مشكلة عائلية

[مشكلتي]

السلام عليكم
بكل إختصار هناك مشكلة أنا خاطيني فيها لأنها تدور ما بين أمي و زوجة أخي و حتى أخي ..و لكن أرجو منكم النصيحة لعلني أستطيع أن أحسن الأحوال بينهم
المهم .. أنا شاب نسكن مع أمي و أبي و أخي و زوجته ..في هاد رمضان زاد جاء خويا أخر هو و زوجته باش يفوت معانا زمضان تاني ..في اليوم الثالث الوالدة التاعي زاحت عند جارتنا تسهر كانت معروضة و قالتلها جارتنا غدوة بعثيلي زوجة أخي توريلها لاروسات تاع وحد الماكلة ..المهم في الصباح الوالدة جات عندهم و قالت ل وحدة فيهم و هي زوجة أخي لي ماتسكنش معانا أنتي روحي لعند جارتنا راهي باغية توريلك روسات ..كي راحت زوجت أخي الأخرى زعفت و غلقت على روحا الباب و بدات تبكي على لي علاش راحت قالت للخرى و ماقالتلهاش هي و بعد 5 دقائق جات بنت جارتنا و قالتلها أرواحي و زادت راحت هي بلا ماتقول للوالدة تاعي ..و من داك النهار و الوالدة راهي زعفانة منها و زعفانة من أخي لأنه حا في صفها و دافع عليها .....فهل كان تصرف زوجة أخي طفولي أم أمي كبرتها على حساب ما قال خويا

[لحن الحياة.]

الغلطة تع الكنة حابة تعمل مشاكل .......................كاين واحد يبكي على جال ما راحش لجيران ؟؟؟؟؟؟؟؟؟؟؟
و راجلها نورمالمو اصلا ما يخليهاش تروح للجيران و ++++++++++ بدون اذن
هنا الام تاعك عدها الحق تزعف بصح نورمالمو الكناين ما يروحوش في زوج للجيران لا الكبيرة لا الصغيرة ..........

[rose de sable s]

اذا كانت جارة قريبة وهي شاورت رجلها عادي
زوجة اخوك غاضها حال تقول اتها فضلت زوجة اخيك ضبفة عليها
خليهم مع وقت يتصالح

[الواثق]

انا ننصحك بعدم التدخل وخلي الامر كيما هو ..........لان النساء يتخاصمو ويضاربو تقول بلي مستحيل يرجعو وغدوة تلقاهم يضحكو تقول ماصرى والو .........يعني تكسر راسك برك بمشاكلهم التافهة..............والله المستعان

[just do it]

سوق. النسا. واعر بزاف نصحك خلي روحك بعيد يمات وتنحل حتانا يصراو هذ المشاكل فالدار سيرتو يكونو زوجتين خطرات نقول نسبهم قع مي يمات وتجبرهم يضحكو نورمال مكن والو تهبل منراسك
الله يوفق

[كاميلا]

يخرب بيت العبط قالها المصري واش هاد السطحية علاش يديروا المشاكل لعمارهم انا المشاكل اللي صرات واللي صارية فيا اكبر ما هاد التفاهات انا معييت نروح ليهم يخرجوا وميديونيش وعادي المشاكل اي اكبر من هاذي هاذي مش مشكل

[كاميلا]

وكي فضلتها على الاخرى ومن بعد علاش هادي امها وغاضها الحال تفضل او متفضلش المهم تكون مع راجلها مليحة

[ana hia]

هههههههه يخي حالة يخي .. هاذي بلعاني دارتها .. باش تروح دير دار وحدها
ربي يهديهم كومبلي ... اخطيك منهم خليهم يحلوها وحدهم .. يعطيك خاطية راسك ... هاذو هوما النسا

[أم خلول]

السلام عليكم
في الحياة الزوجية وإلا في كل المجالات الواحد لازم يستعمل الحكمة والذكاء قبل ما يدير أي حاجة يبان حاجة ساهلة و تافهة بصح كبرت وصار فيها زعاف وبكاء
يماك لي غلطت من الأول تقول لكناينها واحدة فيكم تروح عند الجارة تحتاجها وتخليهم يتفاهمو بيناتهم أنا حسيت بالكنة لي زعفت حست بلي عجوزتها تحب لوخرى خير منها نورمال تزعف بصح ماشي دير حالة والبكاء شوي برك ماشي للدرجة هاذي
وزيد كي جات الجارة وعيطتلها كون ماراحتش من باب عزة نفس كون قالت عجوزتي قالت لوخرى علاه نروح أنا وحدة تكفي والسلام

[كاميلا]

المشاركة الأصلية كتبت بواسطة أم خلول

السلام عليكم
في الحياة الزوجية وإلا في كل المجالات الواحد لازم يستعمل الحكمة والذكاء قبل ما يدير أي حاجة يبان حاجة ساهلة و تافهة بصح كبرت وصار فيها زعاف وبكاء
يماك لي غلطت من الأول تقول لكناينها واحدة فيكم تروح عند الجارة تحتاجها وتخليهم يتفاهمو بيناتهم أنا حسيت بالكنة لي زعفت حست بلي عجوزتها تحب لوخرى خير منها نورمال تزعف بصح ماشي دير حالة والبكاء شوي برك ماشي للدرجة هاذي
وزيد كي جات الجارة وعيطتلها كون ماراحتش من باب عزة نفس كون قالت عجوزتي قالت لوخرى علاه نروح أنا وحدة تكفي والسلام

وكي تحبها اكثر من الاخرى وينو المشكل علاش راهي امها ومطالبة بالعدل بينها وبين الاخرى اللي يبقى يخمم في هاد الشكل يعيش روحوا في الهم والمشاكل

[أم خلول]

يا أختي كاميلا معليش تحبها خير من لوخرى ماشي مشكل في المحبة المشكل في التميييز هي دير كناينها كيف كيف من باب كسب رضا الله وثاني كسب الناس ماشي ياخي انتي لي قولتي ديرها كما أمها ما لازمش تزعف عليها هيا خلاص هي ثاني ديرها كما بنتها وزيد راهي زوجة ابنها هذا ابنها كي يشوف واحدة تعاملها مليح ومرتو لالا ما يزعفش؟؟؟ ؟؟؟
لاجتناب المشاكل ديرهم كيف كيف ولي في القلب يقعد في القلب

[كاميلا]

المشاركة الأصلية كتبت بواسطة أم خلول

يا أختي كاميلا معليش تحبها خير من لوخرى ماشي مشكل في المحبة المشكل في التميييز هي دير كناينها كيف كيف من باب كسب رضا الله وثاني كسب الناس ماشي ياخي انتي لي قولتي ديرها كما أمها ما لازمش تزعف عليها هيا خلاص هي ثاني ديرها كما بنتها وزيد راهي زوجة ابنها هذا ابنها كي يشوف واحدة تعاملها مليح ومرتو لالا ما يزعفش؟؟؟ ؟؟؟
لاجتناب المشاكل ديرهم كيف كيف ولي في القلب يقعد في القلب

مارحش ديرها كيفها هذا هو الواقع اللي عايشينه كون جاو يخافو ربي المشاكل هاذي لا تذكر اصلا وهي تنحي من راسها خلاص تهتم بنفسها وزوجها وخلاص معندها مدير بحب عجوزتها وعدلها

[zina flower]

شوف اخي اذا كانت خرجت من الدار بدون اذن زوجها هنا راهي غالطة١٠٠٪ مايجوزش المرا تخرج بلا ماتشاور راجلها وامك عندها الحق تزعف في هاذ الحالة والواجب على خوك يعيط على مرتو وينهيها باش ماتزيدش تعاود٠٠0٠ومرة خوك بالاك دارت هكذا من الزعاف والغيرة برك المهم ربي يحط رحمتو بين العايلة كامل

[FELLA BIO]

في راي ان المشكل مصدره والدتك بداية
فلما ترسل زوجة اخيك التي تعد ضيفة اصلا في حين التي تسكن معكم وهي صاحبت منزل وبتالي صاحبة الجارة هذا لاينفي ان هذه الزوجة اخطات عندما لم توسع خاطرها وتفوت لكن غاضتها روحها كيما نقولوا
انا اري ان تنبه الوالدة الكريمة لهذا وان لا تزيد علي ذلك
هذا راي
موفق ورمضان كريم

[غير هام]

السلام عليكم

تفاهات الناس راها طيح روح وهادي كلات عمرها على جارة تحسب راهحو للماناج وما داوهاش تلعب يخي عقل دراري