خطبني زميلي في العمل

[مشكلتي]

اني مخنوقة على وجه ربي عاونوني.......انا كنت معجبة بواحد خدام معايا من عامين مدة عامين الله يبارك اخلاق و تربية و قراية لكن السنة فقدت الامل نحيتو من بالي لكن المشكل مع نحيتو من بالي حسيتو في الثلاث مرات الأخيرة من الأعمال المشتركة بيناتنا بدا يتقرب مني بفتح مواضيع شخصية نوعا ما لكن انا كنت حاطة نفسي نتخايل و نقول لا مجرد كلام و ليس اهتمام . .......لكن هذا الاسبوع سال على اهلي و تقدم لخطبتي المشكل انو اثناء الحديث معاه في المرات اللي حكينا فيهم عرفت انو كان خاطب و عاقد ايضا و كي قرب العرس تفركش كلش لكن ماتعمقناش مليح في السبب ماحبيتش نحرجو و بعدها مازادش خطب نهائيا لانو اثرت علية التجربة هذيك يعني ماجرب خطب حتى وحدة مدة ثلاث سنوات لكن انا قلتلو" بالاك ربي شايفلك فيها خير اللي ماكملتش و نورمال يزيد يجرب مع طفلة أخرى إن شاء الله ربي يوفق " باين عليا قنعتو خخخخخ و الان خطبني انا خايفة من تأثير العلاقة بالاك كان يحبها و ....و علاه ثلاث سنين بعد مارجعلهاش اذا يحبها اصلا ماعليش نوع العلاقة اللي كانت بيناتهم اجهل الامر اساسا عاونوني دون كلام جارج من فضلكم

[fella111]

صلي صلاة استخارة اختي بالتوفيق................ممكن كان مكتوبك انتي و ليس هي

[محمد جديدي التبسي]

ما توسوسيش روحك ودعك من القيل والقال معه في العمل لأن كثرة الكلام تذهب الهيبة والاحترام بينكما وأصلا مادام خطبة فقط يعتبر أجنبي عليك ما لازمش داصريه وتستسهلي الكلام معاه مع اني اشك انك راح طبقي واش قلتلك لكن هي نصيحة فقط..الرجل يستطيع الزواج بأكثر من امرأة ولا يقف وده عند فتاة واحدة لأنو يمشي بعقلو اكثر من قلبو.. ربي يتم اموركم على خير

[مراد سابقا10]

الأمر بسيط سقسي على اخلاقوا واربشوا عليه شوي اذا القيتاو كلش صافي اقبلي والنيات يعلمها الله ولا نعلمها نحن

[رندة.]

صلي صلاة الاستخارة وزيدو سقسو عليه مليح، وان شاء الله ربي يوفقكم

[الفتاة السعيدة]

صلي.صلاة.الاستخارة.وربي.يجيب.الخير.

[sohaibdz]

الاختلاط .

[زهرة جوري]

ربي يجيب الخير بالتوفيق لك

[ابو سليمان10]

المهم هو الحاضر و المستقبل...ان كان جاد و ناوي الحلال و سيرته مستقيمة فاللهم بارك
لانه لو طرحنا هذا النوع من الاسئلة لما تزوج احدنا ابدا
في هذا الزمن و مع هذا الاختلاط من غير الطبيعي الا يعجب شاب بفتاه او فتاه بشاب...يعني من المستحيل ان يتزوج الشاب او الفتاه و قلبه جديد كليا لم يدخله احد سلفا

[محارب الحمق]

سبحان الله ويقولوا علاه الاختلاط حرام وعلاه عمل المرأة في الاختلاط حرام. على كل استخيري وتزوجي هاذا مكان لا توسوسي روحك ماتزيدي فيها

[زبدة ذايبة]

انت علاه راكي تنبشي موراه.

حتى ولا عرفتي الأسباب ماراكيش رايحة تقتنعي.

الآن يا إما ترفضيه وتريحي روحك

يا إما توافقي عليه رغم الشكوك التي تنهشك.

ومن الأحسن تنحي من راسك هذا الشي.

الرجل بطبيعته متعدد

يعني عادي يتزوج منك وتكون أخرى في قلبه.

أعطاه الله عزوجل القدرة على التعدد النسوي.

ماعندك علاه تفتشي وتبحثي موراه.

مارايحة تستفادي حتى شي غير وجع القلب.

بما أنه جاك من الباب الواسع زبطريقة شرعية.

ماتبداش تخربي قبل ما تبني.

صفي نيتك

واستخيري

واهلك يسقسو عليه.

أما ماضيه فلايهمك لأنه كان معها في الحلال

هو طوى الصفحة تاعها

انت ماكالاه تجيبيها لعندك وتحيي العظام وهي رميم.

أتمنى لك التوفيق.

[سحابة باردة]

أنا ننصحك تفكري مليح ليس لسبب لذكرتيه لكن كيفاش راح تكون حياتك مع شخص معاه في العمل والبيت يوميا والله تكرهوا من بعضاكم إلا إذا
واحد منكم بدل مقر العمل نعرف بزاف اللي متوفقوش في حياتهم لانهم ربعة وعشرين ساعة وهوما مع بعض وأعين الخدامين اللي معاهم غير تبع فيهم صعيبة

['مــــــــــــرجان نينو']

يااخت كل شيء بالمكتوب ... والصح في الصدق

هو صادق وجااا خطبك معناها نااوي الخير

يحبها ما يحبهااش هئذا مجرد توسويس

ربي يسهلكم ويهنيكم لماا فيه خير

[عثمان الجزائري.]

بالإضافة إلى أمر الإختلاط و الخلوة هذه الكلمة التي تكرهها بعض النساء في هذا المنتدى و يشغبون علينا لرفض عمل الزوجة في الإختلاط...المهم صلاة الإستخارة هي الفيصل في المسألة و مسألة الحب كلام فارغ ناتج عن المسلسلات و لا يوجد على أرض الواقع المرأة بمجرد أن تتزوج يحصل لها ضبط إعادة المصنع و كذلك الرجل.

[blanche rose]

انت مليحتلك طريحة😡
عامين وانت عاشقة فيه
وباين دعيتي ربي حتى غلبتي
وكي جابهولك ربي بديتي تطلعي وتهبطي😠
الرجال دارو الف علاقة وتزوجو وتطلقو وكي خطبوا قبلوا بيهم بلا توسويس..
وانت تعشقيه و حاب يخطبك.. وانت تطلعي وتهبطي..
بانتلي الصدمة اللي دارتلك هكذا🤔
ايا..وجدي للعرس..وبركاي من التوسويس..
وهذي اللي خطبها انسايها كلياااااااااا
ربي يسعدك