مخدة القلب بالسموكس لاختي هاجـــــــــــــــــــر وكل الاخوات مدعوات

fifiarch · 2012-02-21, 22:28

مساء النور والرياحين على كل الاخوات
و بخاصة اختي هاجـــــــــــــــــــــــــــــــــــــر
راني حاولت نعملك طريقتي في عمل المخدة قلب بالسموكس
على فكرة انا عملتها بالياسمينة فقط لضيق الوقت ولانو القماش ماعنديش يااسر
و نصيحة ليك اعمليها بالياسمينة المقلوبة و معاها ياسمينات كبار تجيك اروع
اكيد طريقة عمل هاذيك الغرزة راح نتعلموها في ورشة التروسو
اولا نبدالك مع الباترون
هاذ الباترون رسمتو يخدملك مخدة الطول نتاعها بين فلقتي القلب اربعون سنتيمتر يعني الطول قبل العمل هو اكيد ثمانون سنتيمتر
ماتشوفيش للقلب نتاعي انا عملتو صغير بالزااااف
الله غالب اختك محرقة و ماعندهاش لقماش
المهم اذا تحبي انقليه بنفس الشكل تجيك المخدة متوسطة الحجم و اربعون سنتيمتر كمخدة نظن مليحة
و راني عملت ابعاد المربع نتاع الباترون هي اربع سنتيمترات

على فكرة ممكن تقصي قلب لكن يكون اكبر بقليل من ثمانون سنتيمتر حوالي متر اذا قدرت
و مبعد تنقلي عليه الباترون
او خلي القماش كيما هو و ارسمي قلب بالابعاد هاذوك و مبعد انقلي الباترون و اخدمي خدمتك و كي تكملي قصي على حساب القلب لي رسمتيه
فهمتيني
انا هنا قصيت القلب مباشرة لانو القماش عندي صغير جدا

وبعدين رحت نقلت الباترون على وجه القماش لانو خدمت بالياسمينة انت اخدمي في الخلف لاني قتلك الياسمينة المقلوبة تجيك احسن و تقدري ترسمي القلب لكبير لي قتلك عليه من قبل

الان ديري الخدمة نتاع الياسمينات عادي كيما هكا

تكملي تتحصلي على قطعة القماش و تكون اطرافها ماهيش منظمة

حاولي تنظميها و تخيطيها بيدك برك باه يظهر شكل القلب

انا بعد لا نظمتها جبت قماش اخر وحطيتها فوقو و قصيت شكل القلب بالابعاد هاذيك نتاع لي تحصلنا عليه بعد ماخدمنا خدمة السموكس

ضك خيطتهم في بعضهم و خليت فتحة صغيرة وقلبتهم

قمت بالحشو نتاعهم بالصوف

لانو القلب جاني صغير عملتو تعليقة في الخزانة
عمرت خيط بالسمسم وعلقتو
واش رايكم فيه

واكيد نستنى تقييماتكم
على فكرة ننصحكم تعملو بغرزة الياسمينة المقلوبة ومعاها ياسمينات كبار باه يجيكم رائع
اي استفسار راني هنا

فادية الجزائرية · 2012-02-21, 22:37

عملك رائع..................لكن أنت الأروع.................سلمت يداك أستاذتي

fifiarch · 2012-02-21, 22:44

اقتباس:

المشاركة الأصلية كتبت بواسطة فادية الجزائرية

عملك رائع..................لكن أنت الأروع.................سلمت يداك أستاذتي

الله يسلمك اختي الغالية
رغم انها جات ماشي مليحة برشة لاني مانحبش الياسمينة فهاذ الخدمة
والقماش ماكاش عندي
انا لازمني الستوك نتاع الساتان:d:d:d

نبوغ · 2012-02-21, 22:53

ربي يبارك فيك أستاذتنا دمتي مميزة

fifiarch · 2012-02-21, 22:54

اقتباس:

المشاركة الأصلية كتبت بواسطة نبوغ

ربي يبارك فيك أستاذتنا دمتي مميزة

الله يبارك فيك

sofiane2075 · 2012-02-22, 09:19

ما شاء الله رائعة و اللون يهبل يعطيك الصحة

-رودينا- · 2012-02-22, 10:04

صباح الخير عليكم واش راكم مبروك عليك الاحتراف انساتي وشكرا على تلبية الطلب ياريت كل الاساتذة اكونوا كيفك ربي يعطيك ما تتماناي والان راني مشغولة بزاااااف غير يكون عندي شوية وقت نبدا في التطبيق ان شاء الله

انت دائما في القلب

محــــــ النقاب بــــة · 2012-02-22, 11:41

بارك الله فيك أختي ... دائما في القمة

هــــــــــــــاجر · 2012-02-22, 11:48

التقييم قليل عليك ربي يحفظك ويخليك ديما فوق الروس يا طيبة يا حنونة يا رائعة أنت

هاجر 76 · 2012-02-22, 12:04

chokran okhti fifi baraka allah fiki

fifiarch · 2012-02-22, 13:48

مساء الخيييير
العفووو اخواتي
انا نفرح كي تستفادو من مواضيعي
اشكركن كل واحدة باسمها
وجودكن زاد الموضوع بهاءا

BACHIRA2 · 2012-02-22, 15:02

بارك الله فيك عزيزتي فيفي و الله متابعة عن بعد و حتي في تروسو السموكس بالصح للاسف ما عنديش ماكينة خياطة شكرا جزيلا لك على المجهودات المبذولة و جعلها الله في ميزان حسناتك