دورة صيفية جديدة - الصفحة 9

ام شمسو محمد · 2018-07-20, 15:42

لكل الذين تعثروا في امتحان الباكالوريا لا تفشلوا

ام شمسو محمد · 2018-07-20, 15:50

رندة. · 2018-07-20, 17:47

مساء الخير فراشات، وجمعة مباركة للجميع
ألف مبروك للناجحين في البكالوريا، مبروك نجاح خوك يا أم محمد وولد خوك يا أم هزار، وبنت سلفتك يا أروى، وولد جارتك يا جهينة وتلاميذك يا ساموفيزيك، وإلي ماجابوهش هذا العام ان شاء الله يجيبوه العام الجاي.
فكرتينا في الزمن الماضي يا أم شمسو، وثاني كانو يقولو على أسماء الناجحين في الاذاعات المحلية.

فن و أناقة · 2018-07-20, 18:20

مبروك على كامل لي جابوه والعاقبة لي مازالو..*
بنات خوالي واحدة جابتو ب 12 وواحدة لالا، وبنت عمي جابتو ب 15 وولد لوسي ب12.93
لي ماجابوهش راكو مازالكو صغار، تنجحو وتديرو وش حبيتو بإذن الله

فن و أناقة · 2018-07-20, 18:21

أم شمسو أنا ما لحقش على وقت الجرنان بصح في وقتي كنا نروحو نشوفو النتائج في الثانوية، جبتو في 2004، من تما لي بدات تظهر النتائج في الموقع الإلكتروني

فن و أناقة · 2018-07-20, 18:23

أنا اليوم درت المحاجب، ومور الفطور غسلت الفورنو بما فيه الكوشة ضربت شحال وانا معاه.. وغسلت شوية حوايج، معنديش ماشينة

arwa alaa · 2018-07-20, 22:16

اهلا فراشات ومبروك لكل الناجحين
ام شمسو يعطيك الصحة والعافية فكرتينا بأيام الزمن الجميل
كانت وحدة جارتنا تقول ياحسرة بنتي ادات الباك كي كان رابح درياسة يغني عليه اياشكون يتفكر هذاك الوقت

رندة. · 2018-07-21, 04:41

أصبحنا وأصبح الملك لله و لا اله الا الله وحده لا شريك له، له الملك وله الحمد وهو على كل شيء قدير.

صباح الخير عليكم

ام هزار · 2018-07-21, 12:53

اهلا فراشات الف مبارك على كل اللي جابو اهليهم الباك و لعقوبة للي مازالو
انا اليوم درت تنظيف عميق للبيت
الغدا كان سلطة خضار متنوعة مع فقوس و الكثير من الماااااااااء
الشكر موصول لبنتي ربي يحفظها اللي عاونتني في مسيح الغبرة و ترتيب العابها

ابني نور عيني · 2018-07-21, 19:37

مساء النوور فراشات كاش نشاط 🙄🙄🙄

ألف ألف مبروك على الناجحين كامل و ربي يزيدهم نجاحات على نجاحات و يفرحهم بمستقبل زاهر إن شاء الله
...
البارح درنا الحفلة تاع خويا ما طليتش عليكم لأنو إنشغلت بزاف ...
درت تنظيف عميق لغرفة نومي ..
هاذ الشهر القادم عندي حافل ..أعراس و سوابع و خطوبات على هذا راني نوجد بلعقل كامل واش نسحق باش نكون واجدة
حبيت برك نقوللكم على فكرة شابة ..منكم أكيد اللي يعرفها ..أنا معتمدتها وصراحة دارتلي فرق في حياتي و هي أنو تكون عندك أجندة أو حتى كراس خاص بيك تكتبي فيها كل شيء ، أهدافك و تخطيط لحياتك ، واش حابة مثلا ديري في العطلة ،كاش صنعة أو لغة حابة تتعليمها ، ماسكات و عناية بنفسك صدقيني راح تتبدل حياتك ، لكن أكيد نظموا و خططوا حسب حياتكم وواش يناسبكم و ما تضغطوش على روحكم .

تقدري تدخلي الجانب الديني و الأسري مع أطفالك و زوجك ، خططي لليلة خاصة مع زوجك ، خرجة مع عائلتك ، و خاصة راح تفيدك في التحضير المسبق للمناسبات الكبيرة كالأعياد و رمضان و الأعراس ( نكتب في الأعراس العائلية كل شي من الألف للياء قبل شهرين من الحدث باش نجهز كل شيء ههه)

و الله جربوها راح تتنظم حياتكم و تولوا أكثر فاعلية و إنتاج و ماراحش تغفلوا على أي شيء لانو ببساطة الأجندة راح تفكركم بكل شيء ...

ام هزار · 2018-07-21, 21:27

مبارك عليكم الحفلة ابني نور عيني و لعقوبة لزواجو يا رب
عجبتني بزاف فكرتك من فضلك ممكن تعطيني مثال واقعي عن تخطيطك مثلا لحفلة الباك تاع خوك و كيفاه حضرتيلها باه نديو فكرة و شكرا مسبقا

ابني نور عيني · 2018-07-21, 23:03

مساء النووور

ألف مبروك الباك لوليد خوك عزيزتي أم هزار و ربي يوفقوا في مشوار دراستو و تشوفوه ناجح و فالح .... كي اليوم نشوف ولاد خاوتي كبار و يجوزو الباك ههه أنا عندي حفيدة واحدة لحد الأن عندها ثلاث سنوات هههه نيالك يا أم هزار ...

بالنسبة لسؤالك راح نقولك كيفاش خططت للحفلة :

أولا درت حسابي يومين قبل الحفلة نروح لماما ننقيو الدار عميقا باش تكون نظيييفة و جاهزة لأستقبال الضيوف
و قلت ندير ماسك و مقشر لوجهي يوم قبل الحفلة و ماسك لشعري تاني

و جهزت الكادو تاع خويا
و خططت واش راح نلبس مع الأكسسوارات
و جهزت واش راح يلبس وليدي
و الباقي ترتيبات الحفلة

لوكان تشوفوا واش كتبت في الأجندة تاعي تحضيرا لعرس خويا تهربوا هههههه قائمة ما تخلاصش خخخخ ياربي نكون على أتم الإستعداد ماما قاتلي تقول نتي هي العروسة ههه

تصبحوا على خير

ام هزار · 2018-07-22, 10:57

يبارك فيك و يفرحك اختي العزيزة ام محمد و كي اليوم تشوفي اولاد خاوتك يجوزو الباك و ينجحو مع وليدك واولادك يااااااااااااااا رب
عجبني تخطيطك للحفلة بصح وين راه وقت اعداد الحلويات و لا ما شاركتيش ههههههههههه راني نمزح برك مع اختي :d:d

ابني نور عيني · 2018-07-22, 11:30

اهلا أم هزار شكرا أختي على الدعاء ولك بالمثل

الحلويات شريناها جاهزة ما درناهاش في البيت..

واش كاش نشاط مع بداية الأسبوع ؟؟؟
انا نظفت ثلاجتي اليوم و طيبت فطوري (طاجين الزيتون ) حسب طلب زوجي ههه
و درت رياضة لمدة نصف ساعة مع مدربتي على اليوتيوب ههه والله الرياضة تنشط الجسم و ترفع المعنويات ...
عندي ماسك لشعري ليوم راح نديرو دوك خاطر كملت أشغالي راني مع وليدي يحب يلعب البالون ههه هو يسدد و أنا ندير الحارس

ام شمسو محمد · 2018-07-22, 11:51

السلام عليكم
دخلت على الحوار الممتع بين ام هزار و ام محمد ...صارلي كي هذوك لي قاعدين في جماعة و يسمع زوج يتكلموا و هو قاعد حاط معاهم يستنى في المزيد هههههه...يعطيك الصحة ام هزار كي راكي تحفزي في ام محمد باش تتكلم ...
و فكرتك يا ام محمد تاع الاجندات و المفكرات اختك من المدمنين عليها ...كون نوريلك اجنداتي على مر السنوات تهربي ...نكتب كل شي و نقيد كلشي و ندرس تفاصيل التفاصيل و ندير حديث مع نفسي في الاجندة ....مهووسة هههههه و اذا كانت مناسبة هكذا ممكن تاخذ مني عشرات الصفحات من الفحص و التمحيص و ترتيب و اعادة ترتيب الافكار ....
شوفي بالنسبة لوحدة شاطرة كيما نتيا راح توصلي بيها للكمال حرفيا ...
نهدرلك على روحي نهار لي مانكتبش في الاجندة مانعرفش وين نصد .....عيب صح ...ولكن هذي الحقيقة اصبح مخي مرتبط بواش راني كاتبة مانقدرش نفكر في اللحظة نعجز و نحسو ضغط كبير ...لانو الكتبة تريحني بزاف و ترفع عن ظهري ثقل التفكير...نكتب على اي شي حتى اني ممكن نكتب ملاحظات على معاملة اولادي او مهام في علاقتي بزوجي او اشارات تذكيرية على والديا ..و حتى على جيراني و صحاباتي ...نقلك كي يصير اشكال في علاقة مع شخص معين نحط الورقة و القلم و ندرس الخلل و نحدد وين الخطا ...و اذا لقيت روحي انا الغالطة والله ننهي نفسي و ننهرها و نرجعها و اذا لقيت الاخر هو الغالط ندرس الحلول و كيفاش نواجه المشكل ...و الكثير من التفاصيل اللي نناقشها مع مفكرتي لي هي الوحيدة اللي تضبطني ههههه
و لكن عندي عيب صغير هو اني نعاني من صعوبة الالتزام و الخروج عن النص هههههه
اما البنود الثابتة في مفكرتي (كي نلتزم و نكتب) فهي
- تذكير اسبوعي بالاهداف في الحياة
- اعادة طرح جدول العبادات و محاولة المحاسبة و التركيز و تصحيح الاخطاء
-قائمة بالمهام المنزلية الاسبوعية ...خاطي الروتينات .
- جدول اعمال العناية الشخصية .
- جدول الوجبات و بالتالي قائمة بالمصروف .
- تذكير دائم بالمهام و الاوقات النوعية مع اسرتي .
- ضبط لواجباتي الاجتماعية .
و جلستان يوميتان في الصباح و المساء مع الاجندة للتذكير و التخطيط اليومي ...
و نتي ام محمد ؟
و انتن فراشات ماذا عنكن ؟