طلب نصيحة من (المتزوجين والمتزوجات)

[مشكلتي]

السلام عليكم ورحمة الله
اخوكم شاب :23 سنة
عامل عند الدولة (مرسم) +عامل حر (منذ تقريب سنة)
اخوكم يريد الزواج ولم يجد سكن.
في بداية الأمر كنت أنوي السكن مع الوالدين إلا أن بيتنا ستقوم الدولة
بهدمه وتعويضنا ببيت في العمارة ولا نعلم متى، لكن كاقصى حد سنتين والله أعلم.
الآن متردد من السكن معهما علما انا هو الصغير.
ثانياً اريد البحث عن فتاة واتقدم لخطبتها، هل تصبر علي واهلهاهذه المدة؟
ثالثاً هل تنصحوني بالكراء، علماً أنه مجموع اجرتي حوالي 5 ملايين وتفوق احيانا
مع ان الكراء باهض في منطقتنا.
رابعاً راني دايخ +وساوس شياطين والإنس المثبطة فهل من مرشد....

[ع.عيسى]

23 مزلت صغير ، حاول ان تستثمر اموالك في مشروعك الخاص ، لا تفكر في الزواج قبل 28 او 29 سنة ، لانك اذا تزوجت في هذا السن وفي هذه الظروف رايح تورط روحك ، استثمر اموالك ، وعندما تبلغ 27 او 28 سنة ا ابدا البحث عن زوجة ، حينها ممكن انك دير سكن خاص وسيارة ومشروع بدر لك الاموال ، ساعتها رايح تتزوج براحة ، وبالتوفيق ان شاء الله

[ايمان4]

نصيحتي لست متزوجة لكن 23 سنة مزالك صغير هاد الدراهم لي راك نربحكم لمهم و لم بيهم روحك و اذا جبرت ارض لكان حتى ف قرية صغيرة اشري ح 70متر و ابنيها بالشوية عليك عمر دارك بالشي لي تقدر عليه مش شرط لوكس غير شمبرة و الكوزينة و الدوش و صايي ... و مدام مزال ما تعىف حتى بنت اقعد هاكا تركيزك كامل ف الخدمة و كيفاش تنجحها و تم مع 28__30 كحد اقصى تكون جهزت حالك و حتى انت تكون ناضح بما فيه الكفاية و جيب بنت الناس معززة مكرمة في دارها ديراكت يا ربي ز بكان قرية فيها زوج ديار برك ... و بالشوية بالشوية تلم دراهم العرس غير وليمة صغيرة احسن ما تجيب بنت الناس دركا و تبقى حاصل ف الكرا ... و خصوصا سنك و دخلك يسمح بذلك و الله يوفق

[kacimo.samy]

راك صغير شويا بلاك
شوف مع روحك قادر على المسؤولية... جوزت لارمي ؟؟
بعدت على دار ؟؟ يعني كنت وحدك وتميزرت وطاحت بيك و نضت
لازم تشوف روحك قدها
زواج ليس في الفراش برك لازم تكون قادر يزيد يدخل شخص في حياتك + قادر تحميه موش تهرب وتتخلى عنه

23 الا كنت شايف وفاهم دنيا بصحتك


لا علاقة للايام بالنضج نحن نكبر بمرور الناس

[محمد جديدي التبسي]

وعليكم السلام ورحمة الله وبركاته
لا أنصحك بالكراء أخي ليس حلا ابدا
مادام مدخولك جيد نوعا ما حاول ان تبحث عن قطعة أرض وابينها خلال عامين يمكنك اتمام سكن بسيط وفي هذه الفترة ابحث عن فتاة تناسبك لست صغيرا انت في سن مناسب للزواج وكلما تزوجت صغيرا كان أفضل خاصة وأنك تبدو ناضج ومسؤول ربي يوفقك وييسر أمورك.

[الرأي الاخر]

اذا تزوجت في هذا السن وفي هذه الظروف رايح تورط روحك

[خالد عنابي]

نحير في لي يقول صغير اداك هو برك لا صغير لا والو تحوسوه يشيب مالا ؟ الناس بكري كانت تتزوج في سن 15 و 16 سنة

الاخ كاينة عائلات عايشين بمليون ونص ولا 2 ملاين وانت الله يبارك تدخل في 5 ملاين يعني راك ميسور الحال

مالا رتب اوراقك واتكل على ربي

[ام احمد اياد]

عيش حياتك ومن بعد روح تزوج لانو الزواج مسؤليه كبيره هانا لاانصحك بالسكن مع الاهل لانو راه توقع في مشاكل كبيرهكذا انا قاعده تصرالي وزوجي وقع في حيرة بين اهله وبيني

[nadine0159]

نصيحتي لك ماتكريش الكراء يعري و ثانيا صتتزوج صغير افضل باه تبعد على الحرام و الفتنة مي انصحك اولا وفر مسكن دير المستحيل باه توفر لا بغا ستوديو و مباعد زيد لم و اشري سكنة كبيرة ليك وللعايلة كي تكبر طبعا بعد الزواج شوف اخي انت زيد اصبر عامين لم شوية دراهم و زيد لم شوية على الاقل دير 150 _مليون و زيد سلف اشري سكنة ف الباطيمات ثم اخطب و فهم البنت و اهلها على ظروفك تستناك على الاقل عامين اخرين توجد روحك للعرس و تسلك شطر من الدين هاذا اذا كنت من النوع اللي يوفر و يخبي لوكان ما ديرش هاك مستحيل دير سكنة و بلاك تلقا كاش مشروع حلال للسكن دير تساهمي او ترقوي مدعم عدل المهم الي كاينة المهم تعرف تخبي دراهمك و زيد اصبر شوية ماتتزوجش دركا و ما تكريش و ماتسكنش عند داركم الباطيمات و القرار الاول و الاخير يعود لك

[أم عبد الله السلفية]

لا حول ولا قوة إلا بالله

أخي ربي يوفقك إستخر الله عز وجل

الرسول عليه الصلاة و السلام قال :" يا معشر الشباب من استطاع منكم الباءة فليتزوج" و لم يحدد السن.

أخي في مثل سنك و سيتزوج قريبا ـ العاقبة لكل شباب المسلمين ـ

عليك بالإستخارة و لا تنسى قوله صلى الله عليه وسلم :" ثلاثة كان حقا على الله عونهم : المجاهد في سبيل الله و المكاتب الذي يريد الأداء و الناكح الذي يريد العفاف"

وفقك الله

[ayoub55]

الزواج المبكر كان زمان ينفع اما الان تبدلت الظروف كما قالك الاخوة ابني بيت ولو بقرية صغيرة المهم عندك بيت تلقاه

[هدية]

اخي راك بزاف صغير ماتفكرش في الزواج الا بعد 27 سنة في هذاك الوقت تكون وجدت روحك مليح يعني درت دار و عمرتها ولميت حق المهر و حق مصاريف العرس و تكون فكرت في سيارة هكذا تقدر تخير بنت لحلال و تقدم روحك لنسابك وراسك مرفوع و تجيب مرتك طول لدارها مايصرالكش مشاكل خلاص بينها و بين والديك يعني يبقى الكل عزيز و بقدرو . نشاله تاخذ نصيحتي بعين الاعتبار لانها عن تجربة . وربي يوجهك للخير ان شاء الله

[abder03]

الزواج وانت صغير افضل منه و انت كبير.
الزوجة ستكون اكيد اقل منك عمرا، هل ستكون مستعدة لتحمل المسؤلية و عمراها 20 او 19 سنة؟
انا لا اقول لك انت صغير بل انت رجل و صالح لانك تفكر في الحلال و غيرك منغمس في الحرمات. البحث عن زوجة قد يستغرق زمن طويل في غالب الاحيان و لكن قد يستغرق ايام في حلات اخرى. ابدأ البحث و التنقيب من الان و دع الامور للمولى سبحانه، و حين يحين الوقت، ستجد ان الله قد يسر لك الامور، و جدت زوجة، و اصبح لديك اكثر مال، و اصبح بالامكان شراء مكان للبناء او للشراء .....الخ سيسر لك الله مادمت تطلب طريق الله و كن متاكد لن يخيبك ما دمت تثق فيه و تبحث و تحترم حدوده.

[غزلانْ]

السلام عليكم

طريقة تفكيرك يتجلى كبر عقلك فليس الزواج يبنى على عامل السن بقدر ما يبنى
على طريقة تفكير الشخص فإن كنت تجد من نفسك قادر على تحمل مسؤولية
الزواج بأكمله فتوكل على الله فقط أحسن الاختيار
وفقك الله أخي

[yasmine700]

علاش تتقلقو علي الزواج اخي مازال عندك الوقت عيش حياتك وكون روحك بشويه والزواج يجي يجي والله الزواج في وقتنا اصبح متعب كتيير خاصۃ في غياب السكن والله راح تتعب كتيير وربي يفرج