اختي الصغيرة واعرة بزاااف

[مشكلتي]

اختي الصغرى عمرها 11 سنة والفارق ببنننا تقريبا 11 سنة اعاني من أفعالها ووقاحتها في التعامل معي ترفع صوتها عليا وترجع الصرف وتاني تهدر في هدرة نا منهدرهاش عندها فصاحة في لسان صح هي فايقة وقارية بصح مش متخلقة مفيهاش ذرة الحياء والسبب أيضا امي متضربهاش متنهيهاش إلا نادرا عاجبتها بنتها يا زينة وديما تبوسها وتتحضنها في حين نشوف امي بكري مدارتليش هذا الشيء شبعت ضرب وحنان مكاانش صح تحبني مي مش كما اختي وديما تقلها انت زينة تاع بناتي واخوتي ذكور تضربهم اذا قاسوها يعني راهي أميرة عايشة معنا ولقيسها ياويلو مام انا ممنعتش رغم أنها هي لتظلم وليت عايشة على اعصابي منها وتطور الأمر نشوفها نكرها مي في دار جدي من يعيط عليها تغيضني ومنحبش فيها ....بصح وقاحتها معي في هدرة وترجاع الصرف راهو مقلقني نضربها نحصل وامي نتقابض معها كون نقيسها وحتى علاقة مع امي متوترة بسببها تتهمني اني نغار منها ؟؟؟ من أي شيء من لسانها طويل ولا من جمالها الفتان! !! عادي يعني احساسي نحوها برك تعجرفها معي ومع اخوتي وامي توقف في صفها.
ما العمل مع هذي مخلوقة كرهتلي حياتي ساعات نتمنى كون مجاتش لدنيا راني تهنيت من تكسار الرأس.

[محارب الحمق]

ردة فعلك طبيعية. جميعنا نعلم ماحدث لسيدنا يوسف بسبب شعور اخوته بحب أبيهم وتفضيله له. التعامل مع الأبناء قضية حساسة يهملها الكثير من الأولياء جهلا. الصغير دائما ما يكون مدللا على حساب اخوانه مما يسبب دلاله الزائد وفساد أخلاقه وأول بذرة للفساد تغرسها الأمهات في بناتهم. من الخطير أن تدلل الأم البنات خاصة والذكور عموما لأنها مدعاة الى فساد الأخلاق والبعد عن الدين. حتى أمك نفسها ستعاني من هذه البنت عندما تكبر ان لم هي تغير تعاملها معها. ليس أمامك فعل الكثير سوى فتح الموضوع مع الأب ومع الام فأنت لست صغيرة. افتحي معهم حوارا حضاريا فمن أكبر المشاكل في المجتمع الجزائري غياب الحوار. لا تتكلمي مع الأخت الصغرى وتضيعي وقتك وتوجهي الى المسؤولين عن هذه الفتاة التي هي أختك قبل كل شيء

[زبدة ذايبة]

حاولي احتوائها

عوض الدخول معها في عداء

وخير ماتسكن في راسك

تقربي من أختك وتسكن في قلبك.

هذي أختك

وما عندهاش غيرك

وماعندكش غيرها

أنت اللي كبيرة

وأنت اللي عاقلة

وانت اللي تعرفي خير منها

حاولي تلقاي نقاط اتفاق معها.

وحسسيها أنك تحبيها

عوض ماراكي عاطيتها أكثر مما تستحق.

ممكن خي تستمد وعارتها

من استفزازك لها.

ممكن راكي تنتقدي فيها

على الرايحة والجاية.

تصرفك هذا يخليها تتحداك

و يخليها تكسر على أنيابها في وجهك.

وهي عارفة أن والديك يساندوها


بحكم أنها الأصغر.

حاولي تحافظي على احترامك

ومادخليش روحك فيها

اللهم إلا إذا كان الأمر يتطلب عدم السكوت.

ابتعدي عنها قدر استطاعتك

وماتشغليش نفسك بيها

ومهما كان هي أصغر منك بنصف عمرك.

وبما أن أمك موجودة

ماكان مادخلك فيها هي اللي تربيها

ولست مسؤولة عنها

اللهم الضرورة فقط. وتبلغي والديك

ربي يصلح حالكما.

[sohaibdz]

اختك عمرها 11 يعني طفلة صغيرة برعومة و من كلامك واضح انك تقارني نفسك بزاف معاعا مع انك اكبر منها في السن بشكل كبير و على حد تفسيري ربما انت تشعرين بالغيرة منها و العلم لله

[مرام 2001]

سمحيلي ختي عاندي لي قدك كبير مش طفلة صغيرة انا اختي الصغرى 06 سنوات وقع يحبوها وانا ديما لا وكانو يضربوني مين كنت قدها بصح اختي هدي انا نحبها مرات نلعب معاها مرات من مصروفي نتع ثانوية لي يمدولي والديا نشريلها هدايا وحلوة نمشطلها شعرها مين نجي خارجة ترافقني والله صحابات مع اني 18 سنة واخي الاصغر كذلك امي تضربو وتفضل اختي عليه لكن عندما يكون فشارع يحميها ومرات يجيبها شادها من يدها كي تخرج من مدرسة اختي عادي جدا كل وق ووقتو انا نحب اخوتي وخاصة اختي اسراء نحسها لعبة نحسها بنتي كاريثا مين عدتي تكرهي ختك اكي عارفة غي روحي داوي راكي كبيرة ومازلتي تغيري يك لي يغير و الاطفال مش لكبار

[ندوشةة]

اي طفلة صغييرة ماازال ما تعرفش الصح من الخطأ و امك تسايس فيها باه تنميلها الثقة في روحها مام انا عندي اختي صغيرة عليا ماما ديما تشكرها و تشريلها كلش باه دير ثقة في روحها و تتربى هكا يعني باختصار مازالت صغييرة

[الدرة المصونة 5]

اختي راهي مزالت صغييرة حوالي اجبديها ليك بالكلام الحنين فهميها بالشويااا انصحي امك انها تنقصلها من الغرور هذا لي راها فيها خاطر راح تتعذب في حياتها ربي يهديها و يكون في عونك

[kacimo.samy]

السلام عليكم
مازالت صغيرة
ونتي علاه مداخستها (مداصرتها) اجبدي عليها ما تخلطي فيها ما تخلط فيك
فاهميها كي تتعلم تهدر تجي تحكي معاك

[zineb zizi47]

هدا دلال زايد يهلك والله انا جيت منك نربيها يعيطو ولا يقعدو باش متدسارش عليك