🌹🌹رفيس الكسرة أوالمبروم🌹🌹

[أم يوسف2]

السلام عليكم خواتاتي حبيت نشارككم اليوم بأكلة او طبق كاين لي يعرفوا وكاين لي لالا ولي هو:::
رفيس الكسرة او الرفيس المبروم
كاين عدة مناطق يديروه وكل واحدة منها تطلق عليه تسمية مختلفة وحتى طريقة عمله تختلف.
وفي مناطق الوسط يسمونه رفيس الكسرة او المبروم وهذا الاخير معناه مدور اي حباته تأتي على شكل دائري.
نبداو بالمقادير:🌺🌺سميد. ملح.فنجان زيت وماء نلموا بيه العجينة
تمر غرس
زبدةاو مارغرين او دهان.... لي تحبوه.
طريقة التحضير:📷📷
اولا نحضر العجينة هي كسرة اوفطير عادي
نحط السميد في جفنة نزيدلوا الملح والزيت)انا مانحبوش يجيني مبسس بزاف يجي يڨهم ولي تحبوا هكاك تكثر الزيت)ونلم بالماء عادي,نعمل خبزات نطيبهم فالطاجين
(مانرققهمش بزاف نطيبهم خشان شوية)
بعدها نقسمهم ونرحيهم فالروبو(ضوكا عصر السرعة بكري كانوا يكسروا بالمهراس)
كي يترحاو نحكم سيار الزرع لي عندو ثقوب كبيرة ونصيرهم:الرقيق يطيح والخشين يبقى من الاعلى وهذا الاخير نزيد نحيلوا الخشين بزاف ونعاود نرحيه
وهكذا حتى نكمل العملية ‘
ثم هذاك الرقيق نزيد نجوزو فالصيار لي واسموا الخراج او لي عندوا ثقوب رقيقة اوصغيرة‘
.يولي عندنا خليط رقيق ومتوسط وخشن😊😊😊😊😊
العملية الثانية:نكون فورت التمر الغرس في كسكاس اوبعدها نقيه مليح من النواة(كاين لي يدير الما في كسرونةويشمخ يدو فالما وينقي التمر والما هاذاك يدير فيه شوية ملح نخلي التمر في جهة.
من جهة اخرى في جفنة نحطشوية من الخليط المتوسط ونشمخوا بهاداك الما ونلوز ونفتل مثل الكسكس اي ندور الحبات باصابع اليد فقط حتى تولي مدورة.
في نصف العملية نضيف حوالي ملعقتين تمر وشوية زيت زيتون ونبدا نضيف فالخليط الثالث الخشن ونبقى نزيد فالنا بشوية ونفتل حتي نكمل كل الخليط الرقيق والمتوسط والخشن والحبات تولي مدورة مليح.
بعدها نفور الخليط ونطوا في جفنة نضيفلوا التمر حسب الرغبة ونضيف معاه زبدة مذوبة او لي تحبوها نخلط مليح وهكذا الطبق يكون واجد وكاين لي يرافقوه باللبن او الرايب انا ناكلوا هكاك.
اسمحولي كنت حابة نحط الصور باش تفهموا اكثر لكن عندي مشكل في الهاتف ولي عندها اي استفسار راني هنا ونتمنى تجربوه نشكر عجوزتي بزاف هي لي علمتلي هاد الاكلة ماكنتش نعرف نديرها
عييت راني نكتب بالهاتف هههه 😄😄😄😄🌹🌹🌹

[آسيا 27]

الله يعطيك الصحة ام يوسف

[أم يوسف2]

المشاركة الأصلية كتبت بواسطة آسيا 27

الله يعطيك الصحة ام يوسف

الله يسلمك شريكتي
شكرا على المرور

[fleur de lili]

ام يوسف يعطيك الصحة سخفتيني فيه .
حنا تاني في باتنة نقولول رفيس الكسرة .

[تالا تسنيم]

اممممممم عجبني بزاف طريقة جديدة عليا ربي يعطيك الصحة مشكورة

[أم يوسف2]

المشاركة الأصلية كتبت بواسطة fleur de lili

ام يوسف يعطيك الصحة سخفتيني فيه .
حنا تاني في باتنة نقولول رفيس الكسرة .

فلوغ اختي اسعدني مرورك شكرا،

[أم يوسف2]

المشاركة الأصلية كتبت بواسطة تالا تسنيم

اممممممم عجبني بزاف طريقة جديدة عليا ربي يعطيك الصحة مشكورة

اختي تالا يعطيك الصحة لوكان جينا قراب لبعضاناا نبعتلك تذوقي ان شاء الله تجربيه

[edelweiss_dz]

الله يعطيك ماتتمناي,نحب بزاف هذه الوصفة,عمري ماجربتها,كانت أمي تحضرها مرة في الزمان,لكنها توفات واحنا مازالنا صغار ندرسوا قبل ماتعلمهالنا,من يومها مازدتش ذقتها,هذا وقت طويل وانا حابة نجربها,لكن زوجي قبايلي و يرفض كل الأكلات الحلوة أصلا التمر ماياكلوش.مشكورة على الوصفة,لما ألتقي مع أخواتي نحضرها ونشوف إذا هوما تاني يحنوا لأكلات أمي.

[edelweiss_dz]

يعطيك الصحة

[ام هدول]

ام يوسف الوصفة ر ايعة من تقاليد بلادنا ...فقط ياريت كانت مرفقة مع الصور رايحة تكون اوضح ....بارك الله فيك على الشرح ..في ميزان حسانتك يارب

[أم يوسف2]

المشاركة الأصلية كتبت بواسطة edelweiss_dz

الله يعطيك ماتتمناي,نحب بزاف هذه الوصفة,عمري ماجربتها,كانت أمي تحضرها مرة في الزمان,لكنها توفات واحنا مازالنا صغار ندرسوا قبل ماتعلمهالنا,من يومها مازدتش ذقتها,هذا وقت طويل وانا حابة نجربها,لكن زوجي قبايلي و يرفض كل الأكلات الحلوة أصلا التمر ماياكلوش.مشكورة على الوصفة,لما ألتقي مع أخواتي نحضرها ونشوف إذا هوما تاني يحنوا لأكلات أمي.

الله يرحمها ويوسع عليها راهي خلات فحلات موراها الحمد لله
فرحت كي عجباتك الوصفة حتى انا ماكنتش نعرف نخدمها علمتني عجوزتي
كي ديروها حطيلنا التطبيق وشكرا على المرور

[أم يوسف2]

المشاركة الأصلية كتبت بواسطة ام هدول

ام يوسف الوصفة ر ايعة من تقاليد بلادنا ...فقط ياريت كانت مرفقة مع الصور رايحة تكون اوضح ....بارك الله فيك على الشرح ..في ميزان حسانتك يارب

سررت بمرورك العطر اختي ام هدول ايه عندي مشكل في الهاتف حبيت نحط الصور لكن الله غالب وحاولت نشرح بقدر الامكان باش تفهموني واي سؤال راني موجودة

[edelweiss_dz]

شكرا أم يوسف.انشالله نجربها في أقرب الآجال إذا التقيت مع اخواتاتي,لأننا رانا كل واحدة في ولاية:الجزائر بومرداس البويرة و بجاية.نتوحشوا بعضانا واحنا في بلاد واحدة
لما سألت على الوصفة مدوهالي بخليط تمر و هرماس,ماحبيتش نجرب الوصفة لأن أمي كانت تعملها فقط بالتمر
لعلمك سمعت مؤخرا أن في غليزان و نواحيها طبق يشبه هذه الأكلة يسموه برزقان
أنا رايحة نجرب الوصفة ,لكن للأسف مانعرفش ننشر الصور,حاولت من قبل نجاوب الأخوات بوصفات مصورة ماعرفتش
بارك الله فيك

[أم يوسف2]

المشاركة الأصلية كتبت بواسطة edelweiss_dz

شكرا أم يوسف.انشالله نجربها في أقرب الآجال إذا التقيت مع اخواتاتي,لأننا رانا كل واحدة في ولاية:الجزائر بومرداس البويرة و بجاية.نتوحشوا بعضانا واحنا في بلاد واحدة
لما سألت على الوصفة مدوهالي بخليط تمر و هرماس,ماحبيتش نجرب الوصفة لأن أمي كانت تعملها فقط بالتمر
لعلمك سمعت مؤخرا أن في غليزان و نواحيها طبق يشبه هذه الأكلة يسموه برزقان
أنا رايحة نجرب الوصفة ,لكن للأسف مانعرفش ننشر الصور,حاولت من قبل نجاوب الأخوات بوصفات مصورة ماعرفتش
بارك الله فيك

شكرا على المعلومة ماسمعتش بيها من قبل واهل زوجي يحبوها فقط بالتمر مايحبوهاش بالهرماس

[أم يوسف2]

للعلم فقط انا كي ندير كمية كبيرة ونخبيها فالمجمد كي نحب نجبد نخليها شوية وبعدها نرشها بالماء ونعاود نسخنها لاني كنت فورت الكمية قبل مانخبيها