أرجو مساعدتي

[مشكلتي]

انا متزوجة و عندي ولد 6 أشهر و أعمل و مرسمة في عملي و ليس لدينا سكن مستقل لأن زوجي في الدرك و يأتي مرا على مرا و انا عند أهلي و عملي في نفس مكان أهلى و لما يجي نروحو عند أهله يبعدون عنا ب80 كلم و كي نروح أعامل اسوء معاملة أصبر فقط و اتجاهل و اتنازل حتى تفوت المدة بخير و زوجي مانقولهش وهو يحسبني راني لاباس في دارهم و انا كارها حياتي اتظاهر فقط و المشكلة الكبيرة أن زوجي حول الى ناحيتهم للعمل فترة 8 أشهر فقط و هو يجبرني اان اتوقف عن العمل لمدة 8 أشهر و اعيش معهم

أعينوني

[nihal159]

ديري كونجي صون صولد؛ و قعدي مع زوجك أفضل لك؛ وزيد مدة 8 أشهر ماشي مدة طويلة؛ لعلّ فيها خير وأنتِ ماعلابالكش؛ ممكن هذي الفترة لي تسكني فيها مع أهل زوجك؛ يعرفوك فيها مليح و العداوة تنقلب إلى محبة( وعسى إن تكرهوا شيئا و هو خير لكم)

[عفاف المنتدى]

حاولي تتقربي منهم هوما راهم يشوفو فيك بلي بعيدة عليهم وانتي قلت غير كي يكون راجلي هنا نروح عندهم وهذا ليس عدل علاش نورمالمو تزوريهم دايما حتى و يكون راجلك ماشي هنا راهم يتوحشوك ويتوحشو ولدك انا نظن الغلطة تاعك نتي لي بعدتي عليهم قيسيها على نفسك

[أم ريتاج زهرة]

أنا من رايي أختي ديري روحك منهم و هذا البعد اللي بيناتكم هو اللي يولد المشاكل و 8 أشهر مشي بزاف و تفوت غير العيب اللي يبقى حاولي تتقربي منهم و كيما هكا تنالي زوجك أكثر و أكثر بالتوفيق أختي

[مسلمة81]

ادي كونجي بلا خلاص و بالاكي تسمحي في خدمتك و اهلو كي تروحي عليك باحترام الوالدين اما الباقي حطيهم في مكانهم طبعا بعقلانية ماشي بالدواس

[blanche rose]

ربي يفرج عليك أختي

[blanche rose]

أختي..مادامك خدامة
تقدري تدي معاك زوج هدايا
وحدة لشيخك ووحدة لعجوزتك
وانويهم لوجه الله عز وجل
وباش راجلك يعجبو الحال..
ربي يسعدك

[souadamina]

مادام راكي خدامة وهو خدام يعني الظروف المادية راهي لباس أكرو دار لمدة 8 اشهر او سنة في المنطقة لراهو راح يخدم فيها هاكا تكونو قراب للأهل نتاعو وتزيدي تربحي المعيشة وحدك في بيت مستقل وتروحي لدارهم غير ضيفةوالعمل نتاعك هزي كونجي وريحي مع راجلك عيشو يامات وحدكم قوليلو راني حابة نكونو وحدنا باه مايقولش مابغاتش الأهل نتاعي .لازم تكوني ذكية حتا يالوكان تسلكي الكراء نتي المهم تربحي راحتك راني عايشة نفس الوضعية نتاعك وحاسة بيك ربي يكون فالعون.

[blanche rose]

عودة
السكن مع الأهل أمر يستهين به الكثيرون
لكنه أمر خطير ويؤثر على استقرار الأسرة
وكم من أسرة تشتت بالطلاق بعد أشهر قليلة..


أسرة داخل أسرة
المهم


اولا بخصوص العمل..خذي بنصيجة الاخوات اللواتي سبقنني
عطلة غير مدفوعة الأجر
فلا يمكنك أن ترفضي الذهاب مع زوجك

بخصوص السكن..جربي ما قالته الاخت سعاد
اطلبي منه استئجار بيت لتجدا راحتكما
ولتستمتعا بوقتكما معا

ان لم يقتنع
هنا لم تخبرينا عن مكانته في الاسرة الكبيرة
فزوجة الابن يتم التعامل معها على حساب مكانة ابنهم عندهم


مثلا تجدين ثلاث او اربع اخوة.. يتم التعامل مع زوجة كل واحد بشكل مختلف.

واحد يهابونه فلا يصطمون بزوجته ويضعون حدودا للتعامل معها.. حتى لا يصطدموا به
وابن ضائع مثلا لا يفيد بشيء..زوجته تهان مثله
وابن مدلل زوجته مدللة..
وابن سهل او دعيني اقول طيب ..يعلمون أنه لن يقول لهم شيئا فزوجته تعتبر سهلة ايضا..وبالتالي الظلم
..الخ

يعني حسب مكانة زوجك في اسرته ستكون مكانتك..
وهناك أهل يخافون الله فيلزمون حدودهم ولا يتجاوزونها بل وقد يصلحون ان حدث خلاف..هذا النوع نادر..أخشى عليه من الانقراض..

المهم أوصيك بأن لا تظلمي ولو كدفاع عن النفس ليكون الله معك..
خذي معك هدايا لوالدي زوجك..لوجه الله عز وجل ليكون معك..

وكما قالت احدى النساء في الانترنت
وقد لاحظت أن أهله يريدونه كخاتم في اصبعهم او يقولون عنها ساحرة..
دعيه يلبي كل رغباتهم ولا تحسسيه بأنك منزعجة..فتربحي راحتك..واستقرار اسرتك
وحتى تكوني بشوشة عندما يراك زوجك..

فإن كان كالخاتم في اصبعهم تركوك وشأنك..

ولا تتوقعي المشاكل في فكرك
فمتى توقعت المشاكل حدثت فعلا
وكوني ودودة ولا تكثري الكلام..لكي لا يكون هناك قيل وقال


والتقرب لله عز وجل مهم
كلام روتيني ..يقال كثيرا..هكذا يراه الكثيرون
لكن لو طبقناه سنجد أن حياتنا تتحسن كلما تقربنا لله عز وجل
حتى أذى الأشرار يقل..

ولا يسعني إلا أن أدعو أن يسهل الله عليك أمورك.. ويسعدك..

[thorpe]

قالك حبسي الخدمة حبسيها يا ختي علاه تخلقي مشكل بغير مشكل
الزوج اهم من العمل ومن كل ما تعتقدينه مهم
كون باباك قالك حبسي الخدمة يا بنتي كنتي تطيعيه
لكن زوجك نو ؟ لالا يا اختي نصيحة مني طاعة الزوج اهم من طاعة اوالدين في ديننا الحنيف
وقالك حبسيها حبسيها
مادامو خدام وقادر يعيشك مليح
للاسف بنات الجزاير فيهم عيب كبير
يحبو يتزوجو ويبقاو تابعين لدار اهلهم
هاذي اكبر غلطة واول اسباب المشاكل بين الراجل ومرتو
ربي يسهل

[yasmine700]

يا اختي مانيش عارفۃ علاه زوجۃ الابن دايما يكرهوها عندي نفس المشكل ديري في بالك الكنۃ لو كان دخل روحها في العسل ما يبغوهاش... يعني حتي ولو زرتيهم كل يوم وديتي الهدايا تلقايهم يحوسوا عل سبب اخر شا نقولك الشدۃ في ربي انتي تعرفي نوعيۃ زوجك لا سمح الله صرالك مشكل معاهم هل يوقف معاك ويدافع عليك ولا لا