[ مُلاحظات هامَّة أرجُو أخذها بعين الاعتِبار ] ،، و اللهُ وليُّ التوفيق ..

[« أبْجَدِيَّاتْ »]

( الموضوع قديم، خاصّ ببكالوريا 2012 )

***

السَّلام عليكُم و رحمةُ الله

كيفَ حاَلكُم اليَوم ؟ ، لمْ يبقَ غيرُ يَوميْنِ علىَ الباكلُوريا

علابَالي راكم شويَّة خايفين و ربَّما البعض مَا زال ما كمَّل المراجعَة ،

ديرو الثَّقة في أنفسكُم فقط ، العَام كامل و نتُوما تجبدُو ، و التَّركيز خاصَّةً و المُحافظة علىَ الهُدُوء ،

اليُوم قاعدة نراجع في العُلُوم و تفكّرت وحد الملاحظَات مَا حبِّيتش نبخل بيهَا عليكُم

1/ إذا طاح تمرينْ في التَّركيب الضَّوئي ولاّ المناعَة ولاَّ أيّ وِحدة ، و جابولكُم مُخطّط

و قالولكُم " ضعْ البيَانات " ، و مَا عرفتوش مثلاً الرَّقم 4 وشْ يمثَّل ، مَا تبقاوشْ حايرين تتأملُو في الورقة

ومَا تسيّفُوش على رواحكُم باش تلقاوْها ثَمْ بَعد ! راكم تريّحو الوقتْ ،

إذا مَا عرفتوش البيَانْ خلِّيوَهْ ، و فوتُو للرَّقم اللِّي بعدُو ، لاخاطَر الرَّقم الآتي هُو اللي يقدر يمدلك معلُومة ع اللِّي قبلُو .

و غالبًا باش تعرف البَيَانات ( خاصَّةً في التَّركيب الضَّوئي أو التَّنفُّس )

اِطرَح السُّؤال " ما مَصدر هذا العُنصُر ومَا مصيرُه ؟ "


مثلاً تلقى سهم مُوجَّه من الوَسَط الخارجي نحوَ تجويف التِّيلاكويد : أي أنَّ هذا العُنصُر يُمثِّل الماء
.
أو اذا ما عرفتش تميّز بين الــ HLA 1 أو HLA 2 المحمُولة على الخليَّة ، شُوف الخليَّة الأخرى المُتكاملة معَها

اذا كانت بالعة كبيرة فهيَ HLA 2 ، و اذا كانت خليَّة مُصابة فهي HLA 1 ( مِثَال ) .

واذا تخلطت عليك كامل ! ما كَان والو ، عاود ارسُم في ورقة المُحاولات المُخطَّط اللي تعرفُو من الدَّرس و قارن بيناتهُم

( ما تنساوشْ بلّلي عندكم 4 سَاعات : الوقت الكَافي باشْ تفكّر ، تحاول ثُمَّ تكتَب )

2/ حافظُوا علىَ ترقيم الأسئلة في ورقة الإجابة.


3/ ما تكثّروش الهدرة بزَّاف ! مثلاً التَّحليل يبدأ مُباشرةً بِـ : نُلاحِظ أنَّ ، ثُمَّ التَّفسير تكملُوه مع التَّحليل بعبَارة " مِمَّا يدُل "

و اذا حبِّيتو المصحّح يرتاح في تصحيح الورقة استعملُوا صيغة الاستلزام => ، باشْ تتفاداوْ : " لذلك، وهذا نتيجَة ، ممَّا يؤدي إلى.."

4/ ركزُوا مليح علىَ التَّركيب الضَّوئي و تجربة أنجلمَان ( تاع البكتيريَاء الشَّرِهَة للأكسِجين و طيف الامتِصَاص لليخضُور )

التَّنفُس مُستَبعَد.. ولكنْ نتُوما راجعُوه خفَّافي


5/ ركزُو في المنَاعة علىَ :

- تجربة الانتقَاء النَّسيلي علىَ الفِئران .
- شُروط نضج اللَّمفاويَّات : التَّعرف على الــ HLA و عدم التَّعرف على الببتيد الذَّاتي .
- شُروط عمل الــ LTc و كيفيَّة تأثيرِها في الخليَّة ( الجدول اللِّي قرينَاه في الكتاب ) .

و نأكَّد علىَ :
- فيرُوس الـ ـVIH ( بِنية الفيرُوس + مرَاحل تطُّور الفيرُوس داخل الخليَّة + مراحل تطُّور المَرَض + علاقة الفيرُوس بالــ T4 )
و كيفيَّة الكشف عن الاصابَة باختِبار ELIZA + Western Blot
و الحُلُول المُؤقَّتة لتثبيطِه : حقنْ مادَّة لها القُدرة علىَ التَّكامل معَ الــ CD4 حتىَّ تشغل مواقع تثبيت الفيرُوس .
و منعْ نشاط انزيم الاستِنسَاخ العَكسي .
أيضًا ، لماذا يُعتبر VIH من الفيرُوسات الرَّاجعة ؟ لأنَّ دعامته الوراثيَّة متمثِّلة في ARN .






أمَّا المواد الأخرىَ :
عُلُوم شرعيَّة :
- درس القِيم ، ممكن يمدُّولنا نصّ شرعي و يقولونّا : استخرج القيم الواردة و صنِّفها
( و التَّصنيف يشمُل أربعة مجمُوعات : قِيَم اجتماعية ، أسريَّة ، فرديَّة أو سياسيَّة ) مع بيان أهميّتها في العلاقات الانسانيَّة .
- علاقات المُسلمين بغير المُسلمين : بذِكر أسُسْ العلاقاتْ ( التَّعارف ، التَّعاون ، التَّعايُش و الرَّوابط الاجتماعيَّة ) .
- التَّبَّني : تعريفُه ، حُكمُه ، دليل تحريمِه من القرآن و السُّنة ، الحكمة من تحريمِه .


فلسَفة :
- اليقين الرِّياضي و البداهَة و الوضَوح أمُور مُستَبعَدة لاخاطر خاصَّة بالنِّظام القديم ،
المقالات المُرشَّحة : تعدُّد الأنسَاق في الرِّياضيَّات . الحتميَّة في الظَّواهر البيولُوحيَّة . مُقارنة بين الاستِقراء و الاستِنتَاج .
( الحُريَّة شكّيت يمدُّوها نصّ.. ما ظنِّيتش تطيح مقالة ، ولكن الواحد يطلّ عليها ! )

الانجليزيَّة :
- اذا حبِّيتو تربحو نُقطتين في الفِقرة ، حافظُوا على المنهجيَّة : مقدّمة ، عرض ، خاتمَة ،
و قبل أيّ فِقرة تبداوهَا خلِّيو قدرْ مُربَّعين أو ثلاث مُربَّعات . المضمُون عليه نُقطتين فقطْ

***

هذا ما لديّ اللَّحظة.. و سامحُوني علىَ الاطالة..
مُوفَّقون ان شاءالله .

[الهـ ع ـاشمي]

السلام عليكم

ربي يوفق اخواننا وأخواتنا

[جناتي الشيخ]

الله يخليك والله طلعتيلي المورال 80% مادبيك تعطيلي ملخص على المناعة ولا رقم تلفونك باش تفهميني

[Sensys]

ربي يحفظك اختي الكريمة بصح اسمحي لي نبهك لحجة

- التَّبَّني : تعريفُه ، حُكمُه ، دليل تحريمِه من القرآن و السُّنة ، الحكمة من تحريمِه .

هاذ الدرس جا العام الماضي العام هاذا ما يجيش من المستحيلات

[malak_math]

مارسي يالغالية ع الموضوع والله جا في وقتو مع الخلعة والقلب لي راح يحبس من تسرب السوجي مي لما قريت موضوعك الحمد لله شوي تنحالي الخوف ربي يخليييك يالغالية

يارب ألهمنا الاجابة عند السؤال والنجاح في الامتحان آآآآآآآآآآمين ياربي العالمين

يارب وفقنا في الامتحان وهونها علينا

امين

[malak_math]

ممكن تسرب الاسالة البا ك صح ام كذ ب

[noemi]

بارك الله فيك والله ينجنا وينجحكم .............اللهم امين

[ilyes4am3]

جازاك الله خيرا وجعله في ميزان حسنتاك ووفقنا الله واياكم في هذا الاختبار المصيري

[أم الشهداء]

السلام عليكم ورحمة الله تعالى وبركاته

ــ لقد جعلتني أراجع ما تعرضنا اليه هذه السنة في ثواني معدودة ـــ

بوركت و جزيت خيرا

بالتوفيق للجميع
والسلامــ’’ــ

[سارة.100]

شكرا جزيلا و بارك الله فيك ربي يوفقنا في بكالوريا 2012

[« أبْجَدِيَّاتْ »]

المشاركة الأصلية كتبت بواسطة kamikaz30

السلام عليكم

ربي يوفق اخواننا وأخواتنا

وعليكُم السَّلام و الرَّحمَة
آمينْ ياربّ العالمين.. شُكرًا أخي .

المشاركة الأصلية كتبت بواسطة جناتي الشيخ

الله يخليك والله طلعتيلي المورال 80% مادبيك تعطيلي ملخص على المناعة ولا رقم تلفونك باش تفهميني

ان شاءالله يبقىَ المورال ديمَا طالع
تقدر أخي تراجع المناعة من الحصيلة المعرفيَّة في الكِتاب المدرسيّ
فيهَا ملخّص وافي كافي.. أمّا فيروس الإيدز، اعتمِد على ما درستُم خلال السَّنة
و ستَجِد في الكِتاب في بطاقة ( المعلُومات المفيدَة ) ذكرًا لاختبار إليزا و "وسترن بلوت" .
و ربيّ يوفقك باذنِهْ .

المشاركة الأصلية كتبت بواسطة Sensys

ربي يحفظك اختي الكريمة بصح اسمحي لي نبهك لحجة

هاذ الدرس جا العام الماضي العام هاذا ما يجيش من المستحيلات

بالفِعل أخي ، جات الكفالة العام الماضي ، ولكنّ التّبني لم يُذكر
خلال السَّنوات السَّابقة .. و وارِد جدًّا يجي العَام هذا
شُكرا على الملاحظة .. بالتَّوفيقْ .

المشاركة الأصلية كتبت بواسطة malak_math

مارسي يالغالية ع الموضوع والله جا في وقتو مع الخلعة والقلب لي راح يحبس من تسرب السوجي مي لما قريت موضوعك الحمد لله شوي تنحالي الخوف ربي يخليييك يالغالية

المشاركة الأصلية كتبت بواسطة malak_math

يارب ألهمنا الاجابة عند السؤال والنجاح في الامتحان آآآآآآآآآآمين ياربي العالمين

يارب وفقنا في الامتحان وهونها علينا

امين

آمينْ آمينْ ، بالشوية برك أختي ملاك ، علاش تتخلعي ؟
الباك ماشي غُول ، والله امتِحان عادي كيما اللي موالفين نجتازوه خلال العَام
فقط الواحد يزيد يبذل مجهود شويّة أكبر و تركيز أكبر ، و يتوكّل على ربيّ
[ شُوفي ليّا أنا ما راجعتش الفيزيك و ما قرينَاش التّنفس في القِسم ]
ولكنْ الحمدلله.. الواحد يدير الثّقة في روحو برك
و حاولي ترقدي بكري

[« أبْجَدِيَّاتْ »]

المشاركة الأصلية كتبت بواسطة malak_math

ممكن تسرب الاسالة البا ك صح ام كذ ب

أختي ملاك، تأكدِي أنّو تسرُّب الأسئلة أمر مُستَحيل
حتىَّ لو كان عطاوك موضُوع في أيّ مادة خلال العَام و قالولك هذا هو الباك
و جَا فعلاً في الباك ! ما تصدقيش
لاخاطر المؤسَّسة اللي تجمع الأساتِذة المسؤولين عن وضع الأسئلة
محروسَة بالدرك الوطني ! ما كانش عندهم تلفونات ولا أنترنت
ولا أيّ وسيلة اتّصال ، و واحد ما يخرج خلال شهر مَاي
حتَّان بعد الباك . واذا حاولوا يخرجو كاين نِظام انذار.

و الدّروس الليّ ركّزت عليهَا في الموضُوع، راهي دراسة أختي ملاك
أي واحد يقدر يحزر وش راح يطيح في الباك بالاحتمِالات
المهمّ حنا نقراو ، نبذلو جهدنا، و اللي جات جات

[imad.01]

موفقون جميعا ان شاء الله ربنا وفقنا و يسر امرنا واجعلنا من الناجحين

[روعة الوجود]

الســــــــــــــــلام عليكم


شكرا جزيـــــــــــــلا لك اختي

ممكن سؤال أختي حول تقنية التلخيص هل اكتب مادا قام الكاتب ؟؟؟؟

[بهية الطلة]

الســــــــــــــــلام عليكم


شكرا جزيـــــــــــــلا لك اختي