طريقة صنع النوقا التي تباع في الاسواق

[ريتاج تيارتية]

جيتكم اليوم بوصفة وطريقة صنع النووقا انا هدي الوصفة ديتها على سليمة يعلى انا اول مرة نخدمها جاااات تحفة بغيت نورلكم الطريقة

اول شيء نبداو بالمقادير اللي موضحة في الصورة

نحتاج

700غ سكر

100غ ماء(حوالي تقريبا 125مل)

100غليكوز(ملعقة تاع اكل معمرة مليح) نص كاس

200غ عسل

3 بياض بيض

كوكاو محمص انا درت حوالي 300غ

طريقة التحضير

اول شيء نحط السكر والماء في كسرول ونحطهم فوق النار حتى يطلق السكر مليح

نضيف الغليكوز ونخليه يغلي

حتى نلاحظ فقاعات طلعو

نضيف كمية العسل

ونخليه تغلي ونروح نطلع بياض البيض مع قرصة ملح كي الثلج

ونبدا نراقب السيرو نتاعي مرة على مرة نرفد ملعقة من السيرو نفرغها في اناء حاطة فيه شوي ماء ونرفدها ونشوف اذا كانت على شكل عجينة مثل ماهو موضح هكا لا نخليها تزيد تغلي شوي

لازم كي نرفد هديك السيرو اللي فرغناه في الما يولي كراميل اي تتكسر فهمتوني

من بعد نبدا نفرغ فوق بياض البيض مباشرة مع الخفق المستمر دون توقف ونواصل الخفق حتى تقريبا يبرد هداك الخليط

نوقف الباتور نحط هداك الكوكاو ونخلط

نجيب بلا درت فيه ورق الزبدة ورشيتو بالسكر والمايزينة شوي

نفرغ هداك الخليط ونسويه شوي ونخليه يبات حتى لغدوة من ذاك نقطعها

هنا راني فرغتها نخليها تبات

وهنا غدوا من ذاك تلقاوها يبست قطعوها

هاهي النوقا حاضرة قطعتها وغلفتها بالغلاف الشفاف

ان شاء الله تكون عجبتكم صدقووني رائعة احسن من تاع المحلات

ملاحظة : تحبي ديريها باللوز ولا بيستاش ولا اي نوع تاع مكسرات نورمال انا اول مرة جربتها بالكوكاو وتجي بنينة بزاف

ومن الاحسن الكوكاو تحمصيه مليح باش تجي بنينة

اللي سالو على الجليكوز هدا هو

هدي الكمية اللي درتها 100غ تاع جليكوز مغرف معمرة مليح


هدا عبر تاع الما نص كاس

[attia dalila]

مشكوووووووووووورة الاطفال يموتو عليها وهي بسيطة من الآن فصاعدا يكون تحضيرها بيتي لكن من ملاحظتي لكيفية التحضير فانها لا تختلف عن طريقة الجوزية

[fadila34]

يعطيك الصحة خرجتلك 444444444444 انا من عشاق هذه النوقا

[/زهرة عصفور الجنة/]

بارك الله فيك

[طالبة النجاحْ~]

روعة رتوج يعطييييييييييك الصحة حبيبة

[أم تيم الله]

ما شاء الله تبارك الرحمان خرجتلك 4444444444444444444444

جاري التجريب ان شاء الله

[ام سراج وملاك]

يعطيك الصحة اختي ريتاج وصفة رائعة

[sabrina206]

النوقة تهبلللللللللل ما شاء الله و تبارك الرحمان
في ميزان حسناتك أختي ريتاج ما أحلها من وصفة و تستهلي أحلى تقييم

[ام سامي15]

روووووووووووعة
ربي يعطيك ما تتمناي

[mektouba]

من فضلك اين يباع الكلوكوز و بارك الله فيك على الوصفة

[cuisineshowdalatifa]

شكرا رتاج , المراحل راهي واضحة مليح فقط قوللي المدة الي ضربتي فيها البيض مع السيروا شحال (بالتقرييب)
تشكريين حبيبتي على الوصفة في ميزان حسناتك

[ستينغ]

شكرا على النوقة

[دائمة الحمد]

روعة عزيزتي رتاج موضوع متكامل وخدمتك هايلة
تستاهلي احسن تقييم

[om hind]

الله يبارك

[om hind]

ربي يعطيك الصحة و يبارك لك في عمرك