العجينة المورقة المختمرة و الكرواصون من مطبخي

oum radja · 2015-01-25, 15:24

بسم الله الرحمن الرحيم
نظرا لطلب بعض الاخوات وخاصة حبيباتي في غرفة الدردشة حبيت ندير هاذ الموضوع
حتى وكين بالزاف اخوات دارو مواضيع مشابهة بالصح قلت ماعليش حتى انا نحط تجربتي مع الاخطاء لي كنت نوقع فيها والحمد لله عرفتها وتفاديتها
مقادير العجينة
رطل فرينة
4مغارف سكر
مغرف صغيرة فاني
مغرف صغيرة ملح
2مغارف حليب غبرة
1مغرف كبيرة خميرة نذوبها مع شوية سكر وما دافئ
مغرف صغيرة خميرة كيميائية
2 مغارف زيت
حبة بيض
ماء دافئ
وزبدة التوريق 220 غ

نخلط كل المقادير ماعدا الزبدة حتى نتحصلو على عجينة طرية بالصح ماتتلصقش باليد يعني متكونش مرخوفة وهذا من اسرار النجاح على خاطر كي نزيدو الزبدة رايحة تزيد تطريها اكثر و كي تخمر رايحة تفقد شكلها
ندلكو العجينة شوية ونغطوها و نخلوها ترتاح 15 دقيقة

في هاذ الوقت نكونو وجدنا الزبدة تاعنا
بعد مانحطوها في مكان دافئ
نعجنوها بيدينا مليح ونحلوها بالرولو على شكل مربع
طبعا نحلوها بمساعدة بلاستيك او ورق الطهي
نرجعو للعجينة تاعنا نحلوها على شكل مستطيل و نرشو الفرينة تحتها ونحطو الزبدة في وسطها بهاذ الشكل

ونغلقو عليها مليح

ودرك نحلو العجينة تاعنا حتى نتحصلو على مستطيل طويل

ونطوي هاكذا

ثم هاكذا

وبهاذ الطريقة نكونو درنا
un toure double
الان نخلو العجينة تاعنا ترتاح لمدة 15 دقيقة
ومن بعد نعاودو نحلوها مستطيل طويل و هاذ المرة الطي يكون على 3 برك يعني كيما البارمي كيما تقول فلة

هنا كملنا التوريق
ودرك لازم لازم لازم العجينة ترتاح ليلة كاملة في الثلاجة يعني لازم تخمر في غرضها
ومانديروهاش في مكان دافئ
انا الصباح جبدتها وقسمتها على روج و حليت كل قسم منها الى مستطيل طويل و نقطع مثلثات تكون القاعدة تاعهم صغيرة
يعني الطول تاع المثلث يكون 3اضعاف القاعدة على الاقل
بهاذ الشكل يعني

ونديرو فتحة صغيرة في القاعدة تاع كل مثلث
وندهنو المثلث تاعنا بشوية ماء مانكثروش غير باش تلصق العجينة كي نلفوها و ما تفقدش الشكل تاعها

ونكسلو مليح المثلث تاعنا ونلفوه حتى نتحصلو على هاذ الشكل يحيث الاطراف يكونو مرتفعين

ودرك بعد تشكيل كل الكرواصون تاعنا
نغطوه ونخلوه يخمر مرة اخرى و في مكان بارد ولا في الثلاجة لمدة لا تقل عن 3 ساعات
انا خدمتهم الصباح و خليتهم حتى للعشية مع وقت القهوة طيبتهم
كي فات وقت التخمير ولو مايبانش عليهم بلي خمرو ماعليش ماتخافوش رايحين يطلعو في الفرن
ادهنوهم بخليط
صفار بيضة
مغرف كبيرة حليب
مغرف كبيرة قهوة مركزة
وفاني

ودخلوهم للفرن على درجة حرارة متوسطة
وعسوهم راهم بالخف يطيبو

وحمروهم من فوق تاني على نار متوسطة باش تتحصلو على لون شباب
ولي عندهم المروحة في الفرن احسن
انا طيبتهم في فرن السعادة

وها هم طابو ودهنتهم بلا جولي
وخرجو اممممممممممممممممممممممممممممممممممممممممممممم
والله ماراني نبالغ
جربوهم ورايحين تعرفو

الحمد لله تم بعونه
لا تنسوني من صالح دعائكم

حسناء القمر · 2015-01-25, 15:29

يعطيك الصحه يشهي

fati 17 · 2015-01-25, 15:35

مشاء الله جاك هايل وربي يحفظك نجربو نتمنى يصلحلي كيما هاك

عازفة الناي · 2015-01-25, 15:37

امممممممم يعطيك الصحة

ام نهوله · 2015-01-25, 15:39

مشكوره يعطيك الصحه

Oum Aness Bba · 2015-01-25, 15:42

هاااايل يعطيك الصحة اختي خرجو روووعة شهيتيني

أم محمد تاج · 2015-01-25, 15:44

يااااااااااااي روووووووووعة الله يعطيك الصحة

ام ساجد · 2015-01-25, 15:45

يعطيك الصحة خرجلك هايل

ام سهام 02 · 2015-01-25, 15:52

رووووووووعة ام رجا يشهي تسلم ايدك

راهي نفس طريقتك الاختلاف غير مكونات العجينة

oum radja · 2015-01-25, 15:53

يعطيكم الصحة على الردود
نورتو موضوعي

ام هاديل وياسين · 2015-01-25, 15:58

يعطيك الصحة بالنسبة ليا رايحة نجربو بطريقتك هاذي لاني جربتو من قبل وجاتني فيه
بنة الزبدة زايدة ومحبيتش هذاك الطعم نتاعها شكرا اختي جاري التجريب ان شاء الله

lyzzabel · 2015-01-25, 16:02

ممممم رووووعة رووووووووعة كرواصون ولا في الأحلام يبانو خفااااف و فارغين يعطيييك الصحة حبيبتي ام رجا تسلم الأيادي ،، بإذن الله نجربهم بطريقتك

مياسم75 · 2015-01-25, 16:07

يعطيك الصحة متمنية نجربهم واقيلا درتيلي القلب
ليزا واقيلا قصدها 15دقيقة
يعطيك الف صحة وعافية على الصفة

النرجووسة · 2015-01-25, 16:17

امممممممممممممممممممممممم روووووووعة يعطيك الصحة

عطرالذهب · 2015-01-25, 16:25

ياسلام رووووووووعة راني ديت حبة نشرب بيها لحليب