مطلوع الشحمة

إلهام07 · 2013-02-12, 09:25

الوصفة السادسة

السلام عليكم يا حراير ، كيما تعرفو هاذو ليام الثلج راهو داير حالة هنا في سطيف ، وحرت البارح مع هذا البرد واش ندير للعشاء ، خممت نطبق وصفة كسرة الشحمة نتاع الشاوية بصح قلت راهي ثقيلة ومن بعد قلت ندير المطلوع المحشي نتاع أم رامي مالقيتش عندي المكونات نتاع الوصفة وغاضني بابا نخرجو في هذا الثلج يشريلي ، قلت و علاش ما نديرش مطلوع الشحمة يجي بنين وخفيف على الكسرة و مليح في هذا البرد .
1- حضرت عجينة مطلوع عادية ( شرينا دقيق نتاع قزوط يهبببل ، المطلوع نتاعو روووعة ). درت 8 قرصات صغار ، طاحو كتافي وانا نعجن.

2- حضرت الحشوة : ذوبت كمية مليحة نتاع شحمة و قليت فيها 3 حبات بصل أخضر كبار + 3 حبات جزر مرابيين ( مسكرفجين) + 5 فصوص ثوم مقطع + شوية فلفل حار مقطع رقيق + دبشة مقطعة رقيقة + شوية ملح ( مل تكثريش لأن الشحمة مالحة )، كي ذبلو مليح أضفت 3 حبات طماطم متوسطين مقشرين ومرحيين + هريسة + فلفل أحمر + كسبر + حبة حلاوة +رند ، كي يطيبو مليح ذوقي إذا تحتاج تزيدي ملح زيدي .

3- نطرح القرصة الأولى و الثانية رقاق ونحط الحشو فوق وحدة ونغطيها بالقرصة الثانية و نغلق الجوانب مليح وإذا تحتاج تزيدي تطرحيها زيدي أطرحيها شوية وهكذا حتى نكمل .
4- نطيبها في الطاجين نتاع المطلوع ونحاول ما نحركهاش بزاف وما نقلبهاش حتى الطيب مليح باش ما تتحلش، أنا جاوني القرصات كبار قد الطاجين ( مع أن الطاجين نتاعي كبير ). تحصلت على 4 قرصات كباااار ، شوفو القرصة قدماش كبيرة:

شوفو شحال هشوش من داخل :

هنا قطعتهم ، مدو يديكم ما تحشموش راهو الخير بزاف

:

راهي بنييينة

، جربوها خصوصا في هذا البرد

أم ماجد · 2013-02-12, 10:44

أنا اول واحدة رايحة نمد يدي الهام جاك هايل ارواحي لسوق دبي واشتري عجانة والله غير تنحي شدة اليك طريقتي

https://www.djelfa.info/vb/showthread.php?t=1205081

إلهام07 · 2013-02-12, 10:51

اقتباس:

المشاركة الأصلية كتبت بواسطة أم ماجد

أنا اول واحدة رايحة نمد يدي الهام جاك هايل ارواحي لسوق دبي واشتري عجانة والله غير تنحي شدة اليك طريقتي

https://www.djelfa.info/vb/showthread.php?t=1205081

ربي يخليك أم ماجد ، عندي عجانة دوريجين هايلة kenwood ، بصح العجين نتاع البارح بزاف وأنا خشنت راسي حبيت نعجن بيدي ، 2 مرات الأخيرة استعملت طريقة الكيس المبلل و البارح حبيت نلعبها سوبرمان هههه.
راني شفت الموضوع نتاعك ، بصح قوليلي المطلوع نتاعك حشيتيه قبل ما يطيب كي قرصتيه أو بعد ما طاب؟

feuilleblanche17 · 2013-02-12, 11:03

شكراااااااااااااااا

إلهام07 · 2013-02-12, 11:49

اقتباس:

المشاركة الأصلية كتبت بواسطة feuilleblanche17

شكراااااااااااااااا

العفو ، شكرا على المرور

بريق الامل& · 2013-02-12, 11:54

اممممممممممممممممممم روعة يعطيك الصحة ادير الطاقة في هذ البرد

ام ولي · 2013-02-12, 11:56

مشكووورة اختي جاتك تهبل باين المطلوع تاعك روعة ومنفش ممكن الطريقة إذا أمكن

إلهام07 · 2013-02-12, 12:12

اقتباس:

المشاركة الأصلية كتبت بواسطة بريق الامل&

اممممممممممممممممممم روعة يعطيك الصحة ادير الطاقة في هذ البرد

اللله يسلمك حنونة ، تفضلي ذوقي بالصحة

اقتباس:

المشاركة الأصلية كتبت بواسطة ام ولي

مشكووورة اختي جاتك تهبل باين المطلوع تاعك روعة ومنفش ممكن الطريقة إذا أمكن

الله يسلمك أم ولي ، الطريقة جد عادية ، حطيت سميد ( السميد نتاعي ماركة قزوط يهبببل وحدو يجي روعة ) و حطيت 2 ملاعق كبار سكر و ملح + جنجلانية + سينوج + خميرة الخبز ( طبعا كي عاد البرد وأنا الكوزينة نتاعي باردة كثرت شوية الخميرة ) و حطيت شووووية محسن الخبز ( أنا ماشي مالفة نديرو بصح كي عاد البرد حطيت شوية ) + ماء دافئ حتى تحصلت على عجينة طرية و خليتو خمر ثم زدت عجنتو مليييح و زدتلو شوية ماء ، لازم مايكونش جاري بزاف في هذه الوصفة وإلا تحصلي معاه هههه ، ثم قسمتو قرصات و دخلت فيه شوية زيت باش ما يلصقش و كي يبرد يبقى طري ( حوالي 1 ملعقة زيت لكل قرصة ) و خليتو ريح حوالي 15 دقيقة في المناديل ( لقيتو خمر ) قرصتو و الباقي واضح .
* ملاحظة : أنا لما يكون السميد ماشي مليح أو أول مرة نجربو ونخاف منو يبهدل بيا ، كل قرصة نزيدلها 1-2 ملاعق فرينة قبل ما نجمع العجينة بالماء ، يجي