الغيرة واش دير (توام)

[مشكلتي]

ا السلام عليكم ورحمة الله وبركاته
نحن بنتان توام غير حقيقي المهم بعد حصول كل منا على الباك
انا بطلت القراية "خطراكش كرهت القراية" واختي خدمة مهندسة
( كي بطلت القراية وهي كانت تقرا كانت تسخر مني وتضحك عليا طول حياتها )
بصح انا لاالتفت لكلامها اصلا
واش درتي قتلني الفيد رحت تعلمت خياطة
مرت السنوات
اكتسبت خبرة رائعة في مجالي واختي تخرجت وراهي تخدم
بكل تواضع من كثرة الزبائن / وصلوا الي من خارج ولايتي ولا تتصورن كم انا سعيدة ( سبحان الله الذي رزفني ، الحمد لله )
وهنا البروبليم تاع الغيرة تاع اختي
هي راهي تخدم وعندها شهرية تاع مهندسة كي شافتني سعيدة وزبائني بالصف كلاها قلبها
واش دارت غفلتني كي خرجت في يوم من الايام وهزت الة الخياطة وضربتها على الارض وتكسرت ( مصدر رزقي)
كي رجعت للدار والدتي باش تنحي المشاكل قاتلي راهي اختك الصغيرة طيحتها ( كذبة ) المهم بلعتها في روحي وفوتها
وشريت وحدة اخرى ونسيت الحادثة
بعد 3 اسابيع
جيتني عروسة باش نخيط لاها روبا تاع العرس
خيطها انا ودرت فيها دم قلبي وجيت روعة
واش جرى
مرة روحت لحفلة تاع صديقتي ، استغلت اختي هذه الفرصة وراهت حرقت الروبا لي خيطها ؟؟؟ ( راهي الغيرة الغيرة يا ناس )
كي روحت عاركتها ولاداعي لوصف ماحدث خطراكش ماشو لهته الدرجة
وزكارة فيها ( عاودتها في يومين سهرت الليل وجيت النسخة الثاينة اروع من الاولى بمثات المرات ) والعروسة عجبتها وبعتها ( راو ربي جابلي حقي )
ثارت المشاكل في الدار ( كي وليت انا المشكل رحت خليت داري وكريت حانوت تاع واحد وحليت محل خياطة هنا )
مالقيتش الراحة في داري تلقاها في حانوت ....
واش دارت اختي من لحمي ودمي نسمع فيها بوذنيا تروج لزبائني وتقول ليهم " راهي تسرق ليكم في الكتان ، راهي سلعة بريمي ، فكوكم منها ..."
كذب × كذب
واش ندير معاها خطراكش الغار طلع لراسي ومانيش قادرة نصبر

[sarl02]

لا حول ولا قوة الا بالله ....هذه غيرة مرضية مقيتة تدمر كل شيء ...حذاري من هاته الاخت راح يلحق بيها الامر حتى تاذيك في شخصك بطريقة ما من جراء قلبها المريض ...حاولي ادخلي والديك فالموضوع وادعولها ربي ..هذه المخلوقة ماشي نورمال.

[adam1990]

اختي ننصحك اشري هدية وقدميهالها حاجة كانت تتمنها هي ونقولك باذن الله رايحة تبطل لان الهدية مفتاح القلوب واصبري عليها وربي يهنيكم

[محارب الحمق]

مالقيت واش نهدر, راكم تخوفو صح يا لبنات. غير اعطيها هدايا وتقربي منها كاش ما تنحي شويا غيرة, وزيد عندك اذكار الحسد والغيرة واكفاية الاذى

[طيور الجنان]

حاولي تتقربي منها اختي و ادخلي والديك في الموضوع ربي يفرج علي و يهدي اختك ويشفيها من امراض القلوب

[كلنا راحلون]

كيما قالو اعضاء من قبلي

السر كسب قلبها حسود جربي معاها هدايا بطريقة غير مباشرة.......ذهب نقطة ضعف المرأة ....... ومهما فعلت راهي ختك .

الله يسهل.............

[~أمة الله~]

عليكِ السلام ورحمة الله وبركاته أختي
لا حول ولا قوّة إلا بالله، والله أمر مُحزن جدّا ...
لستُ أُدافِع عن أختك لأنّها تمادت جدّا، ولكن قد يكون لكِ جُزء مِن المسئولية، لا أدري، راجِعي نفسك، يعني هل تتباهين أمامها بزبائنك، وهل وهل ...؟؟؟
المُهم عندك حلّان إن شاء الله:
الأوّل: تحصين نفسك بالأذكار الموظّفة وأذكار الصّباح والمساء، وأكثري مِن الدّعاء أن يهدي الله قلب أختكِ وأن يُصلِح بينكما، فمهما كان الحال أنتُما أختان ومُحزن جدّا أن تُفرقا بينكم أمور فانية...تذكّري هذا جيّدا.
الثّاني: أن تستري نِعمتكِ عن أختكِ، وتحاولي المُستحيل للتقرّب مِنها، قومي بخياطة فستان لها وتفانيّ فيه وأتقينه وقولي لها عمِلتهُ مِن أجلك، اهديها الهدايا، حاولي أن تتقربي مِنها أكثر، حادِثيها، اتركيها تبثّك هموما، شارِكيها اهتماماتها واستمعي لها....
ربّي يصلح الأحوال بينكما

[نور لاتراه]

السلام عليكم
تهادوا تحابوا
وفي حالتكِ قبل ان تهديها وجب التقرب منها ,فاغتنمي المواقف التي تكون في حاجة لمساعدة
أسئل الله أن يسدل السكينة والطمئنينة عليكما

[RAHETBAL45]

غيرة مرضية حاولى ادخال الوالدين لحل هذه المشكلة و حاولى تجنب الحديث عن عملك امامها

[ROMMEL]

تفكرت قصة يوسف عليه الصلاة والسلام مع الاخوة نتاعو

[AMINA.Z]

لا حول و لا قوة الا بالله
هاذ الاخت شوهت صورة الجامعيين اللي من المفروض يكونو واعيين و مثقفين
يعني تفكيرهم يولي راقي ماش ينزل للمستوى هاذا
حطيها في الثقيل و زبائنك يعرفوك و خدمتك تحكي عليك ...درك ما تخافي منها ما والو .....حصني نفسك بالاذكار و الرقية ..باه ربي يحميلك رزقك
لا خول و لا قوة الا بالله

[loula2015]

ربي يكون في عونك

[اياد حياتي]

لا اله الا الله هذا واش بيها حتى هي بمنصب تاعها علاه غيرة وين راهم الوالدين في هذا الشيء ربي يصلح بيناتكم

[thorpe]

العين بالعين احرقيلها المخططات الهندسية تاعها
الورقة راهي تسوا وتغلى قطعيلها الاوراق
حوسي على ديبلومها وقطعيه
الميكرو تاعها لي فيه خدمتها كامل ارميه من االبالكون ولا بيعيهولي
ههههههه امزح فقط اياك وفعل ما كتبت فوق
لكن حبيت نحيلك على خاطرك بواش يدقدر يدير الانسان الشرير كيما انا
شوفي ختي
النار ما نقدروش نطفوها بالنار مي كي نصبو عليها الماء تطفا
حاولي التقرب منها اعطيها فرص
خيطيلها كاش حوايج ليها هدية منك
حاولي تسقسيها كاشما خاصها
واذا ربي فاتح عليك ابواب رزقو واسعة
اشريلها ميكرو قاوي تخدم بيه ديريهالها مفاجاة ماراهش غالي بزاف غير 13 مليون اني نبيع فيهم ومرحبا هههه (( جلب زبون بطريقة غير مباشرة ياااا السي هههه ))
لمهم حاولي ديما تهدئة الاوضاء وادعيها بالهداية
نشالله ربي يجيب الخير
ويصلح بيناتكم يا رب