مشكلة الزواج الى متى عازب

[مشكلتي]

السلام عليكم ورحمة الله وبركاته
أنا انسان بسيط عمري 29 سنة كرهت العزوبية و أخاف أن أقع في الحرام بصراحه اريد التقدم الى بنت تكون ماشي تاع خرجات خطاك البنات الموالفة على الخرجة ماتقدرش تقعد في الدار

وانا الان تائه كيف أبحث عن زوجة صالحة ولكني احيانا أتردد حتى لا أقع في موقف محرج كالرفض او الاستهزاء لانني نشوف في روحي شخص بسيط والعرس يستقاملك حتى واذا درتيه بسيط وهذا ماشي مشكل كبير مي مفهمتش كيفاه ندير
المهم ربي يرزقنا بالزوجة الصالحة المتفهمة
لم أجد هذه الفتاة لكي اظهر نيتي و اخبرها بالحقيقة مع العلم أنني تخرجت من الجامعة ولم اتحصل على عمل في مؤسسة مي داير حانوت ونسترزق بالحلال وساكن مع خويا خطاك الدار تاعنا لزوج

أريد أراءكم بجدية أرجوكم

[sudo]

الجأ إلى الله بالدعاء بالزوجة الصالحة و توكل عليه ، اكثر من الاستغفار ...

و اكثر من دعاء سيدنا موسى عليه السلام "رَبِّ إِنِّي لِمَا أَنزَلْتَ إِلَيَّ مِنْ خَيْرٍ فَقِيرٌ"


بالتوفيق اخي

[زبدة ذايبة]

ماتنقصش من قيمة روحك

مشكلتك راهي دور هنا

إذا كنت تشوف في روحك أقل مما يجب ماراحش تلقى المرأة المناسبة

كاين بيوت راهم يحوسوا على رجل صالح

وكاين اللي يقول نمدهالو ونزيدلو الدراهم من فوق

ماتضعفش روحك

وكي تروح لدار الناس أدخل دخلة راجل

ماتروحش ضعيف ومهزوز

لو كان تروح بهذا الشكل عائلة الفتاة يستخسرو فيك بنتهم

ويحسوا أنها لونجة بنت السلطان بعدما كانوا يدعو ليل ونهار يتهناو منها

تبقى هكذا يفيقولك خايف ويعودو يتشرطو عليك

كي تروح للناس ماتقيسش عليهم وتكلف نفسك من المادة الكثير

شوف مقدورك المادي وفقط وشوف وش يناسبك

كاين ناس يزوجو بناتهم بدون تكلفة كبيرة

فيهم حتى العرس يتنازلو عليه لأن زوج البنت مايقدرش

كيما راك وكيما راهي ظروفك لازم تكون ماتحملش روحك فوق طاقتها

الثقة في النفس من أهم دعائم النجاح الشخصي والوظيفي والأسري

مالازمش تهتز على جال الأمور المادية

المادة شيء عرضي مرة تكون مرة ماتكونش

إستعن بالله في إعفاف نفسك

وتوكل على الله

وسيعينك الله في ما أحله لعباده

رب يرزقك الزوجة الصالحة الشريفة العفيفة التقية النقية

[عثمان الجزائري.]

المشكل ليس فيك و لكن في إيجاد الزوجة المناسبة، لن أنصحك لأني في مثل سنك و أعزب و لي أكثر من 3 سنوات و أنا أبحث عن الزوجة المناسبة... كوراج صاحبي لازم تعرف بلي الزوجة الغير صالحة راح تعيشك في الميزيرية أقصد الزوالية بنت الفاميلا تحس بيك و تعرف كيفاش تعيش بالمدخول البسيط، أما قضية العمل عند الدولة فيا صديقي هي أكبر أكذوبة التجارة أفضل بكثير، الموظف في الجزائر أكبر معوز، الطالب الجزائري يتخرج ليكون فقيرا و يكون عائلة فقيرة و يموت فقير...

[salamandal]

لو كنت متزوجا لتمنيت لو عملت تمديد لعقد العزوبية +4 سنوات قابلة للتجديد

لذلك لا داعي للتسرع

قيس قبل ما تغيص

[محارب الحمق]

أول شيء عليك أن لا تنساه هو الاستعانة بالله والتوكل عليه والدعاء بالزوجة الصالحة بإلحاح. هذا أولا, ثانيا لا تتسرع مهماطالت مدة بحثك. ثالثا لا تحط من قدرك. كي تقصد بنات الناس أقصدهم وراسك فالسما, اذا رفضوك عادي ماهيش كارثة. ماتقبلش الإولى تقبل الثانية. انا أكبرك قليلا وأنا أبحث منذ ما يقارب العامين رفضت الكثيرات ولم أظفر بالكثيرات (سبقوني ليهم) لكني لم أستسلم ولم أتسرع وأنا صابر. كن واثقا بنفسك غير متكبر وابحث في المكان المناسب. ماتحوسش عليها قارية بزاف تكرهلك معيشتك بحكاية الخدمة (اذا راك حابها مرة تاع دار موش تاع شارع). أديها من ناس عاديين طيبيين موالفة بمعيشة الزوالي باش ماتكرهلكش حياتك بالطلبات. الثقة بالنفس مهمة في هذا الموضوع بالدات. بفضل الله وبوثوقي بنفسي هناك الكثيرون ممن عرضوا علي بناتهم وأخواتهم. لا تطح من قدرك وأعيد وأكرر أهم شيء هو التوكل على الله والدعاء فهو الموفق وعليه التكلان

[الحركش]

السلام عليكم
توكل على الله

[الباحث الجديد]

ربي يجيب الخير

[محمد جديدي التبسي]

بنت ماش تاع خرجات صعبة كثير اخي لأنو حتى غير العاملات يحبو الخرجات الا ما رحم ربك
من خلال كلامك تنقصك الثقة في النفس اخي مادام عندك حانوت راك خير من الموظفين ازدم وانت مرفوع الراس النساء هوما اللي يحشموا المفروض وزيد هوما بحاجة للزواج أكثر منك يعني انت تختار لي تعجبك وتتقدملها اما المرأة فتنتظر من يتقدم لها ..ربي يرزقك الزوجة الصالحة

[رندة.]

ربي يرزقك الزوجة الصالحة ان شاء الله

[سفير الأيام]

تمسك بربك واستقم وصلي صلاتك في اوقاتها وتدرع له في سجودك لقوله واسجد واقترب ...... ويفرج الله مشكلتك لكن تدكر اعمل صالحا دوما وبنية خالصة ليجنبك كل شر

[abdellah36]

كثير من الناس تزوجو و ندموا ....يعني القضية ماشي انك مزوج لمجرد الزواج ,,,,,,,,,,,,,,,لازم تلقى المرة لي تسعدك و تهنيك

[براءة سامية]

اولا اخي عليك ان تثق بنفسك و لاتحتقر نفسك ابدا ليس المال كل شئ انما جوهر الانسان هو قلبه و عقله...ادعوا الله و سيستجيب لك. رزقك الله ببنت الحلال

[الباحث السعيد]

رانا في نفس المشكل