توسوست من كلامو

[مشكلتي]

السلام عليكم
خاوتي خواتاتي بدون مقدمات راني بزاف موسوسة من واش قالي خطيبي انا انخطبت مند فترة و كلمت خطيبي لكن باحترام و بالرسمية لكن كلمتو لوقت متأخر قالي باباك راقد و خوك تاني راكي تهدري براحتك حسيت راهو يقولي مالفا ديري هكدا و انا ولله يا خاوتي غير ماتقدروش تعرفو شحل دارنا مزيرين لاقصى درجة جايبنها مورايا يعسو فيا كي نخرج كي ندخل كي ندخل للنت في التيليفون ماكاش التحراك معهم و انا الحمد لله عمري ما غلطت و اصلا كي نحب نغلط مانقدرش و دوكا هو كي قالي هكدا خفت يكون خمم فيا انني من نوع تاع البنات لي يحكو في التليفونات لانه قالي بعدها ان اختو ماتفهم والو في التيليفونات ولا في النت في التكنولوجيا هو قالي هكدا و انا صح توسوست خفت انو شك فيا ولا انتوما واش رايكم دبرو عليا واش ندير و كيفاش نصححلو نظرتو فيا

[sinou19]

وعليكم السلام

سما هو توسوس اووسوسك معاه

لا لا

جامي تخمي بتخمامو نتي مرا وتعرفي روحك مليح ماتقعديش تشرحيلو لا يزيد يتوسوس كثر

او هو راهو خايف كثر منك علابالك قبل الزواج كاين مرحلة الخطوبة فيها يحب يعرف كلش عليك من البا للتا


الشك بزاف يخاف يقلك كون وكون نلقاها هكدا

يبدا يلوح الليزان بلاك تغلطي توالو

هدا مرض يصيبنا كامل هههه


المهم والاهم هو ربي يتم بالخير عليكم

والمرحلة هدي تفوت كي يلقاك مرا ونص في الدار

تالي الهدرة تبقى هدرة


ربي يرزقكم الذرية الصالحة ان شاء الله

[toulay]

وعليكم السلام ورحمة الله تعالى وبركاته
هذا عندو mentalité عيانة تقتل وانسان موسوس
شوف اختي متزيدش تحكي معاه في هذاك الوقت ومين يعيطلك لعشية غير ça va ça va لباس حمد الله pas plus هكذا باش ميبقاش يتفلسف عليك
وفالليل طفي تلفونك ولا دير le code وخليه ياكل بعضاه
مفهمتش طريقة التفكير تاعهم تحكي فالتلفون معندكش اخلاق متحكيش فالتلفون معقدة
اختي راك sérieuse وتحوس كيفاش يبدل النظرة تاعو اتجاهك اخطيك منو خليه يدي الاثم تاع سوء الظن
بالتوفيق

[مريم سلمى الجزائرية]

السلام عليكم و رحمته تعالى و بركاته:
يا أختي الكريمة مادام هوخطيبك برك يعني مازال ماهوش زوجك الشرعي علاه تحكي معاه أصلا في خلوة و راكي تعرفي أكيد أنها حرام ،إذا حب يشوفك و لا تشوفيه يجي لداركم و يطلب الإذن من الوالد نتاعك و يحضر معكهو و لا خوك "محرم" و انتهى .أخطيك من التفكير أنو الحديث مع الخطيب في الهاتف أو الالتقاء به في بعض الأماكن دون ما يكون معاك محرم تَفَتُّح بل هاذاك هو التخلف بعينيه ،تأكدي أن الشيئ لي محرم فيه أذى، و أبني حياتك على ما يرضي الله مش ما يرضي الأشخاص.
أما كلام خطيبك حطيه بين عينيك واعتبريه تنبيه ليك في لي جاي و ما تنسايش حتى إذا غفل عليك خوك و لا باباك كان ربي سبحانه و تعالى الذي لا تخفى عليه خافية فيادرى كيفاه حابة تقابليه ؟راضي عليك و لا؟؟؟
ربي يوفقك و يهنيك.

[إسلام الفاروق]

حل بسيط لا تكلميه في وقت متاخر حتى لو اتصل
اذا اتصل بكي في النهار ابقي الحديث عن المستقبل و امور الزواج
اذا قالك علاش ما ترفديش عليا تلفوون في الليل او خلط في الهدرة قوليلو بعد الزواج نحكي معاك حتى تكره
سلام

[زبدة ذايبة]

ماتغلطيش روحك

ومادخليش روحك في دائرة تقضي بيها على نفسك بيديك

كوني شجاعة وواجهي الأمر لما تحدث المواجهة

ماتسبقيش الأحداث وتبداي تفكري بالاك شك فيا

بالاك كذا .......

أنت أعرف الناس بنفسك ماتبدايش دافعي على نفسك قبل مايصرا والو

لوكان تسبقي انت رايح يتأكد بأنك ماشي ساهلة ويزيد هو في نفسو يتوسوس منك

خلي الأمور على طبيعتها، وخليك انت على طبيعتك

ماكالاه تشرحيلو وتعتذريلو وانت مادرتي والو.

كلما تنازلتي كلما حس بأنك إنسانة ساذجة

ماتخليهش يشعر بأنك ولا شيء

ماتتفرفشيش كي يهدر معاك

وماتقرايش وش كاين في عقلو ولا واش راه يفكر من ناحيتك

خذي الأمور كيما تحتمل.

إذا كان مشكل حليه في نفس الوقت. وإذا لمحلك على الشيء اللي توسوستي منو دافعي على عرضك بشراسة

لأنك شريفة وعفيفة.

أتمنى أن تكوني قد عقدت قرانك مع الشخص وليس فقط الموضوع موضوع خاطب ينوي الزواج

لأنه في مثل هذه الحالة لايجوز لك شرعا الكلام معه لافي الليل ولا في النهار

وإذا حبيتي تكون العاقبة تاعك مليحة في هذا الزواج

اتمشاي بما يريد الشرع الإسلامي ولاتتعدي حدود الله

رب يهينك ويسعدك دنيا وآخرة

[محمد جديدي التبسي]

حتى ولو كان هناك عقد شرعي بينكما لا ينبغي التكلم في وقت متأخر لأن الحياء سيزول بينكما وتكثر المشاكل والتوسويس وانت مازلت في بيت أبيك لذلك خلي علاقتك سطحية مع هذا الخاطب ولا تستعجلي الحديث معه وفهميه انزعاجك من استعمال الهاتف ... ربي يفتح عليك

[صمت الرجوله]

المشاركة الأصلية كتبت بواسطة محمد جديدي التبسي

حتى ولو كان هناك عقد شرعي بينكما لا ينبغي التكلم في وقت متأخر لأن الحياء سيزول بينكما وتكثر المشاكل والتوسويس وانت مازلت في بيت أبيك لذلك خلي علاقتك سطحية مع هذا الخاطب ولا تستعجلي الحديث معه وفهميه انزعاجك من استعمال الهاتف ... ربي يفتح عليك

لماذا يا اخي ...اذا كان حقا بينهم عقد شرعي ما المانع هي زوجته ''حليلته ماهاش خليلته''يتكلم ما شاء في اي وقت شاء ...هل هذا الحياء الذي تتكلم عنه يكون بين زوجين؟؟

[AMINA.Z]

مادام ما درتي والو خلاص
هو الله يسهل عليه .....تبانلي هو اللي موالف ...على هاذي موسوس.
ديري ثقة في نفسك
و فرحان باختو كي كا تفهم والو في التكنولوجيا !!!!!!!
هذا يبينلك مستواه ...التكنولجيا رجعوها وسيلة غير اخلاقية و اللي يعرف يستعملها مشكوك في امره.
هو بالاك ما يقصد والو ....و بلاك قاصد
خليه يحترمك يا الاخت ...ماتزيديش تحكي معاه في الليل.

[محمد جديدي التبسي]

المشاركة الأصلية كتبت بواسطة صمت الرجوله

لماذا يا اخي ...اذا كان حقا بينهم عقد شرعي ما المانع هي زوجته ''حليلته ماهاش خليلته''يتكلم ما شاء في اي وقت شاء ...هل هذا الحياء الذي تتكلم عنه يكون بين زوجين؟؟

مادام مازالت في بيت والدها الأفضل تبقى متحفظة لانها اذا دخلت في الأخذ والرد معه سيزول الحياء بينهما وينجران للحديث في أشياء لا تليق خاصة في تلك الأوقات المتأخرة...بعد العرس واعلان النكاح يكون افضل ويعيشان تلك المرحلة مرحلة استكشاف الطرف الآخر خير وخير.. ربي يسهل

[اياد حياتي]

كيما قالو الاخوات مدام عارفة روحك بركاي مظلي تشرحيلو وهو اصلا علاه عيطلك في الليل كيراه يهدر هذه الهدرة وجا يفتخر بأختو انو متعرف والو وشكون قالو انها ماتعرف والو كلين بنات دايرين تليفونات بالتخبية بركاك قولو حتى انا راجلي داير اختو بونيشة ما تعرف والو وهي راهي على علاقة مع راجل متزوج ومعلابالوش
متزيديش ترفدي عليه فاليل واياك انك تتجاوزي كلام معاه حتى يديك

[nan719]

المشكل هنا انه اهان اباك و اخاك و انتي قاعدة تسمعي فيه نورمال اون بليس تزيدي تخافي منو انو راه شاك فيك بلي كنتي ديريها من قبل يا عجابا و علاش الناس ولات هاك هادا انسان يشوف كاش وحدة من الجبل لا عندها تيليفون و لا عندها نت باش يعيش هاني و انتي اختي ربي يهديك ما تهدريش معاه في التليفون و خالي عندك شوية ثقة في نفسك و شوية تع احترام واذا ما تزوجتيش ماشي نهاية العالم راكي تهدري تقول هذا العبد فرصتك الاخيرة في الزواج انا نقولك راجعي نفسك مليح و هذا انسان موسوس يعني العيشة معاه راح تكون كل يوم سوداء و الله اعلم

[أسماء*]

مازلت أجنبية عنه ولا يجوز لك الكلام معه إلا في حاجة وبإختصار أما الأخذ والعطاء والمزاح لا يجوز أختي
تمم الله لك وجمع بينكم في طاعته