كرهت لبلاد ....

[مشكلتي]

السلام عليكم

صراحة حاب نخرج ما في قلبي

كرهت هاد لبلاد. جربت كل شيء وأحس نفسي مقهور .... لمادا ولدت جزائريا ... الله غالب في بعد الاحيان نجهل

للعلم فقط

أعمل في مجال حر يعني مدبر على روحي والحمد لله الرزق من عند الله عز وجل

حسبي الله ونعم الوكيل

لا سكن لا دار لا دوار

مع أنني متزوج مند أربعة سنين وتقدمت بطلب سكن ... بالاك على 80 عام نديها السكنة

كنت أعتقد انني بالزواج سأرتاح نفسيا أو ماديا فقد قيل ان الزواج يجلب الرزق

لكن زاد الأمر سوءا من ناحية المادية ... فتحت مجال عمل في التجارة قهروني بالضرائب و التأمينات ... طاحو عليا ب9 ملايين ضرائب و 4 ملايين تامينات وداك العام كنت مستاجر بيت ب 15 مليون والعمل تاعي نقص بزاف بسبب قوانين الاستيراد التي وضعوها


من الناحية المالية طاحت بيا بزاف الحمد لله على كل حال بصح حاس روحي رايح نزيد نطيح

بقاتلي السيارة اللي نعمل بيها

راني نخمم نبيعها ونهرب من هاد البلاد المشكلة هي أنني لدي مشاكل ضرائب مع الدولة

حبست الروجيست وحبست العمل بشكل قانوني يعني راني نخدم أونوار ...

المشكلة هي أنني لا أستطيع طلب التأشيرة يعني لا أستطيع الدهب والهجرة بشكل قانوني للاسباب السابقة

لم يتبقى لي الى الحرقة والهجرة الغير شرعية

راني قررت قرار لا رجعة فيه بأنني نحرق ونروح لبلاد العدل

الله غالب راني باغي نطرطق

[MinaGrey]

نعم ، احرق، والله لبلاد هادي ما فيها والو، لا صلاح ولا عدل ولا خدمة ولا اي شيء
انا قريت فالجامعة، كنت غير ب 16 ة 15 ..دارولي مشاكل باه منديش المنحة الدراسية ونروح نقرا فالخارج وحاليا حاوزوني بدون اي سبب ووين نجري يقولولي طفرت فيك
الحرقة هي لي تخلصنا من الحقرة
لماذا ولدنا فالجزاير يا ربي
الحمد الله على كل حال
ربي يفك حوالك

[عثمان الجزائري.]

قبل التفكير في الحرقة، تعلم حرفة فهي سلاحك في أي بلد

[khawla_eleulma]

تحرق؟؟؟؟؟؟ يخي متزوج ولا لمدام رايحة تحرق معاك؟؟؟؟؟ كون راجل وتجمل المسؤولية كي يكتبلك ربي الفقر يكتبهولك هنا ولا في الخارج وديجا وش راح تخدم في ااخارج انا نعرفهم زايدين ثم وقراو ثم وملقاوش الخدمة تجي انت حراق تلقى الخدمة غير لكنت حاب تحدم خدمة ؟؟؟؟؟؟؟؟

[ابو سليمان10]

حال بلادنا معلوم للجميع لاجديد...ان اردت ان تهاجر من حقك...لاكن لا تلقي بنفسك الى التهلكة فكر في ابنائك

[نبض قلبي]

اخي في هذه الحياة كل واحد وين عندو النقص
الله غالب ، بلادنا عشنا فيها و نعرفوها
ربي يفرج عليكم ان شاء الله
لكن قرار الحرقة ماهوش حل
اتفكر العواقب و الاساس انك راح ترمي نفسك و حياتك للتهلكة
ربي يجيب الخير ان شاء الله

[الفتاة السعيدة]

اخي تحرق وزوجتك
هل هي موافقة
ربي يهديك ويفرج عليك

[قدور بن عاشور]

شوف يا صاحبي
أنا نجيك من الأخير
البلاد هذي قاع ماراهيش بلاد
التخلف ضارب أطنابه فيها و في كل المجالات
لو بدأنا اليوم بالإصلاح فسنحتاج لربع قرن من العمل المتواصل حتى نعيدها إلى السكة فقط ثم ننطلق من الصفر.

يعني حياتي و حياتك و حياة جيلنا راحت صايي
لذا أولا لا تغامر بحياتك هناك ألف طريقة و طريقة للهجرة
أقعد مع راسك وخمم مليح.

[هـــدوء]

لا خدمة لا دار لا دوار و تروح تتزوج !!!
الإنسان ما يتزوجش حتى يستقر ماديا و يوفر حياة كريمة لروحو
و بش توفر حياة كريمة لازمك إما شهادة أو حرفة
و أنت كما يبدو ماعندكش الإثنين و هذا خيارك
منبعد تزوجت و هذا سوء تنظيم للأولويات
دخلك محدود و مش كافيك أنت كفرد راح يكفيك و أنتم شخصين أو أكثر ؟؟
الزواج يجيب الرزق؟! كيفاش مثلا ؟ هل توقعت يطيحو عليك الدراهم من السما كي تتزوج!!
الرزق يجي بطريقة وحدة هي العمل و العمل الجاد.
و إذا فشلت في اختياراتك للعمل هذاك فشلك أنت حسب خياراتك أنت .ما ترميهش على الجزائر.
و الفشل مش عيب .العيب أنو كل مرة نحصلوه في البلاد و العباد.
حل مشكلتك بسيط و هو أنك تقتنع بلي حياتك هذي هي نتيجة خياراتك أنـــــت
و منه لازم تبدلهم و تشوف حاجة لي صح تنفعك .
و الأهم من هذا كل هي زوجتك . بأي حق راك تمرمد فيها معاك ؟؟
ماهيش مجبرة تتحمل فشلك و تتحمل زوج هارب بأوراق غير شرعية .
راك تزوجتها بميثاق غليظ أنك توفرلها حياة كريمة بأبسط الأمور .
جو المغامرات هذا كنت عيشوا قبل ما تتزوجها و تولي مسؤوليتك مضاعفة.
و أخيرا فرضا راك حرقت.وش راح تخدم ثم مثلا؟ مدير و لا رجل أعمال؟!

[sam2016]

ربي يفرج عليك وعلينا

[يسمينة الزهور]

السلام عليكم أخي
الدنيا فانية وكل واحد مبتلى والأخرة هي دار الخلود
الهجرة ليست هي الحل يا أخي صحيح أن بلادنا بلاد كثر فيها الظلم والميزرية لكن اللَّه هو الرحيم وهو الرزاق قبل ماتفكر في الهجرة فكر أنك تصلح نفسك تقرب من اللَّه أكثر فهو الذي سيرزقك
هل فكرت انه يمكنك أن تموت في البحر قبل ان تصل الى هناك وتذهب الى جهنم وبئس المصير والعياذ باللَّه لأن هاذا يسمى إنتحار
ام هل فكرت في حالك ان وصلت هناك كيف يخيل لك انك ستعيش هناك لا مال لا اوراق رسمية ستعيش جحيما
الرزق والفرج من اللَّه وحده لا شريك له لذلك إصبر وتوكل على اللَّه وأكثر من الإستغفار فهو سيرزقك حتما

[ityou]

الحياة في البلاد افظل من الحرقة ناس في اوربا ايباتو في الشارع ولكن الي عندو مهنة مطلوبة عادي يتزوج بكاش وحدة ويتكل على ربي

[Barcelone 4]

اسف على الرد الغير واضح من المصدر .... مختصر رسالتي السابقة ارجع الى الله انا خبير في المشاكل