رايكم من فضلكم

[مشكلتي]

وش رايكم في زوج حج بيت الله الحرام و يتغاضى على ظلم اهلو لزوجتو...
و اهلو ما يكتفيوش بسب زوجتو برك بل حتى اهلها و هو يقوللها انت الظالمة و ميكلمهاش بالاسابيع بل حتى بالشهور و كي تحتاج حاجة قضيان للدار يقوللها اكتبي في ورقة ايعقل هذا....صبري بدا ينفذ.
الطلاق بالنسبة للزوج عسير بحكم ضعف الدخل و الاولاد تسمى نبقى انا نخلص و نشد في صدري.
انا مرانيش حابة يواجههم لا حبيتو برك بيناتنا يقولي متديريش عليهم يعني نحس و لو 1 في المءة راهو شايف الظلم ماشي عافس عليه و يقول لا .

[محمد جديدي التبسي]

هذا هو حال كثير من الرجال ولا حل لك الا الصبر والدعاء
ان كان زوجك اهلا للحوار والنقاش وتقبل النصح فحاوريه واوضحي ما تريدين منه
هناك من هي في وضع أسوأ من وضعك تتعرض للشتم والضرب يوميا ولا تطلب الطلاق
في الحياة الزوجية لازم ما تعمريش راسك وتتعلمي داوي جراحك بنفسك وتقوي قلبك
والا فان كل انواع الامراض النفسية وامراض القلب راح تقتلك...ربي يفتح عليك

[طاعة زوجي ..]

السّلام عليكم ورحمة الله وبركاته
والله ياأخية مجتمعنا مليء بالتناقضات وبمفاهيم خاطئة جاهلة عشعشت في نفوس البعض حتى خيل لأصحابها أنها صواب وأن لا أحد على حق سواهم.
لن أقول اصبري فأنت ادرى بضروفك، لكن فليكن صبرك لوجه الله فإن الله مع الصابرين. لا لأجل عائلتك أو أبنائك أو مصوغات أخرى. كي لايأتي يوم وتقولي صبرت لأجل زوجي ولم يقدر ذلك. أو لأجل أبنائي فلربما لن تري منهم شيئا لاقدر الله. هي الدنيا فلنتوقع منها أي شيء.
لكن الله سبحانه وتعالى لايضيع أجر عامل في الدنيا والآخرة. وعليك بسهام الليل فإنها لاتخطئ. وادعي الله في صلاتك وأكثري من الإستغفار.
عدا ذلك لن نستطيع نصحك. للأسف قلما نجد من يتقبل الحوار وإن رأيت منه لينا فحاوريه لعل وعسى تهدأ أحوالكم.
نحن النساء كلمة بسيطة ترضينا. نحتاج إلى من يربت على أكتافنا، وقت ألمنا وحزننا لكن هيهات. لاأحد يربت على كتفك غير يدك. لذا أحبي نفسك اشفقي عليها ولا تحمليها فوق طاقتها. فالضغط لا محالة يولد الإنفجار حتى عندنا نحن البشر. فليست قاعدة فيزيائية فقط.
أعانك الله وفرج همك ورزقك من خير الدنيا والآخرة.

[زبدة ذايبة]

بما أن زوجك مايدافعش عليك دافعي على روحك.

هو مايقدرش يواجههم ويخاف منهم.

وانت تجيه ساهلة باش يعاقبك.

وزيد يحب يوري قدام دارهم راكي ظالمة.

من خلال خصامه الدائم معك.

وهوما كي يشوفوه هكذا تهوني عندهم

وتجيهم ساهلة.

حاولي تبرقي عينيك شوية .

كاين مشاكل مانسحقوش نوصلوها للرجال.

نفريوها بيناتنا نحن النساء.

على هذا لازم يا أختي تعرفي كيفاش تمشي معاهم.

راكي في أرض معركة لازم تخرجي منتصرة.

وعوض ماتشكي انت وتبكي انت خليهم هما اللي يبكو.

مارانيش نحرش فيك عليهم باش تظلميهم.

الظلم ظلمات يوم القيامة.

في بعض المرات نكونو حنايا السبب في تطاول الناس علينا.

بسبب سلبيتنا الدائمة.

حاولي توقفي على رجليك

راكي أم ومايليقش يعاملوك بهذ الطريقة.

بدلي أسلوبك وشوفي.

ماراكيش ملزمة تحبيهم وتصبحي عليهم كل صباح.

وطيبي وتديلهم و........

خلي شوية مسافة بينك وبينهم

لازم يكون عندك مسافة الأمان.

وهذي تكون للطوارىء.

مهما حصل وحدث واحد مايقدر يدنى ليك.

حتى راجلك مايقدرش.

إذا حافظتي على هذ المسافة تريحي أيما راحة.

واحد ما يتعدى الحد اللي بينك وبينه.

لكن من خلال كتابتك يبان تخلط الحابل بالنابل.

وانقلبت الأمور عليك.

ماتسناي من حتى واحد يعطيك الحق.

لازم انت اللي تعطيه لروحك.

وانت اللي تفرضيه.

انت ماشي قادرة تواجهيهم

راجلك ماشي قادر يواجههم

والنتيجة

دايرين رايهم فيك.

وراجلك من ضعفه يحب يحصلها فيك.

باش يرتاح من تأنيب الصمير تجاهك.

ويكذب على روحو ويقنعها بأنك ظالمة لازم تتعاقبي.

ردي ليك بناءا على أنك مظلومة حقيقة.

غيري من تصرفاتك ومن تعاملك معاهم.

ماراكيش بنتهم اللي يخافو ربي فيك.

راكي بنت الناس ماعندهم حتى علاقة بيك

ماعدا أنك زوجة إبن لو كان يحب يبدلك واحد مايقلوا علاش !!!!!!!!!.

هذا وش عندي ليك

ان شاء الله نكون أجبتك.

ربي يوفقك ويصلح حالك.

[hananenour]

عليك بالصبر يا اختيظ* كان الله في عونك

[hananenour]

عليك بالصبر يا اختي - كان الله في عونك

[الداهية كيداهن]

عن تجربة أنصحك بأن لا تضعي نفسك في كفة و أهل زوجك في كفة أخرى لأنك ستكونين الخاسرة. أنصح بالتفكير في كيفية الإستقلال عنهم و ليس قطعهم، إن تعذر الأمر أكثري من الإستغفار و التذكر أن هذه الدنيا فانية و كل من ظلم سيلقى عقابه عاجلا أم آجلا، ربي يفرج عليك.

[مومي23]

اختي اسالك سؤالا واحدا اجيبي عليه بصراحة
هل يحبك هل يحترمك هل يقدرك
هل يحترم اهلك
ادا الجواب نعم
اقول لك
زوجك شايف الظلم جيدا لكن للاسف وقع بين نارين لا يستطيع اغضاب اهله
اصبري معه
مثله الكثير و مثلك الكثير

[نذير السحمادي]

إياك وإعلان الحرب.
سيري في طريق الله الصحيحة وهو من سيفرج عنك.

[مومي23]

راحنا حاسين بيك الكثيرات في نفس وضعيتك ربي يسهل امورك اصبري اصبري اصبري

[kader001]

من حقك طلب مقر زوجية مستقل اثاثا و معاشا عن اهله و ذويه يأويك انت و زوجك و أولادك فقط و هذا حق شرعي و قانوني و لا تصدقي من يقول لك اصبري ...فقط ...........- ما يحس بالجمرة غير لعافس عليها - سلام