دفتر مطبخي ركن خاص لمستمعي اسرار مطبخ دليلة** ملتقى حراير الجلفة **

[ياسمين177]

عجيجات بالكروفات:3 حبات بطاطة نقطعهم ونغليهم ونصفيها ونرحيها + 3مغارف كريم فريش+بيضة +معدنوس +ملح وفلفل+300غ كروفات +كمشة فرينة +بياض بيضة مضرب كالثلج نخلط بالعقل ندخلوه للثلاجة حتى يحكم شوية
نضرب صفار بيضة + بيضة كاملة
نشكل كويرات من البطاطة نغطسهم في البيض ثم في شابلير ونبسطهم ونقليهم
صلصة: نذوب 50غ زبدة +2 مغارف نشا + ملعقة اكل صلصة الصويا + كاس ماءعلى النارحتى تعقد وتقدم هذه الصلصة مع العجيجات.

[ياسمين177]

شفلور بالكبار والزيتون الاخضر
راس شفلور متوسط تقطعيه بوكي صغار يطيب لمدة 10د في الماء والملحنقطروه ونرحيه فلميكسور
ثم نضيف له 100غ زيتون مقطع دوائر +50غ كبار capres
+4 مغارف كريمة سائلة + ملح وفلفل+2 بيض ونخلط الكل 2 بياض بيض مضرب كالثلج ندير الخليط في مول مدور ونحطوه في حمام مائي في فرن 160د حتى يطيب

[ياسمين177]

اخواتي الكريمات الاخت ميميشة ربي يذكرها بالخير مراهيش تبان نشا الله يكون لمانع خير نشا الله
انا من متتبعات دليلة من البداية من 2003 وانا نجرب عليها وصفات قديمة مكنتش نصور بما انكن الان راكم كامل تعرفوها من خلال هذا الموضوع لتجرب اي وصفة
من وصفاتها تحطها في الموضوع لتعم الفائدة لان عندي وصفات تاعها بزاف ومجربين لكن بدون صور لانهم قدم وراح مرة على مرة نبحث في دفاتري ونكتب واذا جربت اكيد نحط الصورة
تحياتي

[ام مريم الجزائرية]

يعطيك الصحة اختي على الوصفات الرائعة
وفي نفس الوقت اسال عن الاخت ميميشة عندها مدة ماظهرتش ان شاء الله خير

[هم كريم]

جزاكي الله كل خير اختي ياسمين على المجهود الي راكي تبدلي فيه باش تفرحينا و تفيدينا بارك الله فيك
اما بالنسبة للوصفة الي طلبتها منك مشي هدي الي قدمتيهالي نشكرك عليها مكنتش نعرفها هدي جديدة عليا و الي بغيتها هي نفس المقادير الي مديتيهالي الصباح بزيادة النشاء و الله كانت عندي و ضاعت تجي بنينة بزاف جربتها في رمضان الي فات عجبتني المهم الف شكر ليك راني تعبتك معايا اختي سامحيني

[kokotg]

الاخت ميميشة مراهيش تبان نشا الله يكون لمانع خير

[عبير ريمة]

شكرا لكن على المبادرة الرائعة و جزاكن الله خيرا و انشاء الله ترجعلنا الاخت ميميشة بالسلامة

[راجية عفو الله]

السلام عليكم
اريد وصفة معجون الفراولة اللي قدمتها دليلة من قبل.
وشكرا مسبقا.

[ياسمين177]

اختي نعطيك وصفتي مجربة مرارا وتكرارا ونشا الله مبعد نحوسلك على تاع دليلة
1كلغ فريزة تغسليها ونحيلها الاوراق وعندك 750غ سكر وعصير حبة قارص

التحضير: في اناء ضعي طبقة فريز وطبقة سكر حتى تكملي وعصير الليمونة وغطيها وخليها تبات في الثلاجة غدوة من داك تلقايها طلقت الماء حطيها على النار لما تبدا تغلي
احسبي 5 دقايق ونحي الفريز جانبا وخلي هذاك السيرو يعقد ثم لما يعقد قبل ما طفي النار بدقائق رجعي الفريزة لمدة 2 الى 3 دقايق وطفي متعقديهش بزاف هكدا الفريزة تقعد حبات اما اذا حبيتي الفريز مرملاد اي كشغل مرحي طيبي بنفس الطريقة ومتنحيش الفريز خليها تكمل الطياب فسيرو حتى تتعجن في السيرو نشا الله تعجبك وتجربيها
ونشا الله نجيبلك وصفة دليلة لي نظن كيف هذا الوصفة

[ام مريم الجزائرية]

اختي ياسمين معجون الفراولة مايجيش حلو لاني جربت معجون الجزر وجاني حلو بزاف

[ياسمين177]

المشاركة الأصلية كتبت بواسطة ام مريم الجزائرية

اختي ياسمين معجون الفراولة مايجيش حلو لاني جربت معجون الجزر وجاني حلو بزاف

يجي كيما المعجون لان المعجون عموما يجي حلو
نظن راكي كثرتي كمية السكر جاك حلو ومعجون الفرولة يجي رائع فذوق واللون
اما معجون الجزر في 1كلغ جزر ديري 800غ سكر

[ياسمين177]

معجون الكرز بالنعناع
ندير كاس ماء يغليلما يبدا يغلي نحوه من النار ونضع فيه ربطة نعناع اخضر
1كلغ ورطل من الكرز او حب الملوك تنحيلو العلف
ثم لما يطلق النعناع نصفيه وفي نفس الماء نضع +حب الملوك + 1كلغ و300غ سكر+ عصير 2حبات ليمون تحطي هذا الخليط في الثلاجة لمدة 24سا
غدوة من داك تنحي حب الملوك وديري هذاك السيرو يغلي لمدة 15دثم ارمي فيه الحب ملوك واحسبي 10د وطفي عليه.

معجون المشمش بالزنجبيل:

كاس من الماء +1كلغ و250غ سكر+40غ زنجبيل مسكرفج ضعيه على الناريغلي لمدة 10 الى 15 دقيقة + 1كلغ ورطل مشمش نقسم الحبة الى اثنان ونح العلف
يعقد ونطفي عليه.

معجون الكابوية والمشمش المصبر:

المشمش اليابس لنطيبو بيه طاجين الحلو ناخذ رطل مشمش مصبر نشمخوه فلماء لمدة 48سا ثم نصفيه نفس الماء + المشمش نقطعوه + نص كابوية نقشرها ونقطعها قطع صغيرة+ كاس ماء زهر+عصير ليمونتين وعصير حبة بمبلموس + قشور برتقالة وفانيونخليه يطيب حتى يعقد.

معجون الدنجال:

1كلغ دنجال نقشروه ونقطعوه مربعات نفوروه
شربات:15سل ماء + 700غ سكر +يغلي لمدة 10د+دنجال + عصير برتقالة وعصير ليمونة وفاني ونخليه يعقد.

اما معجون الجزر ومعجون البيطراف سبق للاخت العزيزة ميميشة قدمتهم نشا الله ترجع بسلامة.
ولي عودة باذن الله

[راجية عفو الله]

المشاركة الأصلية كتبت بواسطة ياسمين177

اختي نعطيك وصفتي مجربة مرارا وتكرارا ونشا الله مبعد نحوسلك على تاع دليلة
1كلغ فريزة تغسليها ونحيلها الاوراق وعندك 750غ سكر وعصير حبة قارص

التحضير: في اناء ضعي طبقة فريز وطبقة سكر حتى تكملي وعصير الليمونة وغطيها وخليها تبات في الثلاجة غدوة من داك تلقايها طلقت الماء حطيها على النار لما تبدا تغلي
احسبي 5 دقايق ونحي الفريز جانبا وخلي هذاك السيرو يعقد ثم لما يعقد قبل ما طفي النار بدقائق رجعي الفريزة لمدة 2 الى 3 دقايق وطفي متعقديهش بزاف هكدا الفريزة تقعد حبات اما اذا حبيتي الفريز مرملاد اي كشغل مرحي طيبي بنفس الطريقة ومتنحيش الفريز خليها تكمل الطياب فسيرو حتى تتعجن في السيرو نشا الله تعجبك وتجربيها
ونشا الله نجيبلك وصفة دليلة لي نظن كيف هذا الوصفة

مشكووووووووورة اختي العزيزة وبارك الله فيك

[ياسمين177]

كيك بالشكولا
هذه الوصفة البارح قدمتها دليلة

التحضير: في كسرونة نضع كاس سكر + كاس زيت + كاس حليب + 4 مغارف كاكاو ونضعها على النار مع التحريك حتى تعقد شوية وتصبح كالكريمة مشي عاقدة بزاف
نحها من النار ونخليها تبرد غير شوية
نضرب 5 بيضات مع فاني ثم نضيف خليط الكاكاو ونخلط + 2 كيسان فرينة و2 خمارة ونخلط الكل
ندهن لمول سيليكون تاع ميني كيك او لمول تاع البابا



ثم نضع فيها خليط الكيك



وندخلها تطيب لمدة 0 3د في فرن 180درجة لما تطيب نخليها تبرد وننزعها من لمول
ثم نحضر كريم شانتي ونضيف لها كاكاو او شكولا وندير وردات بالكريمة في وسط الكيك



ثم في وسط الكريمة نضع بسكوي رول هو عبارة على سيقار بالشكولا انا مالفة نخدم بيهم اليوم ملقيتهمش درت في مكانهم حلوة بشكل طولي زينت بيها

[قطوفها دانية]

بارك الله فيك اختي ياسمين وان شاء الله تكون الاخت ميميشة بخير وعافية