48ساعة ونكون مترشحين بكالوريا

[lamismissa]

السلام عليكم
اتصدقون هذا 48 ساعة وتكونون انتم بكالوريا ياهلترى انا احلم ام انا في واقع
بكري كي كنت صغيرة كي يقولي واحد انا نعقب لباك علاباكم يجيني كبير بزاااف ايه وليوم انا وليت باك
قبل مانكونوا بكالوريا كل واحد يحكينا على مسيرتو التعليمية واهم المراحل
مسيرتي
اولا قريت عامين كراش يعني تحصيري واذكر حتى معلمتي اسمها حياة صراحة هذ المعلمة كنت نحبها بزاااف بزاف ونهار الي دخلت المدرسة نقرى اولى اتدائي ماحبيتش معلمتي لجديدة كنت حابة تقريني حياة انا ماكتش علابالي لقرايا بلي فيها امتحانات ومعلومات ونقاااط...انا كنت نعتقد نهز الساكودو ونروح ونجي هذا مكان مرت السنين واصبحت سنة6 ابتدائي الحمد الله هذا لعام نشفالو ديما ندخل روطار ديما سيدي كان يوبخني يقولي ياكسولة هذا وين تنوضي هههه بصح نجحت دخلت للاكماية تماما نفوت عوام ثما مايتنساوش اما مشاكلي ديما مع الروطار ديما منجيش بكري ساعات يحاوزوني هههه مزيرية بصح دوكا عدت نحكي ونضحك 3متوسط كان عام قاسي بزاااف لما توفى استاذ الادب رحمه الله اما السنة رابعة ماحسيتش كيفاش فات ولعامين هادو تاع الثانوي ديتهم تمسخير وكلما نجيب لبيلتى ندي تبهديلة من والدي ا
علابالكم انا كنت شقية بزاااف في قرايتي مذا عنكم

[amine 1995]

و الله حكاية طويلة لكن باختصار في التحضيري ماكنتش نحب نروح نقرا و ابي و امي كانو جايبينها موراي نوض نوض و البكاء خخخخخخخ
اما في الابتدائي درست 4 سنوات في مدرسة و سنتين في مدرسة التي عديت فيها احلى سنتين و دلك بفضل المعلمة التي جعلتنا كاولادها بارك الله فيها اما في المتوسط فهنا كانت الكارتة من حيث الاساتدة الغير الرسمين و الاقسام الفوضية ههههههههه
و لكن بفضل الله تحصلت على معدل جيد في البيام اما الثانوي قصة طويلة حيت تعرفت على شيئ يدعى الدروس الخصوصية و التعب حيت اننا رحلنا....... المهم
غدا نحن مقبلين على فرصة العمر ادعو الله ان يوفقناا و يزيدنا ارااادة و عزيمة يا رب

[ai*cha]

بالنسبة لي كانت المرحلة الابتدائية هي أطول مرحلة بسبب تنقلي الكثير بين الابتدائيات و لكن الحمد لله استقريت في السنة الثالثة ابتدائي في ابتدائية واحدة و درست جيدا كانت أياما جميلة بصح كنت نكره مادة الفرونسي و كنت طول نقول لدار رانا مانقراوش العشيا فرونسي ههههههههه ومن بعد فاقتلي ماما كنت نتغيب المهم نهارها شبعت تبهديل هههههههه انتقلت الى مرحلة المتوسط و كان أفضل عام عندي هي السنة الرابعة أما الليسي كان أصعب مرحلة في حياتي و أقساها بالنسبة لي بصح انشاءء الله هاذ العام يفوت روعة و ندوا الباك بمعدلات امتياز ياااارب

[ناصف الورداني]

انا قضيت سنتين في التحضير لا اذكر كيف مضت و عند دخولي الابتدائي درست سنة و نصف في مؤسسة و تلك المؤسسة قضيت فيها ايام جميلة ومن ثم انتقلت الى الحلم مؤسسي الرائعة في منتصف السنة الثانية اذكر عندما دخلت و طلبت معلمتي العزيزة ان يحيوني قالت حيو صديقكم الجديد و في السنة الرابعة درسة عند معلم مستخلفة و حينها كانت تقام مسابقة بين اقسام السنة السادسة و اخترنا لاداء مسرحية و اغنية طبعا كنت الراوي في المسرحية و المنشد الرئيسي و كان الموضوع فلسطنيا حتى الملبس تصوروا ان المسرحية كانت من تاليفي انذاك و السنة الخامسة ايضا كنت نفس الشيء الى ان اتت السنة السادسة كنت مجتهدا لكن مشاغب فماكان على المعلمة الا تهديدي بعدم اخدي الى المسابقة فصرت مواضبا و فزنا بالمسابقة الاولية و قدغشونا ففي المسابقة الاخيرة المهم في المتوسطة كنت مشاغبا و لم اشعر كيف مضت السني يا للعجب صرنا نتحدث بالسنين المهوالاولى ثانوي قضيتها شغب و ضحك ليتدنى معدلي الى ١١ و السنة الثانية استرجعت القليل من مستواي بقليل من الجهد فتحصلت على 13 15 14 و ان شاء الله سابذل جهدا اكبر لاتفوق من جديد اعتذر على الاطالة

[yasmine hak]

انا عن نفسي دخلت للإبتدائي قبل وقتي يعني دخلت وانا في عمري 4سنين كانت المعلمة نعرفوها , كنت تقعد قاعدة في الأخير و نشوف هاكدا حتى كمل العام , العام اللي جاي كنت نحسب روحي راح نقرا في السنة الثانية بصح لقيت روحي في نفس القسم , كانو يقولولي بلي عاودتي العام , و خويا كان دايمن يقولي بلي انا راني معاودا العام , من بعد فقت باللي كانو يتمسخرو وفهمت بللي كنت غير قاعدة برك
هههه , فوت الإبتدائي و كنت ديما نجي الأولى و المتوسط تاني . اما الثانوية فالعام الأول فات مليح بصح العام التاني لا حسيت روحي نزلت في المستوى , فوتو مع البنات و نتوما تعرفو بللي إدا تلقاو البنات ماكانش قرايا,
المهم السنة ان شاء الله راح نحاول نبعد عن الضحك و اللعب ونحاول نهتم بقرايتي . انا صدقوني راني حبا نجيب الباك بمعدل مليح على جال والديا لأني انا مش ناويا ندير إختصاص علمي كالطب او الصيدلة المهم عندي نفرحهم وخلاص
يارب يارب نجحني هادا العام بمعدل مليح يارب

[tarkan musta]

سلام عليكم ، صراحة أعجبتني هذه المبادرة اذن لم لا أتحدث عن مشواري أنا أيضا ...
المهم أنا ملي نعقل على روحي نتفكر روحي فالحضانة هههههههه 3 سنين ثما ربيت أجيال ... قاع يجو و يروحو و أنا قعدت ... وحدة كانت معايا راهي تقرا فالجامعة ... يا الهي مين شفتها عرفت روحي بلي طولت تما بزاف
لمهم أخيرا لابتدائي كانت غاية بزاف ... كنت مشاغب بزاف و ندير طوايش مي منبعد استعقلت ههههه كلما نتفكر قصص الحب تاع الكلاسة نموت بالضحك كم كنا أبرياء تبا تبا .
منبعد لمتوسطة ، بدلت في متوسطة ما نعرف فيها حد ... لعام الاول كان يعيي شويا بصح تسقمت مورا داك ... tjrs l'ambiance en classe ...
السنة 4 أحلىىىى عام صراحة (so far hehehe) بالرغم من أجواء الترقب .... من ناحية الاساتذة كان الاحترام متبادل هعهعهعهعهه.
أأأه ضروك الثانوي عرفت فيها ناس فووووووووووووور بزاف و ناس يعيو ، أطفال يعني ..... الاقسام malgré تحسبو حمام مشي قسم بصح فتنا نورمال قاع بدون الحديث عن كوارث المعدلات هههههه ما يروحش مخك بعيد 15 أدنى حد ...
صراحة الثانوي أحسن مرحلة : عينينا ينحلو على بزاف صوالح تعرف الناس مالناس تتعلم و يعلموك و تولي تميز صاحبك الحيح من المنافقين و تع صوالحهم ... أه و بالنسبة ليا تاني أيام الانحراف الفكري ... دايما نضحك الروحي مي مشي بلا سبة ... كاش ما شفت و بديت نحلل فاللقطة ههههه.
كانوا يبانولي اللي يفوتوا الباك كبامين منت صغيررههه كثرة صحاب الموسطاش مي دروك راني نشوف وحدين صغار بزاف ؟ تبا من أنتم !!! لمهم الترمينال ان شاء الله يفوت فةر و نكونوا أحسن دفعة بالرغم كل ما نتفكر عندي لباك الفشلة تحكمني ... عام موفق .
على أنغام Avicii - wake me up when it's all over

[{ توبة }]

السلام عليكم و رحمة الله تعالى و بركاته
و الله يا اختي كي قريت موضوعك حسيت باحساس غريب تفكرت يامات زمان
و شكون قال بلي رح يوصل الباك بهذي السرعة
نشفى على روحي كي كنت في الابتدائي نحير في اصحاب الباك
كيفاه يحفظا هذوك الدروس كامل و كنت نشوف فيهم كباار رجالة و نسا و انا ضك مزلت نشوف في روحي صغيرة
كامل يقولونا نتوما صغار و رح تعقبوا الباك و تطلعوا للجامعة
المهم مسيرتي الدراسية كاانت رائعة لاني كنت طفلة عااقلة بزااف و نقرا مليح >> حوحو يشكر روحو ههه
انا مقريتش التحضيري دخلت طول على 6 سنوات للاولى ابتدائي
نشفى على اليوم الاول كيما رااه
قريت 3 سنوات في مدرسة و انتقلت بعدها لمدرسة قريبة كانت احلى ايام حياتي بصراحة
و بعدها عقبت السيزيام و جبت معدل 8.90 لاني مقريتلوش مليح
طلعت للمتوسطة و بصراحة 4 سنوات اروع مما يكون و بدينا نكبروا و طولنا و جملنا عقولنا فيها
خاصة الرابعة متوسط نتذكر الحفلة و المعرض و الرحلات اياام لا تنسى محفورة في الذاكرة
و عقبت البيام اللي تعبت على جالو بزاف و تحصلت على معدل 18.46
و طلعنا لليسي الحالة تبدلت و تبدلت العقلية و بدا عقلنا يكبر يوم بعد يوم
بسبب المواقف و الصدمات اللي تعرضنا ليها
المهم العام الاول شوي هبط معدلي و كنت في قسم مشاغب بزااف
اما العام الثاني استرجعت مستوايا شوي و لكن صرااو بزاف مشاكل في هذا العام
و العام الثالث و الاخير في الثانوية رح نقرا مع نفس الكلاسة تاع العام اللي فات و اللي نعزها بزاف
و ان شاء الله يكون احسن عام و ربي يوفقنا كامل ان شاء الله
يعطيك الصحة اختي على الموضوع الرائع

[فارسة المنام]

صباحكم بالخير ، فكرتوني في يام زمان ،دخلت نقرا على 6 سنين كنت عاقلة خلاص جامي درت مشاكل هههههههه على خاطر بابا عقلية هتلر و خويا كبير كيفكيف تغلط تسلك هههههههه سيزيام جبت ب 8.40 ، قريت في سيام عاقلة تاني خاطيني المشاغبة ههههه و ديت بيام تاعي ب 16.67 طلعت ليسي وبقيت ناس ملاح ههههه ، راني نشوف سنة ندورها عقلية حرب :d

[norhene*]

السلام عليكم ورحمة الله تعالى وبركاته.............
اشكرك لك صنيعك في هذا الموضوع، الذي قرأته بقلب ينبض خارج صدري....حتى اني صرت احس انني ساجري خلفه الايام المقبلة...
قرأت مشاركاتكم كلها ، وتجربتي الدراسية ليست بمختلفة، وهاهي باختصار مختصر في بضعة سطور:
دخلت الابتدائي على 5 سنوات، تحولت لمدرسة اخرى في السنة 2 ابتدائي وقضيت اروع سنوات في هذه المؤسسة، ديت ال"سيزيام" ب8.80، وانتقلت الى المتوسط، اين كانت السة الاولى و الثانية عادية، اما الثالثة متوسط فكانت اسوءها ، وعندما دخلت الرابعة متوسط، امضيت احلى ايام دراسية التي انا متأكدة انها لن تعاد، وبالتاكيد لن تنسى، ونلت ال bem بمعدل 17.52وختمت مرحلة المتوسط ب"سعادة وهناء"
الى ان جاءت المرحلة الثانوية اين كانت السنة الاولى عادية، والثانية تمنيت لو انني استخطيتها، والثالثة ها نحن في صدد الاستعداد لها....
منذ السنة الاولى ابتدائي وانا ادرس للوصول ومعرفة امتحان البكالوريا، وعندما وصلت اليه فعلا ، اكاد لا اصدق انني وصلت، وانه قد امضينا 12 سنة دراسية، فقط للوصول الى هذه المرحلة المصيرية.....
اتمنى لكم التوفيق والنجاح المتواصل، وادعو الله ان نكون عند حسن ظنون اوليائنا، تحياتي......

[lamismissa]

بعد كل هذه المسيرات الدراسية علابالي بلي راكم كامل حاسين رواحكم تحلمو لبارح دخلنا اولى ابتدائي واليوم رانا راح نعقبولباك