بسم الله الرحمن الرحيم وبعد،
واينكم يا جماعة الماستر و4 سنوات ليسانس في النظام القديم، حقوقكم ضائعة، الحقرة كلاتكم، المسؤولين ماهمش مدايرين عليكم، وأنتم في سباتكم راقدون، وفي صمتكم عائمون، وعلى أحزانكم تبكون، وعلى حقوقكم المهدورة متأسفون، الجميع ترقى في هذا القانون الأخير ودا حقو، غير جماعة النظام الكلاسيكي، اللي قراو 4سنين ليسانس، وزادوا عامين على قلبهم ماستر، زعما تحسينا للمستوى وطلبا للعلم، وهو ما يساوي ويعادل سنوات دراسة أصحاب الماجستير، بل ويزيد عليهم هؤلاء المغبونون بالجمع بين الحسنات وليس الحسنيين فقط، بحيث درسوا كافة مقاييس النظام القديم، وزادوا عليها مقاييس نظام ل،م،د، وزيد قراو عامين في الماستر زايد مذكرة تخرج، واللي ماقراوهاش جماعة الماجستير وإنما فقط دارو مذكرة، وهكاك وما عندهمش الحق في الإدماج أو التوظيف في منصب متصرف رئيسي.
يرحم والديكم يا جماعة ولي معنيين بهذا الأمر وحتى اللي يحب يعاون على الخير ويفكر بمنطق سليم ويحب العدل باش يلقاه هو تاني في الدنيا وفي الآخرة، راني نحوس على الفوحل والرجلا والنسا اللي يوقفو معايا ومعا رواحهم باش نجيبو هذا الحق وهو شهادة معادلة للماجستير، باش ما يقولوناش راهين تبدلونا نظام التعليم في الجامعة وسميونا شهادتنا ماجستير، لا لا يا سيدي، وإنما فقط يخليوها ماستر ويعطيونا شهادة معادلة للماجستير، تحتسب لنا فيها السنة الرابعة التي درسناها وسنوات الدراسة المتساوية، والسماح في الباقي، داخل في العلم.
أرجو من الزملاء والزميلات المعنيين المساندة وحتى من الزملاء الموظفين اللي يعرفو هم الشهرية المحدودة في الإدارة، وهم اللي يلعو على حساب المحسوبية ويخليو اللي قاري ويستاهل المنصب، راهي صعيبة يا جماعة اللي مجرب راهو يعرف
كما أرجو من أصحاب القرار والمسؤولين في الوظيفة العمومية الاستجابة لهذا المطلب، والموافقة على تلبية هذا الطلب الذي لن يضر بميزانية الدولة شيئا، وسيزيح هم ويرد حقوق مجموعة من الموظفين والمواطنين الجزائريين الذين درسوا وقدموا نتاج جهدهم للإدارة الجزائرية، وينتظرون أن يتوج هذا البذل بالاعتراف بإعطائهم حقوقهم لا غير.
كونوا معنا......نكن معكم......ساندونا.......نساندكم.........قفوا معنا...........نقف معكم
وبالله التوفيق وعليه الاعتماد وبه الاستعانة