اصبحت عالة

[مشكلتي]

السلام عليكم
بعد سلسلة المشكلات التي كنت قد كتبتها هنا من موضوع ان حماتي عايرتني باصل جدتي الشاوية كي عيطتلها نقولها توفاة خالة امي الى اشاعات ام زوجي الموضوع الاخر وعدة مواضيع كنت نكتبها لاني مابيدي حيلة كنت صابرة على جالة راجلي لكن اتضح لي اني بلا قيمة حيث انه من السهل يهينوني وهو يضرب النح حتى من اقاربه اهانتني في عرس وانا سكت لا علينا

الشي الوحيد اللي تمنيته هو يحس بيا فقط لا يروح يسب امه ولا يوصلها حبيته يتوله لالمي ومعاناتي وليت منحبش نروح لدار والديه لاني نتعرض لمعاملة قاسية بدون اي سبب وجيه حتى وانا بالحمل مرحمتنيش اذكر انني رحت لعرس فاملتهم وانا حامل علجال راجلي وصورته انا مش عاملة عطاني راجلي دراهم نمدهم جات تجري ليا قدام مرت خوها وتقولي انتيا مجبتي حتى كادوا دايما هكا في هاديك بكيت الدم وحاولت نتمالك نفسي باش منضرش ولدي وانا في الثامن
يعني بالمختصر اسلوبها معايا قاسي جدا في غياب ابنها فمثلا في غذا ولدي دخلت نجط صوارد في غرفتي وهي عيطتلي رايحة تروح قتها دقيقة راني جاية قاتلهم اي مردتش عليا قدام الغاشي ولخالتي تشكيلها اني معرضتهاش تبات ؟ وهو ولدها قالها كي لقيتي ركبة روحي وانا قتلها باتي يعني تمسحا فيا انا
وجديدها ولدي راهي بيبي صغير مزالوا يرضع المرة اللي فاتت رحت ليها كان عندي طريق خليتهولها كانت بنت بنتها مريضة عداتهولي لانها مصت اللهاية تاعه وهي عندها نخمة حاشاكم عمرها 3 سنين وراها مرضلي قفلت فمي وسكت قلت انا اللي كان عليا منروحش
هاد المرة جاو عندي معاهم الحفيدة خبطته على راسه بالشقشاقة وانا شفتها بعيني كي جيت نجري سقسيت حماتي وش صرا ضربته قاتلي مصرا والو علاه تضربه بنبرة تهديد وهو بالمشاية دفعته تخبط مسكين انا ملقيتش وش ندير لاني نوجد في العا قلت لراجلي عس الطفل قالي اي كسرت اللعب قتله ميهمش في قلبي المهم مديرش حاجة للطفل
وراها بقيت حاكمتها في قلبي يتفرجو فيها ساعة قريب تعوره ساعة قريب تكسرله راسه ساعة تمصله العابه وانا وحدي نجري ونتوله قتله علاش كي الطفلة تقيس الطفل يا تحكمها يا تدير ملاحظة لامها بالمختصر عادت لحكاية في ولدي هنا طلعلي السكر قالي انت مريضة ودايرة عقلك بطفلة صغيرة
قولولي يرحم والديكم طفلة عمرها 3 سنين يخليوها مع بيبي ؟ او انا اللي مهبولة نخاف بزاف قتله راني قتلك مزيدش تتكرر الطفلة متخليوهاش تبربش في البيبي سبني وناض حكمني كيما يحكموا الفار ورح يضربني
حسيت روحي رخيسة تحملت ظلم امه في جالته وكنت نبلع ونسكت وديما نوصيه عليها ونكبر بيها ونعرضها ونصبر على الظلم في اخرتها يدزني على جالة طفلة صغيرة ضربت ولدي سومتها اغلى مني ومن ولدي

فقدت اعضابي واللي في قلبي كل خرجتوا والشي اللي صرالي اكل قلتهوله مقدرتش نحمل فاض بيا الكاس هادي منسكتش فيها غدوا تعورلي ولدي والا تخبطه على راسه كشما يصرا فيه نموت بقلبي
انا استنيت منه حاجة وحدة يقولي على جالتي يا مرتي اصبري هادي امي الله غالب وراني حاس بيك لالا نحمل الاذى ونسكت ويزيد هو يهز يده عليا
وبالمناسبة انا صاحبة موضوع اصبحت عالة ايضا
حسبي الله ونعم الوكيل

[زبدة ذايبة]

المشكلة راهي فيك انتي

الناس اللي رانا عايشين معاهم كل واحد كيفاش داير

واحد حقار ، واحد خواف، واحد مكار ، واحد خداع ، واحد نمام، واحد شرير، واحد حقود، واحد منافق و.........

الصالحين ولينا قليل وين نلقاوهم.

انتي وأنا وناس ثانين مايعرفوش صفات الناس اللي يحيطوا بينا

حنايا بشر مانعرفوش وش كاين في قلوب الناس

وحتى يعيش الإنسان بسلام، لازم مايهموهش الناس الآخرين

ماتقدريش ترضي كل الأطراف، وكل البشر، بما فيها زوجك

ماتقتليش روحكح على جال الناس مهما كانوا

الوحيدين في هذ الدنيا اللي لازم تحسنيلهم هوما والديك مهما دارو فيك لازم تكوني بارة

بين رب العالمين حدود التعامل. وماكلفناش فوق طاقتنا

وهذ المشاكل اللي راكي تكتبي فيهم مايخلاصوش

لازم انتي ديري الحد لنفسك

تعرفي وقتاش تهدري وقتاش تسكتي

تعرفي وش تقولي

تعرفي تجيبي حقك

مانقولكش بالقباحة ولا بقلة الأدب، لكن كاين طرق تقدري تتبعيهم تحلي بيهم مشاكلك

واحد منا مايقدر يعاونك في هذا الشيء

وماكاش طريقة سحرية لحل المشاكل

هو التوفيق من الله عزوجل ثم معرفة مالك وما عليك

الناس أشكال وألوان مثل ماقتلك في البداية ومانقدروش نتبدلوا مع كل واحد نتعاملوا معاه

لازم انتي تكوني ثابتة ومايهمكش المتغيرات الأخرى

وماتتوقعيش من الناس يفهموك ولا يقدروا ظروفك

ماتستنايش من حتى واحد يفهمك ولا يشفق عليك بما فيهم زوجك

ماتوسعيش دائرة الوقع باش مايصرالكش الإحباط

وإذا صرالك الإحباط رايحة تدخلي في دوامة الهم والحزن

إذن ماتحوسي على حتى واحد، ومايهمك حتى واحد

تبعي الطريق اللي أمرنا بيها رب العالمين

ديري واجباتك تجاه زوجك، وتجاه الناس اللي راكي معاهم

ماتكلفيش نفسك فوق طاقتها

وما يهمك بعدها حتى واحد

ربي يوفقك ويهديك

[amira19]

ما تستنايش منو يقولك هيه يا مرتي لعزيزة امي لي غالطة و بنت اختي لي غالطة باه ما يطيحش بروحو قدامك
انت المطلوب منك حاجة برك ما تستنايش من الناس يكونو كيما راكي حابة انت لي تتغيري كون جيت ف بلاصتك ابني نحطو ف شومبرتو واحد ما يدور بيه ولا ف بلاصة ما تلحقهاش الطفلة بلا ما نكثر التبجغيط بززززاف و العجوز لاه كل يوم عندك ولا انت عندها نقصي الذهاب و الاياب و نقصي الهدرة معاها و كي شفتيها تجرحك بالكلام تجنبيها ما تعرضيها ما تروحي عندها ما تخلي بنك عندها ضرك تستراحي
بلا ما تبيني لزوجك كوني ذكية و جامي تقوليلو امك ما تنسايش راهي امه
ديري قيمة لروحك يحتارموك الناس و راجلك خليه ضرك يتكالما و يجيك وحدو

[ام رضوان]

السلام عليكم
ربي يفرج همك ويهدي سرك امين
شوفي اختي
كي قريت مشكلتك يعني الحق ومايغيضكش الحال احسبيني اختك وننصح فيك
يعني انت جاتك امر عادي حاطة راسك بطفيلة صغيرة عندها 3سنيين؟
كونكي عاقلة وماتخليش الشيطان يلعب بيك
وعجوزتك يعني في رايك ترضى لوليد ولدها لهليكة خمي مليح مع راسك
وزيد طفيلة عدات وليدك يخي مرض عادي ويداوا يخي مش بعيد الشر سل ولا ايدز ولا مرض ماعندوش الدوا
نورمال غارت منو وهو ببون صغير راهو ليبيبي كامل حوايجهم يبانو ملاح
والله ونحلفلك بالله ياو كون جا عندو خوه اكبر منو غي راهو دار نفس واش دارت رنت سلفتك الصغيرة
وثاني ننصحك على عجوزتك راهم تقريبا كامل قباح مع كناينهم وهاذي فطرة خلقها ربي فيهن
وانت كونكي فحلة واعرفي كيفاه تمشي معاها
بينيلها بلي راكي تحبيها وكي تزورك حاولي تقومي بيها واضحكي في وجهها وهلي ومرحبي بيها وماتنسايش بلي راهي ام زوجك اللي لولا هو ماراكي عندك ذاك الببون الصغير اللي مالي عليك حياتك وربي يحفظولك
ودايما حطي في بالك بلي كما تدين تدان
راهو يجي نهار ويكبر وليدك ويجيبلك كنة وتديه عليك
نرجعو لزوجك حاولي ماتضليش تكسريلو في راسو خليه راهو وليدو كيما انت وليدك
ماتخليش زوجك يكره وليدو كي يشوفك دايما تنوضي الحس والمشاكل على جالو
والطفيلة الصغيرة لهيها بحبة حلوة ولاقاطو تخطيه وقلها بلسان لطيف عندكي على خيك راهو صغير. مثلا
يااختي راه امثل يقول بات على غيض وماتباتش على ندامة
كون تنوض في زوجك ويضربك ولا يكرهك ويديك لاهلك والله ماينفعك حد وتسوفري انت ووليدك
وهو راهو على الصباح يصبح بزوجة اخرى وانت تطفر فيك
استعيني بالله وادعيه يفرج عليك وحنن قلب زوجك وعجوزتك عليك
واخزي الشيطان يروح عليك
وسامحيني اذا غاضك الحال
سلام

[أم درين]

أولا نوصيك مهما يصرا ما تخليش الشيطان يكرهك في زوجك مهما صار
كون برك تسيي تفهميه ربما راه يشوفك تخافي زيادة
وممكن راه خايف أمو تغضب عليه
المهم يا أختي اختلقيلو الاعذار وماتخليش الشيطان يفسد علاقتك بيه
بالنسبة لحماتك ختي لازمك تكوني قوية ماتبكيش قدامهم ما تحسسيهمش بضعفك وهزيمتك
طبعا طفلك حرسيه من اولادهم ولكن بما أنو الكلام ما ينفعش خيري وقتاش لازمك تهدري
وزيدي عنوان الموضوع ما راقنيش ابدااااااااا
لأنك لازم تفرضي نفسك وتكسبي احترام زوجك
ماكيش عالة إلا إذا كنت حابة
ما تخليش نفسك ضعيفة وسيي تقتليهم بالبارد بدون ما تفقدي زوجك
إذا ما اهتمش بيك هو اهتمي بيه نتي بالاك يندم ويفهم نفسو

[أم درين]

وزيدي يا أختي ما تكتريش على راجلك تباني أنت الظالمة وصدقيني أغلب الرجال يفضلو أنهم يكونو حياديين بين أمهاتهم وزوجاتهم
ما تكثريش عليه
أنا زوجي نشفا نهار طلب مني قبل الزواج شرط
هذا الشرط انو مانحكيلوش على مشاكل الدار لأنو كره منها
منبعد رجع عادي لأني ما نكترش عليه

[الاريام]

اسمحيلي اختي لكن ضحكتيني لانو انتي هي الغالطة
اولا هاذيك عجوزتك و ما هيش امك و الشيء الي ديرهولك عادي جدا لانو كل العجايز هكا و اكثر بكثير لكن ان تبكي يعني انتي شخصيتك ضعيفة مع انو قلتي انك جايبة معاك الباروك و بكيتي حتى ولو امام الغاشي في العرس هي لي تهدر يعني من قيمتها هي و من اصلها هي و من تربيتها انتي ما تتعابيش لكن كي تبكي يقولو الناس هادي ما عندهاش شخصية كلش ياثر فيها و الله يبارك عند طفل يعني ماراكيش جديدة ضرك رامي عرفتي طبايعهم
و ثانيا طفلك انتي مسوولة عليه و مدام ام الزوج ماهيش مليحة علاه تخليهولها انا كون نكره انسان ما نتحاهش و لو نموت ما نقولوش ديرلي حاجة و لا نقربلو خلاص بل انسان نكرهو حتى الشوفة ما نشوفش فيه في وجهو و اخيرا كعاد علابالك بلي ولدك الطفلة عندها ساعة و هي تضرب فيه روحي هزيه و ما تخليهش
المرة القادم جربي طيبي قبل بوقت كي يكونو عندك ضياف باه تلقاي الوقت لابنك لانه هو اهم بالنسبة ليك و امانة عندك انتي و ليس عجوزتك وهوما ما ينفعوكش كون كشما يصرالو انتي الوحيدة الي تحصلي فيه
والزوج انا لو في مكانك لكان قلب عليا الدار لانو مايحملش اي ملاحظة في وجود اهله او اي شخص
والصبر اختي انكي تحملي في قلبك لكن انتي على حساب كلامك دايما تطرحي مواضيع تخص اهل زوجك هذا ليس صبرا النسبة لي كاين اخوات تطلقن بسبب اشياء بسيطة ما تخليش روحك ذليلة وبدون شخصية في عين زوجك لانو الرجل يحب المراة الي يعتمد عليها و تكون شخصيتها قوية موش يضر اتفه شيء و دير منو حكاية عظيمة