أحلى شاي مثلج لأحلى أم كوثر

إلهام07 · 2013-09-14, 00:45

مساء الخير عليكم حبيباتي

حنا مالفين منذ خمس سنوات نشريو الشاي المثلج ( Ice Tea ) اللي جاي على شكل بودرة في علب ( العلبة تتباع بحوالي 400دج على حساب الماركة ) ونخلطولو الماء ويجي بكل اذواق الفواكه : ليمون ، خوخ ، برتقال ، فواكه الغابة ، تفاح ....................... الخ . هو من جهة بنين بنين بصح كي تقراو المكونات تلقاو : شاي فقط خمسة بالمئة والباقي مواد حافظة وملونات ونكهات اصطناعية وعطور .................. هههههههههههه يعني كلو هف في الهف خخخخخخخخخخخخ
كي حسبت التكلفة لقيتو يخرج كيف كيف قلت مالا علاه مانشربوش طبيعي خير .

بما انو حنا عندنا ديما النعناع غارسينو وكل شهر كي يكبر ويذبل ماما تقصو وترميه والله يغيضني وزيد قبل العرس شرينا بزاف ليمون للعرس والقاطو وبقى رايح يفسد جاتني فكرة نجرب شاي مثلج طبيعي .

بصراحة أروع شراب ذقتو في حياتي منعش ولذيذ ويبرد على القلب والله أحسن من الشاي الساخن وأحسن من أي نوع نتاع عصائر او مرطبات والأروع فيه انو طبيعي وصحي ، ندمت اني ماجربتوش من قبل .

نجيو للوصفة ساهلة ماهلة :

* 5 أكياس شاي ليبتون الأصفر من الأحسن لانو قاسح باقي أنواع الشاي يجي خفيف بزاف ( ممكن ثاني تستعملو شاي أوراق المهم يتشلل باش تتنحالو المرارة ديرو الكمية نتاع الشاي اللي مالفين ديروها في ثلاث اكواب ماء وديروه شوية ثقيل )

* 3 كيسان كبار ماء بدرجة الغليان + زوج كيسان ماء كبار باااااااارد
* كاس كبير سكر
* عصير ليمونتين ( الاحسن ليمون بلادنا خير من المستورد )
* كمية مليحة من النعناع ( طازج من الاحسن واللي ماعندوش ممكن يستعمل المجفف )

للتزيين :
* اوراق نعناع
* قطع ليمون

الطريقة :
- نحطو الماء يغلي في كاسرول
- كي يغلي الماء نطفيو النار ونحطو مباشرة النعناع وأكياس الشاي ونخليوه حتى يبرد ( حوالي 10-15د لا أكثر باش مايجيش مر لأن الشاي الأصفر نتاع ليبتون قاسح بزاف كي يطول يرجع بمرارة )

- نعصر اكياش الشاي ونحي اوراق النعناع اللي يكونو ذبلو وطلقو الريحة نتاعهم في الشاي وانتهت المهمة نتاعهم .
- نضيف عصير الليمونتين ( أنا مانحبش نصفي اللباب اللي مايحبش ممكن يصفيه وماتخافوش كي تصبوه في الكؤوس مايبانش اللباب خلاص )
- نضيف 2 كيسان ماء بارد ونحرك ونذوق إذا ناقص سكر زيدو حسب الذوق نتاعكم ، لازم طعم الليمون يكون باين وريحة النعناع أيضا هذا هو السبب اللي يخلي هذا المشروب منعش .
في الصورة هذي راهو بارد وأضفتلو قطع الليمون والنعناع ورايحة نصبو في طاس للتقديم.

- صبوه في إناء مغلق باش ما يلمش الروائح وحطوه في الثلاجة يبرد مليح مليح مليح مليح .

- كي تحبو تقدموه حطو كمية مليحة من الثلج في الكؤوس وصبو الشاي عليه ويقدم فوووووووووووووووووووووورا لازم يتشرب باااااارد.
أنا هنا جاتنا ضيفة على غفلة هذاك وين وجدتو ومازال سخون كثرت الثلج في الكاس

وهاهو واجد

إذا حبيتو ممكن تزينوه باوراق نعناع طازج وقطعة ليمون ومن الاحسن لو ماتشربوش مباشرة من الكأس لأنه بارد استعملو paille كيما اللي في الكاس مانعرف كيفاش يسميوها بالعربية باش ماتتضررش أسنانكم .

- إذا عندكم ضياف وحبيتو تقدموه بشكل أنيق فرغوه في إبريق وزيدو فوقو قطع ثلج وقطع ليمون وأوراق نعناع fresh والله غير يحمر الوجه رووعة قدام الضياف وبأشياء بسيطة تقدمو حاجة بريزونتابل.

شوفو عن قرب :

وهذا كاس لأول وحدة تنوض الصباح هههههههههههههههه .

راني نظل ندير فيه ونعاود نتبردو بيه مممممممم

* ملاحظة : هذي المقادير راهي تعطيكم كمية مليحة وكافية خاصة إذاقدمتوه مع كمية مليحة من الثلج
* هذا الشاي راهو يجي خفيف في التركيز وخفيف في السكر ثاني لانه يشرب كمرطبات يعني بكمية كبيرة هكذا مايضرش .
.

بالصحة والهناء على قلوبكم .

ام ندى 87 · 2013-09-14, 01:02

يعطيك الصحه الزينة باين يبرد القلب راني ديت الكاس لوكان نخلي لصباح يطيرو بيه

crono · 2013-09-14, 07:34

الله... الله ..... عليك يا إلهام07.... يعطيك الصحة راكي عطشتينا ... راني ديت الكاس

oum ibrahim · 2013-09-14, 07:45

اممممممممم اح حححححح اييييييي باااااااااارد هههههه منعششششششششش يعطيك الصحة لهومتي شرح كاااافي ووافيييييي

soriaalg · 2013-09-14, 08:23

مممممممممممممم يهبل يعطيك الصحة يالفحلة روووووووووعة ما شاء الله

YAKMISSOU · 2013-09-14, 08:56

هاتي الهام نبرد قلبي يعطيييييييك الصحة على الشرح الوافي

أم محمد تاج · 2013-09-14, 08:57

وااااااااااااااااااااااااو لهووومة يعطيك الصحة يالحبيبة بصح دخل الشتا خخخخخ

أم ياسين الزهراء · 2013-09-14, 08:57

يبرد القلب خاصة يحلى كيخرجو الاولاد ونبقى وحدي امممممممممممممممممممممممممم

souma.f · 2013-09-14, 09:15

هايل يعطيك الصحة حبيبتي شكرا على الشرح الوافي

إلهام07 · 2013-09-14, 09:28

اقتباس:

المشاركة الأصلية كتبت بواسطة المبتدئة

يعطيك الصحه الزينة باين يبرد القلب راني ديت الكاس لوكان نخلي لصباح يطيرو بيه

هههههههههههههه سرقة في نص ليل ههههههههههههههههه

اقتباس:

المشاركة الأصلية كتبت بواسطة crono

الله... الله ..... عليك يا إلهام07.... يعطيك الصحة راكي عطشتينا ... راني ديت الكاس

تفضلي حبيبتي الله يسلمك

اقتباس:

المشاركة الأصلية كتبت بواسطة oum ibrahim

اممممممممم اح حححححح اييييييي باااااااااارد هههههه منعششششششششش يعطيك الصحة لهومتي شرح كاااافي ووافيييييي

ههههههههههههههههههههههه بردت

اقتباس:

المشاركة الأصلية كتبت بواسطة soriaalg

مممممممممممممم يهبل يعطيك الصحة يالفحلة روووووووووعة ما شاء الله

الله يسلمك

اقتباس:

المشاركة الأصلية كتبت بواسطة YAKMISSOU

هاتي الهام نبرد قلبي يعطيييييييك الصحة على الشرح الوافي

تفضلي حبيبتي خصوصا أنت نخاف تخرج في البيبي هههههههههههههه

اقتباس:

المشاركة الأصلية كتبت بواسطة أم محمد تاج

وااااااااااااااااااااااااو لهووومة يعطيك الصحة يالحبيبة بصح دخل الشتا خخخخخ

هههههههههههه شفتي هذا من الكسل والله منذ شهور وأنا نقول نحطو من الشتاء اللي فات وأنا نتحلف ونقول كي جي الصيف نحطو شوفي شريت الشاي حتى قريب تخلاص مدة الصلاحية نتاعو باش صورت الوصفة شفتي كسل أكثر من هذا

على العموم حتى وهو سخون بنين

تقدري تشربيه سخون كشاي بالليمون والنعناع

اقتباس:

المشاركة الأصلية كتبت بواسطة أم ياسين الزهراء

يبرد القلب خاصة يحلى كيخرجو الاولاد ونبقى وحدي امممممممممممممممممممممممممم

هههههههههههه لازملك طاس ماشي كاس ههههههههههههههه راهو خفيف ماتفيقيش كيفاش يخلاص الكاس ههههه
والله حتى نشك باللي شربولي منو خخخخخخخخخخخخخخخ

اقتباس:

المشاركة الأصلية كتبت بواسطة souma.f

هايل يعطيك الصحة حبيبتي شكرا على الشرح الوافي

الله يسلمك سمسومة

أنواار الإيماان · 2013-09-14, 11:02

يهبل اصبري عليا ايامات نتهنا من الكراس اليومي وسجل المناداة وباقي الوثاتق ونجربو راه عندي مدة وانا نسنى فيه
والى ان يحين الوقت مانقدرش نصبر اكيد ندي الابريق ممممممممممممممممم

tong2 · 2013-09-14, 11:35

الله يبــــــــــــــــارك ما شــــــــــاء الله

يــــــعــــطيك الصــــحة حــــبيبة

بـصحـــتـــكـــم

إلهام07 · 2013-09-14, 11:43

اقتباس:

المشاركة الأصلية كتبت بواسطة الادب العربي

يهبل اصبري عليا ايامات نتهنا من الكراس اليومي وسجل المناداة وباقي الوثاتق ونجربو راه عندي مدة وانا نسنى فيه
والى ان يحين الوقت مانقدرش نصبر اكيد ندي الابريق ممممممممممممممممم

إيييييييييييييييييه واش نكرههم كانت ماما مسكينة ظل مع الأوراق وكنت ديما نعاونها فيهم يقرنو
كي عادت لافار فيها هذو كامل أدي البريق وكي تتخصي قوليلي نزيد نطيبلك ماتعبيش روحك

اقتباس:

المشاركة الأصلية كتبت بواسطة tong2

الله يبــــــــــــــــارك ما شــــــــــاء الله

يــــــعــــطيك الصــــحة حــــبيبة

بـصحـــتـــكـــم

الله يسلمك

ladymillion · 2013-09-14, 14:03

واااااااااااااااااو هايل طليتيلي على قلبي حابة نجربوا وملعرفتش لكن ان شاء الله نجربو بااااااااااااااااارك الله فيك لهومة

مرام 1987 · 2013-09-14, 14:42

مبدعة كعادتك ربي يجازيك ويحطولك في ميزان حسناتك ويرزقك بالزوج الصالح يا رب
ضرك نحطلك الرابط في ملف الوصفات الخاص بيك