طهور ابني

[شمس بريكة]

السلام عليكم

حبيتكم تعاونوني في حلويات تخص طهور ابني مزال شهر وراني نلم في الافكار
راح ندير قهوة حفلة صغيرة للعايلة يعني لاتتعدى 20 شخص رجال ونساء
اعطوني افكار كفاش نبدا باش نبدا
مقبلات
القاطو
سارفيات
طريقة التزيين
كللللللش
راه اول حفيد حابة حاة باهية و صغيرة
انا مخممة كي يجيو نحط سلاد فروي و من بعد القهوة

وكاين لي يقولولي تارتولات ولا مادلان
والله تخلطتلي مانيش عارفة حابة نعرف واش راهم يديرو الناس ضركا يعني التقديم راكم عارفين
عاونوني تعيشو راهي تالفتلي

[أثيلة]

السلام عليكم ورحمة الله وبركاته
أختي قبل كل شيء ألف ألف ألف مبروك على ولد
قبل أشهر كان ختان أحد أبناء أقاربي و راح نخبرك واش كان فيه حتى تاخذي منو شوية أفكار
فالليل قبل الختان بيوم دارولو حفلة الحنة ،، لبس فيها كوستيم و قندورة (تصديرة) مع لبسات مش عارفة واش يسموهم،، بعدها وزعوا علينا ساشيات تاع قشقشة مرسومين برسوم و لونهم أزرق و زادت باطة تاع قاطو مرسومة برسوم أولاد تاني و فيها باقلاوة و قاطو شوكولا و بوقالة و بابي ميشوار
و طبعا الغد من بعد نضنا صباح فرزنا الدار و لي كانو موجودين فطرناهم بقاطو ساك و لما خرجوه يختنوه بقينا حنا و روحنا وجدنا دار شومبرة منين نحطوه
فرشنالو هو و درنا طابة فالنص وفوقها سنيوة حطينا فيه حوالي خمس أنواع تاع قاطو مع كيسان تاع جو و عمرنا بابي ميشواغ و كلش و فوق المايدة كاين بابي ميشوار لونو ازرق و جاي شباب يهبل للتزيين أكثر منو للإستعمال فرغناهم بطريقة عشوائية فوق الطابلة هوما و شوية حلقومة
و فالغدا درنا شخشوخة طبعا و درنا معاها شربة فريك و سلاطة مزينة بكلش ليكورنيسو و الماصيدوا و كلش يعني درنالها تزيين سبيسيال وبعدها درنا درنا خلطة من البيشامال و المايونيز و توابل و حطيناها في ليسوطاس سبيسيال و عمرانهم و درنا من فوقهم شوية ذرى و خدمنا مقبلة ناشفة تتقلى فالزيت و حطيناهم و فالأخير سلطة فواكه مع جو و خلاص
نتمنى نكون فدتك وأي سؤال انا فالخدمة

[فردوس الرحمان]

كلشي مبروك ، شوفي اختي. روحي اليوتيوب كاين حفلات في القمة تدي أفكار وتستفادي

[شمس بريكة]

علاه ماتجاوبونيش

[فردوس الرحمان]

اختي جاوبناك ،. مشفتيش الردود

[asma bb]

كلشي مبروك الاخت و ربي يشافيه حنا نديرو الرفيس مزين بالدراجي و المكسرات مع اللبن و مبعد نديرو سني تاع القهوة مع جميع انواع القاطو اللي حضرتيه و كي يكملو ديري سالاد دو فروي او فلان او كرام ديسير مع جي و فيها باراكة ههههه و ليلة قبل لازم نديرو ليلة الحنة و العشاء شخشوخة و شربة فريك و بالصحة و الهناء

[nihal159]

ألف مبروك أختي؛ لعقوبة لعرسو إن شاء الله.
أنا بني للأسف مادرتلوش حفلة كبيرة لأنو مرضلي و الطبيبة قالتلي لازم تطهروه في أقرب فرصة؛ يعني كلشي جا على غفلة و الحمد لله على كل حال.
بالنسبة للصحون و السرافت و لي بوات؛ روحي للمحلات لي يبيعو لوازم الأعراس؛ و سألي البائع عن الجزء المخصص بالأطفال؛ رايحة تلقاي العجب العجاب من أدوات الديكور تاع الحفلات؛ و صحون و سرافت و كؤوس بمختلف شخصيات الرسوم المتحركة لي يحبوهم الأطفال.
ليلة قبل الطهو ديري عشا للأقارب؛ شخشوخة و جاري؛ تقدري مع الجاري تقدمي بوراك تاعنا أو البوراك التركي أو سمبوسك أو أي نوع من المملحات، و أكيد سلطة ماسيدوان. و ديري حنة لولدك و صوريه في حجرك كما كنت أنا حابة نصوّر أنس هههههههههه.
نهار يدوه يطهروه؛ حنا في عادتنا نوجدو مشلوش؛ كي يجيبو الطفل من عند الطهار؛ نحطو لمشلوش مع اللبن.
بالنسبة للقهوة ؛ أنا نصيحتي بما أنو النهار قصير؛ ماتودريش وقتك بالمقبلات؛ ذخلي طول صينية القهوة مع الحلويات لي درتيهم.
من بعد تقدري تقدمي صلاد دوفروي كديسار مع تحلية مثل التيراميسو أو محلبي بلمسة عصرية بالمكسرات والزبيب.

[Lili Rose]

[سوسن تسنيم]

ربي يشافيه و يفرحك بيه
احنا نديرو ليلة الحنة نحنو فيها لطفل و نلبسوه قندورة تكون زينا و نديرو العشاء يكون عبارة عن حريرة و دجاج مشوي مرفق بلاصوص مرق الفطر و سلاطة و فاكهة
و غذوة بعد ما يرجع من طبيب نديرو مرقة بالعسل و نديرو ايضا لحم الغنم و كريات الكفتة و ماسيدوان و ديسار لي يكون عبارة عن فلان ككراميل او اي شيء حلو
اما القهوة نديرو صينية القهوة و الحليب و القاطو و نديرو صينية الشاي لي نرافقوها مع المكسرات
و حذاري من تبذير حبيبتي
الله يكملكم بالخير