في شهر رمضان
أنا كي كنت في الخامسة والا الرابعة هكاك كنت صايمة زعما زعما مالا دارتلنا ماما لفلون flan و أنا كنت اللي نحطو في الصحون امالا ساح شوية منو في السينية مالا بديت نلحس فيه . ومبعد فقت رحت للدوش نشلل فمي وكملت النصف ساعة لخرى اللي باقية حتى المغرب ههههههههه وواحد ما فاق خخخخخخخ
في المدرسة
في الأولى متوسط كنا أنا وصحاباتي مقلبين المتوسطة بصح كي نكونوا في القسم نكونوا كي الملايكة خخخخخخ امالا نهار أنا وصحاباتي قاعدين نحرضو في التلاميذ باش نديروا اضراب خخخ و أنا اللي جبت الفكرة بصح انسيت المناسبة المهم !!! شافتني الأستاذة نتاع الفرنسية و ماتت من الضحك و أنا غير قاعدةنهدر وهما لكل ساكتين كي شافوها ومبعد قلتلهم علاش سكتيو ومبعد درت ورايا ونشوفها ميتة بالضحك ما قيت وان نحط وجهي روزمو بدلت المتوسطة ولا تبقالي عقدة طول دراستي هههههههههههههه
في المنزل
مالا كان بابا و ماما ناعسين و أنا و أختي و أختي لخرى مدايرينها عرس فيالصالون وقاعدين نشطحو و نطيشو في الوسايد و خلي وخلي
و مبعد سمع بابا الحس و جا لينا و قانا نشطحو هوما شافوه قعدو و أنا نغني ونشطح و حاليتلي ومبعد ما حكمش روحو من الضحك وشفتو تمنيت في هذيك اللحظة تبلعني الأرض
مع الجيران
في الشهر اللي عدا صرات هذي امالا هاذا صحيبو لي بابا في وهران عندو دار ختو في الباتيمون نتاعنا امالا بعت لبابا أمانة و راقي وحوايج كيما هاك وقالي بابا روح اديهم لداروا و أنا نعرفها مليح ملييح بصح كنت نتفرج في باب الحارة امالا قلت كي يديروا اشهار نروح وكي داروه رحت نجري ما نشوفش ورايا خلاص مديتو لوحدة لمرة مانعرفهاش قلت ماعليش بالاك ضيفة نمدهولها وخلاص ورجعت نجري و مبعد شاف معاي بابا و قالي مستحيل تكوني مديتيه بهذه السرعة وبعد قتلو والله والله مديتهملهن ومبعد كملت باب الحارة ضربت العشرة نتاع الليل ومبعد عيط صحيبو اللي بابا و قال ما وصلتلهمش الأمانة و أنا استغربتو قاعدة نحلف ونتكتف وصلتهملم وصلتهلهم مبعد فكرت وقلت بالاك عطيتهم للدار اللي تحتهم و لا اللي فوقهم رحت للدار اللي فوقهم قالولي لا لا ورحت اللي الدار اللي تحتهم خرجتلي هاذيك المرة وقالتلي هاك هاذي موش تاعنا . و قلتلها في قلبي درك عاد وان تقول المهم قضيتها ليلة كحلة وخاوتي يعيروا فيا حتى لددوركا و صحيب بابا مزال متحلف فيا هههههههههههههههه
وانتوما نتاني اذا كانت عندكم قصص طريفة ومضحكة حصلتلكم شاركونا بيها و أنا راني نعصر في مخي باش نجيبلكم قصص أخرى و إذا شجعتموني بالردود و بالشكر سأأتي لكم بقصص و مواقف أخرى
باي
مع السلامة