* focaccia * فوكـــــاشيا إيطالية من مطبخي

ladymillion · 2013-10-23, 22:03

أهلا حبيباتي
جبتلكم فوكـــاشيا بإذن الله تنال إعجابكم شفتها في النت من عند وحدة ايطالية ، جربتها وعجبتني بزااااااف راح نفيدكم بها وتجربوها نتوما تاني

بسم الله

المقادير:

اول حاجة نبدأ بها أساسية لي هي تخمار ما قبل العجين

يسموها POOLISH عبارة عن :

~ 318غ فرينة
~ 250ملل ماء بدرجة حرارة الغرفة
~ م ص ونصف خميرة الخبز

نحط الفرينة + الخميرة ونبلل بالماء تتكون عندنا عجينة متخومة بلا ما نعجنها المهم يكون مخلطة مليح نغطيها بكيس بلاستيكي ونحطها تتخمير 24 سا كاااااملة

راح تتكون عندنا فقاعات لما تتخمر كيما راكم تشوفوا في الصورة نخليوها بجنب

نروح بتحضير مكونات العجينة :

~ 340غ فرينة
~ م ص ونصف ملح
~ م ص ونصف خميرة الخبز
~ نصف كأس زيت الزيتون
~ 200 ملل ماء سخن

الان وقت العجن نحضر POOLISH نتاعنا لي تخمر انا استخدمت Pétrin تقدري ديري بيدك عادي

نحط POOLISH + الخميرة + الملح + الزيت ونعجن ملييح + نصف كمية الماء + نصف كمية الفرينة ونعجن حتى يتجانس الخليط كامل يكون شوي سائل

ونزيد نصف كمية المائ المتبقية + الفرينة ونعجن شوي وتتكون عندنا عجينة ملساء

راح نحلها طووووووووووليا بالحلال بعد رش الفرينة فوق المكان لي راح نحل فوقو العجين كيما في الصورة

نطبقها كيما موضح

ندهن زيت الزيتون فوقها ونغطيها بكيس بلاستيكي وفوقو منشفة ونخليها تتخمر 30د

هاهي بعد التخمر تكون طرية

نزيد نحلها بنفس الطريقة الاولى بالحلال طووووليا وندهن الزيت عليها كامل هاذ المرة ونطبقها بنفس الشكل

ندهن صينية مدهونة بالزيت مليييح ونحط العجينة في الصينية ونوزعها بيديا على الصينية كامل راح تمشي بسهولة

ونضغط عليها برؤوس الاصابع بشكل عشوائي كيما في الصورة
نخليها تتخمر من سااااعة ونصف الــــــــى ساعتين حسب حرارة الغرفة

قبل وبعد

بعد التخمر راح نعاود نضغط برؤوس الاصابع ونعمل حفر صغيرة راح نحط فيها (( طماطم مقطعة مربعة ، فروماج قطع صغيرة ، زيتون من غير نواة ، زعيترة ، زيت زيتون ))

نحط هاذ المكونات في الحفر الصغيرة وندير فوقها شوي زين او ندهنوها نشبعوها شوي بالزيت ونزيدوا الزعيترة

نشعل الفرن 220° نخليو فوكاشيا تتخمر مرة ثالثة لمدة 15د أو 20د هاذي بعد التخمر

من بعد كي يسخن الفرن نحطها طيب حتى تتحمر ملييييييييييح من تحت ومن فوق بلا مانشعل من فوق

بعد ما نخرجوها نحطها فوق منشفة

وتقدميها بالصحة والهناء مممممممممممم

أم إناس · 2013-10-23, 22:07

ماشاء الله يعطيكم الصحه يألفحلات الله يبرك فيكم كي شفت الشرح عرفته ونشوف تتباع بصح جامي شريته بصح هم من الفوق يدروله صوص طماطم يعني بالبنسو منظره روووووووعه انشاء الله نجربه ضرك نعرف الوصف شكرا