عرايش بنان ويذوبو في الفم

nousa 06 · 2013-01-06, 13:53

· السلام عليكم كيفكم يا البنات ان شاء الله تكونو بخير اليوم حبيت نتشارك معاكم طريقتي في عمل العرايش نبداو بعد بسم الله في قصعة نخلطو كاس ونص سموغ سمن ذايب وبارد وزبدة ستار وهنا السمن برك اللي ذايب الزبدة تكون بحرارة الغرفة ونزيدو عليهم نص كاس زيت وكاس عصير رامي وكاس شاي من الصغار طبعا ماء زهر المركز نمزجهم مليح وممباعد نضيفولهم الفرينة حوالي 500 غ او ازيد شوييييي برك و2 مغارف كبار حليب بودر ومغرفة صغيرة فاني وذرة ملح
ومانعجنوش نخلط حق ما تتلم برك نغطيوها مليح ونخليها ترتاح في الثلاجة ليلة كاملة لانها فيها نسبة دسم كثيرة ولازم الفرينة تشرب هاداك ليدام وتسهل عليك طريقة العمل نروحو للحشو نخلط 2 كيلات لوز مرحي مع كيلة سكر عادي وبرش 3حبات ليمون اصفر ومغرفة فاني ومغرفة كبيرة معجون و2 مغارف سمن ونلموها بماء الزهر وهنا لازم تتعجن مليح عكس العجينة لانه كل ما يتعجن كل ما يذوب السكر والحشو يشد روحو ويطاوعك في الخدمة يالا نروحو لتشكيل الحلوى تاعنا اول شيء نعطر طاولة العمل بماء الزهر نمسحها ونرش عليها نشاء ونحل كرية من العجين فوق الطاولة ونطبقها على 3 ونعاودو نحلوها ونزيدو نطبقوها على 3 وخلاص نحبسو تقريبا نفس مبدا عمل العجينة المورقة وهنا باه كي تقسمي الحبة تلقايها فويتي وممباعد نقطعها بمول دائري القطر تاعو 10 سم ونضع في الوسط كرية صغيرة من الحشو تشكليها على شكل زربوط قطر الدائرة السفلى تاعو3.5سم والارتفاع 3سم تقريباوهنا باه تجيك الحبة بومبي وتحاولي تخرجي من الحشو 3 اجنحة ان صح التعبيراو عصيات صغار وتحاولي تجملي الدائر في الوسط وتنزلي تلمي العجين على هادوك الاجنحة وتحاولي تخرجي منها الهواء تقلبي الحبة وتحكيها مليح على الطاولة وتضغطي عليها في الوسط باصابعك الوسطى والسبابة والابهام وتشكليها عريشة وتلفيها على اصابعك وتمسكيها بايدك الثانية شوية وهي ملفوفة على اصابعك باه تحكم لافورم وكي تخلصي كامل طيبيهم وقلاصيهم وبصحتكم راني كثرت عليكم بزاف وتالي نحطلكم طريقتي تاع القلاصاج بصح نوعدكم نحطولكم انشاء الله ما تملوش مني برك هههه واسمحولي مانعرفش نحط الصور سلام

natacabell · 2013-01-06, 14:41

choukran laki okhti ajbatni la recette taak besah kan mada biya kan dirtina souuar ou tarika bitafsil ala khatar ana nhab bezaf laarayach machkoura hanouna hawsi mlih fel mountada tsibi kifach nhamlou souarr baraka lahou fik okhti

أم ماجد · 2013-01-06, 14:43

الله يبارك يا السطايفية هات الصور

افنان الهضاب العليا · 2013-01-06, 17:41

حبيبتي بارك الله فيك انا ايضا من سطيف اريد و صفات اخرى

امال7 · 2013-01-06, 20:30

بارك الله فيك

ساندي 28 · 2013-01-06, 20:43

احسنتي اختي برافو

kakinova · 2013-01-06, 21:12

ما شاء الله

يا ريت لو تتحفينا بوصفات اخري و بالصور

لكن لازم يكون عندك عدد المشاركات اكثر من 33 حتى تقدري تحطي صور

feuilleblanche17 · 2013-01-06, 21:15

باينين هايلين يا ريت كانو بالصور

nina13 · 2013-01-07, 10:42

شكراااااا على الوصفة الرائعة

nardjesse2 · 2013-01-07, 11:09

بارك الله فيك

nousa 06 · 2013-01-07, 23:45

شكرا اخواتي على هاد الردود الجميلة والمشجعة وباذن الله راح نوصل ل33 مشاركة باه نقدر نحطلكم الصور وان شاء الله نقدر نفيدكم كيما انا استفدت منكم ومازلت

أم خليلو · 2013-01-08, 08:52

شكرا اختي على هده الوصفة .شحال مقدار الزبدة ستار

أم عائشة 10 · 2013-01-08, 08:59

يعطيك الصحة رانا في الإنتظار ومرحبا بك بيننا وهذه لك ولكل عضوة جديدة

nousa 06 · 2013-01-08, 10:32

السلام عليكم اختي الزبدة تكون بنفس مقدار السمن تقريبا كاس الا ربع زبدة ستار وكاس الا ربع سمن ذائب وفي زوج كاس ونص واي استفسار راني هنا باذن الله وبارك الله فيكن

الأمنيات · 2013-01-08, 11:59