وصفات حراير الكوزينة الجزء الثاني - الصفحة 69

idron0 · 2015-08-28, 16:49

طريقة عمل لحم القديد زينب 83

جيبي شرائح اللحم انا مانحبوش بزاف مشحم ، ندير فيههم شرحات صغيرة بالسكين ، و نحضر درسة فيها الكثير من الملح و الثوم الطازج او المجفف ، كسبر مرحي فلفل اسود فلفل عكري و فلفل احمر حار و ممكن البهارات لي انت تستعمليهم عادة و نخلطو الدرسة مليح مع اللحم و نخليوه فيها 24 ساعة في الثلاجة حتى يتشرب النكهات و يطلق الملء نتاعو بعدها ننشروه على حبل الغسيل في مكان مشمس و مهوي و خطيه بقطعة شاش اذا حبيتي ، و في الليل دايما غطيه يقماش باه مايتنداش
بعد أسبوعين او ثلاث راح يجف خبيه في إناء مغلق من الافضل يكون طين او زجاج ، ممكن خارج الثلاجة انا الصراحة نخبيه في الثلاجة
عند الاستعمال لازم تغسليه مليح بماء و قطرة خل

على فكرة انا ماننشروش في حبل الغسيل ، انا نخيطو على شكل سلسلة و نعلقو في مكان واحد .

idron0 · 2015-08-28, 16:50

العجينة المورقة زينب 83

1كلغ فرينة نديرلها ملعقة خل ابيض و ملعقة زيت و نبلها بماء بارد حتى تولي عندي عجينة متماسكة و ماشي جارية يعني يابسة
الزبدة ندير 500غ تقسمها على ثلاثة و هذي احسن طريقة لانو هكذا نضمنوا الزبدة تتوزع جيدا على الطبقات

اما الطريقة هي نفسها المستعملة في عجينة الكرواسون في موضوعي
https://www.djelfa.info/vb/showthread.php?t=1763926

فقط العجينة لازم تكون مرتاحة قبل التشكيل و بعد التشكيل هكذا راح تحافظ على شكلها
و الفرن لازم يكون سخووووووووون كي ندخلوها طيب غير تبدى تتورق نقصو لو الى اقصى حد هكذا راح طيب مليح من داخل و ماجيش معجنة
صراحة هذه احسن طريقة جربتها لحد الساعة سهلة و مضمونة لحد كبير .

idron0 · 2015-08-28, 18:47

طبق بالدجاج ام اماني و عبدو

تجيبي صدر دجاج تقطعيه مربعات صغيرة وتوبليه بثوم وحشاوش كمون ليمون وشوي من القشورملعقة صغيرة زيت وتخليهم بجيه,من جهة اخرى
تخدمي المايوناز وتخلطي معاها قطعة انتاع فرماج شاف تجيبي مول تدهنيه بشوي زيت وتقطعي فيه حبة بصل شرائح وفوقها وحدة فلفل حلو وتديريلهم قليييل من الملح وفلفل اسود وممبعد هذيك القطع انتاع الدجاج تخلطيها مع المايوناز وتحطيها فوق هذاك البصل والفلفل وتسويها مليح حطي فوقها ورقة رندوتغطيها بالالمنيوم وتدخليها في الفرن بعد مدة نحي عليها الغطاء وخليها تنشف وكي تحسيها طابت خرجيها من الفرن وديري لها فرماج شيدر او اي نوع تحبي هذ الخطوة اختيارية قطعيها وحطيها في الصحن.والله وصفة سهلة وذوقها رائع.

idron0 · 2015-08-29, 05:47

معجون العنب من دون بذور omhadil

كيلو عنب 600غ سكر نخلطهم مع بعض ونخليهم فى الثلاجة ليلة او اكثر فى كل مرة خلطيهم
فى اليوم التالى تلقايى السكر تقريبا ذاب حطيه فى طنجرة تكون كبيرة زيديلو قليل من الماء تقريبا فنجان قهوة وعصير ليمون
على نار قوية وطبعا كيما المعروف كى يبدا يغلى نحيلو هذيك الرغوة لى تتراكم من فوق
بعد مايطيب خليه شوية جارى ارحيه بالميكسور بعدها راح تلقاى الكثير من العضم تاع العنب
هنا خذى قدرة فيها كسكاس فرغى فيه العنب بداخل الكسكاس وبواسطة ملعقة خشب حكى المعجون راح يخرج ويتصفى وممكن تستعملى ساجى ساشى يكون نقى دريه فى يدك وحكى يجيك ساهل هكذا يخرج كامل اللب تاع العنب ويبقى العضم والقشرة داخل الكسكاس
واذا شفتيه جارى عاودى رجعيه فوق النار يعقد شوية

إضغط هنا لرؤية الصورة بحجمها الطبيعي.

idron0 · 2015-08-29, 08:11

كيكة التفاح المقلوبة ام وابنة

كان عندي صوص توفي تع الهام كنت جربتو منذ ايام حطيتو في المول و كثرت شويا الوصفة الاساسية تتطلب كراميل بصح عوضتو بصوص التوفي تقريبا نفس الشيء
نقيت التفاح و قطعتو و فرغتو في المول فوق الكراميل و على فكرة ممكن تستعملي الاجاص او أناناس تقطريه من الماء او اي فاكهة تشوفيها مناسبة

عملت جنواز اللي هي في الحقيقة مجرد مسكوتشو خفيف

درت أربعة بيض مع رشة ملح ضربتهم مليح مع نصف كاس سكر المفروض اكثر و لكن ما حبيتهاش حلوة بزاف طبعا ندور في نفس اتجاه عقارب الساعة و ما نغيرش الاتجاه خلاص هذي نصيحة الخبراء
كي بياض الخليط و زاد حجمو زدتلو نصف كاس زيت تدريجيا كيما نعملو المايونيز
ثم كاس لبن انا في العادة نستعمل علبة ياوورت طبيعي بصح كاس اللبن كان قاعد في الثلاجة يتفرج فيا فرحمتو و حطيتو
حبست الباتور و فرغت كيسين خمارة الحلوى لا لوفير
و فرغت بالعقل كاس فرينة و حركت بملعقة خشبية من التحت للفوق
ثم ضفت كاس ثاني فرينة و نفس الشيء دخلتو بالعقل من التحت للفوق
كي تخلط كلش فرغت الخليط مباشرة فوق الفرن
دخلتها فرن سخووووون و نقصتلو شوية و غلقت باب الفرن و ما فتحتوش حتى نصف ساعة بالتمام و الا رايحة تهبطلي
طابت الداخل شعلتلها حمارت شوية من الفوق
خرجتها و قلبتها و بسسس.

إضغط هنا لرؤية الصورة بحجمها الطبيعي.

idron0 · 2015-08-29, 18:42

صابلي اسيا 27

500 مرقرين طرية - 4صفار بيض - 2 فنجال زيت صغار - 10 ملاعق كبيرة سكر - حوالي كاس مايزينة - 2 خميرة كيميائية - فرينة -مربى - كاوكاو مقشر و مرحى خشن و بياض بيض نلصقو بيه الكاوكاو قبل ما نطيبوه
خلي العجينة طرية شوية و بعد ما تطيبي الحلوة خليها حتى تبرد باه ترفديها من البلا تاع الفور باه ما تتفتتش
صحيح فيه الزيت مي ما يجيش كيما الصابلي اللي بالزيت.

idron0 · 2015-08-29, 19:15

خبز lyzzabel

كيلة فرينة و كيلة سمييد رطب او رقييق و م ص ملح و م ص سكر و م ص او 2 حلييب غبرة و خلطيي و م ك معمرة خميرة الخبز و 2 م ك زييت عاادي و اعجني بالما داافئ حتى تولييلك عجيينة ملسااء و خلييها شوية مطلووقة يعني تلصق فاليد و غطيها و خليها تخمر عشر دقاايق و عاودي هوديلها الخموور و اقسميها كويراات و قرصييهم في سنيي تااع الفرن مدهوون بالمارغريين و ميين تكوني تقرصي فييهم ديري علييهم من فووق شوية سمييد و خلييهم يخمروو و طيبيهم في فرن ساااخن من قبل على 220 درجة و حمرييهم من فووق .. و كي ما يكوونش عندي السميد نديير الفريينة وحدهاا بنفس الطرييقة يخرج خفيييف يهبل و مقطن.

ammmm · 2015-08-30, 19:58

دوبارة بسكرية *ام سراج وملاك*

تغلي الحمص الي تكوني رنختيه من قبل في الماء ليلة كاملة تغليه مع الملح والثوم واولفلفل الحار
في صحن غميق ضعي الطماطم المرحية خشن و الثوم و الكسبرة و 2 ملاعق كبار زيت زيتون و الفلفل المقطع و الطماطم المصبرة و الهريسة الحارة والليمون و التوابل بما فيها ملعقة صغيرة كمون أخضر مرحي و اخلطيهم مع بعض جيدا
**الخطأ الشائع الأول في تحضير الدوبارة أنو يستعملو فيها البصل و لكن الدوبارة الأصلية حبيباتي ما يجيهاش البصل أبدا**
*والخطأ الشائع الثاني عند تقديم الدوبارة أنهم يخلطوا الدرسة نتاعها مع الحمص والمرق نتاعهم و من بعد يحطوه على النار يغلي و هذا خطأ لأنو لتحضير الدوبارة البسكرية عزيزاتي الدرسة نتاعها ما طيبش**
**الطريقة الصحيحة لتقديمها هي إنك تسخني جيدا الحمص نتاعك و تحطيه في صحن التقديم و من بعد تضيفيلوا الدرسة و تخلطيه جيدا و من بعد حطيلو شوية كسبرة مقطعة من فوق و ملعقة زيت زيتون وقدميه نفسها نتاع الفول

ammmm · 2015-08-30, 20:02

اللوبياا خضراا باللحمlyzzabel

في كووكطة نحط شوية زييت و مارغريين و بصلة صغييرة راابي و اللحم تااع الجااج وﻻ الغنميي و نقليي على ناار هاادية نتبل بالملح و الفلفل اﻷسود و عوود صفيير قرفة و شويييية زعفراان نزييد نقليي و نمرق قييس ما يتغطى اللحم و نبلع الكوكوطة .. من جهة اخرى نكوون نقييت اللوبياا و غسلتها ملييح و قطرتهاا .. نحل الكوكووطة و نرمييها تطييب مع اللحم و نقفل علييها و نخلييها على ناار اقل من متوسطة حتى يطييبو هي و اللحم كيفكييف و تخثاار ﻻاصووص .. ما تنسييش دووقي الملح و بسسسسس
طرييقة اخرى .. نراابي بصلة صغيييرة في كوكووت مع شوية زييت و قلي مع اللحم و نتبل بالملح و الفلفل و شوية زعفراان و عوود قرفة و نتبع نفس خطواات الطرييقة اﻷولى و ميين تطييب اللوبياا نحل الكوكوت و نقطع فووقهاا حبة طمااطم رونديﻻات و فووقها حبة بصل رونديﻻاات و ندردر رشة صغيييييرة ملح و فلفل .. ما تنسييش تنحي اللحم .. و نعااود نقفل علييها وحد عشر دقاايق حتى ربع سااعة تجي بنييييينة و الصلصة طبعاا تكوون خااترة على هادييك ما نكترش المااء خااطرش الطمااطم و البصل يطلقوو الماا تااعهم هوما لي يزييدو فالبنة .. و تنجمي ديرييها بﻻ لحم تااني تجي بنيينة

ammmm · 2015-08-30, 20:03

لووبيا صووتي باللحم محمرlyzzabel
قليي فالكوكوت بصلة صغييرة راابي وﻻ مقطعة شراائح رقييقة انا كل خطرة و كيفااش .. قلييها مع اللحم جااج وﻻ غنميي و تبلي بالملح و الفلفل و عوود قرفة و مرقي بالمااء ما تكترييش و اقفليي ﻻ ك كووت و خلي اللحم يطييب حتى تختاار الصلصة .. صفييها و خلي اللحم يتحم في ليداام تااعها على ناار هاااادية ماﻻازمش اللحم يطييب بزاااااف بااش ما يتفتتش فالتحماار .. حمرييه على الجهتيين
و من جهة اخرى نقي اللوبياا و اغسلييها و قطرييها ملييييح و فورييها حتى تطييب .. وجدي مقلة دوبي فييها على ناار هاادية شوية مارغريين .. تنجمي تضيفي شوية زييت و قلي زووج سناات تووم مقطع رقييييق و ملح و فلفل اسود و ضييفي اللوبيا المفورة و مرة على مرة حركي بالملعقة غيير بالعقل و قبل ما تطفي ضييفي عليها شوية معدنووس مقطع رقيييق .. فالتقدييم حطيي اللوبياا فالطبق و فووقها حطي اللحم لي حمرتييه و اسقيي بالصلصة لي خليتييها على جهة و شهية طييبة حنوووونة

ammmm · 2015-08-30, 20:13

الكرام *ام محمد تاج*

اولا تبعو معايا سخنت نص لتر حليب وخلطت فيه زوج مغارف كبار نواد كوكو وغليتو وخليتو بجيهة
ثانيا حطيت في كاسرونة نص لتر حليب واحد آخر وزدتلو مغرف صغيرة كاكاو واربع مغارف سكر وبيضة مخبطة وثلاث مغارف كبار نشا وحطيتهم على النار حتان خثارو نحيتو من النار وضفتلو باطة شوكولاطة اومباسادور نوار المرة مممممممم كي ذابت مع السخانة خبطتو بالباتور وغطيتو ببابيي فيلم وخليتو برد مليح
نرجعو للحليب بالنواد كوكو حبيباتي صفيتو بصح لوكان جات لداري مانصفيهش بصح حبيت الضياف مايديرونجاوش بحبيبات النواد كوكو
المهم كي صفيتو زدتلو بيضة مضربة واربع مغارف سكر وثلاث مغارف نشا وحطيتهم على النار كي خثارو زدت خبطتهم بالباتور وغطيتها وخليتها تبرد مليح ونتحصلو على كريمة بذوق النواد كوكووو مممممممم
ثالثا خبطت ثلاث مغارف كرام شونتيي وحطيتهم بردو
كي برد كللللش ضفت نصف كمية الكرام شونتيي للكريمة البيضاء ومعاها نص مغرف صغيرة فاني وخبطت بالباتور على سرعة خفيفة خلاص وزدت النصف الباقي لكريمة الشوكولاطة وحطيتهم في لي رامكان وزينتهم بالموجوووود ولازم يبردووو مليح مليح والله انتعاااش مممممممم

ammmm · 2015-08-30, 20:25

قاطو الفلان*ام سوهيل*

3بيض ونحو 1صفار لدهن الوجه كاس سكر ناقس ربع وهداك الربع الي نقسناه نعوضوه بي الفلان

نخلطوهم مليح ونضيفو كاس تع زيت ونضربو ومنبعد نضيفو كاس ميزينة ونصف باكي خمارة ونلمو بي الفرينة حتى تتلم العجينة ومن بعد نطبعوها دوائر وهداك الصفار الي خليناه نضيفوله شوية كاكا و2مغارف قهوة او حليب او حتى ماء عادي نخلطو نطلو وجه الحلوة

ونخربشوها بي الفرشيطة ونطيبوها ونخرجوها منحوهاش من الصنية حتى تبرد

idron0 · 2015-08-31, 12:58

طاجين الحلو فايزة 44

اولا ننقع الفواكه الجافة في ماء زهر وفيه عصرة ليمون حتى يطراو مليح
وبالنسبة للصوص انا ندير كلش بارد في بارد ندير الفواكه طرية ونزيد السكر حسب الفاكهة ونزيد مغرفة زبدة طرية وندير الماء قيس كاس والقرفة عود والنجمة ووووو ندير الكل فوق النار حتى يعقد مليح نزيد ندير ماءزهر حوالي نصف كاس ونيغلي شويا نطفي ويقدم في صحن وشوفي الصورة انا الصوص نصفيها ونزين الصحن عند التقدييم مباشرة نسقي شويا من فوق

بالنسبة للصحن الاول راه فيه خبز الباي طايب عادي قدمته معاه والتزيين كيما تحبيانا قدمته بالطريقة لللي شفتي .

إضغط هنا لرؤية الصورة بحجمها الطبيعي.

إضغط هنا لرؤية الصورة بحجمها الطبيعي.

idron0 · 2015-08-31, 13:00

شطيطحة دجاج فايزة 44

اطراف دجاج نتبلها بالملح وفلفل اسود وشويا عكريييييونقليها في السمن وزيت حتى يتحمرو نحيهم ثم في القدر ندير الدرسة اللي هي ثوم وفلفل ادريسوفلفل اسود وفلفل عكري وشويا ملح ونهرسهم مليح في المهراس نقليهم شويا برك ونرجع الدجاج للقدر نحرك شويا ونمرق شويا ماء ونزيد شويا طماطم مصبرة

ومن جهة اخرى الصدر نرحيه ونزيد له نفس التوابل اللي في الرق ونزيد له بياض بيضة ومغرفة خبز يابس مطحون وشويا من الدرسة ونعجن مليح ندير خبيزات ونرمدهم في الفرينة ونقليهم

المرق يغلي ندير شويا حميصة تكونة طايبة مليح ونزيد الخبيزات تغلي ويخثر المرق وتقدم .

إضغط هنا لرؤية الصورة بحجمها الطبيعي.

miessa · 2015-09-01, 13:28

ميرسييييييي كتييير