هل أخطات في حق زوجي؟؟

[مشكلتي]

السلام عليكم ورحمة الله وبركاته
انا امرأة متزوجة وعندي طفلة، حاليا امر انا وزوجي بظروف مادية صعبة والحمد لله على كل حال اقترحت على زوجي اني نبيع ذهبي رغم اني لا املك الا اشياء بسيطة يعني ىقلت نعاونوا روحنا حتى ربي يفرجها لكنه رفض الفكرة تفهمت وقلت يمكن نكون جرحت كرامته المهم المشكل الان يكمن في اني رحت لدارنا قعدت فترة وخلالها رحت مع والدتي وبعت قلادتي تاع ذهب وشريت وحدة اخرى تاع بلاكيور واختفظت بباقي النقود قلت هكذا كل ما يعطيني زوجي مصروف بنتنا لانها لازالت رضيعة نزيد عليه شوي ونشريلها واش يخصها تعرفوا متطلبات الرضع كثيرة والله نشري غير لاساسيات المهم لما عدت للمنزل شاف زوجي لقاادة وسألني قلتلو بلي بدلت قلادتي الاولى بهذي بعني قلتلو بلي هذي القلادة تاع ذهب وهي خاطي... والله انا قصدي اني نساعدو بدون مانجرحو لكن والله خايفة يعرف ويزعف مني بالاخص اني كذبت عليه؟؟ وش رايكم تصرفي صح ؟ ونخبروا الحقيقة ولا لا لا؟

[بناتي نور العين]

السلام عليكم

أختي ذهبك بيعيه على حاجة تفيذكم مش الملابس و الاكل بيعيه على دين او عمل او مرض عافاكم الله

انا وحدة من الناس عاونت زوجي محبش فاللول ولكن قلت له ممبعد ترجع لي فالمستقبل وفعلا رجعلي بالدوبل الحمد لله

و الان ايضا تدهورت حالتنا المادية و حابة نبيع مسايس على جالو (دين) وايضا يعاود يرجع لي فالمستقبل وهادي حاجة عادية

قوليلو الذهب علاش تديره المرة ؟؟ باش نصيبوه في الضيق و كلش ينخلف برك الهنا و المفاهمة

انا ننصحك تخبريه ما تخبيش عليه في نظري انا درتي غلطة روحي و اعتذري له و قوليله انك فعلتي هاذ الشيء لأجل ابنتكم

ربي يهنيك و يفرج همك أختي .

[nihal159]

اختي انت مخطئة في تصرفك بهذه الطريقة، و باش تصلحي الغلطة نتاعك لازم تصارحي زوجك بالحقيقة، لانو اذا اكتشفها وحدو رايحة تدفعي الثمن غالي، صارحيه و اطلبي منو السماح.
لكن صراحة ياختي، الناس تبيع الذهب كي يوصل الموس للعظم يعني للشديد القوي، مش تبيعي ذهبك باش تشري لحليب و ليكوش.

[abouabed]

اللهم فرج على كل معسر والصدق منجاة

[Hanan salim]

الكذب دائماً راح يجر معو كذب تاني مافي احلى من الصدق مهما كان مرر . الله يفرج عليكم وعلى جميع المسلمين يارب

[ابو سليمان10]

لو اكتشف كذبك فسيغضب لانك خالفتيه متعمدة رغم حسن النية..و قد تقل ثقته فيك لانه من يكذب مرة يكذب مرات

[مومي23]

تصرفك تصرف انسانة بنت عائلة و زوجة يتمناها ﻻاي رجل
لكن يا اخي زوجك قالك لا ما تبعيهاش القضية ليست قضية كرامة ما للرجل هو للمراة و العكس لعل ياتي اليوم يكون فيه لهده القلادة دور في اخرجكم من مازق
المهم ماتقوليش الان الا ادا تحسنت ظروفكم المادية
عليك بقيام اليل و الدعاء و اعطيك وصفة لك ولزوجك يفتح عليكم الله
زيادة على اجتهاد زوجك قدر المستطاع في توفير متطلبات البيت اكثروا من الاستغفار
لا تدعي الاستغفار يغادر شفتيك و قلبك
وكما قلت لك عليك بقيام اليل يوميا حتى نصف ساعة قبل الفجر ربي ينزل الى السماء الدنيا كل ليلة و يقول هل من مستغفر اغفر له هل من عنده حاجة اقضيها له من يسالني فاعطيه
اليك الحديث الصحيح اختي
عن أبي هريرة أن رسول الله صلى الله عليه وسلم قال : " ينزل الرب في كل ليلة إلى السماء الدنيا حين يبقى ثلث الليل الآخر ، فيقول : من يدعوني فأستجب له ؟ من يستغفرني فأغفر له ؟ حتى يطلع الفجر "


التزمي بها وسترين العجب العجاب وتدكريني بدعوة صالحة

[زبدة ذايبة]

والله نحن النساء بالفعل معوجات.

لو كان قالك بيعي ذهبك لو كان جيتي تكتبي وتقولي :

زوجي يريدني أن ابيع ذهبي ماذا أفعل؟؟؟؟؟؟

وكي قالك ماتبيعيش رحتي بعتي !!!!!!!!!.

نديروها بيدينا ومن بعد نحصلوها في الرجال؟؟؟؟؟..

قالك ماتبيعيش ريحي.

رايحة تتفلسفي وتبيعي وتخبي عليه وتشري في لي فونتيزي.

وعلاه عليك هذ أفلام الأكشن اللي ماراكيش قادرة عليها.؟؟؟؟؟؟

كي بعتي ذهبك وش من نتيجة تحصلتي عليها!!!!!!!

ياهل ترى قدرتي تغيري الحالة اللي راكم فيها بسلسلة.

ياربي تكوني شريتي حفاظات وحاجات جد بسيطة مقبل خيانة الزوج وخداعه.

للأسف عندك ثلاث حالات:

حالتك الاولى: عصيان الزوج
الحالة الثانية: خداع الزوج
الحالة الثالثة التستر على الحالة الأولى والثانية.

ياويلك لو كان يفيقلك.

كنت قادرة تتجنبي كل هذا.

لكن وش نقولوا خلاص طفرت الآن.

إذا تقدري ترجعيها يكون خير ألف مرة من أي حل.

بيعك لذهبك راح يفتح عليك باب مارح يبقالك ولاقطعة. ورايحة تندمي عليه أشد الندم.

ديري جهدك ترجعيها وماتقوليلوش راني بعت.

رايح يفقد ثقته فيك.

مايزيدش يصدقك مهما فعلت.

الحياة الزوجية ليست علاقة عابرة. بل تمتد طول الحياة إن شاء الله.
فلا تتركي أي شيء يتسبب في الحكم عليك بأنك مخادعة أو..... لأن الرجل يصدق ماتراه عيناه ومايثبته الواقع.

ومهما رايحة تهدري معاه وتقوليلوا راني درت وفعلت على جالك مايصدقكش.

فات وغلطتي ديري جهدك تشري وحدة ثانية إذا ماقدرتيش تجيبي الأولى. وقوليلوا راني حابة نبدلها ( السلسلة المكذوبة) ونجيب أخرى.

دبري راسك كيفاش ديري.

المهم ماتقوليلوش.

راه يثيق فيك وانت غلطتي ماتكمليش عليه وتخربي حياتك الزوجية بيدك.

القناعات اللي عندو تجاهك رايحة تتبدل

رايحة تخلطيلوا الحسابات تاعو تجاهك.

رايحة تقنعيه أنه زوج غير قادر على توفير

الحاجات البسيطة لابنته.

رايحة تحسسيه بالنقص والضعف وعدم الحيلة.

كل هذه الأشياء موجودة ضمنيا في التصرف الذي قمت به.

لذا لاتزيدي الطينة بلة رجاءا

وحافظي على مشاعر زوجك وعلى رجولته.

من خلال مايظهر أنه رجل بأتم معتى الكلمة.

ماتخربيش عش الزوجية

وماتفسديش حياتك الهنيئة على جال حفاظات.

ردي بالك تهدري معاه وتقوليلوا وش درتي

صححي خطأك بتخبية كيما غلطتي بلامافاق

صححي بلامايفيق.

حفاظا على الزوج

حفاظا على نفسك وابنتك

وحفاظا على حياتك الزوجية.

رب يصلح حالك ويهديك.

[kamili1]

السلام اذاراكي في ظروف صعبة ربي اولادكم على حسب ناس تع بكري بعد العسر يسر