وين نروح؟؟

[مشكلتي]

صلاة وسلام على رسول الله غادي نحكيلكم مشكلتي راني نسوفري ونخمم بزاف انا بنت عمري 42 سنة عزباء عندي أخ أكبر مني متزوج وعنده ولاد كبار و مبعد أنا ومبعد أختي لهي اصغر مني بست سنوات وهي متزوجة من خمس سنوات ولم يسعفها الحظ للانجاب ومبعد خويا الصغير كامل متزوج غير كيما يما وبابا ماته بحادث من 13 سنة وأنا لخذيت بلاصة يما ودكا كي تزوجه بقيت غير مع خويا الصغير وكنا كي زوج صباع كنت نحبه بزاف وبصح بعد خطوبته شوية بدا يتبدل عليا و يبعد علي شوية وقبل العرس قالي بلي ندبر لروحي وين نروح وماغاديش نعيش معاه وانا وبقيت في دار ومارديتش عليه وكي قرب العرس قبل سمانة طردني رغم انه كنت كي نروح للعرس نجيبله حقي في لحم والياغورت باش ياكلهم حتى فدار كنت حقي كامل نمدوه ليه وديما نعش قشه شوية برك نجري نغسلهم وأذ طاح زر نروح نخيطهوله باش كي يخرج من دار يخرج يشعل ونفرح بزاف كي نشوفه طلع شباب وخير من الاخرين كي شغل وليدي حبيته كيما ولدي وهو أكثر واحد حبيته فدار لأني ربيته من صغره وفالاخر الخير نتاعي رماه فالبير وروحت نشكي لخويا الكبير وجا عنده زعما باش يبجلي حقي بصح قالي نستناو بعد العرس يفريوها وخويا الكبير طميني بلي يرجعني لدار بسيف عليه وكي دار العرس مروحتش عنده أصلا ماجا ماسقسى علي ومبعد كي فات العرس زعما فروها بيناتهم وكيفاش فروها خويا الكبير كذب عليا وشاف لمصلحة نتاعه خويا صغير شرا حق خويا الكبير فدار وشار حقي وحق اختي ولعلمكم انا مدلي غير 20 مليون زعما هذا هو حقي فدار واختي ثاني 20 مليون وخويا الكبير مدله كثر طبعا وهو باع قطعة ارض دار به العرس ولتبقى وزعه علينا علجال دار هذا للعلم اننا عندنا اراضي بصح قبل مايخطب خويا قسموها هو وخويا الكبير وحنا مضينا لهم باش يقاسمو بيناتهم برك يعني تنازلنا عن حقنا وهذا شي يديروه كامى نساء عندنا وين نسكن عيب طفلة تطلب حقها وأنا دركا ندمت لدرجة نعض صباعي منت نشوف للعادات كان لا م نشول لروحي خصوصا وانا عزباء بصح كنة غافلة بزاف اما على 20 مليون نتاع دار أنا زعفت بزاف لأنه واش ندير بدرهم أنا حابة درانا حابة نستر روحي فدارنا بصح كي زعفت على خويا الكبير قال خلاص أنه أتفق هو وياه وقالي أختك ماشكتش انتي تشكي وانا اتصلت باختي باش ترفض حتى هي بصح قاتلي لالا مانحبش ندير مشاكل مع خوتي مع العلم البيعة غير قانونية يعني بالهدرة برك دركا أنا رجعتله دراهمه وهو بعثليهم مع واحدة قالي يا تقبليهم يا ترميهم دار مستحيل ترجعيله شديت عليه الكبار والو ماسمع لحتى واحد وكبار العيلة نصحوني أني نعيش مع خويا الكبير وخويا الكبير كان حضر ووعدني قدامهم بلي ماعندي مايخصني معاه وروحت وانا ماعندي ماندير لانه حشمت نشكي بخويا لبوليس انا متربية وبنت أصل وهذا شي مراهش موجود عندنا يعني لو كان نشكي غادي يدرولي حكاية وغادي نكون أول واحدة سكت بسيف علي وروحت لدار خويا وهم عددهم بزاف ونخدم بزاف لازم نخدم مثل الألة باش مرت خويا ترضى علي وكي نقولها مريضة تظل مشنفة طول الوقت يعني لازم تشوفني برك نخدم حتى لو كان نموت منغيضهاش وكي نخدم نشوفها تتبسم وتهدر معايا عادي يعني باش نري البسمة نتاعها والهدرة منها لازم نخدم بلا مانقول أح حتى ظهري ولا مقسوم نصفين منقدرش نرقد بليل كي شفت روحي هكذا قلتلها مانخدمش وحدي بناتك ثاني لازم يخدمو زعفت وصرت نتاعفر معها وخويا ديما بصفها ومرته سمعتها تقول لخويا بلا ماتسحقنيش في دارها وبلي نغير من بناتها وكي سمعتها اتصلت بأختي وحكيتلها كيفاش نعيش ويظلموني وأختي بدات تلقاى أعذار لمرت خويا بلي لازم نسعفها وبنات صغار ووو رغم ان بناتها واحدة 19 سنة خرجت من المسيد وقاعدة فدار وثانية عمرها 23 سنة مخطوبة وتقرا بصح دركا فكونس تقدر تعاوني بصح هما مايخدموا حتى حاجة وزواخات بزاف مرتحتش كامل فدارهم وخويا يعمروله راسه عليا وأختي تقولي بلي أنا لازم نفههم شوي الكبيرة تقرا وثانية صغيرة يعني ظلمتني أنا وهدرت معاها مرة أخرى كنت نبكي قلتلها نجي ليك وراني نسوفري حسيتها محبتش كامل تسمعني ومبعد زعفت منها ومبعد اتصلت بيا قالت بلي أنا مانفهمش ناس ونلومهم وأني انانية ومافكرتش فخويا واش يقوله عليه ناس قاتلي ماشي بهدلتي بواحد حتى ناس كامل سمعه وولا يحشم من ناس ودركا حبيتي تبهدلي بثاني قالتلي كيفاش تجي عند نسيبك وتخلي خوك هكذا غادي تفتحي البيبان لناس يهدرو عليه ويقوله بلي مادارش معاه واجبك و قالتلي وواش يعرفك بلي راجلي غادي يقبلك ومرانيش وحدي باش نقرر وقالتلي بلي راجلها أخته ماغاديش يقبلها مابالك أنيا يعني خرجتني انا لماشي مليحة انا نسوفري وهي تقولي نبهدل بيهم يعني لازم يذبحوني ونسكت باش مايتفضحوش وفالاخر لصقت تهمة على راجلها مع العلم زوجها مليح بزاف وديما يسمع لهرتها واش تقول عليه يديره وهي كي خطبها شرطت عليه يكريها دار وحدها وهي لرفضت تسكن مع العجوزة ودار عجوزتها من الول وهو فلول كرا ومبعد شر دار عدل وبديون ثاني حتى دركا مزال مردش ديونه كامل واهل راجلها نفتهم ممنوع يروحه عندها ، انا تعارفت معها وكوبيت عليها ومبعد ستنيت يومين اتصلت باش نطلب سماح وأنا مكنتش غالطة بصح قلت نعفس على كرامتي وهي تكوبي في وجهي محبتش ترفد وجات لدار خويا مايقمتنيش خلاص سلنت عليها وطلبت منها سناح مردتش كامل عليا وكي شفت زوجها برا كي خرجت نحوس على فلي صوصيال عرضني باش نزورهم وقلتله بلي اختي زعفت عليا وكي سقساني علاه حكيتله وأنا محكيتلوش باش يتعافرو بيناتهم برك كي سقساني لقيت روحي نهدرله لأنه خبيت همي في قلبي ومكنش ليسمعني كنت راح نطرطق لو كان جربتم شعوري غادي تفهموني وهو تشوكا مسكين قالي معلباليش بلي هي هكذا وقالي بلي ديما يقولها نجيبوها تعيش هنا خير مسكينة تسوفري تشوكا مسكين حتى ولا مايعرفش كيفاش يدير وكي وصل لدار معالباليش واش صرا بينهم بصح هي اتصلت بخويا الكبير شكتني ليه وكانت تبكي بلي أنا حابة نطلقها من راجلها وبلي نديرلها مشاكل بصح علاه ماتصلتش بيا أنا علاه أتصلت بخويا ومبعد خويا ومرته كامل جاو ضدي ولاموني ديما أنا لغالطة حتى واحد ماجرب يسقسيني ولا يفهمني أي واحد يكره ثاني يردو ديما غالط وطبيعة مرته وبناتها محبوش يطلقو سيرة ويقوله بلي نغير حتى من أختي وحبيت نطلقها من راجلها مابالك هما ولاو يضحكوا كل شي بيناتهم وكل واحدة تنادي لاخرى بايرة ومبعد جات عند خويا ماهدرتش كامل معايا وانا قويت روحي وروحت نسلم عليها وقفتني باش مانسلمش طلبت سماح منها وقلتلها مكنش عندي نية خايبة بصح هي شافتلي بواحد الخزرة مننسهاش طول حياتي ومبعد خرجت لا قيمتني كأنني غير موجودة والأهم انها ولات تشيت لمرت خويا وبناتها بعدما كانت متتحملهاش و كي راحت البحر غير كيما دات بنات خويا معاها قعدوا اربع وانا ماقيمتنيش خلاص والأهم ولات تشيتلهم ماشي نو مال ولات تجي بزاف عند خويا وانا ستنيت شويا طلبت سماح منها لثالث مرة وهاذي المرة ماشفتش فيا خلاص وماتقيمنيش كامل وتشيتلهم باش تديرلي زكارة والاهم أنن واحدة جارتها وصحبتها قاتلي كي تلقيت بيها برا علاش ماتروحيش عند أختك انتيا جايحة قاتلي بلي أختي ديما تقولهم بلي أنا منحبش نروح عندها ونا سكتت محبتش ندير مشاكل اكثر كلهم طلعوا ناكرين الخير وأنا ضحيت علجالهم مراهمش يشوفني عبد ولا واحد فيهم يخمم عليا وأنا لخلعني أختي جامي تصورت ديرلي هكا انا كنت ديما نخمم عليها خفت ماتولدش وكنت ديما نسقسي ناس يمدولي الوصفات للانجاب وكنت نسقسي حتى فالانترنت جبتلها شحال من عنوان لطبيب اعشاب ورحت حتى عند راقي وكنت نرفد زوج بدونات نتاع خمس ريتلات يعني 10 ريتلات في يدي وراقي كان بعيد يعني نمشي بزاف حتى نوصل نركب فلكار . كي طلبت سماح رفضت ولات تديرلي زكارة كل هذا باش برك مانسكنش معها وباش ماترفدنيش مع العلم انها لو كان غادي تربح فلافير لأني غادي نعاونها ،دركا خلاص شفتهم على حقيقتهم وليت نشوف روحي مقطوعة من شجرة مانقدرش نعيش مع هذا راجل لهو إبن أمي وأبي ومرته وبناته ماعنديش وين نروح حابة نرجع لدار بابا قلولي كيفاش ندير راني دركا نخمم في حل انه نشكيه لبوليس خويا صغير عفوا ولد بابا ويما نرجع بسيف لدار دركا موليتش كي بكري نخاف واش يقوله علي ناس حتى واحد مراه فبلاصتي ولا عايش حالتي وحتى واحد مايسقسي عليا وهذا ماشي ضد دين هذا حقي وبصح علبالي بلي كي نرحع غادي نطيب وحدي ونصر ف على روحي لانه دركا قاطعني مابالك كي نشكي عليه صح كاين زوج مشاكل هنا الأولى مرانيش قارية خرجت من سويام وماعنديش دبلوم وفيلي صوصيال راني نجري عليه كل مرة واش يقوله لي شديت بزاف ناس يساعدوني بصح مزال مابان والو . وكي مايصحليش واش نقدر ندير زعما انا شاطرة غير فشغل دار المطلوع خليته للاخر محبيتش نديره لانه في تعب وانا ظهري ولا مريض من شغل مع هذوك ناس حابة حاجة لمتعبنيش ياريت تقترحوا علي اعمال تناسبني وحاجة ثانية خايفة هذاك يطلب نرجعله دراهمه لمدهملي لأنه كليت منهم خمس ملاين بقاو برك 15 مليون منين نجيب خمسة ملاين هذا مبلغ كبير حتى واحد مايمدهولي واذ قلتلي وين صرفته نقولكم صرفته فطبيب فلراديو على ظهري ودوا كلهم بدراهم وشريت بيهم زعما ماطلة وفراش لانه كنت نرقد على الارض عند هذوك دعولي يفرجها ربي لانه دنيا صعيبة بزاف عليا والواحد اذ مات أهله يغسل يديه بجافيل ماكان حتى واحد مور أهله من البشر و إذ تقوللولي تزوجي نقولكم حتى واحد ماخطبني مكنش زهر شديت بزاف نساء يجبولي مكنش يشوفني مايرجعوش زواج نحيته من بالي لأنه مستحيل أدعولي دركا حابة برك نرجع لدار بابا ندي حقي فيه مانشوفهم مايشوفني نطيب في شومبرا نتاعي المهم نرجع ليه مرات نقول نحمد الله لأنه مرني بهذي الأزمة باش نكتشفهم على حقيقتهم ودركا مرانيش كامل نخمم عليهم ونحيتهم من حياتي كامل لملقيتوش في وقت ضيق مانسحقوش بعدها. ودار العجزة لازم يكون عندي شهرية مايقبلونيش بلا شهرية سقسيت عندهم كان جا عندي شهرية كنت سور ندخل ليها باش نبهدلهم بصح الله غالب ولقهرني أني مانقدرش نحكي لأنهم يزعفوا يعني لازم يدرولي شر ويعفسوني برجليهم ولازم نسكت إذ نطقت يزعفوا باش مايتفضحوش لازم نسكت اصلا هما حتى كي سكتت مانحكيش مخلونيش طرونكيل أختي تقول انا لمحبيتش نسكن معاها لكل ناس وخويا الكبير ومرته خرجوني انا لمرانيش مليحة وغيورة وبلي وواعرة وخويا صغير ومرته الله أعلم واش يحكيو أكيد خرجوا ألف قصة وقصة
مع العلم دار بابا كبيرة اربع غرف كبار وصالون وكوزينة ودوش وزوج طولات وحوش فالوسط والغرف منا ومن الهيك شحال زعما يصحلي منهم ليفهم بالقانون لانه حبيت تصحلي غرفة اخرى نديرها كوزينة .عاونوني.

[ع.عيسى]

لا حول ولا قوة الابالله العلي العظيم ...قصتك تقطع القلب ..اهربي لربي .يفرج عليك ...42 سنة ماكش كبيرة حتى تيأسي من الزواج ....الزواج هو افضل حل ليك ...ربي يفرج عليك بزوج صالح يسترك ...وكلي امرك لله عز وجل ..وتيقني ان الله يفرجها عليك

[وَحْـــ القلَمْ ـــيُ]

السلام عليك
أعتذر اختي
موضوعك طويل وحجم الخط صغير
أنا قرأت المقدمة وقليلا من المنتصف
إذا انت قادرة على التحمل اصبري لوجه الله
واذا استطعت العمل من الافضل ان تعملي

والإسلام لايمنعك من استرجاع حقوقك

اذا رأيت صمتك يجلب لك المذلة والنكد ولاتستطيعين الاحتمال

فاذهبي للشرطة
هذه حياتك
هم لم يحترموك فلماذا انت تتخلين عن حقك؟
فرج الله كربتك اختي

[~ابتسامة~]

ربي يفرج عليك ختي والله يهدي خاوتك انا تبالي جري مور حقك غير متسمحيش فيه بيسك يجي وقت يطردك من الدار ولا يديرلك مشاكل الله يستر عليك

[سجل انا عربي]

صراحة مشكلتك تقطع القلب حقا الحل الوحيد هو وكلي امرك لله و ابحثي لنفسك عن عريس اسالي نساء تكون لديهن معرفة مثلا يشتغن كا منشطات في مسابقات دينية و كذا

[نجاة^^]

غريب مجتمعنا طلب الحق وما فرضه الله على عباده اصبح عيبا ، وهذا ماتفعله كثير من النساء التنازل عن حقوقهن مخافة فساد العلاقة الأخوية ،انصحك ان لا تتخلي عن حقك في البيت لانك إمرأة ولا يمكنك العيش وحدك ،فالمبلغ المالي لن يكفيك حتى لإستأجار بيت لمدة أكثر من عام .
إذا لم تجدي حلا بالتي هي أحسن اظن الشكوى ضده هي الحل ،ربي يرزقك زوج صالح 42 سنة هناك فرص لبناء اسرة ان شاء الله ،و ابحثي عن عمل ولو في مطعم او مصانع الاغذية ....الخ على الاقل تستفيدي من المنتوجات المهم رزق حلال ،فلا تيأسي اخية سيعوضك الله خيرا على ما فعلتيه مع اخوتك حيث كنت بمثابة امهم خاصة الصغير منهم .
الله يعينك .

[ابن الجزائر11]

عليك بالدعاء والالتجا ء الى الله فأمره بين الكاف والنون
لا تقنطي من رحمة الله

فرج الله عنك

[نـور الإيمان]

ربي يفرج عليك اختي ولك منا خالص الدعوات في هاته الايام المباركة
من اي ولاية انت؟

[بشـرى]

ربي يفرج عليك أختي ، حكايتك تقطع القلب صح ...

[قلب امرأة]

اختي كان الله في عونك حبيبتي لكن عليك انت بالمبادرة لحل مشكلتك وان تكوني اقوى مما يتصورونه منك عليك بالدعاء فدعوة المظلوم ليس بينها وبين الله حجاب كذاك عليك بالمطالبة بحقك وبما ان التحويل لاخيك الصغير لم يكن من خلال اوراق رسمية فذلك سيسهل عليك الامر كثيرا ولا تبيني لهم ضعفك فهناك الكثير ممن لا يرحم الضعيف بل يحاقره ...اذهبي لبيت والدك وطالبي اخاك ولو بغرفة تكون لك تحفظ كرامتك المبعثرة بين اختك واخويك وزوجة اخوك وبناتها*

اسال الله لك خيرا*

[الطيب الجزائري34]

victor hugo كتب رواية البؤساء في 1862 لكن في حياتنا الحالية فيه من يزرع البؤس في نفوس الناس و من الاقربون... ربي يفرجها عليك.
الانسان لي ما خممش فيك ما تخمي عليه روحي لمحامي و فهميه هو يساعدك لان الحقارين لازم يفهموا بلي ما ناش في غابة

[آسيا 25]

السلام عليكم
أختي المبلغ اللي مازال عندك روحي أجري بيه على روحك و وكلي محامي يجيبلك حقك بالقانون, ربي يفرج عليك إن شاء الله ما فهمتش وش بيه المجتمع تعنا, يا إما تلقا الأخ مطيش مرتو و مفرط في حقها على جال أهله يا إما تلقاه مطيش أهله و خواتاتو على جال مرتو; النورمال قلة قليلة!!!ربي يجيب الخير.

[رندة.]

ربي يفرج عليك ويهدي أخواتك ان شاء الله.

[élena]

لا حول ولا قوة الا بالله العظيم...والله سقطت الدموع و انا اقرا قصتك....فرج الله همك وانا احسست بكل ما عانيته مع اهلك...

[بـــيِسَة]

ربي يفرج عليك اختي اشتكي ربي صبحااااااااااااااااااااااننو