مرحبا يا معشر قوم الاحرار
تبانلي موتى مكاش تفاعل كامل في المنتدى ولا تحديات ولا اي شيء
عدت من جديد طبعا كملت الوحدة لوله نتاع الشخصيات لي كتبت عنها اخر خطرة لكني بعدها توقفت كليا عن الحفظ وعن اي حاجة فجاة غاب شوقي وحبست كلش مام الالمانية لي معنديش فكرة عليها حبست تقدمي البطيء فيها
اخر رد ليا كان في 15 جانفي بعدها سجلت تكوين ولهيت بالتكوين كليا صبحة مع عشوة نسيت الباك وصراحة كانت احسن حاجة صراتلي لاني تعبت من تجربة الباك كنت فوت الباك عامين كنظامية بشعبة علوم تجريبية خسرت باكي لول 7.47 وباكي زاوج 7.73 مكلاه نحكي وش صرا في العامين ذوك من ضغط وخوف نقرى وكاني مقريتش نحفظ ونراجع ونهار يوصل باك كلش يتبخر سهرة الليل والليالي البيضاء والتحضير ومراجعتي للعلوم لي نحبها كلها راحت هكذا وخسرت صحتي وراحتي النفسية فوق كل شي
لكن ديما نتفكر انو الخيرة فيما اختاره الله لنا ودايمن لازم نسعاو ونثابروا وبقية الامور بيد الله تعالى وحنا معلينا غير نصبروا واكيد انو لي خلق مينسى .
اليوم بقا اربعين يوم على الباك كنت قبل يومين بديت بحل موضوع انجليزية 2008 شعبة لغات اجنبية بديت بالسبت في الليل هكذا وبدات بالموضوع وحليت وسجلت ملاحظاتي حول الامور لي تنقصني ولي مفهمتهاش علما اني نفهم الانجليزية مليح مي من خرجت من ليسي عام 2016 مزدتش حكمت سوجي يوم الاحد وقت لي كنت في التكوين مقريتش من 10 لل12 كملت نصف الموضوع الثاني نتاع باك الانجليزية وسجلت ايضا ملاحظاتي بعدها مقريتش حاجة .والنتيجة لي خرجت بيها من سوجي الانجليزية كانت مليحة مكاش نقائص ياسر الا بعض القواعد لي لازم نراجعها .
معنديش فكرة عن المواد الاخرى لكن لسبب ما انو عندي برود قلبي او فعلا تمالكت اعصابي حول الباك
الخبر المزعج لي تلاقيتوا البارحة كان انو نفوت الباك ونكمل بتاريخ 15 جوان غير منكمل منا تجي اختبارات التكوين في 18 جوان ونعم نقرى التكوين في رمضان .
الحاجة لي نقرى فيها في التكوين هي تخصص عامل مكرو معلوماتية وحبيتها ياسر رغم الضغط صباح وعشوة وحاطه في بالي لازم نتفوق فيها والحمد لله لحد الان متفوقة .
حاليا رح ندير برنامج نعرف وش رح نقرى لكن نشارككم بواش في بالي بديت العد التنازلي للباك بتاريخ الاثنين 24 افريل ويعجبك مقريت والو لين يوم السبت 29 افريل
..... يتبع