الكسكي القبائلي

[kamilia-1997]

السلام عليكم
من يمكنه افادتنا بوصفة الكسكسي القبائلي و له جزيل الشكر

[lina lona]

الله يعطيك الصحة

[انا هي رزيقة]

اي نوع من الكسكسي راكي تحوسي اختي هناك انواع و اشكال و الوان . كاين بصوص الخضارو االلحم او بالبقول الجافة و الدجاج او بالخضر المفورة (المقفول) . وضحيلي سؤالك و انا في خدمتك ان شاء االله

[kamilia-1997]

المشاركة الأصلية كتبت بواسطة انا هي رزيقة

اي نوع من الكسكسي راكي تحوسي اختي هناك انواع و اشكال و الوان . كاين بصوص الخضارو االلحم او بالبقول الجافة و الدجاج او بالخضر المفورة (المقفول) . وضحيلي سؤالك و انا في خدمتك ان شاء االله

اريد وصفة بصوص الخضار و اللحم و بالخضر المفورة اذا كان بالإمكان

[انا هي رزيقة]

شوفي اختي كاميليا بالنسبة للطعام بالخضر المفورة حنا في منطقتنا نقولولو المقفول و حتى هو كاين بزاف انواع منه المقفول بالخضار و طريقتو
تفوري الطعام تاعك عادي و تفوري من جهة اخرى كل انواع الخضار لي تحبيهم (بصل زروديا لفت بطاطا جلبانة لوبيا خضراء كورجيت) مقطعين مكعبات كي يطيبو فوري الطعام تاعك التوفويرة الثانية ثم تخلطي الاثنين و زيدي عليهم زيت زيتون بسخاء يجيك امممممم هو يشبه لهذا
و تقدري ثان ديريه بالفول الاخضر و الجلبانة يعني تفوري الفول الاخضر مع شوية ملح و جلبانة حتى يطيبو (تقدري تديريه بفول وحده طبعا) ثم تخلطيلهم الطعام و زيدي زيت الزيتون يجي ثان امممم
و كاين ثان هذ الطريقة و هي
من وصفات امي يندار بالفول الاخضر احسن بصح هنا اختي دارت الحبات فقط لانها لقات القشور مشي شابين . في الاول تفوري الطعام تاعك اول تفويرة و تحطيه بجيه. ثم تحطي الفول في قاع الكسكاس و تخليه يدخلو التفوار قيس 5 دقايق ثم زيدي عليه طبقة من زروديا مقطعة الى مربعات متوسطة مشي صغيرة بزاف ثم زيدي طبقة لفت بنفس الحجم ثم طبقة من البطاطا و ترشي شوية ملح ما بين كل طبقة . هذي ميديررولهاش البصل و في الاخير تقدري تضيفي شوية جلبانة هذ اختياري . كي تطيب الخضرة تاعك فرغيها في جفنة كبيرة ثم فوري الطعام تاعك التفويرة الثانية و فرغيه مباشرة على الخضرة و خلطي ثم زيدي زيت الزيتون هنا ملازمش التقشف كوني سخية حبيبتي ... خخخ اتمنى انو الوصفة واضحة

إضغط هنا لرؤية الصورة بحجمها الطبيعي.

[انا هي رزيقة]

بالنسبة للطعام بصوص الخضار و اللحم امبعد نحطهالك بالتفصيل اختي دوك عندي شوية خدمة بصح استنايني نولي متخافيش و نحطلك احلى طعام ....خخخخ

[انا هي رزيقة]

راني وليت اختي خفت لوكان اومبعد نلهى بالخدمة و ننساك ....خخخخخ

الطعام بصوص خضار حمراء
اولا ننبهك اختي في منطقة القبائل ميقليوش لاصوص يعني ميحمسوهاش مايجعل طبخهم صحي الى ابعد الحدود. بصح الاجيال الحالية ولاو يعاندو و يحمسو اللحم مع البصل
بصح انا منعاندش ....خخخخ اذا نحط قدر و نملاه بالماء الى النصف و نحطوه يغلي كي يبدا يغلي ارمي فيه قطع اللحم تاعك (من المستحسن االلحم يكون فيه شوية شحمة) مع حميصة و حبة متوسطة بصل مقطع رقيق حذاري متسكرفجيهش و حبة طوماطيش صغيروة مقطعة بالماء تاعها و مغرفة الى 2 زيت زيتون و ملح و راس الحانوت و قصبر و شوية فلفل اكحل و شوية فلفل عكري و خليهم يغليو على نار متوسطة . اذا شفتي رغوة تكونت على سطح الصوص نحيها برفق بالملعقة . و زيدي نصف ملعقة كبيرة طماطم مصبرة اذا كانت كمية الصوص بزاف ديري ملعقة كاملة باه لون الصوص يجيك جميل و زيدي 2 الى 3 حبات زرودية مقطعة بالطول على حساب كمية الصوص لي رايحة تطبيها و خلي الكل يطيب .في هذ المرحلة تقدري اذا حبيتي تزيدي اعواد كرافز مقطعين بنفس الحجم تاع زروديا. من جهة اخرى تحضري الطعام تاعك و تفوريه التفويرة الاولى فوق الصوص باه ياخذ النكهة تاعها

نولي للصوص كي تنحي الطعام زيدي فيها حبتين او ثلاث لفت مقطعين بنفس حجم الزروديا هنا اذا كان اللفت في وقته يعني طري سينو اذا شفتيه جاف شوية حطيه في الاول مع الزروديا . و خلي يطيبو دائما على نار متوسطة الى هادئة و لازم تعسي على كمية الماء في الصوص اذا شفتيها ناقصة زيديلها ماء سخون لازم سخون. و ذوقي الصوص تاعك اذا تسحق ملح او لا . كي تشوفي اللحم تاعك قريب يطيب زيدي في الصوص كورجيت بنفس حجم الخضر السابقة مع حبة بطاطا صغيرة مقطعة. و تقدري ثاني تزيدي لوبيا خضراء مقطعة بالطول ايضا بعد متغليها باه تنحيلها هذاك اللون لي مشي شباب لي تطلقو في الماء. . انتي و ذوقك و على حساب المتوفر . ثم فوري الطعام التوفويرة الاخيرة و ادهنيه بزيت الزيتون . و زيدي دوقي الصوص تقدري تضيفيلها رشة قصبر للبنة ملاحظة نفس هذه الصوص تقدري ديريها بالدجاج ففقط في هذه الحالة زيدي فيها شوية قرفة
يجيك يشبه لهذا .حنا لقبايل نحطو الطعام وحدو و االلحم وحدو و الصوص وحدها و كل واحد يسقي على هواه

[wahibaazel]

تسلم الايادي اختي رزيقة
حبيت نستفسر كل الاطباق ماتحمسيش البصل.

[انا هي رزيقة]

المشاركة الأصلية كتبت بواسطة wahibaazel

تسلم الايادي اختي رزيقة
حبيت نستفسر كل الاطباق ماتحمسيش البصل.

اختي وهيبة مشي في كل الاطباق هي اطباق صوص الطعام فقط . يعني جدات القبائل ميحمسوش البصل مع اللحم او الجاج كي يديرو صوص الطعام . هما يحطو القدر فيه الماء حتى يغلي ثم يرميو فيه اي نوع لحوم و يزيدو البصل و التوابل الضرورية ثم الخضار. و هذ الطريقة معتمدة حتى في اعراسنا و صدقيني يجي اللحم طري زبدة و الصوص اممم ثم امممم و الاهم الاهم انها صحية الى ابعد الحدود
اما في الطواجن فعلى العكس نشفى جداتي االله يرحمها كانت توصيني ديما بتحميس البصل مع اللحوم و التوابل جيدا جيدا و بتقليل الماء كي نمرق

[kamilia-1997]

شكرا اختي رزيقة تسلم يديك ثانميرث انم
دي نروح لبلاد القبائل نشوفهم كيفاه اديرو الكسكسي افورو الخضرة وحدها و كي تذبال احتوها في الماء تزيد اطيب و ايفورو الكسكسي بعد ميغسلوه مي نسيت ادا بعد التفويرة لولا اديرولا شوية ماء و الا ماكالاه ؟

[fifi.fofina]

بارك الله فيك

[soso.samia]

بارك الله فيك

[انا هي رزيقة]

المشاركة الأصلية كتبت بواسطة kamilia-1997

شكرا اختي رزيقة تسلم يديك ثانميرث انم
دي نروح لبلاد القبائل نشوفهم كيفاه اديرو الكسكسي افورو الخضرة وحدها و كي تذبال احتوها في الماء تزيد اطيب و ايفورو الكسكسي بعد ميغسلوه مي نسيت ادا بعد التفويرة لولا اديرولا شوية ماء و الا ماكالاه ؟

الا راكي على الطعام تغسليه ثم تخليه حتى ينشف ثم تعاودي تفتيه ما بين صباعتيك ثم تفوريه التفويرة الاولى بعدها تفرغيه في الجفنة و تحطيلو ملح و حوالي 2 مغارف زيت زيتون و ماء غير بالشوية و تخدميه مابين يديك حتى تشوفيه ولى رطب عودي زيدي الماء حتى تشوفيه رطب و املس بين يديك . ثم خليه يتشرب هذاك الماء ثم عاودي فوريه التفويرة الثانية .
و بالنسبة للخضار اذا كان رايحة ديري بها مقفول خليها تفور حتى تطيب احسن باه تحتفظ بمكوناتها الطبيعية و متروحلهاش الفيتامينات في الماء .

[lama14]

بارك الله فيك

[sifo33]

4444444444444444444444444444444444444444444444444