سلام عليكم
حبيت نحكيلكم جزء من واقعي و حبيت رايكم سامحوني الحكاية طويلة شوي
اولا انا بنت عايشة مع بابا و ماما و خويا الصغير يقرا في الابتدائي و عندي زوج خواتاتي بنات متزوجات
ابي انسان تقي جدا عمرو ماسمعتو جاب سيرة واحد حاكم المصحف و صلاتو برك و مزال من ناس بكري يفرح بالضياف و يحب العايلة واللمة مهما حكيتلكم عليه متامنوش كان كاين ناس هكا يعني مثلا تصدق بزوج ديار تاعنا لمحتاجين----منهم خالي------ قال عندي طفل واحد ماعندي ماندير بيهم
الحكاية بدات نهار جاني خاطب في عمر 19 انسان مليح بابا وافق عليه درنا الرؤية الشرعية وقبل الخطبة بيومين سمعو لافامي جاو كامل يخطبو قالك خيري من ولادنا المهم ماتقبليش بالبراني انا رفضتهم و بابا ديجا مد كلمة للراجل
ايه جا نهار الخطبة بابا و خطيبي تفاهمو يديرو خطبة و عقد شرعي لانو خطيبي قال نحب نحكي معاها في لحلال و حضرنا رواحنا ع هادا الاساس يخي نهار الخطبة خوالي و عمامي مقبلوش قالو للامام ماكانش عقد شرعي خطبة برك و بابا محبش يكسر كلمة خيانو اكبر منو و صرات مشاكل كبيرة فاتت تما و مبعد بشهر جاب خطيبي الامام و عاودنا الفاتحة
خالاتي و نسا عمامي نهار الخطبة لبسو عباءات سوداء و ناضو يبكو تقول جنازة بهدلو بيا قدام الناس عادو يحاولو فيهم و روحو في نص الخطبة و حتا كلمة مبروك مقالوهاليش
ديجا كنت حابة ندير هيبة لروحي قدام دار خطيبي بالعايلة و كثرة خوالي و عمامي لكن للاسف فضحوني من اول يوم
خالي يوم الخطبة راح لوالد خطيبي يقلو احكيلي ولدك يعرفها الطفلة؟؟كيماه حتى جا خطبها
خطيبي او زوجي شرعا يسكن في ولاية خلاف و يخدم في ولايتنا كان يجي يزورنا في دارنا و يشوفني قدام والديا لاني عمري ماتلاقيتو لبرا ماخلاو ما يقولو فيا كانو يجو للدار كي يلقاوه عندنا مرة يقولو انا لقيناه راقد معاها قالو ع بابا مش راجل قالو راهي بالحمل صدقوني اي حاجة تجي في بالكم قالوها و هدا اكثر شي ضرني فلحكاية
و الاخيرة خالي اللي عطالو بابا الدار لم عمامي و قاللهم بالكدب او بابا راح ينحيهالو و يعطيها لنسيبو و عمامي قالو لبابا كون تنحيهالو نحرموك من الورثة حقروه كي معندوش لولاد و كي عاد عاقل هو قالهم كاين ربي
ماما راحت لبيت جدي رحت معاها طردنا خالي من الدار و جدتي قالتلنا تستاهلو و سبتني قاتلي يا ل؟؟؟؟؟
و بلا مانحكيلكم ع السحر عماونا لزوج المهم والله نكتب و نبكي حياتنا ولات ظلمة بعد عام من العداب بطلت انا من خطيبي غاضني بابا خاوتو عاداوه و تفاهمو ينحولو ورثو اكثر من زوج مليار و نص و قالهالو عمي خلي نسيبك ينفعك
المهم وكلت ربي
كي تطلقت منو رجعو لافامي يحبونا جاني خالي قالي علابالك هاو وجهي كون تتزوجي تبقي هاكداك
المهم فاتو 4سنوات و درك ادا سهل ربي رح نتزوج و قررت ما نسمع حتى واحد قررت نخرج من دار بابا وحدي يفرحولي غير والديا و خاوتي و هدا راي ماما تاني
وش رايكم والله قلبي مكوي سامحوني ع الاطالة