التحضيرات الخاصة بشهر رمضان الكريم

[ريتان]

44444444444444444444

[ام سراج وملاك]

اولا يعطيك الصحة فكرة الطماطم هايلة ضك نجربها انشاء الله من ناحية الترقاد انا من خلي والو يعني في وقت الفول نشد نغسل الفول مليح ونقطعو دوائر صغار بزاف مبعد نفورو ونحطو في كيس بلاستكي كميات ونخبيهم ندير بيهم شكشوكة مثلا طبعا كي يكون وقت الفول مكانش خي تعرفي شكشوكة الفول الاخضر لرقيق ماشي لي نغليوه ونخبي حبات مجمولين شوي نشتي ندير بيهم بربوشة بالنسبة لي يتغلى ثاني نحيلو القشرة ونخبيه نوليو لرمضان انا نخبي الجيلبانة خطراه عندها وقت معين نخبي كميات كبيرة نفوت بيها رمضان وحتى ورا رمضان في رمضان منديروش كل يوم جيلبانة خي علابالك هنا يغلبنا رمضان ونوعو بزاف نسخفو على كلش لاشة مانكلوش بالنسبة لطماطم انا نخدم نتاع لقرع ونخبيها على برة الفكرة نتاعك عجبتني نجربها انشاء الله و ندير سعات حميس نتاع فلفل مشوي حار وحلو مع الطماطم والثوم ونخبيهم نلقاهم سعات كي ميكفينيش الوقت بالنسبة لطجين لحلو انا قبل نهار من رمضان نوجد كمية كبيرة نخبيها كل يوم نجبد نحي قيس مانكلو ونسخنو باش ميفسدش منسخنش الكمية لكبيرة كي يخلاصلي نزيد نطيب كمية كبيرة نتمنى انشاء الله يزيدو لبنات يفدونا انا عندي خالتي تخبي في الثلاجة حتى الكابية خي تعرفيها عندها وقت معين برك كي سقسيتها قاتلي قلشي جديدة كي طيبيها شوفي اي حاجة تخبيها تلقايها ماشي خسارة بصح الواحد يدير احتياطو الحاجة لي يجبدها من المجمد ميخليهاش تذوب ويعاود يرجعها خي علابالكم بلي راهم يديرو المرض لرواحهم علابيها الفكرة نتاع الطماطم نتاعك عجبتي كي عادت كميات صغار في باطة نتاع الياؤورت راني نهدر بزاف لوكان تطلقيني نعمرلك الصفحة منطولش عليكم في انتظار تحضيراتكم جميعا

[خيروشة]

الشكر الاول لصاحبةالفكرة الأولى ونشكر أيضا كل من شاركتنا بخبراتها ومنكم نستفيد بارك الله فيكم

[lyzzabel]

ليلوشتي الحبيبة تسلمي على هذا الموضوع الرااااءع
انا رمضان ما حضرتله والو ااباغ الجلبان لي نقيته و درته فالكونجيلاتور لرمضان انشالله
و درت مركز البرتقال زعما بغيت نكونجيله لرمضان ساعة قالي زوجي ن ع خليه نشربوووووه هههههه ما نعرف إلا يعاود يجيبلي البرتقال باش نديره ولا لا خخخخخخ

اللهم بلغنا رمضان

[أم محمد تاج]

الف شكر ليلوشة على الموضوع وراح نبدا بتحضيراتي الرمضانية اللهم بلغنا رمضان ياكريم
اولا مرت بابا الله يحفظها خدمتلي الفريك من عندها زوج كيلو يعني يكفيوني لرمضان ويبقى ياخي تعرفي حنا تاع باتنة لازم الشوربة فريك
وثانيا الدواوات تاع البرمة والله صراحة نشريهم من عند واحد ثقة من لي توفاة امي الله يرحمها عدت نشريهم بكري تخدمهملي هي بنة عظيمة اييييييه الله يرحمها يارب
ثالثا حنونتي فيما يخص الطماطم المجمدة كنا نديروها كي كان رمضان يجينا في الشتا والطماطم غالية بصح ضرك راه يجينا في الصيف والطماطم تكون رخيسة بزاف مالا كي يفوت رمضان لي نكونجليو الطماطم تحسبا للغلاء تاعها في الشتا
رابعا والعصير وانواعه الصراحة الصراحة كي يتكونحلا مايعجبنيش يضرب فيه ريحة الكونج وتتبدل البنة تاعو مانقدرش عندك نكونجلي تاع المشماش بصح مايطولش
خامسا وراكي تعرفي ميناج رمضان بديت هاذ ليامات بالخزاين والكوزينة بقاو الحيوط والنوافذ كي قريب يلحق نغسلهم مرة وحدة
حبيبتي وكي قريب يوصل رمضان نقضيو هاذ العين هذا زبيب وووو اكي تعرفي
حنونتي كاشمة تفكرت نزيد ندير تعديل ونحطلك يالغالية
الف الف شكر

[رياحين الجزائر]

حبيبتي انسيت البارح ماكملتش راه الزهايمر
انا ثان انوجد الدواوات او التوابل وان شاء الله كي نلقى الليستة انتاعي انتاع راس الحانوت راني نكتبها واش فيها اكل ونشريو الفريك بكري كانت يما وبابا يحصدوه ويخدموه ونخدم معاهم بصح درك انا مايخلونيش الاولاد وراجلي وبابا ويما كبارو مايقدروش للتعب نشريوه واجد يا اما حب ونرحيوه ولا نشريو 100غ من عند الحوانت حتى انطيحو في البنين انروحو نشريو حتى 3 كيلو تعرفي الفريك في باتنة راه هو الرسمي هههههوماننساوش الزبيب والعينة والشونتييي والفلان وانا من طبعي في رمضان مانكثرش ليبلا خاطر ماياكلوش والله والتبدير حرام تقريبا راجلي شربة وطاجين حلو فقط والسلاطة ماياكلوهاش بزاف ديما نرميها عدت مانديرهاش ساعات برك كي يسخفو فقط بصح واش تلقاي عندي بزاف وبكميات هايلة القازوز والفلفل هههههه هدو تلقاي بالانواع وكاشما تفكرت راني انزيد والميناج مازال مابديتش ههههه بيناتنا راني نسنى في بنتي تدي العطلة ونبداو في الديار الاولين من بعد الكوزينة باه تبقى نقية

[lilouchaf]

يعطيكم الخير والربح كي شرفتونا بالافكار والتدابير الي تساعد كل ربة بيت

[lilouchaf]

او هادا تاني القارص كي اعصرتو وجمدتو درت بيه مكعبات ودرت عصير ام اماني عمرت القجور تع الكونجيلاتور

[lilouchaf]

وهادا مركز البرتقال تاني عصرتو ووجدتو

وهادا الرابط الي تحب

https://www.djelfa.info/vb/showthread.php?t=1570437

[الزوجة الجنونة]

يعطيك الصحة

[scorpionoir]

ليلو حبيبتي موضوع رائع هكا نستفادو من بعضانا .
انا ما نحضر ما والو .كلشي عادي ماعنديش كونجيلاتور كبير غير تاع الفريجيدار زعما كبير شوي بصح ثم ثم يتعمر ههههه
ندير الحمص طايب هذا راهو على طول العام وساشي جلبانة لي تتباع مكونجليا واجدة مانكلوش الجلبانة بزاف وطيح كيف كيف مالا نشريها واجدة خير.هي اللوبيا الخضرا والقرنون
ثاني القارص نكونجلي منو حب وعصير
العام هذا كونجليت السلق . والباقي تاع الكونجيلاتور حق اللحم والكسرة نطيب قيس يومين ولا تلاثة ونجبد وبس
اما الفريك نشريه واجد تاع المعريفة روعة . اما الدواوات راني نطيب بيهم كل يوم وديما حاضرين ماكانش فرق. والعين بقرة والزبيب والمشماش ثاني ديما عندي كي نسخف ندير .
انا ماعنديش تحضيرات بزاف
اللهم بلغنا رمضان في صحة جيدة

[nabila222]

فكرة هايلة اختي ليلو،انا ظارية كل عام راني نوجد في كلش بصح كي يلحق رمضان صدقيني والله ما ناكلو ما والو والله غير نسخفو برك،ونرمي كلش والله حرام التبذير ،قلت رمضان الجاي ما نخبي والو ،لي نسخف عليها نشريها وخلاص ،حاجة وحدة صح. ديما نديرها وهي الثوم ديما نرحيه ونديرلو شوي ملح ونحطو في الكونجيلاتور،نتهنا من ريحة الثوم،مع الصيام ،

[بريق الدجى]

المشاركة الأصلية كتبت بواسطة scorpionoir

العام هذا كونجليت السلق

اختي من فضلك كيفاه تخبي السلق ديما نحب نخبيه لكن مانعرفش الطريقة و جزاك الله خيرا

[Sasau]

الله يعين كل وحدة فيكم ويجعل كل أيامنا رمضان انشاء الله

[ام نافع]

بارك الله فيكم على هذه الافكار واتجاربكم اما انا نوجد الفريك نشريه حب ونغسلو ونقيه ونرحيه عند الرحى والكروية كذلك ونجمد الحمص ونشري لاوازم الاخرى مثل الزيت والقهوة والطماطم الباط السكر بكميات كبيرة ونخبيها