لقاولي حل

[hadjerjouja]

انا راني حابة نسقسيكم في موضوعي اذا كنت غلطت ولا لا
المهم انا المرة لي فاتت كتبت موضوع في المختصر انو تقدملي شاب وكان شرطو اني ندير لعجار وانا في الاصل ما كنتش مقتنعة بيه وقالي ديريي القفاز والجوارب في الاول رفضت ومن بعد كي شفتو انسان مليح وباغيني قلت مستحيل نلقا كيفو انسان في هذا الوقت رغم اني انا في دارنا مش من عاداتنا لعجار وعايشة في دار كل واحد يحترم روحو وعندنا حرية نديرو كلش بصح في حدود وكل واحد يعرف قدرو وهوا عارف وقالهالي انا كي شفتك وسقسيت عليك وشفت عقلية وتربيتك كيفاش عجبتيني انك انت مقتنعة بواش راكي ديري على اساس اني درت الحجاب وحدي بلا ما واحد سيفو عليا ومانيش نتاع كثرت خرجت المهم هوا كي تقدملي قالي مكانش لا خدمة ولا خرجة والخرجة اذا خرجتي تخرجي غير معايا قلت معليش مش مشكلة وبقاتلي غير في لعجار ومن بعد الحق بقي يقنع فيا حتى كي وافقت بصح كي قبلت بشرطو خرجلي بخرجة جديدة وهيا اني لازمني نلبس البرقع اللي هوا الجلباب وما لازمش حتى حاجة تبان فيا هنا انا تقلقت وقتلو مستحيل اني نلبسو على خاطر يغمني وقتلو وعلاش ما قتليش من الاول وكي قتلو مكانش فرق ياك حتى بالحجاب والعجار راني مستورة وواحد ما يعرفني قالي ما نحبش واحد يعرف تفاصيل جسمك المهم ومن بعد زاد يامات وعيطلي قالي واش درتي فيها تلبسيه ولا لا قتلو لالا رفض قاطع قالي ربي ينوبلك بولد لحلال لي ما يلبسلكش لبرقع قتلو امين وانت ثاني ربي ينوبلك ببنت لحلال لي تقبل بشروطك وكوبينا بعد سمانة عاود عيطلي وقالي زيدي خممي مش حاب نخسرك الربي قولولي واش ندير انا باغياتو بصح في نفس الوقت مش قابلة بشروطو وزيد راني نشوف فيه راه يمادى في شروطو مع العلم انو انسان غيوووووووووووووووووووووووووووووووووور لدرجة كبيرة

[eBusiness]

واش نقولك أختي الفاضلة، قطعة من القماش إن زدتيها أنت ما تخسري والوا بما أنك ترين أنه إنسان صالح وبما أنه عاجبك وأنت عاجباتو زوجو على بركة الله والله يسخرلكم، ما تنسوس برك تعرضونا للعرس
أختي ماشي لا جال شرويطة تفترقوا ورمضان كريم!!!

[sonia00]

اختي انت لاكان انت عاجبك نورمالمو حت الشروط انتاعو يعجبوك

[لحن الحياة.]

هاذا يدخلك للجنة ربي يهنيكم

[إيمان احمد]

اختي شوفي اهلك واش ايشورو عليك

واش قالولك

و ربي يوفقك

[أم احمد3]

فيه غيرة تخوف...بعدين متخرجيش إلا معاه واحد ميدخل واحد ميخرج...رآه مزير. مليح...راح يدريك في قرعة.. إلا تحبيه تقبلي كلش... إلا متسبريش....الله يعطيك في مكان آخر...

[اغادير]

أختي مشكل الجلباب مفتوح نورمال ديريه................... ولكن هو بصراحة يخوف كل مرة يطلعلك بحاجة جديدة ...... غدوا كتتزوجو يقلك ماتروحيش لداركم تقبلي هنا؟ جارتنا صرالها كيف هكدا ......هو ناس ملاح ولكن حرم عليها كلش حتى كتمرض هي ماتروحش للطبيب.... ومبعد قاللها ما تروحيش لداركم ............... يعني انا في مكانها مانقبلش

[راية الاسلام1]

السلاام عليكم
اختي الجلباب مسؤوولية كبيرة
اذا ارتديته نقصي الطلعات والخرجاات ولاازم تعدلي مشيتك
وفي الاعرااس انسااي الحفافة والمكيااج
اذا انتي مقتنعة بيه وعلابالك برووحك قادرة ديريه توكلي على ربي
واذا كنت مترددة ولو قليلا لاانصحك رح تشوهي صورته
خطيبك هذا دار خطأ كان لازم يقولك شروطو أول مرة
زيدي استخيري واستشيري الوالدة تاعك
موفقة

[تراتيـل صبــح]

كي تكوني مقتنعة بانسان مهما كانت ظروفو تقبلي بيها
تكوني معاه في السراء والضراء
يعني مهما كانت شروطو تقبليها
المهم ماتكونش تعجيزية
والحل في يدك
موفقة.

[bouchra hakerz]

مدام راهو مصر عليك و عاود معناها تشبثي في قرارك راهو يوح و يولي ليه...ادي نصيحتي

[مريم الصابرة]

السلام عليكم اختي
اولا هو إنسان مليح وراجل وراه يوريلك الصواب علاه ما تقبليش إنت عاجبك وباغياتو ومافيها والو كي ديري البرقع اصلا لو جينا فعلا مسلمين ونطبقو الإسلام هذاك امر نديروه بلاما يرجع شرط من الشروط
انا من رأي لو ترفضي راح تندمي مستقبلا خاصة لو راجل مليح ومتربي والواضح إنو فعلا راجل ومن حقو زوجتو يغطيها ما يبان منها والو صدقين اختي نعرفهم بزاف داروه ومتزوجات والله تشوفيهم فالطريق تغيري منهم
انا من رأي تقبلي لكن لما تحكي معاه طلبي منو يقولك كل شروطو في ضربة مش كل مرة يخرجلك بخرجة و واقبلي من ٍاي مافيها والو فالأول يجيك صعيب وتختنقي ربما لكن عادي من بعد والرأي الأول والأخير ليك وخمي راه مازال باغيك خير من تندمي موفقة

[" أبو عبود"]

والله بعض الاخوات ينصحوك ترفضي وكانه طلب منك معصية الله. اتقي الله في نسفك غذا فاتك هذا فاعلمي ان الله حرمك الكثير. وبرقع او عجار النتيجة واحدة. زيدي واش هذي فكرو يغمني؟ علاش اليل راهم دايريرنو قاع مغمومات؟ الله يهدكم. مش عارف الوحدة تحوس على رجل متدين كي قلها الحجاب الشرعي تقل له هنا احبس.

[وليد1990]

يا اختي انتي شرطتي شروط وهو أيضا شرط شروط
وانتي مادامك في داركم وعندك الاتساع في الوقت فخمي مليح وفي غرضك وريحي مع راسك شويا اذا شفتي روحك راضية وقادرة تلبيلو شروطوومقتنعة وانك كبيرة وضاقت عليك بيبان الزواج وان هذا الرجل يستاهل ومليح فاللهم بارك اما اذا شفتي روحك ماتقدريش وان هذا ضد حرينك فالله يسهل على كل واحد باب الحلال في جهة اخرى

هذا حياتك وراكي رايحة تعيشيها وحدك ماكان حتى عبد يحس بيك غير ميمتك فهمتيني ورايحة تندمي ممبعد وتقولي ياليت وياريت
وزيد بانلي شراط ياسر فانتي ماعليك انك تصري على الرفض وتشهدي اهلو انك رافضة وخليه هو الي يناقش الامر مع روحو فاذا قبل راه قبل واذا ما اقبل فالله يفتح عليك من جهة اخرى

[وليد1990]

المشاركة الأصلية كتبت بواسطة riyad552

والله بعض الاخوات ينصحوك ترفضي وكانه طلب منك معصية الله. اتقي الله في نسفك غذا فاتك هذا فاعلمي ان الله حرمك الكثير. وبرقع او عجار النتيجة واحدة. زيدي واش هذي فكرو يغمني؟ علاش اليل راهم دايريرنو قاع مغمومات؟ الله يهدكم. مش عارف الوحدة تحوس على رجل متدين كي قلها الحجاب الشرعي تقل له هنا احبس.

يا اخي اسمحلليييييييييييييييييييييييييييييي بصح لوكان يلبسوك النقاب والبرقع نهار واحد برك تعرف صح وش معنتها الغمة
ياخي النساء هم أدرى بحجابهم وهم ادرى وش يناسبهم من اللباس المهم يكون لباس شرعي يخي العجار ثاني لباس محترم ومقبول


مهوش النقاب برك هو الوحيد حجاب شرعي النقاب راه ثقافة برك من الباس الاسلامي تاعهم مش تاعنا مهوش تاع جداتنا يعني كانو جداتك مهمش مستورات كي مالبسوش النقاب
كاين بعض الرجال تخلاو على القندورة التقليدية لصالح اللباس الافغاني كأن الرسول صلى الله عليه وسلم قاللهم اللباس الافغاني هو السنة

الله يهدكم. مش عارف الوحدة تحوس على رجل متدين كي قلها الحجاب الشرعي]

يا اخي مش كل المتدينين يفرضو النقاب على زوجاتهم وانما يفرضو حجاب شرعي ويمد لزوجتو الحق في اختيارو المهم يكون شرعي
وزيد الاخت راها مش معترضة على اللباس الشرعي وانما على النقاب بالذات يخي مهوش برك النقاب برك هو اللباس الشرعي


وفي الاخير كل واحد حر في شروطو بصح واحد ماهو يقدر يلزم الاخر .. فإذا حصل توافق اللهم بارك واذا ما احصلش ربي يسهل على كل واحد

[وليد1990]

المشاركة الأصلية كتبت بواسطة jill

هاذا يدخلك للجنة ربي يهنيكم

ياختي كيفاه عرفتيه يدخلها للجنة

هل مجرد انو طلب منها النقاب برك
وهل لما الانسان ذا الدين بصح ما يطلبش من مرتو دير النقاب وش تقولي فيه

ياختي كيفاه حكمتي على هذا الشخص بلا ماعرفتيه

كاين واحد سلفي ومرتو منقبة بصح يضربها وحارمها من زيارةوالديها إلا في المناسبات واذا راحت ماطولش وطلبمنها في الدار ودير الخمار ومايعاملهاش بالحسنى وماعندوش هذي الرومنسية والحنانة حتى في العشرة أناني هذي الانسانة بنت خالتي كنت عند خالتي وانا في غرفة الاستقبال ومع ذالك سمعتها تبكي من سوء المعاملة ونزيدك للبحر كاس في شخصيتو حقدي حسدي يسب في العلماء ويفسق في الناس واذا سالوه الناس في المعلومة يبدا يزوخ كأنو الوحيد الي يعرفها ويسلم برك على الي يعرفهم من الناس ويحقر في الشباب بالعين لمجرد انهم باليهم ربي بالذنوب في عوض يطلب ليهم الهداية ويحرقالكتب في المكتبة لمجرد انها تخالف المنهج تاعو وعصبي ما يحملش الي يعاسرو في الراي واولادتو مش راحمهم ويضرب فيهم وكأنو يضرب في راجل كبير