ماهو شعوركم اكثر من 10 سنوات بطالة

[karime amrs]

المشاركة الأصلية كتبت بواسطة mrmilano1984

موضوعك اثارني اخي حول ازمة البطالة الخانقة صحيح الكثير بشهادات عليا مثلي انا متخرج عندي كم من عام لم اجد وضيفة خاصة بي اللهم مرة وجدة منصب ليس مثل شهادتي يعني مشابهة جدا لها لكن عملت عام وصاحب رب العمل رمالي الماء واستبدلني باخر للاسف الشديد بالتالي الوضيفة راحت وراح المستقبل عملت عام باجر 18000دج في اطار لانام ومش هو لي يخلص وهاك تخلص مني مهم نعود لموضوعك هادي الدولة هي احد الاسباب ايضا كيف شباب كثر عاطلين جدا عن ايجاد وضائف في تخصصاتهم اللهم نساء فقط علاه مايدرولناش منحة خاصة بنا لاصحاب الشهادات مثل دارو نشاريع ansej anjem andi cnac ect يديرو ضندوق خاص بنا نحن البطالين les chomeurs صندوق وطني خاص بابطالين يتقدم اليه كل بطال دو شهادات جامعية او معاهد ةمدارس الخ طبعا لي مالقاولوش عمل نعملو مثل الدول اووبية لي مايعملوش يخلصوهم لكن حنا ماداروهاش يمدو دراهم يمين يسار وفي امور تافهة ونحن لانستفيد هادي دةلة تشوفها فرضا واحد يخلص 5000دج علي الاقل يحس بقيمتو وقيمة الشهادة لي تحصلها في لنتاضر ايجاد له عمل هناك تنزع منه اليا يعني هكدا لامتصو البطالة مش ينحو الديون للكحالش ووووو يرمو مالنا في امور اخري

سلام
رمضان كريم اخي
الردود المختلفة في هذا الموضوع قالك الغلطة فيك انت و قالك ايضا ابدى من الصفر توصل ...لا اعلم اخي كيف تفكر الناس انوفي هذا البلد الفاشل يمكن ان تبدا من لاشيىء ...لا اعتقد ان من يقول كلام هذا راه في كامل قواه العقلية و مدرك للحقيقة
هل كل الشباب البطال في 48 ولاية و هم كثر فهل كل هؤلاء مخطئون و ما يعرفوش يخدموا
و من بعدها يقولو علاش العنوسة و الانحراف و هل هناك مخرج هل هناك حل
من يملكون المال اصبحو دولة فيما بينهم لا يقيمون مشاريع لا ينظرون لمستقبل البلد و الشباب لا يفيدون في شيىء بل بالعكس اصبحو هم العائق
يرشون من اجل المناصب لبناتهم
يسرقون من الصفقات من مال الشعب
و يقولك انت ابدى من الصفر
فبالله عليكم لا تقولو كلام هو اقرب للسخرية منه للجد

[samiaa2017]

المشاركة الأصلية كتبت بواسطة ايمان4

يحسن عاونك لكن حتى انت ف هاد 10 سنين محسوتش كامل تطور نفسك ...
وحدة قريبة ليا خريجة مدرسة عليا للصحافة بمعدل ممتاز بالمعريفة ما فاتتش دكتوراه راك تعرف ريحت سنة ف الدار و في هديك السنة كانت تحوس على الخدمة بالريق الناشف ما لقاتش وااااااااالو وين ما تروح تلقاها ناشفة ايا في نفس الوقت مضيعتش الوقت بدات تكتب مقالات في النت في مواقع يدفعولها عليها مبلغ مالي معين لكن ماشي مقالات و هي مريحة ف الدار تروح و تبحث في ارض الواقع ماشي راقدة و تمونجي و مبلغ ضئيييييييييل لكن تمسكت ف هدوك المواقع مع الوقت عرفت بلي المهارات نتاع الكتابة تحسنت بدات تبحث على عمل حتى في الخارج واااااالو عرفت بلي المشكل فيها بدات تعلم اللغات و تحسينها اتقنت اللغة الفرنسية و صارت تكتب حتى في مواقع فرنسية مقابل اجر و تعلمت الانجليزية و اجتازت امتحانات لغة جاتها فرصة في الدنمارك مشي عمل غير تربص تدي عليه اجر جد ضئييييييييل لكن تسكن باطل الاكل عليها سما بهاداك المبلغ الضئيل تخلص الاكل و تقلي مساعدة الاهل والو فقيرة الدراهم تجيبهم غير من كتابة المقالات و هداك الستاج ممبعد مرور سنة كاملة على الستاج اكتسبت خبرات جديدة في مجال ماركتينغ او التسويق رجعت للبلاد عاودت فوتت امتحان الدكتوراه عاودت فشلت للمرة الثالثة ... بدات تبحث في الخارج مخلات حتى جامعة في اي بلد و ما راسلتهاش كلهم رفض رفض رفض .... حتى جابلها ربي هاد السنة قبلوها بورس في جامعة روما في ايطاليا تحضر دكتوراه في مجال الاعلام و الميديا بورس يعني كلش خالص عليهم و الحمد لله راها غاية و بدات تتعلم الايطالية و راها تعمل عمل غير صغير باش تزيد تساعد روحها بالصح ما قطعتش الامل بغات الدكتوراه و قالت لازم نجيبها و كان الهدف نتاعها تولي دكتورة في مجال الاعلام غير في الجزائر هاهي تحصلت عليها في جامعة عرريقة اوروبية تمكنها من العمل في اوروبا و باااطل بالصح كل هاد الشي ماشي غير هاكك بالعمل تعلمت لغات و اتعلمت الكتابة خاطرش الجامعة ما تعلمش هاد الصوالح التربصات الطويلة و القصيرة عملت في جريدة جزائرية شهر كامل في باديء الامر و فالتالي ما خلصوهاش و طردوها يعني مرت بصوالح يفشلو...

و حكالتي على زميلة دراسة مصرية تعرفت عليها باحدى التربصات خريجة جامعة البطالللة وااالو الاهل فقراء يعني لا مجال للمساعدة فكرت و فكرت ... هي كانت سافرت على بلد اووروبي في اطار ستاج كتبت خبرتها في الفيزا الاوروبية و سمات كتابها كيف تحصل على فيزا شنغن و حطاته يتباع في الموقع امازون حققت ارباح لا باس بها و بداو الناس يتصلو بيها و يزيدو يستفسرو قررت تنظم رحلة لفرنسا راحو معاها اطباء و مهندسين ختارت غير ناس لي خدامين باش اكيد يمدولهم الفيزا و هي اتكفلت بالاوراق يعني مشات معاهم و ساعدتهم في كلش مجموعة صغيرة نتاع 15شخص ... كيما كان الحال كامل مدولهم راحت بيهم لفرنسا و زادت بيهم لايطاليا كونها تتقن اللغة الانجليزية ما واجهوش مشاكل في اوروبا و دارت مرشد سياحي لمت شوية دراهم و مع اخوها الفقير لي حتى هو لم الدراهم غير اعمال حرة خريج جامعي بطاال فتحو وكالة سفر صغيييرة يخدمو فيها غير هوو هي و دركا راه ماشي الحال لاباس ...

شووف اي مشروع قادر ينجح لكان يكون فيه اصرار . ممكن تختار طريقب الدراسة يمكن طريق الحرفة يمكن طريف اعمال حرة شوف انت واش يخرج عليك ما تبقاش تفشل في روحك دزاير ما قال دزاير و تزيد تفشل عباد ربي معاك كون انت المثال

المشروع ماشي حنا نقولوهولك انت دووور عليه ملييح و متبداش من الفوق ابدا غيير من التحت .... و ماشي شرط تترفه المهم تتعفف ربي يسهلك ادعي ربي .... بالصح ايلا تبغي اوروبا ننصحك لوجه الله مجال الامام راه يتمشى في فرنسا بزاااف الائمة مكاانش زعما يلا تقدر تستثمر وقتك و تحفظ القران و تقرلى علوم شرعية كلها 3 سنين تقدر تكمل فيها كلشي و تروح راااهم مطلووبين بكثرة ..

السلام عليكم أختي ايمان
معليش أختي عندي طلب ممكن تقوليلي اسم هاد الجامعة الايطالية و تعطيني site
جزاك الله كل خير

[Abdelghani.Abdou]

اخي تقبلها مني بصدر رحب رغم قساوتها
انت عقلك هو لي عاطل مدة 10 سنوات
لازم ياخي تخدم راسك مش تقعد تنتظر فباش تنجح في المسابقات اصنع فرصة فكر في مشروع حتى لو كان حانوت تحرك برك.

[visa uk]

اخي انا حاسس كثير بك منه عندك الحق كامل واش تقول ناس بشهادات عليا مادخلوش خصوصا الدكور لانو معارف ورشاوي وحق القهوة الخ وطبعا الان الاولوية للاناث يتشغلو للاسف امور كثيرة جدا ادت الي هاته الوضعية الكارثية نشوف رجال قاعدين حابسين مايخدمو والله ونساهم يحدمو وهو يعمل في احسن حال عون حراسة او سائق او قاعد في الدار الخ
المهم نتا لازملك تدر مشروع خاص بك ماتبقاش مكتف الايدي ناس بالانترنت دارت مشاريع وراها تدخل دراهم برك باللسان شوف مثلا دزاد جوكر انس تينا بلسانو برك مواضيع جد تافه رجع يوتوبير ويدخل واش مايدخلوش واحد يمل عام كامل بالزعاقة برك وكي يجي يخلص يروح للبنك يجبدهم

[iL aMIRe]

والله راني مثلك أخي
ولكن لا يأس
التوكل على الله