ماعندكش ني لحم ني جاج سلكي راسك......بطاطا بالزيتون الاسود

ريم الفلى · 2013-02-23, 13:52

السلام عليكم حبيباتي ان شاء الله تكونوا ملاح بزاف هههههههه

اليوم تاني جبتلكم وصفة ساهلة ماهلة والنتيجة باينة " بنة لا تقاوم" وبمقادير بسيطة موجودة في أي بيت بما انني ماكان عندي لا جاج لا لحم ههههههه "عام القحط" ههههههههه مالا خممت في غدا واللي هو
- سلاطة خضراء عادية
- بطاطا بالزيتون الاسود
- مطلوع هههههه زعمة فحلة
بلا ما نزيد نطول نبدا بالمقادير
(مرنيش رايحة نحدد الكمية لان كل وحدة تعرف ناسها والكمية تكون على حساب عدد الافراد اللي رايحين يديرو همهمهمهم هههههههه)
زرودية، بطاطا، 4 فصوص ثوم وزيتون اسود

بلا ما ننسى الزيت، الملح وبعض التوابل انا درت (كمون، كروية، ززريعة البسباس، حبة الحلوى) حنا مخلطينهم كامل مع بعض.
طريقة التحضير:
اولا نرابيو الثوم

ونديرو تالزيت شوية برك في الكسرونة حوالية 2 مغارف

ونحطو الثوم يتقلى مع التوابل وشوية ملح

ثم بعد ما يتقلى الثوم نزيدو الزرودية المقطعة مكعبات صغيرة طبعا اذا كان عندك الجاج او اللحم تقليه مع الثوم من بعد تزيدي الجزر

ونحركوها جيدا مع الثوم والتوابل

ونغطيها ونخليها تتقلى مع الثوم والتوابل مليح مليح

من جهة اخرى نحط حوالي 2 كيسان ماء يسخنو في طاوة اخرى

ونقطعو البطاطا دوائر

وبعد ما تتقلى الزرودية مليح نزيدو الزيتون

من بعد نحرك ونزيدو الماء السخون ماشي بزاف غير قيس ما تتغطى الزرودية والزيتون برك

هاهو كي زدت الماء وحركتو

من بعد نغطيها ونخليها تصيب مليح

في هادا الوقت زعمة كي الشاطرة رحت نطيب المطلوع هههههههه

هاهو مطلوعي زعمة زعمة ههههههههه

من بعد قليت البطاطا

وهاهي كي طابت ملحتها وملحتها شويا

شوفي الزيتون والزرودية نشف وشرب المرقة

نزيدو البطاطا

ونحركو هكا

وهاهي واجدة وطبعا الديكور كيما تحبي

وهادي سورة اقرب لكل حبيبات قلبي من المنتدى

نتمنى تجربوها طعمها هاااايل ومتقولوش الزيتون لكحل يطيب كيفاش صدقوني رااااااااائع.

imana · 2013-02-23, 14:09

ya3tiik sa7a jat hayla w matlo3 thaniii

dahbia2009 · 2013-02-23, 14:11

ما شاء الله
يعطيك الصحة طباق اقتصادي

هند222 · 2013-02-23, 14:12

الحمد لله لحقت على الطبسي الأول

راهي جاتك تهبل
والشطارة باينة بلي مرة ونص و25

ربي يبارك فيك

اكيد راح نجربها

والمطلوع خرج يهبل

4444444444444444444444

ريم الفلى · 2013-02-23, 14:17

اقتباس:

المشاركة الأصلية كتبت بواسطة imana

ya3tiik sa7a jat hayla w matlo3 thaniii

شكرا على الرد نتمنى تجربيها راهي بنينة بزاف

ريم الفلى · 2013-02-23, 14:20

اقتباس:

المشاركة الأصلية كتبت بواسطة dahbia2009

ما شاء الله
يعطيك الصحة طباق اقتصادي

شكرا على المرور بالموضوع جربيها ومتندميش علبها

*اية* · 2013-02-23, 14:24

يعطيك الصحة

بسمة تحدي · 2013-02-23, 14:36

يعطيك الصحفة فحلة مشاء الله

ريم الفلى · 2013-02-23, 14:43

اقتباس:

المشاركة الأصلية كتبت بواسطة هند222

الحمد لله لحقت على الطبسي الأول

راهي جاتك تهبل
والشطارة باينة بلي مرة ونص و25

ربي يبارك فيك

اكيد راح نجربها

والمطلوع خرج يهبل

4444444444444444444444

ان شاء يا رب والمرة الجاية نحطلك سر المطلوع تاعي هههههههههه احم احم احم