انت ولا انتي كيفاش تشوفو هذ الخطوة؟؟؟

[مشكلتي]

مسلخير واشراكم نتمنى تكونو لاباس وبخير

موضوعي هو التالي

واشرايكم في المراة لي تعاون خطيبها او زوجها باش يعمرو دارهم مثلا تشارك معاه بالنص باش يشرو شمبرة او حوايج نتاع دار ليكتروميناجي ؟؟
مع العلم انو هدا الزوج قدو قد حالو وهوما يحبو بعضاهم وبغاو يتزوجو في اقرب وقت ومايقدرش يوجد كلش وحدو حتى الاهل انتاعه ميعاونوهش؟
كون نتي ختي في بلاصتي هل تقومين بهذه المبادرة وتعاونيه ؟
ونت كون دير مرتك هدي الخطوة راح ترجع تتكل عليها ولا كيفاش اتشوفها نتمنى تفيدوني وشكرا لكم

[sohaibdz]

انا نعرف واحد خطيبتو خدامة عاونتو كراو دار و عمروها و سهلتلو في الزواج و درك تزوجو و راهم عايشين ماشاء الله ربي يهنيهم
يعني باختصار الامر يعتمد على نوع خطيبك
و انتي تاني في المستقبل ان شاء الله ما تبقايش تقوليلو بلي عاونتيه

لكن انا منديرش هكا كون نكون ماش قادر على الزواج منلصقش بنت الناس و نمرمدها معايا..
لكن هذا رايي و ممكن يختالفو معايا الاعضاء
و بتوفيق

[kacimo.samy]

حاجة عادية ولكن على حسب المرا موش غدوة تبقا تقولي درتلك ودرتلك

[اناناسة]

على حسب الشخص و معرفتي القويه به ....اذا وجدته لا ينظر لي نظره ماديه لما لا ...المهم هو كيف يفكر , وفقك الله عزيزتي و ربي يبارك ليكم ان شاء الله

[محمد جديدي التبسي]

هذا الأمر مطلوب اذا كان بمقدورك طبعا دون ان تكون هناك حساسية من الرجل
والحقيقة ان الأمر صعب لمن يخطب فتاة غير عاملة ولو كان أهلها مرتاحين ماديا
أما من يختار عاملة فلا أظنه يرى حرجا في أن تساعده
والأفضل للنساء ألا يغالوا في المهر والشكليات مما سيؤدي الى ذهاب النقود في مسارها الصحيح دون تبذير واسراف وتحل المشكلة من جذورها دون حساسيات.

[Simsim.rd]

حاجة عادية انو المرأة تساعد زوجها و في الاخير هاد الدار ليهم في زوج خير ماتخليه حاصل مع الديون
انوي الخير تلقى الخير و ربي يسهل لكل واحد ان شاء الله

[زبدة ذايبة]

من رأيي والله أعلم

خلي هذا الخاطب يقدم واش عندو في الأول

خليه يطيح وينوض على جال تأسيس الحياة الزوجية

خليه يبدع في توفير مايجب توفيره

خليه يتحمل المسؤولية تجاهك

بعدما يستنفذ كل ماعنده من مدخرات وحيل وطرق لتوفير اللازم للحياة الجديدة

هذاك الوقت تقدري تكملي وش نقص

لكن من البداية تبداي تجبدي وش عندك رح تحبسيلوا مخو وتكسريلوا يديه

واللي رايح يدفع الثمن هو أنت

رح يتعود على هذا الشيء

ورايحة تقتلي فيه بتصرفك أي إحساس بالمسؤولية تجاهك

ورح مايتفكركش

ورح مايعرفش احتياجاتك المادية والشخصية والنفسية

خليه يضرب صدروا كيما الرجال

وكي تدخلي لدارك وتولي سيدة البيت

هذاك النهار يجي دورك

كي يوفرلك برك حصيرة ومخدة وقربة تاع الماء من تعبه وجهده ومن كده

يكون خير مئات الآلاف المرات من الحاجات اللي تجيبيهم انت

ماتعونيهش باش يقصر في حقك من غير قصد منه

وتكوني شريتي تعاستك بمالك وتكوني أنت المتسببة في ذلك

لو كان تعاونيه ضرك في هذ الوقت رايحة تفسدي أكثر مما رايحة تصلحي

إذن:

أعرفيه ، وأعرفي مدى رجولته

وخليه يحس بأنه رجل ، وأن البيت مسؤوليته هو

ماتعوديهش تجيبيلوا الحلول الجاهزة

عوديه تكوني آخر حل بالنسبة إليه

الدراهم هما الساهلين

كي يكون راجل تاع الصح ، كي تعطيلوا كامل مالك ماشي خصارة فيه.

هذا رأيي وأنت في الأخير حرة في قراراتك

رب يوفقك

[غزلانْ]

السلام عليكم
أن تكوني زوجة شيء و أن تكوني خطيبة شيء إخر
زوجته لا بأس من باب المساندة
لكن و أنت خطيبة له لا للمساعدة اطلاقا
اجعليه يتحمل مسؤوليته من الآن و ان تأقلم على تقبل مساعدة منك
منذ الآن فستكون عواقبها عليك أكثر من أن تكون عليه اذ أنت قمت بمساهمة منك بتغطية حاجياتك
التي من المفترض أن يوفرها هو كرجل لا أنت و بهذا ستساهمين في التقليل
و التخلي من مسؤوليته كرجل
اتركيه يشقى ليعي ما هو مقبل عليه
بالتوفيق

[oumhana]

الأخت زبدة ذايبة قالت كلش ولأخت غزلان كيف كيف يعني تعاوني زوجك معليش راكي عندو بصح خطيبك ......أسمحيلي فيها قول راهو خطيب برك "لعروسة في المركب ومنعرف لمن تكتب" و الحديث قياس

[هدية]

شوفي اختي في الله ننصحك ماتعاونيهش خلاص في حتا حاجة ونتوما مخطوبين . فهمتيني ابدا ابدا و لكان نتي عندك دراهم خبيهم و كي تروحي لدارك وتدخليها حتا ولو كان فيها غير لحيوط ماعليش هذاك النهار كي تكوني دخلتيها عمريها .
روحي بقدرك خير خصوصا الشومبرا خليه ينوض و يطيح يسلكها هوا وحدو حطيها في راسك مليح هو اللي يسلك و يوفر فراشكم . يجي نهاااااار و تتاكدي من صحة كلامي . كوني فحلة و غالية عليه ديما .اوكي !

[ام جبير]

نصيحة ماتعاونيهش مادامكم لسع مخطوبين لكن ارضاي بلي يقدر عليه و بعد الزواج انت حرة

[عشريني متمرد]

أختي من وجهة نظري

هو أن لا تقدمي له أي شيء وأنت لازالك مخطوبة وما بعد الزواج

عمري دارك على روحك

[*سندوسة*]

هدا الامر انا ضده لان من خلال تجربتي الفاشلة فزواج راجل كي تعوديه على حاجة من نهار لول تولي تجيه حاجة نورمال

"الرجال قوامون على النساء" خليه يبينلك قوامته

انا زوجي كان حافظ غي الاية لي تقول على تعدد قنعني بيها وانا في شهر العسل بصح حوايج اخرى مايعيرهاش اهتمام

انا عن تجربتي ماكنتش متطلبة وحتى مصروفي مانديهش من عنده كي يجو لعندي والديا يعطوني دراهم نتصرف

اختي ربي يقدملك لي فيه لخير وان كان خطيبك حاساته من النوع لي يستاهل ماتبخلي عليه

[ايمان4]

انت تعرفيه... كون انا ما نعاونش ف الخطبة. حتي بعد الزواج حتي الاستغلاليين كترو

[brain.up]

السلام عليكم
من الاحسن اذا كنتو تحبو بعض انك تدخلي لدارو عروسة ان شاء الله بالي كاين و مبعد ان شاء الله تتعمر داركم بالمجهود تيعكم يعني كل واحد حر وش يجيب الا كنتي خدامة لمي دراهمك و اشري وش تحبي ما تتشاركوش و مبعد تتعاركو.
انا الي حيرني انو كاين بعض الردود يشككو في النوايا انا نظن انو اصلا واحد ما يعرف واحد في هاذي الدنيا و ربي هو العليم و في الاخير "ما يقرا السفيه الا اللي فيه" انتي انوي تعاوني و ادخلي لدارك بالشيء اللي كاين و عسى ان يكتب الله بعد الشدة فرجا