معقودة او سفيرية بالبطاطا واللحم المفروم -من مطبخي

[ninafret]

السلام عليكن حبيباتي
حبيت نقدملكم سفيرية بطريقتي الخاصة واللي ممكن تتعمل على طريقتين الاولى مقلية وتجي امممممممممممممم والثانية للفرن نزولا عند رغبات حبيباتي اللي يعملو ريجيم كيما طلبت مني الغالية ام ايمن وايمان مالا تبعو معايا

اولا حضري كمية من البطاطا ممكن كيلو تنقيها وتسلقيها 10 دقائق لا اكثر مالازمش تطيب لازم تكون ربع طياب فقط خليها تبرد مليح وابرشيها من الجهة الرقيقة نتاع الثوم وقطريها مليح مليح من الماء اللي فيها انا نحطها في كسكاس ونضم عليها حتى تتعصر مليح زيديلها لحم مفروم نيء حسب الرغبة ممكن شي 200غ ل1كلغ من البطاطا وزيديلها 2 حبات ثوم مرحية +ملح وفلفل اسود +معدنوس مقطع ولا سلق مفور شوية برك ومقطع صغير




لمي الكل مع بعض وزيدي بيضة ولا 2 حتى يتجمل الخليط ويولي كي العجينة



شكلي كويرات وابسطيها بكف اليد



كملي مع كل الكمية وحطي الحبات في سنيوة مدهونة شوية برك ودخليهم للكونجي لاتور 20د حتى تتماسك وماتتعبيش معاها كي تجي تغلفيها

كي تخرجيها اغطسيها في بيض مخفوق ثم غلفيها مليح مليح بالخبز المرحي او الشابلير حتى تجي مقرمشة





هنا عندك الاختيار اما تحطيها في مول مدهون بشوية فقط زيت وتدخليها للفرن على 180درجة حتى تستوي من الداخل وتتحمر وتتقرمش من برا



ولا تعملي كيما انا لان زوجي يحبها مقلية
تحطي الحبات في زيت غزير على نار هادئة مالازمش تقوي النار حتى تطيبلك من الوسط وتحمريها من الجيهتين



تحطيها فوق ورق ماص


وتقدميها مع صوص بيضاء بالزيتون ولا بالحمص كيما اللي عودتكم عليها
ولا تقدميها مع سلطة وتجي روعة خاصة في شهر رمضان والاولاد يموتو عليها





حبيباتي رني نستنى آراءكم وتقييماتكم واكيد تطبيقاتكم كيما عودتوني

[oum radja]

وصفة هايلة خاصة في رمضان امممممممممممم

[ninafret]

المشاركة الأصلية كتبت بواسطة oum radja

وصفة هايلة خاصة في رمضان امممممممممممم

حبيبتي ام رجاء شكرا على المرور

[أم محمد تاج]

حنونتي روعة الله يبارك عليك وتاكلوها بالصحة ولهنا

[*نآدرة~]

أمْ،راهي تشهي يعطيك الصحة باينة بلي بنينة
موالفة نديرها بالصح بلا لحم مرحي بالصح المرة الجاية نديرها كيما تاعك خصوصا في شهر رمضان ان شاء الله وندعيلك أكيد
صحيتي اختي ربي يفرحك ويهنيك مع زوجك

[أم ياسين الزهراء]

هايلة تعيشي حنونة

[oum rahma]

بارك الله فيك ، هايلة ، متعودين عليها بلا فيوندشي

تستاهل التجريب ،،

مشكورة كل اطباقك هاااايلة

ربي يرزقك الذرية الصالحة

[اميرة في دنيا حقيرة]

يعطيك الصحة يا نينا وصفتك روعة حنونتي شكرا ليك اكيد نجربها

[عبير الزهور]

شكرا جات روعة اتا نديرها بلبطاطة وحدها كما نتاعك ولكن كنقليها تتحل ماعرفتش وين المشكل

[rofia.sarah]

شكرا على الوصفة وأكيد راهي بنينة و ملائمة للصيف و لرمضان مشكورة أختي و لا تحرمينا من جديدك

[شهرزاد أم التوأم]

شكرا اختي ربي يهنيك

[نورسان]

اكيد راح تكون مليحة مادام انك انتي صاحبة الوصفة
في الحقيقة اختي كل الوصفات نتاعك ربي يبارك روووووووووووووووووووعة جربت شحال من وحدة لكن للأسف ضيق الوقت ماخلانيش نشارك بيهم ان شاء الله في المرات المقبلة نحطلكم تطبيقاتي

[غزة في عيوني]

اممممممم هايلة الله يعطيك الصحة

[لمسة حنية]

جميييييييل روااااااااااائع يعطيك الصحة

[HADIL2044]

يعطيك الف عافية