aidez-moi svp

[لؤلؤة الجنان]

bonjour


je suis une nouvelle enseignante

je suis vraiment perdue avec les 3 AP

pouvez-vous m'aider ???

qui peut m'expliquer les activités

et quoi faire dans chaque une

merci d'avance

[Barcelone 4]

حسنا ... السنة الثالثة
نبدا بالشفهي قلنا مدة 45 دقيقة و تقدري ديريها في 25 دقيقة ...انا نفضل 45 ...نتي راكي تقولي التلاميذ ما يعرفو والو وعندك الصحححح ... ولكن خلاص نقوم بالغاء الشفهي ؟؟؟ انا وش نقول .. على حساب مستوى اولادك ...ممكن يكونو ملاح ؟ ممكن العكس ؟ الحل كاين وهو انك لست مضطرة ديري وش كاين فلكتاب لازم تقومي بتبسيط الحوار قدر المستطاع ...ممكن ترسمي مدرسة و تقوليلهم école ...سوف تنبهرين ان التلاميذ حفظو الكلمة عن ظهر قلب ... manil ... amina ..........انا اللي يهمني لااااااااازم يحفظ الكلمات باش في حصة التعرف على الحروف a...i..m...n يكون عاقل على الكلمة الاصلية ..... هاااو مش نتي تقريه manil.....amina...école ومن بعد تجيبيلو كلمة جديدة تخلعيه و تكتبيلو farida وتقوليلو خرجلي a ..i لالالالا و لهذا السبب انا ندير 45 ( لانو 25 دقيقة ما يشد والووووو )باش يحفظ مليح الكلمات اللي رح تكون نفسها مفتاح التعرف على الحروف الجديدة وما تنسايش قبل ما تديري الدرس نتع التعرف على حروف جديدة تقومي بعملية تذكير rappel لدرس الشفهي oral تجيبي لكتاب تفتحية في الصفحة 8 و تقولي ماذا تلاحظ .. يخبرك التلميذ école .amina...manil ومن بعد تكتبي على السبورة واش قال التلميذ
manil
ومن بعد سؤال les syllabes كم مقطع ؟ ma-nil هناك اثنان طبعا انا استعمل التصفيق باليدين في كل مقطع مفهوم ؟
ثم سؤال من منكم يقوم بتلوين الحرف a
يقوم تلميذ بتلوين الحرف a
ثم استخراج الحرف a
manil
ma-nil
a
ثم نطق الحرف a القسم كامل لازم ينطق a
ثم اعطوني امثلة
ahmed....amel....etc
ممكن تجيبو صورلكلمات جديدة عليها الحرف a وصدقوني التلميذ رح يحفظها

[Barcelone 4]

ومن بعد نقوم بكتابة الحرف a....i ......في كراس القسم على الشكل التاليcursive et majuscule

a.....................a......................a.... ............................a

a...........................a..................... ......a...................a

A..................A.......................A...... ......................A.

A.......................A....................A.... ....................A

i.........................i....................... ..i..............................i

I...........................I..................... ......I..............................I
وبهذا نكون قد انتهينا من حصة التعرف على حرفين a...i و كتابتهما على كراس القسم .....

هذا 45 دقيقة نتع اليوم ... غدا 45 دقيقة جديدة للحرفان الاخران m....n و نقوم بنفس العملية و نكتبوهم على كراس القسم

طبعا راكم تقولوا الوقت ما يكفيناش ؟...قصدي في كل 45 دقيقة .ولكن عندما يكون المعلم محظر الدرس نتاعوا وعارف وكاتب الحروف على كراس القسم مسبقا ما يكون حتى مشكل ..... 45 تكفيكم لازم تكفيكم

واذا ما كفاتكمش عادي تقدرو تزيدوا من عندكم شحال 10 دقايق مش مشكل ممكن فترة الاستراحة انا نستغلها ...او ممكن 45 دقيقة من الوت الرسمي نكمل فيه عملي عادي

[Barcelone 4]

نكملو التعرف على الحروف وكتابتها ....نروحو الان للدرس الموالي و هو الاملاء

تلميذ السنة الثالثة واش من املاء قلي هههه ؟ ولكن ما تنساش راهم قراو الحروف a...i...m...n
كيف تتم الاملاء ؟
طبعا زمن الاملاء 15 دقيقة نتا ديرها في 10 مكاش اللي يسالك باش نروحو exercices ecrits ونحلو التمارين على كراس القسم في مدة 35 دقيقة بش يكفي الوقت
نقوم باملاء الحروف a...i...m...n طبعا بالصيغتية لكل مثلما كتبوا في كراس القسم ...نقوم بتوبيخ التلميذ الذي لم يحفظ الحرف حذاري لازم توبخوووا لانك ما قمت بعملك على اتم واجب اذن ؟؟
علاش ...؟؟ نرجع بيكم للوراء قليلا معليش بش نفهموا متى يجب على المعلم يقول للتلميذ احفظ الحرف و هذا قبل حصة الاملاء هادي
شوف ... بعد انتهاء درس التعرف على الحرف و كتابتها على كراس القسم ..المعلم لازم يقول للتلميذ لازم تحفظ الحرف في المنزل و الحصة القادمة راني نسقسي ؟؟؟ لازم تحمل المسؤولية للتلميذ لانو في النهاية انت ماذا تريد ؟؟؟ تريد ان التلميذ يتذكر الحرف ..
والذاكرة تتطلب ((((((((((((((((((مسؤولية + تكرار + رؤية الحرف ))))))))))))))))
لو لم تكن مسؤولا في عملك هل تتذكر عملك كل يوم صباحا على 8 ؟؟ والله لن تتذكر ولاصبحت المدارس شاااغرة
لماذا المعلم يذهب كل يوم للمدرسة ؟؟ لانو هناك من يقول له اين كنت ؟؟ المدير و المفتش و بصفة مستمرة ....
اذن التلميذ الذي لن يساله المعلم والله لن يحفظ حرف و السؤال يلزم مستمر على الاقل على الاقل كل اسبوع
التكرار هو عبارة عن ذاكرة مثل ما نشوفوهم يحفظو القران في العربية هذا الشي لازم تفهموه للتلاميذ
الرؤية ذاكرة وهو كتابة الحروف على ملصقات الجدران في القسم
كي نكملو املاء نروحو exercices ecrits وين نلقاوها هادي ؟ افتحوا لكتاب روحو للحروف المكتوبة a...i...m..n... تلقاو تحتهم تمارين هاذوك هوما التمارين اللي راح يحلهم التلميذ احيانا انا نقولهم خرجوا اقلام الرصاص و يحلوهم فوق لكتاب ولكن غالبا ما نحلوهم في كراس القسم و يكون عليهم ملاحظات او علامات ....

[Barcelone 4]

وبهذا نكونو قد كملنا الدروس الاتية
oral .lecture
je découvre le son ....a...i
je découvre le son ...m...n
Dictée +exercices ecrits
حال من حصة ؟؟؟ اسبوع يا خاوتي ....اسبوع على الورق ....انا هاذو نكملهم في اكثر من اسبوع لانو كل معلم و طريقته
نفوتو الان للاسبوع الثاني
اول درس و هو oral production وش معناتها ؟؟ الدرس نتع الشفهي الاول نعاودوا و لكن التلميذ هو اللي راح يطلع للسبورة و يقوم باجراء الحوار مع صديقه bonjour je m'appelle manil و يرد عليه صاحبو salut je suis amina و لازم يطلع شحال من ثنائي للمنصة لمدة 15 دقيقة .........ثم نمر الى activité de lecture لمدة 30 دقيقة طبعا نختار 3 تمارين فقط المهمة ..على خاطر الوقت ما يكفيناش و الباقي يحلو في المنزل ...

ومن بعد نمر lecture du texte هنايا لازم تركزوا معايا ...طبعا النص صعب و كلمات جديدة مستحيل يقراها التلميذ ولو بعد 6 اشهر و لذلك ما الحل ؟ الحل راه في je prépare ma lecture الحصة نتاع الاسبوع الاول ياك قلنا oral+lecture (je prérare ma lecture ) ok
في هاد الحصة انت راك تحضر التلميذ للقراءة نتع النص و طبعا كل معلم و شطارته يلزم نفس الجمل او على الاقل نفس الكلمات
وبعد ذا lecture combinatoire اللي نلقاوها تحت النص مباشرة يقوم المعلمع بكتابتها على السبورة و التلميذ يقرا بلواحد ...ملاحظة بعد القراءة نترك التلميذ يقرا الجملة je lis a haute voix التي توجد اسفل lecture combinatoire علاش ؟ لانها بمثابة تقييم اة evaluation
مفهوم ؟ لانك في المذكرة نتاعك دائما تدير evaluation و هنا التقييم لازم التلميذ يقرى الجملة بنفسه لانو خلاص راه تعلمه lect.combinatoire
طبعا الوقت هنا دايرين بالنسبة للنص 25 و قراءة الحروف المتالفة 20 دقيقة و هذا مستحيل ...ونخليكم كل واحد يلقى الحل


من بعد نروحو production ec1rite هنا التلميذ يكتب الجملة je copie la phrase اللي راها فلكتاب لمدة 30 دقيقة طبعا تقدرو تقولو اكتب اسمك ..اكتب كلمة .... ومن بعد نروحو lexique illustré لمدة 15 دقيقة وهي عبارة عن كلمات مرفقة بصور في اخر الكتاب تلقاوها .. ...يقرى المعلم والتلميذ يعاود من وراه ... حتان نهاية المشروع الاول يولي التلميذ يقراها وحدو ..ولازم جميع القسم .


من بعد نمرو comptine لمدة 25 دقيقة ومن بعد evaluation20 minute


وبهذا يكون عندنا
oral production+activité de lecture
lecture texte support + lecture combinatoire
production ecrite+lexique illustré
comptine+evaluation
شكرا

[لؤلؤة الجنان]

un grand merci

ربي يجازيك و يفتحها في وجهك