خسرت خويا ..واش ندير

[مشكلتي]

السلام عليكم ...خاوتي من فضلكم انصحوني واش ندير راني عييت
باختصار انا فتاة عمري 24 سنة مخطوبة وعلئ وشك الزواج وانا الكبيرة في خاوتي عندي تحتي اخ دكر وحيد عمره 21 سنة انا وخويا هادا طول عمرنا قراب بزاف لبعضانا ...خويا ما يتفاهمش ياسر مع دارنا وانا الخيط الوحيد الي يربط بينو وبين بابا و عائلتي خاطر نفهمو ...خويا انسان كان من قبل متخلق ياسر خاتم قران و خاطيه عقلية الشباب التافه ..مند دخل الجامعة قبل عامين بدا يتعرف علئ شباب يقراو معاه شوية طايش ماشي كيما خويا المهم فات العام الاول ومبعد العام الثاني دار تخصص وهاد التخصص 90 بالمئة منو بناات وهنا المصيبة ...خويا المتربي المتخلق خاطية البنات وهاد العفايس بداو البنات يلصقو فيه وهو رخف روحو بدا يميل لهم ...بعد ماكان مزير علينا حنا خاوته ويعسنا في البرا وفي الدار ..عاد هو الي يحكي مع البنات ...بشوي بدات الهدرة في التلفون ولينا نسمعوه في غرفته يهدر للساعة3 صباحا و اكثر.. والله صدمةةة جاتنا لان دارنا محافظيييين و ملتزمين يااسر ياااسر ومكانش هادا الامور في منزلنا البتة ..امي قلبها قريب يوقف ما تصورناش يكون هاد الشئ واخي الوحيد بعد والدي ..كنا نحترمووه ياسر ..
واش نقولكم اه بس اخي كان شاب متربي ولا العكس ..وبما اني انا الي يسمع مني ياسر تقربت منو وحاولت نهدر معاه ونفكرو بلي حرام و و و ...تدابز معايا وقالي ما نعرفك ما تعرفيني...حاولت مرة اخرئ تدابز معايا وسمعني كلام جرحني و قالي مارانش خاوة روحي اخطييني وخليني نهدر كيما نحب ..هدرتو قاستني ياسر ما صدقتش !!!
وبصح قلت يمكن لاني صدمته ...ولكن ولكن بعد هاداك الموقف خويا ماولاش يكلمني
اي نعم خويا ماعادش يهدر معايا نهدر معاه عادي يحقرني ... شهر و هو يتجاهلني ..تقربت منه حاولت كلش والو ماراهوش يهدر معايا ...كيفاش انا قريب نتزوج مابقاليش غير اشهر ونروح كيفاه نروح وخويا مقاطعني ..قلبي راهو مقسوم ومانيش عارفة واش ندير ...هو اقرب واحد لقلبي في الدار اقرررب من والديا ..راااح و صار طايش نتاع بنات و سهرات بالتلفون ومصاحبة وغناء و و حوايج ما قلتهمش ...كيفاش نرجع خويا كيما كان مع العلم ماراهوش يهدر معايا رغم كل محاولاتي ...محاولات امي والو ...راني نبكي ونكتب خسرت خويا ! ساعدوني بالله

[Yeah]

الله المستعان ماذا عساني ان اقول يجب ان يتدخل الاب بكل الطرق الهدرة او السوط او العقل انا نحيير واش الفايدة من هته العلاقات ؟

ولا شوفي شكون راه يهدر معاعهم و شوفي اولياءهم يجب التدخل بصرامة لانه راخ يضيع في بنات الناس

[خالد عنابي]

ما تديري والو لستي قوامة عليه ربي يسهل عليه شوفي مستقبلك
المشكلة انتي لي راكي تديري فيها لنفسك لانه مستحيل يسمع او يقبل منكي النصيحة مالا اخطيك وخليه يعوم بحرو يغرق ولا يسلك

[لحن الحياة.]

ادعيلو............................................ ..................ربي يصلح لحوال

[ام رضوان]

السلام عليكم
اختي انت ذرك مابيدك والو عندك سلاح وحيد وهو الدعاااااء
يااختي بنات لحرام واش قاعدين يديرو راهم يعاونو في ابليس
واتاكدي اختي ماراكيش وحدك تعاني من هذا المشكل
يامامثلك الوف
وامك والله راني حاسة بيها وبماساتها
والله والله واقسم بالله نفس المشكل راني نعاني منو مع اولادي
وكي ننصح يقولولي راكي عايشة متاخرة لاه الموسيقى وكي نتكلمو مع لبنات هذا مشكل يستاهل باه تقلقي ؟ وهوما اللي كانو من الجامع مايخرجوش الله غالب
الله غالب يااختي راهو العري والبنات الخايبات والصحبة الطالحة هما اللي وصلونا لهذا الشيء
ادعي ربي يصلحو ويبعد عليه الشر امييين ووليداتنا اجمعين اميييييين

[sarl02]

مالا خوك ملاك طاهر وبنات الناس هم الي راهم يتلصقو فيه ؟؟يعني خوك هذا ديكابريو ولبنات راهم ملهوفين عليه....حتى طريقة سرد المشاكل فيها نزعة ذاتية غير مجردة ....يعني ممكن اخرى تاتي وتدعي ان اخوها او ابنها بنات الناس يلصقو فيه وتكون احدى هاته البنات اختك مثلا .....لما لا تقولين ان اخوك يعيش مرحلة مراهقة شبابية كغيره من الكثيرين وليس قاعدة شاذة وربي يهديه ...هذا ليس بالمشكل اطلاقا خوك راه ضاربو الريح ومرحلة واتفوت وادعيلو ربي يهديه .

[آسيا 25]

ربي يهديه أختي زوبعة و تفوت بإذن الله رايح يكبر و يجمل عقلو إن شاء الله المهم حاولو تنصحوه و تبعدوه على الصحبة السيئة و تدعيولو لكن عندي إعتراض على جملة (البنات يظلو لاصقين فيه) و ما أدراك أختي ربما هو اللي يظل لاصق و يجري من وراهم ربي يهدي كل شباب المسلمين يا رب

[FRANCH]

ربي يكون في العون

[♥سهام♥]

الله يهديه و يصلح احوالو

[صفيان 11]

اختي اقسم بي الله نفس حكايتي عندي 4 خيات يحبوني و يعزوني اكتر من نفسهم وازواجهم كي كنت صغير كنت كما خوك نداوس معاهم او منهدرش معاهم مدة مي غير يجوزو يمات نعاود مولي ليهم واحدي بدون ارادة و نلقا روحي نضحك معاهم كلي مكان والو دوك كي كبرت اعرفت بلي واش كانو يديرو و يعيطو اعليا درت في بالي رام يعسو فيا و يضيقو اعلي المعيشة هد كل غير كان في صلاحي و ان مكنتش نعرف دوك خوك كي يكبر يعرف قيمتكم و الله متخافيش هدي عن تجربة شخصية و شنو انصحيه بي التي هي احسن واش راو يدر حرام او ميجوز ولا كيما قلتي قاري القران قولي لي اخيك يقرا سورة النور عسى ربي ينورلو البصيرة تاعو و ربي يؤلف بين قلوبكم

[أناييس الربيع]

الحل هو الدعاء
والرفق في المعاملة ،انتي دخلتي مباشرة حرام وكذا .هو يدرك الحلال من الحرام ولكن غلبته نفسه فانغمس في المحرمات ،حاولي معهم بالرفق وقولي له مصير هذه العلاقات ،لازم الأب نتاعك يكون صارم معه في الصلاة في كل وقت يأخذه معه للمسجد
إن الصلاة تنهى عن الفحشاء والمنكر ،حاولي معه ولا تستسلمي
أو ممكن حاب يتزوج ،حاولي تفاتحيه في الموضوع .
وربي يهديك ويستر عليه

[@رنيم الأمل في الحياة@]

الرقية الشرعية هي الحل

[رميساء خولة]

استغفري له وادعي ربي ....

[aloota]

نسال الله الثبات

[الثلج الأبيض]

ربي يهديه ان شاء الله و يرجع كيف ما كان