيس، نرجعو للقصعة و نرشو بخليط الماء و ماءالزهر و نحرك باطراف الاصابع، نخليه يتشرب و نزيد ندلكو بشوية زبدة و نرجعو يفور للمرة الثالثة.
لما يفور الرفيس مليح، نرجعو للقصعة و نرشو بخليط الماء و ماء الزهر و نخليه يتشرب مليح، ثم نضيفلو كمية من السكر العادي و نخلط جيدا.

و نرجعو يفور للمرة الرابعة و الاخيرة، و هكذا السكر يذوب و جينا الرفيس معسل

وصلنا لوقت الصح هههههه وقت التقديم، بعد مايفور الرفيس للمرة الرابعة نخلوه يبرد شوية لانه يؤكل دافئ.
ناخدو زوج كيلات تاع رفيس مع كيلة تاع مكسرات، عادة نستعملو اللوز فالأفراح، أنا ليوم استعملت خليط من الجوز و الكاوكاو، نخلطهم جيدا و نسقيهم بخليط من الزبدة الذايبة و العسل باش يجي حلو.

و هذا شكلو النهائي، زينتو بالسكر الناعم و الجوز، و قدمتهولكم مع اللبن و العسل الحر.

كانت هذه هذيتي لكل رواد منتدى الجلفة، وخاصة حراير الكوزينة، في الاخير ارجو التقييم و دعوة الخير

فردوس الرحمان · 2017-10-22, 13:41

نهال ، راني اول وحدة نرد ، كملي الموضوع وابعثيلي طبسي نموت عليه ،. مام حنا نديروه في الافراح والمناسبات ،. اخر مرة شفتو في حفلة تاع بكالوريا في الصيف، مي ماكليتش بقا في قلبي ، تعرفي الوسواس لي فيا ، هدا ك المنتوج كون نلقاه كون غدوة نديرو ، يخي عاند ومتحسدش

nihal159 · 2017-10-22, 13:43

كون نصيب نبعثلك طبسي تبردي السخفة لي بقات في قلبك ههههههههه درك نكمّل الموضوع و قوليلي رايك فالشكل النهائي

سحابة باردة · 2017-10-22, 13:49

كملي نهولة روعة وشرح ساهل وللأسف هذاك المنتوج مكانش عندنا

فردوس الرحمان · 2017-10-22, 13:52

سحابة رانا نشجعو في المنتخب الوطني ، ههههه كي نتلاقاو في المول ، جيبلنا نهولة الحبوبة هداك المنتوج ماتخافيش ،. فعلا شهاتنا اليوم نهال

أم فاطمه · 2017-10-22, 14:10

السلام عليكم اخواتي نهال وفردوس وسحابة سبقتوني وتقسمتو الرفيس بيناتكم بدون ماتتفكرو اختكم ام فاطمة ههههههههه

اهلا بي نهال يعطيك الصحة فحلة تاع الصح حنا معدناش في تلمسان حناا الرفيس نطيبو مبسس ونفتوه ثم نضفوله الزبدة والتمر ونخلطوه مليح ونقدموه

مزيد من التألق تحياتي

فردوس الرحمان · 2017-10-22, 14:23

واو روعة ،. كلمة روعة قليل عليه راكي ابدعت ،. والله تحفة ،. شرح كافي وموفق ،. أكيد نجربو في القريب العاجل ،. ربي يعطيك ما. تتمناي ،. نهولة الحبوبة

nihal159 · 2017-10-22, 14:38

اقتباس:

المشاركة الأصلية كتبت بواسطة فردوس الرحمان

واو روعة ،. كلمة روعة قليل عليه راكي ابدعت ،. والله تحفة ،. شرح كافي وموفق ،. أكيد نجربو في القريب العاجل ،. ربي يعطيك ما. تتمناي ،. نهولة الحبوبة

الله يسلمك حبيبتي فردوس؛ إن شاء الله تجربيه و أكيد يعجبك؛ مرورك أسعدني

nihal159 · 2017-10-22, 14:39

اقتباس:

المشاركة الأصلية كتبت بواسطة أم فاطمه

السلام عليكم اخواتي نهال وفردوس وسحابة سبقتوني وتقسمتو الرفيس بيناتكم بدون ماتتفكرو اختكم ام فاطمة ههههههههه

اهلا بي نهال يعطيك الصحة فحلة تاع الصح حنا معدناش في تلمسان حناا الرفيس نطيبو مبسس ونفتوه ثم نضفوله الزبدة والتمر ونخلطوه مليح ونقدموه

مزيد من التألق تحياتي

أهلين بالغالية تاج روسنا؛ خالتي أم فاطمة؛ شكرا لتشجيعك؛ مرورك أسعدني؛ إن شاء الله نجرب الرفيس تاعكم و نحطو فالكوزينة باش تعطيني رايك

سحابة باردة · 2017-10-22, 15:09

ماشالله موضوع كافي ووافي لطبق أصيل يستحق التثبيت راكي تحيي في التراث شوقتيني نذوقوا
أن شالله نقدر ننجح فيه كيفك
أم فاطمة حتى حنا مبسس ونفتوه مع العسل والزبدة بصحتنا الرفيس اليوم

nihal159 · 2017-10-22, 15:14

الله يسلمك سحابة على تشجيعك لي؛ شكرا؛ أسعدني مرورك.
باش نزيد نشهيك ملييييييييح: أتخيلي طعم المكسرات مع نكهة ماء الزهر و طعم العسل الحر و بعد الإنفجار اللذيذ للنكهات في فمك تلّحقي اللبن البارد و المنعش ههههههههههههههههههههه