قولولي وين المشكل يالفحلات

هبة ام عبدو · 2014-04-21, 18:27

درت المسكوتشو وطلعتلي ماصة معرفتش وين راه المشكل نتفخت مليح ومن بعد هبطة درت فيها 3 بيض 1 ياؤورت 2 سكر نص عبر زيت 3 فرينة 2 خمارة افيدوني تعيشو وعندي نفس المشكل مع المدلان تبهدلت اليوم مع زوجي قالي راكي تتعلمي في داري هههههه مزية ومدرتهاش كي كانو عندي ضياف

takwaaa · 2014-04-21, 18:35

ماعليش كون ما يغلتش الواحد مايتعلمش - كي عادت تطلع و تهبط بلاك تحلي عليه فالكوشة - و الخميرة يظهرلي بزاف القاعدة الي نعرفها انا 2 بيض تجي فيهم 1 خميرة و انتي دايرة 2 و زيداليايورت فيه الخميرة بزاف على 3 بيضات -ديما اديريها و ما تصلحش ?

هبة ام عبدو · 2014-04-21, 18:38

لا لا محليتش عليها صحيتي المفروض ندير غير وحدة خمارة

(( هبة الرحمن )) · 2014-04-21, 18:46

كثرت الخميرة حنونة ولا قللت الفرينة يعني خففتيه لازم يعمل زيڤ زاڤ مين ترفعي الملعقة وتفرغي ماينزلش طول ...و شوفي الا حابة المادلان يجيك خفيف خلطيه وخليه يرتاح ساعة او اكثر وعاودي خلطي بالملعقة جربيها وقوليلي

بريق الدجى · 2014-04-21, 18:53

كيما قالولك الاخوات بارك الله فيهن و نزيد نضيف حاجة انا مرة سمعت انه كي طيب طفي عليها و خليها داخل الكوشة باه ما يصدمهاش الهواء بارد ماتهبطش و ما تتنحاش هاذيك القشرة لي من فوق
و بالتوفيق

takwaaa · 2014-04-21, 18:56

بلا مزيه حنا هنا بش نفيدو بعضانا

ضفاف الإبداع · 2014-04-21, 19:06

أختي ربما كذلك الخمارة الكيميائية غير صالحة أو قاستها الرطوبة

وما المشكل ان كنت تتعلمي في بيتك الزوجية ؟ المرأة تبقى تتعلم حتى وهي عجوز لأنه دائما فيه جديد

وفقك الله

هبة ام عبدو · 2014-04-21, 19:11

صحيتو كامل على نصائح ياكظمة الغيظ دري فيا مزية كون تمديلي الوصفة كامل انتع المدلان

لميس اميرة · 2014-04-21, 19:23

درتي العجينة جارية بزاف و النار فالفرن قوية طابت و نشفت على الحواشي و النصف و من تحت بقات شبه عجينة ماش ناشفة مليح لانك شلفتيها فالطياب

والازم ما تحليش خلاص حتى تبدا الريحة نتاعها تتشم

هبة ام عبدو · 2014-04-21, 19:49

مقعدتش عجينة من داخل طابت مي جات رقيقة بزااااف

(( هبة الرحمن )) · 2014-04-21, 19:57

اقتباس:

المشاركة الأصلية كتبت بواسطة هبة ام عبدو

صحيتو كامل على نصائح ياكظمة الغيظ دري فيا مزية كون تمديلي الوصفة كامل انتع المدلان

واش عليه حنونة نمدلك
شوفي انا تخرجلي المادلان هايلة
6 بيض ، كاس زيت ، 6 مغارف كبار سكر ( على حد الملعقة يعني ما تعمريش الملعقة حتى للفوق) ، 2 خميرة ، مبشور ليمون ( الليمون احسن من لفاني لانه يقطع رائحة البيض والزيت) ، الفرينة.
ضربي السكر مع البيض عادي ثم اضيفي الزيت الا عندك الخفاق الكهربائي استعمليه متوسط ماشي سريع واذا ما عندكش ضربي عادي...ثم اضيفي قشور الليمون وقليل من الفرينة مع الخميرة ..واصلي الخفق وشوفي الخليط كيفاش صار يعني كيما قلتلك يعمل زيڤ زاڤ مين ترفعي الملعقة وتفرغي ماينزلش طول

غطيها وخليها ترتاح ساعة او اكثر عاودي خلطي العجينة ...سخني مليح الفرن واملئي القوالب ثم اخفضي درجة الحرارةيعني النار ما تكونش قوية ..اخليها الفرن ما تفتحيش حتى تمر حوالي 15دقيقة ...

بالصحة والهنا

جربيها وقوليلي .

sissi yasmine · 2014-04-21, 19:57

انا نستعمل مادلين اخت من المنتدى هدا تجي هايلة
دوك نحوس الرابط و نبعثولك

sissi yasmine · 2014-04-21, 19:59

https://www.djelfa.info/vb/showthread...C7%CF%E1%ED%E4

هبة ام عبدو · 2014-04-21, 20:27

صحيتو لبنات ربي يحفظكم ونجرب طريقتك ونردلك الخبر يالحبيبة