وصفات من حراير مطبخ وش طيبتي اليوم

[حابة نزلي طباخةماهرة]

السلام عليكم اختي من فضلك ممكن تعطيني الوصفة كاملة لهذ الخبز و الله عجبني ياسر و حابة نديرها الليلة الجاية ان شاء الله و للعلم انا مبتداة فيالطبخو حابة نتعلم و نولي طباخة ماهرة لاني كرهت من تقلاش خاوتي و ان شاء الله تعاونوني

[ريم الفلى]

حباباتي شكون لي تعرف الكسرة لي دارتها بتبلا تطيب في الفور تعطيلي الطريقة وصح سحوركم وفطوركم يا لفحلات

[fado19]

merci pour le tout mais aider avec llles lliens

[sirina_angel]

سمك الاسبادون فالفرن بواسطة lyzzabel




اولا ندهن السني لي نطيب فيه بشوية مارغرين و نتبل الاسبادون بالملح و الفلفل الأسود برك ما نكثرش و نستفهم فالسني و نصب عيهم شوية زيت و نزيد عليهم عصرة ليمون و نغطي بالالمنيوم و ندخلهم للفرن على درجة حرارة متوسطة و نخليهم يطيبو فالماء لي يطلقوه ما يديش بزاف الوقت حوالي نصف ساعة او اكثر بقليل ما لازمش يطيبو بزااااف يجو ناشفيييين

[LINA 97]

بارك الله فيك أختي

[LINA 97]

بارك الله فيك أختي وربي يرضي عليك ويرضيك

[rymdu25]

حبيت نشارك معاكم
ليوم حبيت نحطلكم موس الجوزية
المقادير:
125 غ ماء
125 غ سكر
250 غ عسل حر (أنا إستعملت عسل الشفاء)
جوز مكسر و محمر في مقلاة
4 بياض بيض

التحضير:
1_ تغلي الماء مع السكر حتى يعقد (تقوي عليه النار حتى يغلي و مبعد تنقصيلو خلاص و تخليه يغلي)

2 _ تغلي العسل هو تاني حتى يعقد (تقوي عليه حتى يغلي و مبعد تنقصي خلاص وتخليه حتى يثقال شوية)

3 _ تخلطي الخليط رقم 1(الشاربات) مع الخليط رقم 2 (العسل) وتخليه يبرد

4 _ تضربي بياض 4 بيضات حتى يولي كيما الشلج و تضيفيلو الخليط رقم 3 غير بالشوية و تواصلي الخفق بالباتور

5 _ كي تخلصي زيديلو الجوز و حطيه في صحون للتقديم وزينيه بنصف جوزة و حطيه في الثلاجة

[lyzzabel]

وصفات لطاجين الجلبان lyzzabel

ربي يتقبل منا و منكم حبيبتي
شوفي الجلبانة كاين شحال من طريقة و نتيا ميزي
انا ندير حبة بصل متوسطة مرحية او رابي نقليها في شوية زيت مع مارغرين و اللحم تاع الخروف ولا الجاج ولا البقري قاع يجو ملاح و نقلي و نضيف زرودية مقطعة دوائر هاذي اختيارية و الملح و الفلفل الأسود و شويييية زعفران و عود قرفة و نقلي مع التقليب و نمرق ،، نخلي المرق حتى يغلي و نرمي الجلبان و نطيبه على نار متوسطة حتى يخثار المرق ،، هاذي الطريقة الكلاسيكية ههه
تقدري تضيفي م ص طماطم مصبرة مين تكوني تقلي
تقدري تضيفي سنات ثوم رابي تاني مين تكوني تقلي
تقدري تطيبي معاه القرناع او القرنون بصح ما تضيفيش الطماطم المصبرة
تقدري تطيبي اللحم وحده بطريقة المحمر و تفوري الجلبان حتى يطيب مليح و تصوتيه في مقلة مع شوية مارغرين وزيت و ملح و فلفل اسود و تقدميه مع اللحم المحمر ولا صوص تسقي بيها من فوق ممممم الطريقة المضلة عندي
تقدري تطيبيه كيما الاول و تحطيه بيه باللحم و لاصوص في بلا تاع فرن و تحطي عليه من فوق مورصوات ضغنا آذار تاع مارغرين و ذراري رشة فلفل اسود ك
و تقدري تزيدي عليه البيض فالطريقتين يعني فالفرن ولا فالكوكوطة و تبلي البيض بالملح و الفلفل و رشة كمون و تغطيه حتى يطيب على نار هاااادية حتى يطيب البيض طبعاااا

نتمنى تكوني فهمتي و بالتوفييييق حبيبتي

[lyzzabel]

الحريرة بالمرمز للقبطية

السلام عليكم ورحمة الله
الحريرة تاع المرمز
انا نحطلك ماقادير ممكن تكون 5غرفيات او اكثر
قطع حم بصلة صغيرة مفرمة ملح 3 ملاعق كبار زيت 2 حبة جزر صغيرين بحجم او حبة متوسطة حبة بطاطا بحجم بيضة حبة طماطم متوسطة ملعقة ونص طماطم مصبرة قسبر وكرافس)سالغي( التوابل نحط راس الحانوت وفلفل عكري وفلفل احمر وفلفل اسود و فنجان حمص وفلقل حا في الخير و2 فنجان صغير الت مرمز (فنجان هداك صغير بصفة عامة الناس تشرب فيه قهوة كحلة مش الكبير تاع الحليب
اولا نحط اللحم يتقلى مليح وحد 5د او اك8د كي تقلى وبدا يحمار نحطلو بصلة مفرومة وكنحط ملعقة ملح على حساب ذوق انا نحط وحدة كبير ة ما معمرة وكي يدبال البصل نحط الخضر والتوابل والحمص القصبر والكرافس يعني نحط كل المقادير الا المرمز والفلفل حار ونقليهم شوية مع بعضاهم ونمرق بما ساخن وكي تبدا القدرة تغلي نحط المرمز ونقص شوي برك للنار ونخليهم يطيبو .....كي نحس بيهم بدا تقريبا طابو نحط الفلف حار ....كي يطب كلشي ننزع الخضر فلفل حار مانميكسيهش نخليه بجيه ومن بعد نرجعو للقدرة يزيد يعطينا نكهة خاصةنميكسيها في ربو ولا ميكسوغ ونرجعها للقدرة ونضيف نصف ملعقة صغير سكر ونشوف الماء لا زام ماتكون ثقيلة ماتكون خفيفة وسط وسط (خير الامور اوسطها) وتغلي غلية خفيفة ونطفي وندير شوية حشاوش قصبر وكرافس وبصحة وراحة نتمنى نكون وفقت في الشرح

[lyzzabel]

طريقة للحم المحمر lyzzabel

اامال المحمر تديري اللحم تاع الخروف ولا الجاج و ترابي حبة بصل في شوية مارغرين و زيت و تقلي و تبلي بالملح و الفلفل الأسود و عود قرفة كاين لي يزيدو توابل اخرى انا ندير غير هاذو يكفيو و نمرق بشوية ماء قد ما يتغطى اللحم و نغطي و نطيب على نار متوسطة لازم مين اللحم يطيب لاصوص تكون قلييييلة مشي بزاف و خلاااااص

[لينا11]

صح فطوركن
هذه مقبلة رائعة وخفيفة والاهم تحمر الوجه قدام المعازيم
تصلح للخطبات للعرضات للمناسبات السعيدة


إضغط هنا لرؤية الصورة بحجمها الطبيعي.
إضغط هنا لرؤية الصورة بحجمها الطبيعي.


إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.
بالنسبة للمقادير:
زوج بيضات ديري لها ملح وفلفل اسود وزيدي عليها كاس شاي حليب وخلطيهم مليح زدت لها فاح
زيدي عليها علبة طون بالزيت ما شي بالطماطم وزوج مغارف كريم فرش العلب ماشي سائلة و04 حبات فروماج مثلثات وخلطيهم مليح
وخلطي 03مغارف كبار فرينة +مغرف صغيرة خميرة حلوى زيديها وخلطي مليح
بالنسبة للاضافات أنا زدت لها زيتون اسود مقطع قطع صغار وزدت لها ماييس وخلطتهم مليح
تقدري تزيدي لها فلفل احمر مقطع مربعات صغار وفلفل اخضر ثاني مقطع قطع صغار (انا مازدتهمش )
خلطيهم مليح مليح وديريهم في مول سيليكون الى الفرن






هده هي علبة كريم فريش التي استعملتها

[*عاشقة الجنة*]

islam1aya

صدردجاج باني دوزنتو بالقصبر فلفل اسود وملح عصير الليمون وخردل و توابل الكيري وخليط الدجاج رشة كركم يرتاح ساعة في الثلاجة ثم درتو في الفرينة ثم في بياض البيض ثم في الشابلير يجي روووعة

[ام ايمان 11]

وصفة المعقودة سوفلي للاخت ليزابيل المتألقة
نقي 3 حبات بطاطا متوسطين وإذا صغار ديدري 4 واغسليهم وقطعيهم و طيبتهم فالما والملح
في هاذ الوقت حضري عجينة الشو لي تكوني معتمدتها أنا طريقتي هي كالتالي
كأس ماء وكاس مشي معمرمارغرين طرية قرصة ملح حطيهم فوق النار حتى تذوب المارغرين تماماً نحي من فوق النارو ضيفي كأس فرينة مرة وحدة وخلطي بملعقة خشبية رجعي فوق النار مع الخلط المستمر باش تنشف من الرطوبة الزائدة رجعيها في وعاء تبرد شوية و ضيفيلها 4 حبات بيض كبار و إذا كانو صغار ديري 5 حطي بالوحدة وخلطي حتى تتجانس مع العجينة زيدي أخرى و هكذا حتى تكمليهم
مين تطيب البطاطا صفيها مليح مالماء و مرسيها مليح بالفرشيطة ذوقيلها الملح و حطيها فوق عجينة الشو ضيفي نصف م ص فلفل اسود وخلطي مليييييييح حتى يتجانس الخليط قطعي 8 حبات فرماج لافاشكيري أو أكثر حسب الذوق و خلطي
ديري مقلة فيها زيت غزير تسخن و بملعقة ارفدي شوية خليط البطاطا و عجينة الشو و ملسيها بملعقة أخرى يعني حتى يولي الشكل بيضوي و املس و حطي فالمقلة مباشرة من الملعقة والنار تكون بين هادية و متوسطة راح تتنفخ حمريها من الجهتين تجئ خفييييفة و بنيييينة تهبللللل و فارغة من داخل و فيها الفرماج والله هااااايلة مممم حطيها فوق الورق الماص
اسمحولي بالاك طولت فالشرح وتبان صعبة بصح فقط باش نفهمكم والله سااااااهلة مااااهلة و ماتديش الوقت و ماتتحلش فالمقلة أنا عندي سنيييين راني نديرها وما تتملش.

[ام ايمان 11]

خبزة تونس للأخت ياسملك حنان

كيلة بيض
كيلة ناقصة شوي سكر
كيلة مارغرين ذايبة و باردة حبيباتي جربو مارغرين ماني هااااااااااااايلة فيها بنة روعة
كيلة نوادكوكو
كيلة تاع لاشابلييز
زاست تاع القارص
1 خميرة تاع الحلوى.
و لي سوغير كونيفيت. لوز ايفيلي
و للشاربات 2 كيلات ماء مع كيلة سكر
نطلع البيض مليح مع السكر ثم نزيدو المارغرين و نخلطو غير بالمغرف ثم نزيدو النوادكوكو و الشابلير و الزاست تاع القارص و الخميرة تاع الحلوة و نحطو الخليط فلي غامكان والا في سنيوة ما نعمروهمش بزاف بارسكو يخمرو و نحطو حبة سوغير فاي النص و نشبحوها باللوز ايفيلي على الجناب و نطيبيها في فرن مسخن 10 دقايق من قبل 180درجة كي تحمار نسقوها شحال من مرة بالشاربات الباردة و بصحتكم

[ام ايمان 11]

عصير الدلاع للاخت عطر
نص دلاعة منقية من البذور حطيتها في الخلاط مع كاس جوتابل نتاع عصير الليمون ساك و5ملاعق سكر ومازدتش الماء وضربتو في الخلاط مدة 3دقايق وبالصحة والشفاء