مشكلة عائلية

[مشكلتي]

السلام عليكم و رحمة الله و بركاته
فكرت بزاف قبل ما نحط المشكل لكن الوضع لم يعد يطاق .
حنا 4 بنات و عندنا اب و ام و امي عندها ولد من زوجها السابق عمرو 29 سنة .
انا عمري 18 و اختي وحدة 20 سنة و اختي اخرى 16 سنة يعني شابات و عندي اخت صغيرة اخرى . المشكل انو حنا عايشين في دار صغيرة جدا لدرجة انو بعضنا ينام في الصالون و بالمناسبة اخي ميسكنش معانا . و بيتنا ملئ بالاثاث لدرجة تصعب تنظيفو . ابي يكتفي بدفع فواتير الغاز و الكهرباء و شراء الطعام و يشريلنا الملابس مرة في العام . و عندو ارض تاع قمح ما بغاش يبيعها و لا يستغلها و خلاها لخوه يستغل فيها . امي تعمل و عندها راتب كبير لكنها تعطينا مصروف 200 دج كل شهر بطلوع الروح . و ساعة على ساعة تشريلنا قش مستعمل . و امي تعطي لأخي 6000 دج كل شهر و شراتلو سيارة و وجدتلو دار يتزوج فيها مع العلم انو عندو باباه و يعمل ايضا . لكن امي تستمر في دفع مصاريفه ودفع مصاريف ابيها و امها و اخواتها رغم انو كل واحد فيهم عندو شهرية . وحنا ماعندناش حتى قرعة ريحة . و عندنا سيارة رائعة لكن عمرنا ما خرجنا نحوسو لانو سيارتنا ديما في القاراج و ابي ما يحبش يخرج . و حنا البنات تفاهمنا مع الوالدة نخرجو في هذي العطلة نشريو شوي ملابس و هي وعدتنا نخرجو . لكن امها لازم تدير فحوصات باش تدير عملية و مؤخرا امي تتقعد من 8 - 3 تاع العشية في المستشفى باش تدير فحوصات لامها و هي لي تدفع ثمن الفحوصات و العملية مع العلم جدتي عندها 6 ابناء لكن امي تصر على دفع كل شيء رغم انو جدتي مرضها ماهوش خطر لهاذيك الدرجة .
انا تعبت من هذا الوضع لا ملابس . لا طعام رغم انو حنا بنات . امي مازالت عايشة مع والديها و حنا في الهامش . ابي كاره حياتو هو ثاني و دائما في غرفته ما يحكي حتى مع واحد . امي تفعل المستحيل باش ترضي والديها و نسات بلي حنا ثاني محتاجينها . لو كانت ماتقدرش تصرف علينا و الله مانلومها لكن هي عندها المال و تصرف اغلبو على ولدها و عائلتها الاخرى و تخبي علينا . و كي نقولولها تقولنا قولو لباباكم . و هو تنازل على ارضو لخوه و ما يكسب منها حتى دينار .


تعيشو قولولي شكون الغالط . كانو قادرين يحسنو الوضع و يعيشونا عيشة الملوك لكن واحد فيهم ماهو حاب يتنازل .

الرجاء من الادارة حذف النص بعد ثلاثة ايام .

[هند222]

ااختي في الله حاولي تتكلمي مع احد كبير في االعائلة

اسالك ماهو موقف جديك اي والديها من هذا الموقف

وكذلك هل تحب والدك ام تزوجته مرغمة

وهناك عدة اسئلة لكي نعرف لماذا والدتك تتصرف بهاته الطريقة

وربي يسهل

[الزيتون]

اول شيء اختي تعلمي القناعة فهناك عائلات بلا منازل بلا ام بلا اب وانت قدرزقك الله بنعم لاتحصى فاحمدي الله
اما قضية الميزانية ومتطلاباتكم فكوني ذكية وحاولي تتحصلي على بعض المصاريف لاشياء مهمة تساعدك في دراستك او غيرها اما الامور الاخرى من الكماليات لو تخمي فيها وتقارني روحك بمن هم اكثر منك في المال رايحة تحزني وتصيبك الكابة فقط

وتذكري ان المأوى والاب والام والاخوة نعمة كبيرة حرم منها الكثير

[sirine3000]

ختي والله غير راني حاسة بيك بصح واش ديري ادعي ربي سبحانو والصبري قدما تقدري ومن الله الفرج القريب ان شاء الله وانتي سيي اجبدي ماماك ليك واحكيلها هادي المشكلة بتاني بالاك ماراهيش حاسة بروحها بتقصيرها من جهتكم . انتي حاولي احكي معاها وفهميها بلي باباك تاني مهوش حامل المسؤولية تاعكم وقوليلها واش خصك باللاك تفهمك وتتبدل متوالكم وننصحك نصيحة الصبر الصبر الصبر ومن الله الفرج

[zalamite]

على حسب ما فهمت انتم ضحية لسوءالتفاهم الحاصل بين الام و الاب فامك و على حساب فهمي تريد ان تضع الاب امام الامر الواقع و تجعله يسترجع ممتلكاته و لا يفرط فيها لاخيه و ينفق عليكم هو بدل ان تنفق عليكم هي ...ادا المسالة و الله اعلم لا تتعلق بكم كان تقولوا انا امكم لا تحبكم او ما شابه بل بلعكس فهي مسالة و قت فقط عليكم بالصبر و التعقل ...كما من مسوليتكم الان العمل على اذابة الجليد بينهم لتتضح الامور اكثر .

[ليلى خانم]

السلام عليكم ورحمة الله تعالى وبركاته
اختي واش كنت حابة نقولهولك قالوهولك الاعضاء بصح حبيت نزيد على كلامهم ونقولك بلي ربما يكون هذا ابتلاء من رب العالمين وان الله اذا احب عبدا ابتلاه يعني ماذا ؟ يعني يمكن الله سبحانه وتعالى ابتلاك باش تتقربيله بالصلاة والدعاء فوالله ان الدعاء يغير القدر ادعي ربي بالحاح وراكي رايحة تشوفي النتيجة ونوصيك بالصبر فقال الله عزوجل : " وبشر الصابرين الذين إذا أصابتهم مصيبة قالوا إنا لله وإنا إليه راجعون أولئك عليهم صلوات من ربهم ورحمة وأولئك هم المهتدون "
اذا ماعليك غير تصبري وتقولي انا لله وانا اليه راجعون وهذا لي راهوا صاير معاك اختبار فاذا احسنت التصرف اي ماغضبتيش ربي العالمين حتربحي في الدنيا والاخرة يعني كل الاشياء اللي نحرمتي منها في الدنيا ربي حيعوضهالك في الاخرة وماادراك ما في الاخرة فالملابس والطعام الذي ناتي به في الدنيا ينهتي والملابس تتمزق ولكن في الاخرة حاجة متخلاصش
وفي الاخير ننصحك اختي باه تدعي ربي العالمين لانه هو الرزاق
اسفة كان عندي بزاف حاجات كنت حابة نقولهملك بصح دايما تخونوني لغتي والفاظي.