حابة تخدمي صدر كريستال؟؟ .... ادخلي

نبيلة 81 · 2013-04-10, 23:31

راني وفيت بوعدي لكل لي طلبو مني شرح لصدور الكريستال ... وسامحوني اذا تأخرت كنت غايبة

1- لازم يكون عندك حوالي 200 أو 250 غ من المكرمي (الكريستال / الديامو) + خيط + كروشي يكون رقيق
تبداي بخيط مزدوج و اعملي سلسلة قد القيس لي حابتيه .. أنا عادة ندير حوالي من 260 الى 290 عين حسب رقبتك

2- اغلقي السلسلة و قطعي الخيط الثاني وكملي بخيط واحد

3- دخلي حبة الكريستال في الكروشي

4 - وزيدي دخلي الكروشي فالعين الثانية تاع السلسلة وجبديه داخل حبة الكريستال

5- اجبدي الخيط مرة أخرة باه تغلقي على حبة الكريستال كيما موضح فالصورة

6- زيدي الحبة الثانية وخلفي عين وحطي فالثانية و اخدمي بنفس الطريقة ... لي يدها مزيرة يجيوها العيون صغار تخلي 2 بين كل حبيتن باه ما يجيهاش مشبوح

7- كملي السلسلة حتى النهاية و لصقي الحبة الأخيرة فالخيط تاع الحبة لي بديتي بها

8 - وهاذي السلسلة كملت وشكلنا السطر الأول

9- انتقلي للسطر الثاني وحطي حبة الكريستال بين الحبتين أي في المثلث لي يتشكل بيناتهم

10- هنا فالسطر الثاني نزيدو 2 عين بين كل 2 حبات

ومن بعد فالسطر الثالث والرابع ديري زيدي عين بين كل حبة وأخرى
و زيدي فالسطر الخامس والسادس بين حبيتين عين و بين الحبيتين لي وراهم 2 عين
و هكذا ابقاي زيدي حتى فالسطر الأخير يكون عندك بين كل حبة وحبة 3 عيون
وعادة أنا ندير حوالي 11 سطر
وطبعا كل أخت و لاطاي تاعها تقدري ديري 9 أسطر أو 10 أو حتى 13 سطر

بالنسبة للمكرمي أو الكريستال كاين بأحجام وألوان وأشكال مختلفة و أنت وذوقك تخيري كيما تحبي

أهم حاجة ما تشبحيش يدك بزاف ارخفي قد ما تقدري هكذا ما يجيكش فاسد
والبداية ديما تكون صعيبة و ما تعرفيش تحكمي حبة المكرمي حاولي وكسري راسك حتى يوالف يدك
نتمنى تكونو فهمتوني و إذا كاين سؤال مانيش رايحة نبخل خواتاتي

ام الطيب · 2013-04-10, 23:38

السلام عليكم
بارك الله فيك
واصلي كل المراحل .........انشاء الله يثبت الموضوع
علاش محطيتيش الموضوع في قسم الكروشي

marazf · 2013-04-11, 07:40

baraka ellaho fik khti 3la elifada w rabi yej3alha fimizane hassanatek
mawdou3 raye3 w mofid
tahiyati hbibti

جيجلية · 2013-04-11, 08:39

موضوع رائع

نتمنى تواصلي الشرح وتورينا الموديل كيكمل

بيلسان11 · 2013-04-11, 09:01

بارك الله فيك ربي يعطيك ما تتمناي.

نبيلة 81 · 2013-04-11, 09:34

اقتباس:

المشاركة الأصلية كتبت بواسطة ام الطيب

السلام عليكم
بارك الله فيك
واصلي كل المراحل .........انشاء الله يثبت الموضوع
علاش محطيتيش الموضوع في قسم الكروشي

الله يبارك في أختي الكريمة
و الله ما جا في بالي نحطو في قسم الكروشي ... المهم رايحين يشوفوه الأخوات و ان شاء الله يستفيدو

نبيلة 81 · 2013-04-11, 09:37

اقتباس:

المشاركة الأصلية كتبت بواسطة marazf

baraka ellaho fik khti 3la elifada w rabi yej3alha fimizane hassanatek
mawdou3 raye3 w mofid
tahiyati hbibti

شكرا ليك اختي على الرحب والسعة

نبيلة 81 · 2013-04-11, 09:41

اقتباس:

المشاركة الأصلية كتبت بواسطة جيجلية

موضوع رائع

نتمنى تواصلي الشرح وتورينا الموديل كيكمل

أكيد رايحة نوريلكم كي يخلص

نبيلة 81 · 2013-04-11, 09:45

اقتباس:

المشاركة الأصلية كتبت بواسطة بيلسان11

بارك الله فيك ربي يعطيك ما تتمناي.

يبارك فيكي أختي العزيزة ... نشا الله ربي يعطيني واش نتمنى

يااااااااااااااارب

وليد مولودية · 2013-04-11, 10:19

شكرا اختي واصلي الشرح و اكيد راح نطبقوه ان شاء الله

نسمة الورود · 2013-04-11, 10:23

ربي يجازيك كل خير

zsalima · 2013-04-11, 17:34

يعطيك الصحة نبيلة على الشرح و ان شاء الله تكمليه وتلبسيه بالصحة والهنا
بصح بغيت نسقسيك هاديك الزيادة في العيون اللي بين حبات الكريستال واش خاصة غي بهاد المودال اللي راكي تخدميه ولا اي مودال آخر وأنا كنت باغية نخدم واحد في مجلة أنفال كريستال وهداك الباترون اللي حاطينه ما تبانش الزيادة كيما راكي تقولي
نتمنى تجاوبيني واسمحيلي اذا كترت عليك

abir chemss · 2013-04-11, 18:18

هذا واش كنت نستنى ...يعطيك الصحة على التطبيق ..حبيت نسقسيك احنا الكريستال يبيعوه les grossistes في ساشيات تعمل 450 دج نشري منو و لا نشري تاع الميزان ........و انت استعملتي المتوسط و لا الكبير

نبيلة 81 · 2013-04-11, 18:26

اقتباس:

المشاركة الأصلية كتبت بواسطة zsalima

يعطيك الصحة نبيلة على الشرح و ان شاء الله تكمليه وتلبسيه بالصحة والهنا
بصح بغيت نسقسيك هاديك الزيادة في العيون اللي بين حبات الكريستال واش خاصة غي بهاد المودال اللي راكي تخدميه ولا اي مودال آخر وأنا كنت باغية نخدم واحد في مجلة أنفال كريستال وهداك الباترون اللي حاطينه ما تبانش الزيادة كيما راكي تقولي
نتمنى تجاوبيني واسمحيلي اذا كترت عليك

يعيشك اختي
في مجلة أنفال يخدمو بطريقة غير لي نخدم بها أنا ...... المهم تقدري تطبقي الشكل تاع الصدر لي عجبك في مجلة أنفال بطريقتي أنا ....... الزيادة هاذيك باه يجيك الصدر مدور ويصلح للخياطة

لوكان تلاحظي فالمجلة تلقاي الحبات محطوطين بشكل أفقي أما أنا نخدمهم بشكل عمودي وهذا هو الفرق

janino · 2013-04-11, 18:32

بارك الله فيك اختي نحاول نطبق الوقت مكانش خلاص