بقلاوة لبات فيلو بكل اسرار نجاحها من مطبخي

[عازفة الناي]

رمضان كريم و ربي يقبل صيامكم و قيامكم
العيد على الابواب و حبيت نشارككم بطريقتي في بقلاوة لبات فيلو روووووووعة و ناجحة باذن الله

نبداو باسرار البقلاوة
* نخلط المكونات الجافة مع بعض مليح و نغربلهم باه نمنع اي تكتلات
* بعد مانلم العجين لازم يرتاح على الاقل 4 ساعات و من الافضل تعمليه فالليل و في الغد صباحا تبداي العمل او تعملي العجين في الصباح و لعشية تخدميها كما عملت انا
* الفرينة تكون نوعية جيدة و الزبدة تاني و العسل لااااااازم النوعية الجيدة
* اضافة النشاء للعجين يعطيها قرمشة هايلة
* اضافة الخميرة تعطيها خفة
* استعمال زبدة التوريق راح تساعد انها تجي كل ورقة وحدها و رووووووعة
* الحشو نعمله و نتركه يرتاح 4 ساعات باه يذوب السكر و تجي معسلة و تهبل
* كي نحل العجين لازم الاستعانة بالنشاء
* كي نحط شرائط العجين نحطهم متخالفين بعنى اذا حطيت الطبقة الاولى بالطول التانية نحطها بالعرض و الثالثة بالطول و هكذا
* اخر طبقة ماندهنهاش حتى نقطعها باه تسهال علينا
* لازم بعد مانكمل البقلاوة نخليها تبات و غدوة نطيبوها صدقوني تجي روووووووووووووووووعة وافضل من انك تطيبيها فنفس اليوم وعن تجربة
* كي تطيب البقلاوة نعسلها وهي سخونة بعسيلة باردة و مانغطيهاش باه ما تتعجنش

العجين :
4 كيلات فرينة
4 ملاعق نشاء
4 ملاعق حليب غبرة
نص مغرفة صغيرة خميرة كيميائية
3/4 كيلة خليط زبدة توريق و زبدة
ماء زهر لطم العجين
الحشو : 2كيلات لوز وكيلة جوز مرحيين
نص كيلة سكر
رشة قرفة
فاني
ماء زهر
للتوريق : نشاء
خليط من زبدة التوريق و السمن
الطريقة :
العجين :
نخلط المكونات الجافة مليح و نزيدلها السمن و نبسس مليح و نغربله
نضيف ماء الزهر حتى نتحصل على عجين متماسك نغطيه و نتركه يرتاح كما قتلكم
الحشو : نخلط السكر مع الللوز مليييييييييييييييييييييييييييح و نزيد القرفة و الفاني و نبل بالماء زهر و نخلط بالاصابع جيدا و نغطيها و نخليها ترتاح

نقسم العجين الى 12 كورة لاني عملت 6 فوق و6 تحت
نبدى نحل فالكور وحدة بوحدة باستعمال النشاء في الالة حتى الرقم الاخير انا اخر رقم هو 9 يعني رقيقة تهبلو ونزيد نحاول نمددها بيدي غير بالشوي
شوفو كي راهي رقيقة و شفافة

نبدا نحط الطبقة الاولى في سينية مدهونة بالزبدة مليح و بين كل طبقة والاخرى ندهن بخليط السمن و زبدة الاوريق

كي نوصل للطبقة السادسة ما ندهنهاش بالزبدة باه يلصق الحشو لازم

* نحط الحشو ونوزعة دون ضغط باه يبقى مفرفر كما نقولو هههههههههههههههه وما يجيش معجن

نكمال نحل العجين الباقي و نكمل الطبقات
انا قطعتها مربعات و زينتهم باللوز و اخرين بوردات من العجين و اخرين خليتهم سادة



من بعد ندهنها بالسمن مليييح و نغطيها و نخليها تبات و غدوة نطيبها


بعد ما طابت


شوفو التوريق

نعسلها



هنا قطعتها شفتو الحشو كيف معسل و يذووووووب اممممممممممممممم






وهذي السنيوة لكل اعضاء المنتدى الغالي ربي يحفظكم كااااااااااامل



و اسمحولي الصور بزاااااااااف و كثرة الكلام
ويارب الشرح يكون كافي و وافي لان البقلاوة عليها اسئلة كثييييييييييييرة و استفسارات اكثر و حبيت نوضح كل الاسئلة بقدر المستطاع
واكيد اي اسئلة اكيد مانبخلكمش
تقبلوا تحيات عزووووووفة