الكنة بين الماضي والحاضر

[*باسم*]

المشاركة الأصلية كتبت بواسطة ام ايمان16

عجبني سؤالك
نعطيلك قصة كنة في الحاضر موش في الماضي واحكم فيها وحدك


يحكى انه توجد عروس حاليا عندها ام مريضة والام هاذي عندها زوج عرايس فقط والام دايرا للعرايس هاذو كل مايحبو وتعاملهم اكثر من بناتها بالخير ويتصرفو في الداروكانهم في دارهم واكثر وهوما بطبيعة الحال يطيبو ويجيبولها الماكلة بينن يديها ومؤخخرا لمرض الام الشديد يسااعدوها في التدواش

ننرجعو للعروس لي عندها امها مريضة تزوجت وراحت عند ناسس لقات عجوزها بصحتها يعني موش مريضة لكن العروس حبت تدير كييما ولوو انها في مانة امها يعني على الاقل تطيبلها
لكن المفاجاة انو لعجوز تقول للعروس في شهرها الاول من العرس انو اهل البيت يحبو ماكلتها (اي لعجوز)) ومايكلوش ماكلة اي واحد؟
يعني هاذاي الهدرة خلات لعروس تحس بالذل وبطبيعة الحال جبدت روحها عليها وخلاتها تطيب كيما تحب يعني لعروس ماقاتش حرية التصرف عند اهل زوجها مما خالاها كيما قلت تجبد روحها عليهم وتحكم شامبرتها لانو اكتشفت انو عجوزها غيارة بزااف وحبت تجنبها

فماهو هو الحل بنضرك واين المذنب هنا

المذنب هنا هو ام الزوج هناك ناس مهما ديري فيهم الخير ميحترمكش اما بالنسبة للحل تحاول تكلخ للعجوز بشوية بشوية يعني اغرائها بالجانب المادي هذي روبة هذي ريحة هذي صابونة وممبعد تقولها يا امي حبيت نتعلم من طبخك الجميل علمني اذا تفاهمو الله يبارك
واذا متفهموش تطلب سكن مستقل اذا كان الزوج قادرواقترح هذي آخر الحلول يعني هي تخرج تخرج ماذبيها تخلهيم هم يخرجوها يعني متفسدهش معهم

[*باسم*]

المشاركة الأصلية كتبت بواسطة ام ايمان16

عجبتني تاع الزوج المسكين؟؟؟؟؟؟؟؟؟؟؟؟؟؟؟

يعني كونك رجل حسيت بالرجل لي يكون مسكين معندوش

وماحسيتش لما تكون الزوج مسكينة اهل زوجها يذلوها والمصيبة كي يكون راجلها واقف مع اهلوو ماايواسيهاش بحتى كلمة وهوما يحقرو فيها

والوقت هاذاا بالسكن المستقل وما تفراش االمشااكل ببيين الكنة ولعروسة
ياوينك نحطوهم قدام بعضاهم كي الزيت والنار

يعني الزوج يجي تعبان من من برا وكاره ويزيد ميلقاش الراحة في دارو من وين يروح
تصبر حتان يفرج ربي او تسلك روحها بلسانها الطويل

[صُبح الأندلس]

حين يصبح أو يعود رجل اليوم كما في الماضي تصبح الكنة كذلك

[*باسم*]

شكرا لكل من قرأ وعلق ومن لم يعلق

[الجواهر]

عمل المراة ليس واجبا دينيا فالرسول قدوتنا و حبيبنا كا يخيط ثوبه و يغسله و له من النساء 11 زوجة كلهن مستعدات لخدمته
توارثنا هذا حتى صار واجبا و المراة التي لا تعمل يقال لها ليست بنت اصل ؟ ما علاقة الاصل بالعمل؟
زمان كانت المراة مقهورة تخدم و دمعتها في عينيها و ماشي تخدم و فرحانة انا سمعت هذا من امي و من خالاتي و من عماتي و تقريبا لم اسمع امراة تاع بكري تقولك كنت نخدم فرحانة .. نساء زمان يحسدون بنات اليوم و الذي يكذب يذهب عند مسنة و يسالها
ان تقوم المراة بخدمة ام زوجها او حموها شيء اما ان تفرض عليها العمل و الغاشي راقد محااااااااااال و ليقولوا ليست بنت ........

[حبيبة زوجها]

انا سمعتها من سلفتي ربي يهديها كي روحت عروس جديدة وهي ماشافتنيش
جابلنا ربي لعرايس باش يخدمو علينا هي عمرها 22 سنة
يعني كي تسمع هك وش يجيك في البال

[روح مراد]

أصلا الموضوع هذا راهو متشعب بزاف
انا زوجي ما عطالي لا ضوء احمر و لا أخضر
نخدم لوجه الله تعالى و صراحة بيني و بين نفسي
نخدم و كأن العجوزة غير موجودة عمري إذا ستنيتها تخدم أو الدير أي حاجة كي ندخل العشية نتصرف و كأنها غير موجودة و لكن هي ثاني أعطاتلي حرية التصرف في الدار و نخدم و نطيب واش نحب
و لكن كاين عائلات نهار يتزوج وليدهم العروسة تكون مقيدة لازم تشاور و لازم ينتقدوها و ما يلزمش الدير هاذي و لا هاذي .... يخلولها غير بيتها و الباقي ممنوع اللمس من الطبيعي هاذي تفايا للمشاكل تحكم بيتها و ما تخرجش ماشي على خاطر ماشي حابة تخدم عليهم و لكن تفاديا لانتقاداتهم و تفاديا للمشاكل
و كاين عرايس يروحو من أول يوم ما يخدموش غير باش ناس دارهم ما يوالفوش يتكلو عليهم و يفهمو أنهم ما جابوهاش خدامة
و لكن كيما يقولو مول النية يربح
الوحدة لازم تدخل بنية مليحة لدارها و ناس الدار لازم يستقبلوها بنية مليحة

[أحلام مؤجلة]

كل وحدة وأصلها سواءا الكنة أو العجوزة, أنا متزوجة وعجوزتي كل عرايسها من أول ليلة وحدهم ماتحب حتى واحد وماتسقسي حتى على واحد, مهيش اجتماعية رغم أنها طيبة وناس ملاح, عرايسنا ثاني مستقلين كل وحدة وحدها بصح والله على ما أقول شهيد أمي دايما تسقسي وتقول لخواتي ارواحو وجيبو لولاد دايما يجيونا ونعقبو النهار كلمل ملمومين وفرحانين نتغداو ونتعشاو وكل واحد يروح لدارو فرحان هاذي هي صلة الرحم , أما أنو العبد يعيش وحدو ومايحب حتى واحد يجيه هاذي حاجة مش مليحة

[imenealg]

انا متزوجة. واقوم بالاعمال. المنزلية على قدر استطاعتي. لان ام زوجي. تطلب من ابنتها النوم و الراحة. و انا المراة الحامل. لا تسمح لي بالراحة لو اقم بعمل ما تتكلم عني في غيابي بسوء، فديننا الاسلامي لا يفرض على المراة خدمة اهل زوجها 0
ماشي بنات تخاف عليهم وانا نخدمهم ابداااااا

[Nadiamanal]

بارك الله فيك و الله خدمنا ما ربحنا غير وجه ربي مي العربي ما فيهش الخير

[rahma nour]

موضوع جميل اخي
الصراع بين العجوز و الكنة مستحيل ينتهي لان كلاهما لا يحب الاخر بنات هذا الوقت ما يحبوش يتنازلوا و العجايز باقيين في عقلية بكري بلي لازم الكنة تخدم على العجوزة و ما تقول والوا و الراجل باقي في الوسط بين رضا اموا و ارضاء الزوجة اموا يخاف من دعوة الشر منها و بالتالي يلجا للحل الساهل و هي الزوجة و يطلب منها تصبر
و الحل كل وحدة تقعد في دار باباها و لا تدي واحد يتيم و كل واحد يبقى مع اموا و يكسب دعوة الخير
و نزيد حاجة اخيرة البعد عن الوازع الديني من طرف الكنة و العجوز هو اللي خلا الامر يصل الى ما وصلنا اليه

[سيرين 5]

Quote=*باسم*;3993358521]حنا مقولنش جابها خادمة لكن يتعاونو في الخدمة ولنفرض أن هذي العجوز معدهش بنات أو جميعهم متزوجين[/quote]

طبعا هنا واجب عليها تخدم العجوزة و الشيخ إذا كانت عايشة معاهم و إذا ماكانتش عايشة معاهم كي تزورهم تخدم لكن فرضا ساكنة في طابق وحدها في نفس البيت لكن العجوزة ماشي ساكنة وحدها عندها عرش تاع بناتها و بنات بناتها و أطفالهم الصغار و حتى نسابها يعني ما راهيش وحدها العجوزة ، و زيد هاذ العروسة دخلت في وسطهم و خالطتهم و طيبت معاهم و كلات معاهم و خدمت معاهم ... لكن لقات الاساءة (عيناني و من التحت للتحت) من بعض بنات اللواسات (في سنها تقريبا) و من بعض اللوسات كبارات عليها و كانت تحشم العروسة ترجع كانت تسكت و تخلي في قلبها بما أنها جديدة في وسطهم و تحشم و حتى العجوزة كانت تقعد تقعد و تحكمها و تبداها بالأوامر ما تروحيش لداركم لازم يشتاقوك ، ما تلبسيش هكذا (في الدار قالتلها ما تلبسيش البونتاكوغ)، ألبسي هكذا في عرس بنت بنتها في البلاد داروه في الحوش تاعهم وين الخالوطة نساء و رجال قالتلها ألبسي لونسوبل جيب ميني و صدرو عريان و يديه طرونسبارون كي ما حبتش بقات تشنف عليها و تعطيها بالوذن كرهتلها حياتها)، ديري ماكياج كي تخرجي، ديري الذهب في الدار، ما تعرفيش طيبي، كي تفتح التاقة تهوي الدار علاش حليتيها الجيران يوقبو، كي تغلقها علاش راكي غالقتها هوي دارك، خلي التاقة تاع البيت محلولة كي تروحي تخدمي و اغلقي بابك مع العلم أنو البالكون تاع البيت و الكوزينة مشترك و الكوزينة ما فيهاش باب يعني كلي ما غلقناش الباب و من هب و دب يقدر يدخل للبيت من البالكون ....
هاذ العروسة عاشت في الستراس من النهار الأول شعرها طاح كامل و دارتلها كي شغل ايكزيما في ذراعيها و كل ما تداويها توليلها قالتلها الطبيبة تدير من التقلاق ....
المهم هاذ العروسة قررت تجبد روحها نهائيا و تعيش في دارها ، حاولت العجوزة تمنعها طيب العشاء قالتلها ما تزيديش طيبي اتعشاو معانا العروسة رفضت قالتلها لالا ندبر راسي نوالف نتحمل مسؤولية داري نطيب و نغسل وحدي بحكم يجي النهار و نستقلو في دارنا ان شاء الله كي توجد.
العروسة بشوية بشوية بدات تنظم وقتها بن دارها و خدمتها و خصصت الجمعة طيب فيها حاجة تقليدية (طعام، شخشوخة، رشتة، تليتلي ...و خطرات القاطو ، المسمن ، الكسرة ، و البريوش ، المطلوع ، البيتزا ... ) و تبعت طبعا للعجوزة و أحيانا تكون عندها الفاكهة تمدلها مرة على مرة تتفكرها بجبة ، بليغة ....
لكن العجوزة ما عجبهاش الحال نهائيا بقات تلوم فيها علاش جبدتي روحك علينا ؟؟؟ كنت تقعدي معانا و دركا جبدتي روحك علينا .... العروسة تحججت بكثرة الشغل في الدار و العمل ماكاش وقت طول الأسبوع خدامة و الويك آند الشغل تاع الدار ؟؟؟ ما تقبلتش العجوزة المبرر علاجال علابالها الأسباب المهم و كي العادة لما دخلت العروسة للدار من العمل طبعا لازم جوز عليهم تمسيهم بالخير لقاتهم مجمعين يطيبو في المحاجب قعدت تحكي معاهم شوية كي العادة قبل ما تطلع العجوزة رفدت حبات محاجب حطتهم في طبسي و قاتلها هاكي و بالسلامة المخلوقة باش ما جيهاش حريق قدامهم شدت الطبسي قالتلها صحة و دارت روحها ما فهمتش قالت تزيد دقيقة و تنوض باش ما تبانش تحاويزة زادت العجوزة قالتلها أدي لدارك و سقمي كيما تحبي ؟؟؟؟ العروسة خلاص اتبهدلت واش دير يا ترمي المحاجب في وجها ما تسحقش الزبل تاعها (حاشة النعمة) و تطلع لدارها يا تكتم الغضب تاعها و تستغفر و تقولها يكثر خيركم و تطلع و تخليها على ربي سبحانو ؟؟؟ العروسة تصرفت الصرف الثاني استغفرت قدامها بالصوت و قالت يعطيكم الصحة و طلعت لدارها دخلت لبيتها و طرطقت بالبكاء ، راحت توضات و صلات و بقات غير تدعي حسبي الله و نعم الوكيل مع العلم أنو العروسة كانت تتوحم و علابالهم.
زادت العروسة قررت ترمي السلام و ما تزيدش تدخل لعندهم بدون راجلها (علاجال المعاملة قدام راجلها و في غيابو مختلفة) ولات كل ما تجوز توقف في الباب و تقول صباح _ مساء الخير و تروح غير إذا كاش وحدة هدرت معاها ترجعلها ؟ زادو ولاو ما يرجعولهاش مثلا مرة الصباح هبطت لقات العجوزة و بنتها قصارين و الباب مطبعة نصف قالتلهم صباح الخير عليكم ما رجعولهاش زادت علات صوتها و قالتلهم صباح الخير ، زادو ما رجعولهاش ؟؟؟ خرجت العروسة رايحة للخدمة و طرطقت بالبكاء في الطريق ، قنطوها على صباح ربي حكات ليماها قالتلها والله ما نزيد نصبح و نمسي عليهم ما خلاتهاش يماها قالتلها لالا قوليلهم، يفرج ربي ان شاء الله و تروحي لدارك و تتهناي.
ولاو ناس دارها يطبعو الباب كي تكون هابطة رايحة لخدمتها و كي تدخل لعشيا للدار، و عادو يعطوها بالوذن و كي تهدر معاهم يرجعو كليمات و يتسرسبو، المهم ولات حرب نفسية للعروسة يالي جبدتي روحك علينا و صح العروسة تقنطت و ولات ما تحبش تدخل للدار قبل راجلها كون تصيب تدخل معاه بصح الله غالب هي تخرج قبلو ولات تروح لدارهم و هو يجوز كي يكمل خدمتو بصح شحال تعيا تروح لدارهم ؟؟؟؟ كرهت و تقنطت و هي بالحمل لحقت العجوزة هددتها قالتلها راكي تولدي و تقعدي وحدك ؟؟؟ و العروسة دركا مازال ما قررتش إذا كي تزيد تروح لدارهم يرفدوها ماليها و لا تجي لدارها و ماكاش كيفاه تجي وحدة من ماليها تقوم بيها لأنوا الطابق مفتوح و كأنو عايشين في دار وحدة برك قاسمينلها جيهة وحدها للعروسة ؟؟؟
رغم أنو العروسة شادة سابعها ما تدنا لحتى وحدة هكذاك و مازالت الاساءة متواصلة ، العروسة تحاول ترمي في الثقيل بصح الله غالب الانسان ماشي بيدو ما يزعفش و ما تغيضوش عمرو ؟؟؟ تبقى حسبي الله و نعم الوكيل هي مفتاح الفرج.
كتبت القليل فقط من الأمور لي صراولي مع ناس داري، إذا راني غالطة فكاش حاجة قولولي ؟؟؟

[smile with me]

السلام عليكم
طرح رائع و حساس، و اقول مباشرة ان السبب هو "ضعف النفس امام مغريات الحياة"
بناتنا سامحهن الله ، و عفا عنهن، وقعن ضحية اغراءات الحياة المادية التي يبدو انها لن تنقطع، فصارت كل بنت لديها حلم خاص ببيت زوجية خاص و غرفة خاصة و اشيك ملابس و اغلى حلي و افخم سيارة و و و و و و و ....
السبب الرئيسي "اغراء الإعلام" و هو سبب ليس جديد بل يتجدد ، كل شهر هنالك model جديد لملابس و حلي و احذية ، فقارن هذا بالماضي؟؟
لذلك طبيعي جدا ان نحصل على نتيجة كهذه، بنات و نساء ايضا كل همهن هو المتعة الشخصية و لو على حساب الوالدين، فما بالك بوالدي الزوج؟؟
و كما قلت اخي، لا نعمم، هنالك بنات بارك الله فيهن مازلن يردن انشاء أسرة، يعشن مع أهل الزوج و يراعين شؤون الأسرة الكبيرة، يحترمن والدات ازواجهن حتى و لو كن لئيمات، و يصبرن لأنهن يعلمن أن الصبر لا يأتي ألا بما هو محمود
اوجه نصيحة هنا للشباب ، لا تفقدوا الأمل و اكثروا من الدعاء بالزوجة الصالحة و الذرية الصالحة إن شاء الله تعالى

[سيرين 5]

المشاركة الأصلية كتبت بواسطة سندوسة يسمين";3993357393][b][i][color="navy

وعليكم السلام

موضوع جميل اخي

انا نقولك السبب الرئيسي هو الزوج على خاطرش هو لي يعتبر اشارة مرور لزوجته اما ضو الاخضر او الاحمر

يعني الراجل يلا مد الضوء الاخضر لمرته راهي دير رايها وتتمرد
ويلا مدها الضو الاحمر تم تعرف حدودها وتسقم روحها

راني متابعة للموضوع ان شاء الله تكون عندنا تدخلات من لي رانا نسمعوه فالمحيط نتاعنا[/color][/i][/b]

نتمنالك زواج الدهر في بيت العايلة و ان شاء الله تكون كبيييييييييييييييييييييييييييييرة بزاااااااااااااااااااااااااااف العايلة و نتمنى نكونو مازالنا على اطلاع بمختلف مواضيع المنتدى و تقدري تخبرينا بجديدك مع ناس دارك بكل صدق

صدق المثل لي يقول : ما يحس بالجمرة غير لي كوتو