وصفات من أعماق التراث

[روح مراد]

السلام عليكن أخواتي
أشكر كل المجهودات التي تبذلوها من أجل إنعاش المنتدى و الركن بالأخص أقدم تحية شكر و عرفان للأخوات اللي ساهمو بوصفاتهن و دروسهن و تطبيقاتهن و شكر جزيل للفتيات المبتدئات حقا نساء تستحقن كل التشجيع و التقدير
لا يفوتكم أخواتي أننا أصبحنا نبحث عن كل ما هو جديد و سهل التطبيق و لذيذ كل واحدة تتفنن في إعداد أطباق جديدة و متنوعة و نتسابق دائما إلى تقديم الجديد في الطبخ و الجديد في التقديم
حبذا أخواتي لو نتعاون و نقدم في كل مرة طبق تقليدي لا أقصد المثوم الزيتون و الرشتة و الكسكس فهاته رغم قدمها إنما حافظت على مكانتها على موائد الجزائريين
إنما أقصد أطباق من عمق التراث الأطباق التي كانت تحضرها جداتنا في القديم
بالرغم من صغر سنكم و سننا جميعا إلا أننا نتذكر تلك الأكلات الذيذة التي لا تنسى مكونات بسيطة و لكن كانت جد لذيذة

أنا كنت صغيرة لما كنا نزور قريبة لجدتي في جبال منطقة القبائل مرة كان فصل شتاء و موسم جني الزيتون المراة العجوز تقطن في بيت من طين في منطقة جبلية البيت جد صغير يفتقر إلى أدنى سبل العيش الحالي حتى موقد ما كانت تملكه و إنما تطبخ على الحطب ، مرة زرناها فبدأت تحضر لنا الغداء و من فرحها الكبير أخذتنا معها لجلب الماء من البئر في حديقتها بعدها اشعلت الكانون و وضعت طنجرة من طين بمجرد ما غلى الماء وضعت الزيت و الملح و كأس كسكس و حركته قليلا بعدها أفرغت الكسكس في جفنة و و وضعت السكر عليه
صدقوني أن ذلك الذوق بالرغم من مرور 30 سنة إلا أني احتفظ به في ذاكرتي كسكس بالسكر

[sorour93]

باسم الله ماشاء الله شوفي اختي هديك اسمها البركة واكيد انت كنت صغيرة ونية مع البرد يجي كلش بنين بصح درك ولادنا راهم فايقين و ذواقين لدرجة ماتتصوريهاش انا راني فاهماتك وراني معاك لكن جربيها درك ديريها لعلئلتك وشوفي


حتى انا نعقل على روحي خطرة كنت صغيرة وكنت تغديت عند كنة عمي مرقة باللفت والله اعلم معاه بيص في هذيك المرقة ليومنا هذا ما نسيتهاش بنينة بزاف سبحان الله

تحياتي اختي

[أم تيم الله]

السلام عليكم اخواتي
كيما قالت الاخت ولادنا اليوم ذواقين و هما صغار مازال حتى ميعرفوش ينطقة توكليه و يخرج الماكلة من فمو.............الخ
انا نشفى بكري كليت عند جداتي عيش بالحليب و الفول الاخضر و الكوبية و ياسر صوالح نسيتهم و على ما اظن الخليع حاضر في الاكلة
المهم كان عمري حوالي 4/5 سنوات مازال لحد الساعة بنتو على راس لساني من هذاك اليوم ما زدتش ذقتو حتى عند وحده........

[حنين40]

والله فكرة مليحة وتخلي التراث حيي حسب ما نشوف العجائز صبحوا قلال فى هذا الوقت والزمن يجري وكل ما هو تقليدي يروح شكرا انا نتذكر فى صغري اكلت أكلة وهم اهل البدو يعتبرنها قيمة غذائية كبير يؤخذه الرحل معهم تتكون من لكليلة التى تصنع من الحليب حبوب من الحليب يابسة يؤخذ الرطب متاعه ويزيدولوا الغرس والسمن ويعجنه صحة بكل

[روح مراد]

شكرا أخواتي
في الحقيقة صحيح الأطفال الآن ذواقين حتى بكري كنا أنخيرو واش ناكلو في دارنا و لكن بحكم بكري كانو الناس بزاف قراب لبعضاهم و كانت كاينة صلة الرحم و الزيارات و ..... يعني كنا نخرجو روحو لناس مانعرفوهومش و نشوفوا مناطق جدد و كانت كاينة البساطة في كل شيء
و لكن الآن أولادنا يروحوا من الدار للدار نفس الأكل نفس الديكور .... يعني مابقيناش أنروحو للريف و نزوروا العجايز في الحقيقة مابقاوش و الواحد و اللا يعرف غير عائلته المقربة فقط الأخوال و الأعمال من العيد للعيد و من عرس لعرس
صحيح تربيت و كبرت في أسرة ميسورة الحال في المدينة كل شيء مواكب للعصر و لكن في زمان جداتي ربي يرحمها كنا نروحو معاها و حتى أننا كنا نقضيو العطل أنتاعنا في بيت جدي في الريف و الله حاجة بزاف هايلة البساطة و الفقر و راحة البال
و بقينا كامل مرتبطين بحب الريف بالرغم من الحالة الاجتماعية اللي وصلنا ليها بفضل الله
من كثرة ما أحب الريف و أعشقه زوجة أخي تضحك عليا تقولي الناس يتمناو المدينة و نتي تتمناي الريف ...

[راضية12]

المشاركة الأصلية كتبت بواسطة حنين40

والله فكرة مليحة وتخلي التراث حي حسب ما نشوف العجائز صبحوا قلال فى هذا الوقت والزمن يجري وكل ما هو تقليدي يروح شكرا انا نتذكر فى صغري اكلت أكلة وهم اهل البدو يعتبرنها قيمة غذائية كبير يؤخذه الرحل معهم تتكون من لكليلة التى تصنع من الحليب حبوب من الحليب يابسة يؤخذ الرطب متاعه ويزيدولوا الغرس والسمن ويعجنه صحة بكل

احنا للآن مازالنا نديروها يسموها الزريزة عندنا في غارداية بكسر الزاي والراء الاولى .والله روعة البارح برك كنت ناكل فيها هي كنوع من انواع الرفيس او البسيسة كل واحد واش يسميها الا انها تختلف في مكوناتها كيما قلتي من ناحية الكليلة والباقي كيف كيف التمر والدهان واذا ولا دهان عرب يالله على البنة هههههههه وتستعمل خاصة في رمضان في السحور اضافة لفوائدها هي تساهم في منع العطش والجوع.وتأكل وحدها او مع الحليب انا نحبها سخوووونة.امممممممممم.
الموضوع هايل ياريت نرجعو بعض الاكلات التقليدية لموائدنا وكل جهة من الجزائر تعرف بمأكولاتها ومقبلاتها وعصائرها مثلا انا من غارداية وكاين حاجات ما نعرفهمش يديروهم اهنا خاصة بمتليلي ونتمنى نعرفهم بما انو يمى من بجاية يعني تخلطتلي شوي والقبايل عندهم اكلات شعبية هايلة / نحاول نبحث انا تاني ونفيدكم ان شاء الله

[روح مراد]

شكرا لك أخت العزيزة
مادابينا لوكان كل واحدة تقدم واش تعرف باش نستفادو كامل

[متفائلة خيرا]

فكرة هايلة بارك الله فيك

[حنين40]

كاين الملتوخة التبسية وهي عبارة عن بو شقوف مثل لبراج لكن بلا غرس يتفتفت مليح ونضيف له الزبدة والا زيت زيتون ونعجن مليح واش نقلكم مع البن وكي تكون سخونة شبعة

[روح مراد]

شكرا لك أختي
لاحظت أن كل مناطق الشرق و الجنوب يستعملو بزاف الزبدة و ليدام أنا مانحبهاش مانقدرش ناكل بزاف أكلات