عقوق الإبن

[مشكلتي]

السلام عليكم

و الله ضاق صدري و مالقيت وين نفرغ قلبي .
راني في حالة و السبب هو أخي لي كان الإبن البار و الإنسان الطيب شكون كان يقول أنو رايح يتحول لهذا النوع من البشر لكن حسبي الله و نعم الوكيل على زوجتو لي هي في الأصل ابنة خالتي جابتهالو الوالدة بسيف عليه هو ماكانش حابها أنا كنت نقوللها خليه راهو كبير و يعرف صلاحو لكن هي أصرت حتى رجعت تبكي عليها باش جابها أخي و راني نتفكر كان يقولي راني رايح نجيبها على جال يما باش ربي يباركلي في حياتي مع العلم أخي قاضي و يسكن في ولاية بعيدة على ولايتنا و أمي كانت تعامل زوجة أخي أحسن من معاملتها لبناتها و كي كانت تنفس كانت ماما تجيبها لعندها و تقعد شهرين و هي راقدة في الفراش و الماكلة تلحقلها لفمها و روح يا زمان أرواح يا زمان انقلب كلشي فجأة أخي رجع يرفع صوتو على أمي و كل ما يتلاقى بيها يفاتنها على أشياء تافهة مع العلم أخي كان دايرلها لأمي مبلغ 600 ألف كان يعطيهولها شهريا و هذا ما يساوي والو قدام دخلو لي يلحق حتى ل 15 مليون شهريا لكن مرتو قالتلها لأمي لازم بنتك لي هي أنا تمدلك 300 ألف و وزوجي يمدلك 300 ألف مايمدش راجلي وحدو لأني أستاذة و أنا في الأصل نمدلها لأمي دراهم لكن ماشي بصفة شهرية كل مرة و كيفاش مع أن ظروفي قاسية و دراهمي كامل راحو في الأدوية وزوجي دخلو بسيط .
المهم مؤحرا أخي رجع كل ما يتلاقى بأمي يجبدلها على موضوع دراهم و يقوللها علي لي لازم نديرلها شهرية و أمي تفاتنو على جالي حتى أنا كرهت و قلتلها لأمي خلاص قوليلو مانسحقش دراهمك ماتزيديش تشدي من عندو دورو أنا و أختي نرجعو نديرولك شهرية تكفيك .
خلاص الموضوع تاع دراهم حتى يبدا موضوع جديد مع زوجتو الستوتة هي ماتقول والو كي نتلاقى معاها لكن أخي ديما يمعنيلي بلي أمي راهي تسحر !!!!!!!!!! أنا نكظمها في نفسي و مانلحقش الهدرة لأمي حتى لحق عرس أختي خويا جا كي الضيف و اتخيلو سيارتو الفخمة قدام الباب و زوجي هو لي كان يلحق اختي لعند الحلاقة و عند محل كراء الفستان الأبيض طبعا رفقو أخي الصغير و كي قالتلو اختي و علاش ما تلحقنيش انت لي خويا و تخلي راجل اختي يديني كلاها و قريب ضربها و دار فتان كحل و قال ماراهيش تحتارمني .
المهم كي فات العرس أمي و أخي الصغير راحو كراو فورقو و لحقولها قشها لأختي في دارها على خاطر ماداتهمش قبل العرس خويا القاضي العزيز راح عيط لاختي العروسة غسلها و قاللها قوليلها ليماك ماتزيدش تجي لداري مانسحقهاش لأنها ماشاوراتوش كي دات قش اختي .
أنا من العرس لهنا و قلبي يوجع راني حابة نعيطلو نغسلو نكوبي عليه خلاص هذا ماعادش اخ نقدر نتعامل معاه .
أكيد رايحين تقولو واش دخل مرتو في الموضوع مرتو كيما قلتلكم هي بنت خالتي حرضت كامل خالاتي على أمي بالأكاذيب تقوللهم راهي تحرش فيا باش مانجيش لعندكم و راهي تكرهكم وووووووووو و حتى جدة ماقالتهاش بالتحراش و ساعات خويا كان يقولي حوايج على يما يوجعو و انا نقولو مين راك تجيب في هذي الهدرة ؟ يسكت و يقولي ايه مرتي راهي وحدة من العائلة و عادي كي تحكيلي واش راهو يصرا .
راني في حالة يا خاوتي قلبي راهو يسطر و ماعرفت كيفاش نعاون أمي لي راهي بالسكر و ضغط الدم و مؤخرا ناضلها كيست في رجلها رجعت ماتقدرش تمشي منو و قاللها الطبيب قلبك راهو عيان .

[خالد عنابي]

واحدا ماعطاك الصفة تع الوالدين لكي تتكلمي عن عقوق الابن هذا اولا

ثانيا وامك النهار لول علاش تحتم فالزوجة عليه ؟ يخي راجل ويعرف صلاحو

ثالثا الحكاية تاعك فيها خالوطة كبيرة وزعم معلمة جملة بالفصحة وجملة بالدارجة وجدت صعوبة كبيرة في فهم القصة وخصوصا الدخلة المخربطة تاعها العنوان يوحي بانك والد الشخص ثم يفاجئ القارئ بالحديث عن الاخ ويقع التباس ثم بعد القراءة نجد انكي انثى واخت المعني !

رابعا الحكايات تع النساوين هاذو ليس لهم نهاية ابدا وام يليقوش للنشر في منتدى عام

خامسا ماعندك حتى دليل ان زوجته تقوم بتحريضه وعلاش متكونيش غايرة منها مثلا

[kacimo.samy]

سلام عليكم
خالد عنابي دائما تبهرني بأجوبتك


اختي الكريمة ربي معاكم

وخوك يا ترقولو يا تشوفولو عم يتفاهم معاه حالها عم

يفهمو و يكبر بالوا وما يعمرش راسو بهدرة نسا

يقولو يتقي الله في نفسه

بداها مليحة وختمها هكذا ؟؟
ربي معاك

[*ام ادم*]

السلام عليكم ورحمة الله وبركاته
اختي الفاضلة ربي يهدي اخوك وينور طريقه
بالنسبة زواج اخوك رغما عنه و سبب الوالدة
انا نقولك مكتوب ربي ربطهم مع بعض .
بالنسبة مصروف هو ما حبش يمدلها هو حر الله لا أعطها
الرازق ربي سبحان انت ديري واجبك مع امك و هو خليه يجي
نهاره يتفكر واش دار
ننصحك بالدعاء ثم دعاء
ربي يتولكم و يحفظكم يا رب

[الصديق قروف]

ربي يفرج
كاين اعضاء نقرى مشاركتو قبل منشوف اسمو نعرفو بلي هوا

كيما قالو شوفولو انسان يقادرو يهدر معاه
ورقيولو مدام يهدر على سحر
معندك ماديري المفروض هوا الي يصرف على ادار كامل ماشي نتوما
وبلاك يكون خاربها في خدمتو ثاني

[123boutheina]

وعليكم السلام

المُشكلة تولي :

1/ مولاش يمد شهرية للوالدة نتاعه

2/ مقدمش مساعدة في عرس خته

3/ مولاش يراعي شعور حد ويعفس على اي كان واولهم الوالدة


( حلول هذو كامل ميجوش ضربة وحدة , ولا يجو بالتذكير ثاني , ولكن سابقوه بالخير والصبر )

ولكن وينه الوالد نتاعك ؟ , نتوما فقط طفل وزوج بنات عند الوالدة ؟

شحال عنده زواج ؟


كلذلك انا مفهمتش يا اختي صراحة , ضرك عجوزه كان تُعامل عروستها بالحُسنى وتجيبهالها لـ فُمها كيما تقولي , وبكات عليها باه تزوجها لوليدها

اش صار ؟ علاش تحقد عليها هك ؟ علاه حتى تبغي تحرض الجميع ضدها ؟

ومفهمتش ثاني يعني كيفاه راجل يمشي تحت يد زوجته هك ؟ لا وقاضي ثاني ؟ عجييييييب ( خوك كانت شخصيته قاوية ؟ هل انتِ متاكدة انه تزوج بنت خالته ارضاءا لامه فقط ؟)

والله سبحان الله

المُهم جوابا على ما طلبتِ :

و ماعرفت كيفاش نعاون أمي

انك تتبعي ارشادات الطيبب , تساعديها بلي تقدري , ونصيحة متحمليش راجلك فوق ما يطيق حتى وكان هو راضي وعادي ولكن خففي يا اختي عليه

اما خوك خليك محضر خير بينه وبين امه

الله يعينكم

[nihal159]

ربي يهدي أخوك، مشكلتك متشعبة و حلها صعيب بزاف؛ لو كانت مشكلة بين الإبن و أمه لكان من السهل التوفيق بيناتهم؛لكن راكي تقولي الفتنة لحقت حتى لخالاتك و قاطعو الوالدة نتاعك؛ ربي يفرج عليكم.

[رندة.]

كيما نصحوك الي قبلي شوفو واحد كبير الي يحترمو ويذكرو بحقوق أمه عليه ويحثه على القيام بواجبه اتجاهها.
بالنسبة ليك انتي مادام راكي خدامة ديري مصروف شهري الوالدة تاعك وماتتكليش على خوك، هي ثاني عندها حق عليك.
أما زوجة اخوك مافهمتش علاه انقلبت عليكم هكا بالرغم من أنها بنت خالتكم؟؟؟
ربي يهديها ويهدي اخوك ويفرج عليكم ان شاء الله.

[سَامِيَة]

الإنسان كي يعود دائما يجري من
ورا واحد يتم هذاك دايما
هارب عليه
بصح كي يحبس من الجري ينتبه
الآخر ويرجع هو إليه

حسسوه بالخطأ الذي يقترفه لا أقول
لكم قاطعوه لأنها صلة الرحم ولكن
انصحي والدتك بأن تظهر له بعض
الغضب عليه. .....

مادمتم ماشيين على نفس النسق
الكلام في ظهره وتوجيه الإنتقادات
إليه وانتقاد زوجته أمامه سيستمر هو
في نفس السلوك لأنه سيحسب نفسه
على حق. . . .

تخيلي أختي أنكم كعائلة جالسون بالصالة وكل واحد يمسك هاتف بيده
يخرب فيه وامكم تشاهد التلفاز. . . .
فجأة ينقطع التيار الكهربائي فتضعون
هواتفكم وتقررون تبادل الحديث مع
بعضكم....هذا ما يجب فعله معه حتي
يستفيق من حالته....

غيروا معاملتكم معه لا تقللوا الإحترام
ولكن أظهروا ياسكم منه وتعودكم على
العيش بدونه عاملوه بجفاء....

وقتها ربما سيتفطن لانقطاع تيار
الحب ويعيد حساباته من جديد. .....

بالتوفيق

[زبدة ذايبة]

لو كان نشوفوا للمشكلة من زاوية ثانية. رح نلقاو غير انت اللي راكي حامية فيها.

يعني من كل الكلام اللي كتبتيه ماكاين حتى شيء حدث بين خوك وأمك بشكل واضح ومباشر.

ممكن المشكلة اندلعت بالنسبة ليك لماقال أخوك أن تعطي لوالدتك مبلغا من المال.

ولما حول أخوك دفة المصاريف نحوك تغير كل شيء.

وأصبح أخوك عاقا ومقصرا في واجبات الأسرة.

لذا يا أختي

أرى ألا تحملي أخاك أكثر ممايستحق.

إن أنفق على أمه فهذا محض فضل وكرم وبر بوالدته.

وإن رفض فإنما يبخل على نفسه.

وعيب كبير تداوسوا على يماكم شكون ينفق عليها.

خلافكم هذا هو العقوق بعينه.

تولي انت عاقة وهو عاق. خاصة لو تكون الأم في حاجة للدواء أو المعيشة وانتوما خدامين وبدراهمكم.

ماتحصليش كلش في خوك وفي زوجتوا.
العيون اللي راكي تشوفي فيهم بيها خليهم يشوفوا لنفسك.
باش ماتغلطيش.

وعمرك ماتسمحي تكون أمك بؤرة توتر بينك وبين خوك.

تداوسوا على نفقتها !!!!!!

حاولي تحلي المشكلة المتعلقة بالوالدة.
إذا يخصها شيء تحميله انت وماتستنايش خوك هو اللي يشري.

هذا باب عظيم من أبواب الجنة مفتوح أمامك.

ماتخليش لا أخوك ولا أي شخص آخر ينافسك فيه.

وكيما ديري مع أمك يديروا معاك أولادك.

[dede2000]

قبل ما نمد راى
اتمني من اخي خالد العنابي ان لا يكون قاسي مع من يطرح مشكلته .
اختي انت كذالك راكي عاقة للوالدة نتاعك
والمبلغ لي تمدي فيه لامك مأثر فيك بزاف
و3000دج والله في وقتنا مادير والو وانت قاتلة نفسك و تذكري في ظروفك من اجل....
هذي أمك يعني توكليها لحمك ودمك وقليل.....ديري واجبك واكفي احتياجات الوالدة وخوك بينو بين ربي
ولا تربطي المساعدة نتاعك لامك لهي واجب بعلاقة خوك ومرتو بأمك
اما قضية اخوك القاضي خليه كاين رب وعقوق الوالدين والله غير عقوبته في الدنيا قبل الاخرة
انا أسئل القاضي المحترم واتمني انو يكون قاضي حكم في الجنح
ماذا ستحكم في قضية اهمال الاصول.....تقدر تنطق بالحكم .....ام تحتاج نعطيك رقم المادة......سيدي الرئيس

[muslim girll]

اللهم وفقنا للقول السديد والعمل الرشيد
على حساب وش قريت

راكي تكبري فالموضوع

العائلات راهي تعاني اكثر من هكدا
وش دار خوك هذا
اصلا يماك سيفت عليه
وبالاك هو راهو يخلص فيها لاخاتش مازالو ماشي مقتنع بمرتو

صغروها تصغار
ايدا مدلها دراهم تشدهم وايدا مامدلهاش ما دومونديش
وتقولوا معليش يا وليدي خبي دريهماتك لولادك وتصيبهم انت كمل تاويلك وربي يباركلك
يعني الام تقدر تجبد وليدها بدعاوي الخير في وجهو و باللسان الحلو وتفكرو بيامات الصغر كي كانت تربي فيه ..
وانت حرام تْشيّتي لخوك !! اكسبيه يا لفاهمة ماشي تعيطيلو تسمعيه لكلام اللي ماشي مليح وزيد بالزيادة خوك الكبير !
ربي يقولنا «ولا تستوي الحسنة ولا السيئة ادفع بالتي هي احسن فاذا الذي بينك وبينه عداوةٌ كانه ولي حميم »...مي حنا اللي ما نحبوش نعرفو وش يقول ديننا .
وانتوما قدما يشوفكم كارهين منو يزيد يبعد
وماكالاه تهدرو بالشر على مرتو
انتوما لصقتوهالو اومبعد تدورو عليها ...حبيتو تهبلوه !
ربي يؤلف بين القلوب وقولي ربي يبارك لخويا فالدخل تاعو بالحلال مام ايدا مامدناش .

[ام رضوان]

السلام عليكم
شوفي اختي كون تاخذي من رايي اجبدي روحك على الموضوع ومعندو ماحشرك فيه
اذا هو عق الوالدة يجي نهار وين يسلك ربي سبحانو يمهل ولايهمل
وانت اذا ساعدتي الوالدة راهي مش مزية من عندك
وزيد300والله مادير شيء في وقتنا
حاجة اخرى امك جات شكاتلك من اخوك ولاانت وحدك تتدخلي؟
اذا جات شكاتلك قلها ياامي انت امو وانت اللي حقك عليه وانت اللي لازمك تتكلمي
اذا ماشكاتلكش تاكدي بانو راكي تقلقي في روحك في الباطل
وجربيها اتكلمي على اخوك او هاوشي عليه قدامها وتشوفي ردت الفعل تاعها
هذه هي الام
اما بالنسبة لزوجة اخيك
يعني حاجة تحير
كيفاش من سيها رااسها تتبدل عليكم؟
يمكن كاينة حاجة او كاش فتان دخل بيناتكم او او.....الخ
المهم طيعي انت امك اللي تتحاسبي عليها وخلي الاخرين كاين رب يحاسب
ربي يهدينا اجمعين امييييين

[غزلانْ]

السلام عليكم

ليس البر متعلق بمنح المال لتصفي أخوك بالعاق فمجرد تفكيرك هذا كسر خاطر و به يكون العقوق
كلاكما متحاسبان على أمكم فأنت تنتظري من الأخ ليمنح من ماله و هو بدوره ينتظرك
و تنتج المحاسبة
المال يكون عن طيب خاطر لتجد البركة في صحتها أثناء العلاج و ان كان غير ذلك
ارغاما فالامتناع أفضل بكثير لكليكما
بالتويق
و لا تقولي لأمك ماقاله لك أخوك تقسيم المال ستحس أنها عبء عليكم
اللهم لا تجعلها تحتاج أحد سواك شفاها الله

[توتة2008]

ربي يهدينا