تحبي تتعرفي على سوبر زيقزاق .. سطايفيه

[stayfiya]

السلام عليكم
جمعه مباركه
كيما وعدتكم لي عندها مشينه سوبر زيقزاق راح تتعلم تخدم بيها ان شاء الله
انا حبيت نعرفكم عليها و على لي بيي دبيش تاوعها كيفاش يخدمو و في الاخير كيفاش تطرزي بيها
اول شي
هاااذي هي (المشينه هاذي تاع مرت خويا )

اول حاجه ممكن راه عندك مشاكل فيها لازم تريقليهم باش تبداي الخدمه بيها
و تخيطي و نتي مستراحه
الحاجه لي مالازمش تنسايها هي الزييييت انا هاذا هو الزيت لي نزيت بيه ماشيناتي

لازم يكون خفيف لي تقولي الزيت واش فايداتو. نقولها الزيت للمشينه كي الما لينا هو مايخليش لبياس يتحك في بعضاه و يزرب يرشا. و يتكسر و ينقص من الحس و فوائد اخرين ممكن مانعرفهمش انا
الزيت يكون من فوق و من تحت اكييد ..!
تبداي تمشي الخيط نتاعك لي لازم يفوت بكل المراحل هاوليك توضيح

و مرات نلقاو مشكل الخيط يخرج من تحت لقماش و يتخبل و يولي يتقطع
كيما هكذا

تعرفي بلي راهي لا طونسيون نتاعك ميش مريقله مليح او ميش فايت عليها الخيط اصلاً

نتي ريقليها في 7و شوفي (ماتشوفيش على تاعي لانو راهي طارت و عاودت ركبتها بقات في رقم 3 ) المهم الخيط نتاعك كي تجبديه مايكون مرخوف مايكون مشبوح بزاف
و لكان العكس معناها الخيط تاع الكانات لي يطلع


معناها لا طونسيون تاع الكانات لي مرخوفه و هاوليك منين تريقليها تعاودي تسيري الفيس هذا

منبعد نريقلو مدى ظغط البيي نتاعنا من هنا



اذا كان قماشنا خشين نطلقوه و اذا كان متوسط نخليه في النص و اذا كان رقيق نظغط عليه
و نكملو نتعرفو على الرجلين لي جاو معاها واش يديرو

نبداو بالاول هذا العادي نخيطو به الدروات و الزيقزاق نورمال

الثاني يخدم الكفه الرقيقه كيما لي جي في حاشية الخمار

اول حاجه لازم نحكمو الجزء الاول بليبانقل. و تكون الكفه صغيره نص سنتمتر و لازم تتحكمي فيها مليح باش ماتدخلكش قماش بزاف داخل الكفه والعكس باش ما تميلش الكفه و من بعد ماتحكملكش لخياطه هي هكذا جي




نروحو للرجل الثالثه ساهلة تاع ثقب الازرار تركبيها و تريقليها بالرقم منا و تبداي على حياي كبر الزر تحددي طول الثقب 1 2 3 4 رايحه تحددلك بكل سهوله الثقب نتي ماعليك غير تفتحيه بمقص



الرجل الاخيره حنا نديرو بيها البساط و الكوات هي تسهلي لخياطه تخدملي مسار لخياطه و تحددلي المسافه قدقد باش ماتعوجش لخياطه و تسبطلي البونج



و نحب نستعملها في الفيرميتور انا ما كانتش عندي باش نوريلكم كيفاه
و اخيرا راح نتعلمو كيفاش نطرزو
اول شي لازم توجدي الرشمه نتاعك فوق لقماش و تكوني درتيلو الفيزلين (انا مكانتش عندي درت هكذاك المهم نوصللكم الفكره )

تحطي لبلاكه فوق سطح المشينه باش تطرزي بانسيابيه و ماتلصقلكش لخياطه من تحت

من بعد تريقلي طول الغرزة انا درتها 0 و الزيقزاق خيرت عرض f


و تطلقي الظاغط من فوق باش ترخفي الرجل و تسهلك الدوره


و برك ابداي اطرزي

و هذا من اسفل كيما قلتلكم انا ماعنديش فيزلين ولا طمبوله باش نشبح ايا جات تعيف المهم توصل الفكره

انتهي بعون الله و الحمد لله
ان شاء الله راح تستفادو من الموضوع
دعواتكم
في امان الله

سطايفيه

[لينة المتفائلة]

شكرا ليك اختي سطايفية حبيت نسقسيك على مشينة سانجار كحلة ايلا مفيهش مشكل

[stayfiya]

علاش لينا واشمن مشكل فيها ؟؟؟

[لينة المتفائلة]

تقطع الخيط قبل كانت تتكسر الابرة و بدلناهالها ودرك عاد الخيط يتقطع من جيهة الابرة ريقلتها خيطتلي شوية او مباعدا بدات تقطع فيه

[crystale49]

الله يبارك اختي السطايفية على الشرح الي اكثر من رائئئئئئئئئئئئئئئئئئئئئئئئئئئئئئع فمبرو ك لكل الخياطات بهذا الانجاز الي راح يستفيدون منه فعلا

[douda21]

يعطيك الصحة سطوفة الحلوة شرح ممتاز ان شاء الله تفيد كل وحدة عندها هد الموديل

[stayfiya]

المشاركة الأصلية كتبت بواسطة لينة المتفائلة

تقطع الخيط قبل كانت تتكسر الابرة و بدلناهالها ودرك عاد الخيط يتقطع من جيهة الابرة ريقلتها خيطتلي شوية او مباعدا بدات تقطع فيه

نتي راكي تخيطي بالكبه لكبيره ولا صغيره ؟؟ و لبرا واشمن نيميرو. الزيت راكي ديريلها كل اسبوع ؟ و مسار الخيط راكي تفوتي على كامل المواحل و لاطونسيون نتاعها بلاك مشبوحه ؟؟ و البورت كانات كي تخلخليها تتحرك بزاف ولا ثابته في بلاصتها (طبيبه زعما..!) لانو ممكن كيتعودي تخيطي مع اهتزاز المشينه تقيس لبرا في البورت كانات تتكسر ولا يتقطع الخيط.

[stayfiya]

شكراً كرستوله و دودا الحبوبات الله يخليكم. دودا الماشينات كامل يتشابهو في حوايج بزاف. يعني على الاقل تستفاد كل وحده من حويجه يااارب و تدعيلي

[لينة المتفائلة]

المشاركة الأصلية كتبت بواسطة stayfiya

نتي راكي تخيطي بالكبه لكبيره ولا صغيره ؟؟ و لبرا واشمن نيميرو. الزيت راكي ديريلها كل اسبوع ؟ و مسار الخيط راكي تفوتي على كامل المواحل و لاطونسيون نتاعها بلاك مشبوحه ؟؟ و البورت كانات كي تخلخليها تتحرك بزاف ولا ثابته في بلاصتها (طبيبه زعما..!) لانو ممكن كيتعودي تخيطي مع اهتزاز المشينه تقيس لبرا في البورت كانات تتكسر ولا يتقطع الخيط.

الكبة لي ندير بيها صغيرة والرا نيمرو 12 او زيت سمانة لي فاتت درتلها او ماعاودتلهاش و الخيط نفوت فيه قد قد بصح لا طونسيو والله ماعلابالي حتى البورت كانات ما مسيتهاش درك نجبدها او نرجعلك الخبر

[stayfiya]

نتي ريقلي لا طونسيون و لبرا راهي رقيقه بزاف ديري 14 مليحه برك و الكبه المشينه نتاعك بالطابله تحب وحده كبيره هاذوك تاع 80دج. و عين لبرا مقابلاتك ولا جايه على يدك ليسره ؟؟

[لينة المتفائلة]

المشاركة الأصلية كتبت بواسطة stayfiya

نتي ريقلي لا طونسيون و لبرا راهي رقيقه بزاف ديري 14 مليحه برك و الكبه المشينه نتاعك بالطابله تحب وحده كبيره هاذوك تاع 80دج. و عين لبرا مقابلاتك ولا جايه على يدك ليسره ؟؟

اختي سطايفية الابرة عينها على يدي اليسرى او دركا عاودت جربتها تمشي شوية قيس الخيط لي مخرجاتو انا مبعدا دير صوت من جيهة الكانات او يتقطع الخيط

[kiya]

شكرا ليك حنونة انا عندي مشينة طيوطا وراني نطرز بيها وهبلتني تقطع الخيط بصح درك راني نريقلها كيما قلتي ونشوف
شكرا مرة اخري دمتي متالقة

[موجو جوجو]

يعطيك الصحة على الطرح القيم

انت ادعي واش راكي متمنية وانا نقول أمــــــــــــــــــــــيـــــــــــــــــــــــن

[ranimranim]

ربي يخليك سطوفة على الشرح المبسط،راني شحال وانا حابة نطرز بالمشينه وماعرفتش من بعد نروح نجرب،شكرا لكي

[R I A D]

السطايفيةاختي يعطيك الصحة على الموضوع القييييم و الرائع
و الي اكيييد راح يفيد الكثيرااات من محبي الخياطة
و نطلب ربي يزيّن سعدك و يسعدك في الدارين امين

قوليلي من فضلك هذيك البياسة لازم للطرز , خاطر انا ما عنديش هذ البياسة ...نشريها ؟

و نسمعكم تهدرو على السنين تاع الماشينة كيفاه؟....نطلعوهم و نهبطوهم و لا ما يتمسوش ؟كي نحبو نطرزو ؟و لا نشري هذيك البياسة و نحطها برك و نطرز ...ما تضحكوش عليا اني نحس بيكم